Wekelo ayɛ wa Bible l’Ɛmɛnyi wa Jehowa ambokokimanyiya dia mbekesanɛ la akambo wa mɛtɛ. Aha la taamu, kɛnɛ kamboyeka kambokokimanyiya dia wɛ monga la diɔtɔnganelo dia dimɛna la Nzambi ndo kambokosha elongamelo ka lɔsɛnɔ la lo nshi yayaye ndo ɛtshɔkɔ lo paradiso ka la nkɛtɛ lo ɛlɔmbwɛlɔ ka Diolelo diaki Nzambi. Mbetawɔ kayɛ lo Ɔtɛkɛta wa Nzambi kakakeketshama ndo diɛsɛ oma lo osanganelo wa la etshumanelo k’Akristo, wɛ amboshila la nkondja ɛtshɔkɔ efula. Wɛ amboshihodia woho wakɛndakɛnda Jehowa l’ekambi ande ɛlɔ kɛnɛ.​—Zɛk. 8:23.

Oko woyoyalɔngɔsɔla kakianɛ dia batizama, wɛ ayokondja wahɔ oma lo ovuswelo wa waetawɔ w’Okristo, wayɔlɔmbɔma oma le dikumanyi dia l’etshumanelo. (Hɛb. 6:1-3) Jehowa atetemale la ntshɔkɔla welo tshɛ wadjayɛ dia mbeeya ndo akosha difuto diakalakema.​—Jni. 17:3.

1. Lande na kalangayɛ batizama?

2. Ele Jehowa?

• “Jehowa kele Nzambi ka mɛtɛ l’olongo ndo la nkɛtɛ. Ndooko okina.”​—Eoh. 4:39.

• “Wɛ, lele lokombo layɛ Jehowa, wɛmɛ kele Ɔnɛ-Laheme-Tshɛ lo nkɛtɛ k’otondo.”​—Os. 83:18.

3. Lande na kele ekɔ ohomba dia wɛ nkamba la lokombo l’oshika laki Nzambi?

• “Kanyɔlɔmbake ɔnkɔnɛ nyate: ‘Shɛso lele l’olongo, lokombo layɛ lakidiame.’”​—Mat. 6:9.

• “Onto tshɛ lelɛ lokombo la Jehowa ayoshimbamɛ.”​—Rɔmɔ 10:13.

4. Naa ditelo dimɔtshi diakamba la Bible dia mɛnya woho wele Jehowa?

• “Jehowa, Otungi wa tokoma ta nkɛtɛ ekɔ Nzambi ka pondjo pondjo.”​—Isa. 40:28.

• “Shɛso lele l’olongo.”​—Mat. 6:9.

• “Nzambi ekɔ ngandji.”​—1 Jn. 4:8.

5. Kakɔna kakokayɛ mbisha Jehowa Nzambi?

• “Langa Jehowa Nzambi kayɛ l’otema ayɛ tshɛ, la anima ayɛ tshɛ, la yimba yayɛ tshɛ ndo la wolo ayɛ tshɛ.”​—Makɔ 12:30.

• “Jehowa Nzambi kayɛ kahombayɛ ntɛmɔla ndo paka ndamɛ oto kahombayɛ kambɛ olimu w’ekila.”​—Luka 4:8.

6. Lande na kalangayɛ ntshikala la kɔlamelo otsha le Jehowa?

• “Ɔnami, oyale kanga lomba ndo ɔngɛnyangɛnya otema ami, dia dimi mbeya nkadimola ɔnɛ latɔmɔnyɔlaka.”​—Tok. 27:11.

7. Le na alɔmbayɛ, ndo lo lokombo l’onto akɔna?

• “Lo mɛtɛ kanyotɛmi [dimi Yeso] nte, ɛngɔ tshɛ kayonyɔlɔmba Papa lo lokombo lami, nde ayonyoshatɔ.”​—Jni. 16:23.

8. Naa awui amɔtshi wakokayɛ nɔmba?

• “Kanyɔlɔmbake ɔnkɔnɛ nyate: ‘Shɛso lele l’olongo, lokombo layɛ lakidiame. Diolelo diayɛ diaye. Lolango layɛ latshame la nkɛtɛ oko watshamalɔ l’olongo. Otosha mbo ya ndɛ ya lushi l’ɛlɔ. Otokimwe abasa aso oko wakimwɛso wanɛ wakolɛso. Totokonyake lo ohemba, koko ototshungole oma le kanga kɔlɔ.’”​—Mat. 6:9-13.

• “Eshikikelo kɛnɛ mbele la so le nde shoate kɛnɛ tshɛ kɔɔlɔmbaso kɔtɔnɛ la lolango lande, nde tokɛka.”​—1 Jni. 5:14.

9. Lande na kakoka monga ko Jehowa hahokamɛ alɔmbɛlɔ w’anto amɔtshi?

• “Vɔ wayolelɛ Jehowa dia nyanga ekimanyielo, koko nde hatowakadimola . . . l’ɔtɛ w’etsha awɔ wa kɔlɔ.”​—Mika 3:4.

• “Washo wa Jehowa wekɔ le anto w’ɛlɔlɔ ndo atoyi ande pokamɛka ɛsɛngɔsɛngɔ awɔ. Koko elungi ka Jehowa tonaka wanɛ wasala akambo wa kɔlɔ.”​—1 Pe. 3:12.

10. Ele Yeso Kristo?

• “Simɔna Petero akakadimola ate: ‘Wɛ ekɔ Kristo, Ɔna Nzambi kasɛna.’”​—Mat. 16:16.

11. Lande na kakaye Yeso la nkɛtɛ?

• “Ɔna onto akaye aha dia anto mbokambɛ olimu, koko dia ndjokambɛ anto akina olimu ndo nkimɔ lɔsɛnɔ lande oko oshinga w’etshungwelo dikambo di’anto efula.”​—Mat. 20:28.

• “Dimi [Yeso] pombaka mbewoya lokumu l’ɔlɔlɔ la Diolelo dia Nzambi ndo l’esomba ekina, nɛ dia l’ɔtɛ wa dikambo sɔ mbakamatomama.”​—Luka 4:43.

12. Ngande wakokayɛ mɛnya lowando layɛ lo olambo wa Yeso?

• “Nde akavwɛ anto tshɛ diaha wanɛ wasɛna ntetemala nsɛna dikambo diawɔ vɔamɛ, koko wasɛnɛ dikambo dia ɔnɛ lakavu dikambo diawɔ ndo lakolɔ.”​—2 Kɔr. 5:15.

13. Lowandji lakɔna lele la Yeso?

• “Wakambisha lowandji tshɛ l’olongo ndo la nkɛtɛ.”​—Mat. 28:18.

• “Nzambi akawodiya lo dihole dia laadiko ndo la ngandji tshɛ nde akawosha lokombo lele laadiko dia nkombo nkina tshɛ.”​—Flpɛ. 2:9.

14. Onde wɛ mbetawɔka dia Olui-walɔmbɔla w’Ɛmɛnyi wa Jehowa mbele “ɔhɔmbɔ wa kɔlamelo ndo kɛsɔ” wakasɔnama oma le Yeso?

• “Akɔna mɛtɛ ele ɔhɔmbɔ wa kɔlamelo ndo kɛsɔ wele nkumɛnde akookitsha laadiko di’anto wa lo luudu lande dia mbashaka mbo ya ndɛ yawɔ lo etena kahombama?”​—Mat. 24:45.

15. Onde nyuma k’ekila kekɔ onto?

• “Ondjelo akookadimola ate: ‘Nyuma k’ekila kayoya le yɛ ndo wolo wa Ɔnɛ-Laheme-Tshɛ wayokokomba. Diakɔ diele ɔna layotɔ ayelamɛ ɔnɛ ekila, Ɔna Nzambi.’”​—Luka 1:35.

• “Ɔnkɔnɛ naka nyu, kaanga mbenyu akanga wa kɔlɔ, mbeyaka mbisha ananyu weshasha w’ɛlɔlɔ, kete hoke Shɛnyu lele l’olongo! Shi nde ayoleka mbisha nyuma k’ekila le wanɛ wɔɔlɔmbatɔ!”​—Luka 11:13.

16. Ngande wakakambe Jehowa la nyuma kande k’ekila?

• “La ɔtɛkɛta wa Jehowa kakasalema olongo, ndo la nyuma ka l’onyɔ ande mbakasalema diangɔ tshɛ diele lɔkɔ.”​—Os. 33:6.

• “Nyu nyayolongola wolo lam’ayoya nyuma k’ekila le nyu ndo nyayoyala ɛmɛnyi ami . . . polo ndo l’ahole woleki etale wa lo nkɛtɛ.”​—Ets. 1:8.

• “Ndooko prɔfɛsiya ka l’Afundelo kaya oma lo kanyi y’onto ndamɛ. Dikambo prɔfɛsiya kombishama oma lo lolango l’onto, koko anto wakate akambo w’oma le Nzambi nɛ dia wakasokoyama oma le nyuma k’ekila.”​—2 Pe. 1:20, 21.

17. Diolelo diaki Nzambi kɛdikɛdi na?

• “Nzambi ka l’olongo ayotondja Diolelo diahalanyemaki pondjo. Diolelo diakɔ hadiotoshama le anto akina. Diɔ diayominola waolelo akɔ tshɛ ndo diayowashila oshiki, ko diɔ diɔamɛ diayotshikala pondjo.”​—Dan. 2:44.

18. Wahɔ akɔna wayoyokondja oma lo Diolelo diaki Nzambi?

• “Nde ayokitola asɔyi tshɛ oma lo washo awɔ, nyɔi hatoyala nto, otanda hatoyala nto, delo hatoyala nto, kaanga kandji hatoyala nto. Akambo wa ntondo wamboshila.”​—Ɛny. 21:4.

19. Ngande weyayɛ dia ɛtshɔkɔ w’oma lo Diolelo diaki Nzambi wayanga monga keema edja?

• “Ambeki wakaye le nde lo shɔpɔ ko wakawombola vate: ‘Ototɛ, etena kakɔna kayosalema akambo asɔ, ndo djembetelo yakɔna yayɛnya woongelo ayɛ ndo etena k’ekomelo ka dikongɛ di’akambo?’ Yeso akawatɛ ate: ‘. . . Wodja wayɔlɔsha wodja okina ndo diolelo diayɔlɔsha diolelo dikina, ndjala ya kasha l’adidimu wa nkɛtɛ wayonga lo dihole la dihole. Ndo lokumu l’ɔlɔlɔ lɔnɛ la Diolelo layosambishama lo nkɛtɛ k’otondo oko ɔmɛnyi le anto wa lo wedja tshɛ, ko oma laasɔ ekomelo kayoya.’”​—Mat. 24:3, 4, 7, 14.

• “Lo nshi y’ekomelo, tena dia paa dia wolo mbikikɛ diayoyala. Nɛ dia anto wayoyalanga, wayolanga falanga, wayonga akanga w’etako, akanga wa lotamanya, atɛnganyi, wahakitanyiya awui w’ambutshi awɔ, akanga wa lɔhɛndɛ, waha la kɔlamelo, waha la ngandji ka lam’asa ase nkumbo, wahalange mbokana, amamanyishi, waha la ndjakimɛ, akanga w’ekonda, waha la ngandji k’akambo w’ɛlɔlɔ, afungi, akanga w’ɛtɛ wolo, akanga wa ndjadiya, anangi w’ɛngɛnɔngɛnɔ lo dihole dia monga anangi wa Nzambi, wayonga la ɛnamelo k’anto wayasha l’awui wa Nzambi, koko wayanguna wolo ande.”​—2 Tim. 3:1-5.

20. Ngande wɛnyayɛ dia Diolelo diekɔ ohomba le yɛ?

• “Diakɔ diele, nyotetemale nyanga ntondo Diolelo la losembwe laki Nzambi.”​—Mat. 6:33.

• “Yeso akatɛ ambeki ande ate: ‘Naka onto nangaka ndjelami, nde ayasɛkɛ, ɛmbɛ otamba ande w’asui ndo atetemale ndjelami.’”​—Mat. 16:24.

21. Ele Satana ndo ɛdiɛngɛ?

• “Nyu ndja oma le shɛnyu Diabolo . . . Nde aki ondjakanyi oma ko lam’akandatatɛ.”​—Jni. 8:44.

• “Wakakasha dragɔ dia woke, oloyi akɔ w’edjedja welamɛ Diabolo ndo Satana, ɔnɛ langanyiya nkɛtɛ k’otondo. Wakawokasha la nkɛtɛ nde l’andjelo ande.”​—Ɛny. 12:9.

22. Tɔfwɛfwɛ takɔna takadje Satana Jehowa ndo wanɛ watɛmɔla Jehowa?

• “Womoto akakadimola oloyi ate: ‘Sho kokaka ndɛ elowa w’oma l’esongo wele lo ekambɔ. Koko Nzambi akatotɛ lo kɛnɛ kendana la elowa w’oma l’osongo wele l’atei w’ekambɔ ate: ‘Tanyɔlɛke ndo tanyonandake, nyotokovɔ.’’ Ko oloyi akatɛ womoto ate: ‘Hanyotovɔ mɛ! Nɛ dia Nzambi mbeyaka ɔnɛ lushi layonyɔlɛ elowa w’oma lɔkɔ, washo anyu wayodihɔ ko nyayoyala oko Nzambi, ndo nyayeya kɛnɛ kele ɔlɔlɔ la kɛnɛ kele kɔlɔ.’”​—Eta. 3:2-5.

• “Satana akakadimola Jehowa ate: ‘Lokoho lo lokoho. Onto ayokimɔ kɛnɛ tshɛ kele la nde dikambo dia lɔsɛnɔ lande.’”​—Jɔbɔ 2:4.

23. Ngande wakokayɛ mɛnya dia emamatanya waki Satana wekɔ kashi?

• ‘Kambɛ Nzambi olimu l’otema ɔtɔi.’​—1 Ɛk. 28:9.

• “Polo lam’ayomovɔ, dimi hantotshika olowanyi ami!”​—Jɔbɔ 27:5.

24. Lande na kavɔ anto?

• “Oko wakɔtɔ pɛkato l’andja oma le onto 1 ndo nyɔi oma lo pɛkato, ɔnkɔnɛ nyɔi kakadiangana le anto tshɛ dikambo anto tshɛ wakasale pɛkato.”​—Rɔmɔ 5:12.

25. Ngande wayalaso etena kavɔso?

• “Wasɛna mbeyaka dia vɔ wayovɔ, koko wanɛ wambovɔ haweye ndooko dikambo.”​—Ond. 9:5.

26. Elongamelo kakɔna kele la wanɛ wakavu?

• “Eolwelo k’anto w’ɛlɔlɔ ndo k’anto wa kɔlɔ kayoyala.”​—Ets. 24:15.

27. Anto angana wayotshɔ l’olongo dia tolɛ la Yeso?

• “Mɛnyi ko Ɔna Ɔkɔkɔ emadi lo Dikona dia Siɔna nde l’anto nunu lokama l’akumi anɛi la nɛi (144 000) wele la lokombo lande ndo lokombo la She lofundami lo mfumu yawɔ.”​—Ɛny. 14:1.

Lo wekelo ayɛ wa Bible, wɛ ambeya kɛnɛ kalongamɛ Jehowa oma le yɛ ndo woho wahombayɛ ndjela ɛlɛmbɛ ande wosembwe. Dia nkotsha kɛnɛ kamboyeka, mbeyaka monga ohomba dia wɛ nsala etshikitanu ɛmɔtshi lo woho wɔsayɛ lɔsɛnɔ lɔamɛmɛ ndo lo dionga diayɛ hita. Etena kɛnɛ kamboyɔsa yɛdikɔ ya nsɛna lo yoho yɔtɔnɛ l’ɛlɛmbɛ wa Jehowa wosembwe, wɛ aya okambi wa lokumu l’ɔlɔlɔ wakoka mbokambɛ olimu wetawɔnde.

Ovuswelo wa ambola wayela anɛ wayokokimanyiya dia nkakatshiya dimɛna ɛlɛmbɛ wa Jehowa wosembwe lo yimba yayɛ ndo wayokohola awui amɔtshi wakokayɛ nsala dia nkoma okambi ɔmɔtshi l’atei w’ekambi ande wetawɔnde. Ewo k’awui asɔ ayokɛnya ohomba wa salaka akambo tshɛ la nkum’otema k’ɔlɔlɔ ndo dia lotombo la Jehowa.​—2 Kɔr. 1:12; 1 Tim. 1:19; 1 Pe. 3:16, 21.

Woho wamboyokoma lo etenyi kɛnɛ lo wekelo ayɛ, mɛnyaka aha la taamu dia wɛ nomɔlomɔka monga l’ɛse k’ɛlɔmbwɛlɔ ka Jehowa ndo monga ɔmɔtshi la l’okongamelo ande. Ambola ndo avɛsa wa l’Afundelo wayokokimanyiya dia wɛ nsɛdingola eokelo kayɛ kendana la woho wakitanyiyayɛ tɛdikɔ ta Jehowa oyadi l’etshumanelo, lo nkumbo kana lo kɛnɛ kendana la awui wa pɔlitikɛ wa lo dikongɛ nɛ di’akambo. Aha la taamu, wɛ ayoleka monga la lowando lo tɛdikɔ ta Jehowa dia mbetsha ndo nkenga ekambi ande lo nyuma. L’atei wa tɛdikɔ tɔsɔ mbele ndo nsanganya ya l’etshumanelo yayoyɔngɛnangɛnaka mbɔtɔ ndo mbisha kɔmatɛrɛ lo ndjelana l’awui wele la yɛ.

Laadiko dia laasɔ, etenyi kɛnɛ kayɔsɛdingola ohomba wa ndjashaka mbala la mbala l’olimu w’esambishelo ka Diolelo, dia nkimanyiya anto akina dia vɔ mbeya Jehowa ndo kɛnɛ kasalɛnde anto. (Mat. 24:14; 28:19, 20) L’ekomelo, tɔ kayonga la shɛngiya le yɛ lo ndjakimɔ kayɛ ka l’otema ɔtɔi le Jehowa Nzambi ndo lo batisimu kayɛ. Wɛ koka monga l’eshikikelo dia Jehowa mbɔsaka la nɛmɔ ekadimwelo ayɛ wa l’otema ɔtɔi lo ɔlɔlɔ ande waheyama mbɛdika lo wahɔ ayɛ.

1. Ngande wɔsa Akristo diwala? Naa tshɔi y’ɔkɔkɔ ya l’Afundelo yakoka ndjaka diwala?

• “Onde nyatadia dia ɔnɛ lakaatonge oma l’etatelo akaatonge pami la womoto ndo akate ate: ‘Diakɔ diele, pami ayotshika she la nyango ndo ayomamatana la wadɛnde, ko vɔ 2 wayoyala demba 1’? Ɔnkɔnɛ, vɔ keema anto 2 nto, koko waya demba 1. Laasɔ, onto atokakitolake kɛnɛ kakamamatanya Nzambi. . . . Onto tshɛ ladiaka diwala la wadɛnde, naka aha l’ɔkɔkɔ w’awui wa mindo wa dieyanelo ko nde ntshuka womoto okina, nde ambosala loseka.”​—Mat. 19:4-6, 9.

2. Lande na kele wanɛ wadjasɛ kaamɛ oko wadi l’omi pombaka mbidja diwala diawɔ lo dibuku dia lɛɛta? Naka wɛ ekɔ lo diwala, onde wɛ shikikɛka dia diwala dianyu diakɔtɔ dimɛna lo dibuku dia lɛɛta?

• “Tetemala mbaohola dia vɔ ndjakitshakitsha ndo nkitanyiya awui w’emboledi ndo w’ewandji.”​—Tito 3:1.

• “Diwala diɔsamake la kɛnɛmɔ le anto tshɛ ndo mbeto ka diwala katɔtɔke mindo, nɛ dia Nzambi ayolombosha anto wasala awui wa mindo wa dieyanelo ndo akanga wa loseka.”​—Hɛb. 13:4.

3. Naa ɔkɛndɛ ayɛ lo nkumbo?

• “Ɔnami, hokamɛ ohokwelo wa shɔ, ndo tɔsɛkake wetshelo wa nyɔ.”​—Tok. 1:8.

• “Omi ekɔ owandji wa wadɛnde oko wele Kristo owandji w’etshumanelo . . . Waomi, nyotetemale nanga wadiɛnyu oko wakalange Kristo etshumanelo.”​—Ɛf. 5:23, 25.

• “Ambutshi w’apami, tanyotshake ananyu nkɛlɛ, koko nyotetemale mbaodia lo ohokwelo ndo lo alako wa Jehowa.”​—Ɛf. 6:4.

• “Nyu ana, nyokitanyiya ambutshi anyu l’oseka dikambo tshɛ nɛ dia dui sɔ mbangɛnyangɛnya Nkumadiɔndjɔ.”​—Kɔl. 3:20.

• “Nyu wadi nyoyakitshakitsha l’ɛse ka waomɛnyu.”​—1 Pe. 3:1.

4. Lande na kahombaso mbɔsa lɔsɛnɔ la nɛmɔ?

• “[Nzambi] kasha anto tshɛ lɔsɛnɔ, lomu ndo diangɔ tshɛ. . . . Oma le nde mbeso la lɔsɛnɔ, mbakɛndakɛndaso ndo mbeso lo andja ɔnɛ.”​—Ets. 17:25, 28.

5. Lande na kahatahombe ndjaka ndooko onto, oyadi ɔna lahatotɔ?

• “Naka apami walɔ ta ko ɔmɔtshi ambosakanya womoto lele la diemi ko . . . naka onto ambokala waale, kete wɛ pombaka nsɔmbɔya lɔsɛnɔ lo lɔsɛnɔ.”​—Eto. 21:22, 23.

• “Washo ayɛ wakamɛnyi kaanga lam’akimi eholoko; tenyi diatɔ tshɛ diakafundama lo dibuku diayɛ lo dikambo dia nshi yakamakengama, la ntondo ka etenyi katɔ tshɛ monga.”​—Os. 139:16.

• ‘Jehowa petshaka . . . anya wakɛdia dikila diaha la onongo.’​—Tok. 6:16, 17.

6. Naa didjango diaki Nzambi diendana la dikila?

• “Nyɔsɛkɛ . . . dikila [ndo] nyama y’esena.”​—Ets. 15:29.

7. Lande na kahombaso mboka anangɛso l’akadiyɛso w’Akristo ngandji?

• “Dimi lambonyosha ɔlɛmbɛ w’oyoyo dia nyu mbokana ngandji. Nyokane ngandji lam’asanyu oko wakamanyoke ngandji. Oma lo dikambo nɛ, anto tshɛ wayeya dia nyu nyekɔ ambeki ami, naka nyayokana ngandji lam’asanyu.”​—Jni. 13:34, 35.

8. Dia mbewɔ nsambiya anto akina hemɔ kasambanɛ kana kokoki monga waale: a) Lande na kele onto lele la tɔ hahombe ntatɛ mɛnyanya ngandji, oko lo kumbatanɛ kana mbishana bizɛ? b) Lande na kahandahombe monga la lonyangu naka anto amɔtshi hawolange mbeeta lawakawɔ? c) Lande na kahomba onto lele ondo aki lo waale wa nkondja hemɔ kɛmɔtshi kasambemɛ pombaka nyanga ndamɛ dia tasadi ɛgzamɛ wa dikila la ntondo ka nde ntatɛ nyanga omambedi? d) Lande na kahomba onto lele la hemɔ kasambemɛ mbewoya ɔnɔmbɔdi w’olui wa dikumanyi la ntondo ka nde batizama?

• “Tanyokolamake dibasa le onto onyake dibasa dia mbokana ngandji. . . . ‘Langa wonyayɛ onto oko wayalangayɛ.’ Ngandji hasalɛ osekande akambo wa kɔlɔ.”​—Rɔmɔ 13:8-10.

• “Tanyendake paka wahɔ anyu hita eto, koko nyendake ndo wahɔ w’anto akina.”​—Flpɛ. 2:4.

9. Lande na kalongamɛ Jehowa dia sho dimanyiya anto akina?

• “Nyotetemale mbikikanɛ kɔlɔ ndo nyodimanyiyanake l’otema ɔtɔi lam’asanyu, oyadi kaanga onto ekɔ la dikambo dia nyangɛ osekande, oko wakanyodimanyiya Jehowa l’otema ɔtɔi, nyu lawɔ pombaka nsala woho akɔ waamɛ.”​—Kɔl. 3:13.

10. Ahombayɛ nsala naka ɔnanyɔ ambokokesa kana ambokomamatanyiyɛ?

• “Naka ɔnanyɔ ambokosalɛ pɛkato, tshɔka towɛnya munga kande wɛ la nde ato. Naka nde ambokokɛ, kete wɛ ambokimanyiya ɔnanyɔ dia nsala kɛnɛ kele ɔlɔlɔ. Ko naka nde hakooke, ko wɛ ntshɔ la onto okina 1 kana anto 2, kele lo etelo k’ɛmɛnyi 2 kana 3 oseka dikambo tshɛ kadioshikikɛme. Naka nde hawaoke, ko wɛ mbewoya etshumanelo. Naka nde hoke ndo etshumanelo, nde ayale le yɛ oko ose wodja kana oko ofutshanyi w’elambo.”​—Mat. 18:15-17.

11. Ngande wɔsa Jehowa pɛkato yayela nyɛ?

▪ Awui wa mindo wa dieyanelo

▪ Okambelo wa la mpingu l’ɔtɛmwɛlɔ

▪ Dieyanelo dia lam’asa pami la pami kana womoto la womoto

▪ Wovi

▪ Tɔkɛnyɔ ta falanga

▪ Wodjwelo wa wanu

• “Tanyokesamake. Oyadi wanɛ wasala awui wa mindo wa dieyanelo, atɛmɔdi wa dikishi, akanga wa loseka, apami wayakimɔ lo totshelo ta dieyanelo la apami, apami wasala dieyanelo la asekawɔ apami, wevi, akanga wa lokaki, ambidjɔki wa wanu, atɛnganyi ndo apɔtwanyi, vɔ tshɛ hawotokita Diolelo dia Nzambi.”​—1 Kɔr. 6:9, 10.

12. Lo kɛnɛ kendana la awui wa mindo wa dieyanelo, mbidja ndo toho efula ta totshelo ta dieyanelo l’andja wa diwala, kakɔna kamboyoyashikikɛ dia nsala?

• “Nyolawɔ awui wa mindo wa dieyanelo!”​—1 Kɔr. 6:18.

13. Lande na kahombaso ntona ekanga wadjoya, aha la dikimɔ dia enganga kana weho ekina wa didjoyadjoya oko mfɔka kana kaandji?

• “[Nyolambole] alemba anyu oko olambo wasɛna, w’ekila ndo wetawɔma le Nzambi, olimu w’ekila kaamɛ la akoka anyu w’ekanelo ka yimba. Ndo nyotshike tshikitanyema oma le dikongɛ di’akambo nɛ, koko nyohilwame lo nɔngɔsɔla timba tanyu dia nyuamɛ mbeya dimɛna lolango la Nzambi l’ɔlɔlɔ, letawɔma ndo la kokele.”​—Rɔmɔ 12:1, 2.

14. Naa ditshelo di’ɛdiɛngɛ diatona Nzambi?

• ‘Atotanemake l’atei anyu onto lasala diendja, onto lasala awui wa maji, kanga alɔhɔ, kanga dɔka, onto lakeleka lɔsɛnɔ l’anto akina la sengi, onto latɛkɛtsha dimu, wetshi, kana onto latɛkɛta la wanɛ wakavu.’​—Eoh. 18:10, 11.

15. Naka onto ambosala pɛkato ka woke koko nde nangaka mbetawɔma nto le Jehowa, ahombande nsala aha la ntshimbatshimba?

• “Dimi lakashola pɛkato kami le yɛ; dimi kokomba munga kami. Dimi lakate nte: ‘Dimi layoshola kɔlɔ yami le Jehowa.’”​—Os. 32:5.

• “Onde onto ɔmɔtshi ekɔ la hemɔ l’atei anyu? Nde ete dikumanyi dia l’etshumanelo kele vɔ wɔɔlɔmbɛ, wookite esɔ lo lokombo la Jehowa. Ko dɔmbɛlɔ dia mbetawɔ diayɔkɔnɔya ɔnɛ lele la hemɔ ndo Jehowa ayowokimanyiya. Ndo nto, naka nde akasale pɛkato, nde ayodimanyiyama.”​—Jak. 5:14, 15.

16. Naka wɛ ambeya dia osekayɛ Okristo ambosala pɛkato ka woke, kakɔna kahombayɛ nsala?

• “Naka onto ɔmɔtshi ambosala pɛkato l’ɔtɛ wakandoke ombeka wewɔ la ohomba w’ɔmɛnyi, ko nde ekɔ ɔmɛnyi, akɛnyi kana akoke dikambo diakɔ koko nde haditshi, nde ayolongola dilanya l’ɔtɛ wa munga kande.”​—Lɛw. 5:1.

17. Naka diewoyelo diamboshama ɔnɛ onto ɔmɔtshi aya bu Ɔmɛnyi wa Jehowa, ngande wahombaso mbosalɛ akambo?

• “[Nyotshike] mbekesanɛ la onto tshɛ lelamɛ ɔnangɛso lasala awui wa mindo wa dieyanelo kana kanga lokaki kana ɔtɛmɔdi wa dikishi kana ɔtɛnganyi kana ombidjɔki wa wanu kana ɔpɔtwanyi, ndo diaha nyu ndɛ kaanga ndɛ la onto ɔsɔ.”​—1 Kɔr. 5:11.

• “Naka onto ɔmɔtshi amboya le nyu ko nde haye la wetshelo ɔnɛ, tanyoolongolake lo mvudu yanyu ndo tanyowoshake mɔyɔ.”​—2 Jn. 10.

18. Lande na kahombaso monga la lɔngɛnyi la ma ma la wanɛ woka Jehowa ngandji?

• “Ɔnɛ latɛngɔlaka kaamɛ la akanga wa lomba ayonga kanga lomba, koko ɔnɛ lekesanɛ la akanga wa dinginya ayokomɛ lo kɔlɔ.”​—Tok. 13:20.

• “Tanyokesamake. Lɔngɛnyi la kɔlɔ ndanyaka mbekelo y’ɛlɔlɔ.”​—1 Kɔr. 15:33.

19. Lande na kele Ɛmɛnyi wa Jehowa la lomangemange l’awui wa pɔlitikɛ?

• “Vɔ keema ase andja ɔnɛ oko wemi [dimi Yeso] keema ose andja ɔnɛ.”​—Jni. 17:16.

20. Landena kahombayɛ nkitanyiya emboledi?

• “Onto tshɛ ayakitshakitsha l’ɛse ka ewandji wa laadiko, nɛ dia ndooko lowandji lahaye oma le Nzambi ndo Nzambi ketawɔ dia ewandji kitshama lo ahole wewɔ.”​—Rɔmɔ 13:1.

21. Naka ɛlɛmbɛ w’ana w’anto wɔlɔshana la ɛlɛmbɛ wa Nzambi, kakɔna kahombayɛ nsala?

• “Sho pombaka nkitanyiya Nzambi oko wende owandji lo dihole dia nkitanyiya anto.”​—Ets. 5:29.

22. Naa avɛsa wakoka kokimanyiya dia wɛ ndjanganya l’andja ɔnɛ etena kasɔnayɛ olimu ɔmɔtshi?

• “Wodja ɔmɔtshi hawotɛmbɛ wodja okina lokuwa la ta, ndo vɔ hawoteka ta nto.”​—Mika 4:3.

• “Anto ami, nyotombe oma l’atei atɔ [Babilɔna ka Woke] naka hanyolange ndjotambɛ lo pɛkato yatɔ diaha nyu ndjolongola asui atɔ.”​—Ɛny. 18:4.

23. Naa toho ta tɔkɛnyɔ ndo ta nkɔkɔla demba tayoyɔsɔna ndo naa tɔnɛ tayoyotona?

• “Jehowa . . . petshaka onto tshɛ lalanga awui wa ngala.”​—Os. 11:5.

• “Nyohetsha kɛnɛ kele kɔlɔ ndo nyokukute kɛnɛ kele ɔlɔlɔ.”​—Rɔmɔ 12:9.

• “Akambo tshɛ wele mɛtɛ, akambo tshɛ wele la kɛnɛmɔ, akambo tshɛ wosembwe, akambo tshɛ wele pudipudi, akambo tshɛ wakoka nangema, akambo tshɛ wele la lokumu l’ɔlɔlɔ, akambo tshɛ wele ɔlɔlɔ ndo akambo tshɛ wakoka mandɔma, nyotetemale nkana yimba lo akambo asɔ.”​—Flpɛ. 4:8.

24. Lande na kahatɛmɔla Ɛmɛnyi wa Jehowa kaamɛ la elui w’ɛtɛmwɛlɔ ekina?

• “Hanyokoke monga nyalɛ lo ‘mɛsa wa Jehowa’ ko nyalɛ ndo lo mɛsa w’ɛdiɛngɛ.”​—1 Kɔr. 10:21.

• “‘Nyotombe oma l’atei awɔ ndo nyokakitɔne la wɔ,’ mbata Jehowa, ‘ndo nyotshike minanda ɛngɔ ka mindo,’ ‘ko dimi layonyolongola.’”​—2 Kɔr. 6:17.

25. Naa atɔndɔ wayokokimanyiya dia wɛ mbɔsa yɛdikɔ dia kana wɛ koka ntshɔ lo fɛtɛ kɛmɔtshi?

• “Koko vɔ wakasɔhana la wedja. Ndo wakokoya mboka yawɔ. Vɔ wakatetemala kambɛ dikishi diawɔ, ko dui sɔ diakayala tshondo ya djonga le wɔ.”​—Os. 106:35, 36.

• “Wanɛ wambovɔ haweye ndooko dikambo.”​—Ond. 9:5.

• “Vɔ keema ase andja ɔnɛ oko wemi keema ose andja ɔnɛ.”​—Jni. 17:16.

• “Lo nshi yakete, nyu nyaketsha etena k’otale lo nsala lolango l’ase wedja lam’akanyayashaka lo lɔkɛwɔ la fumbɔ nsɔnyi, lo nsaki ya kɔlɔ, lo ɔnwɛlɔ wa wanu wa tshambandeko, lo fɛtɛ yele l’awui wa tshambandeko, lo wodjwelo wa wanu ndo lo ɔtɛmwɛlɔ wa kɔlɔ wa dikishi.”​—1 Pe. 4:3.

26. Ngande wakokimanyiya bɛnyɛlɔ dia lo Bible dia mbɔsa yɛdikɔ dia kana wɛ koka ntshɔ lo fɛtɛ ya eotwelo?

• “Lushi la 3 oma laasɔ aki lushi lakotɔ Farawɔ, ko nde akasale fɛtɛ dikambo dia ekambi ande tshɛ ndo akatondja kapita kakawodjɛka wanu lo dikɔhɔ ndo kapita k’okatshi wa mapa la ntondo k’ekambi ande. Ko nde akakaloya kapita kakawodjɛka wanu lo dikɔhɔ l’olimu ande wa mbidjaka wanu lo dikɔhɔ . . . Koko nde akahanɛ kapita k’okatshi wa mapa l’otamba.”​—Eta. 40:20-22.

• “Koko lam’akawasalaka fɛtɛ ka lushi la eotwelo ka Hɛrɔdɛ, ɔnaki Hɛrɔdiyasɛ la womoto akanɔ lokombe lo diaaso sɔ ndo akangɛnyangɛnya Hɛrɔdɛ efula, ko nde akolake lo ntshiba dia mbosha ɛngɔ tshɛ kayondɔlɔmba. Lo ndjela kɛnɛ kakawotɛ nyango, nde akate ate: ‘Ombisha ɔtɛ wa Joani Obatizanyi lo dɔnga.’ Nde akatome dui ko wakatohembola Joani ɔtɛ lo lokanu.”​—Mat. 14:6-8, 10.

27. Lande na kalangayɛ ndjela ɛlɔmbwɛlɔ kasha dikumanyi?

• “Nyokitanyiyake wanɛ wanyɔlɔmbɔla ndo nyoyakitshakitsha l’ɛse kawɔ, nɛ dia vɔ wekɔ lo ntetemala nyolama oko anto wayowoyokoya la wɔ, dia vɔ nsala dikambo sɔ l’ɔngɛnɔngɛnɔ koko aha la lonyangu, nɛ dia dui sɔ diayonga l’etombelo wa kɔlɔ le nyu.”​—Hɛb. 13:17.

28. Lande na kele ekɔ ohomba le yɛ ndo ase nkumbo kayɛ dia tshungolaka etena mbala la mbala dia mbadiaka ndo mbekaka Bible?

• “Koko nde ngɛnangɛnaka lo ɛlɛmbɛ wa Jehowa, ndo nde mbadiaka ɛlɛmbɛ Ande la dui dia l’ɛse la yanyi ndo l’otsho. Nde ayonga oko osongo wonɛmi suke la ɛkɛdi w’ashi, osongo watɔ elowa lo eleko kawɔ, wele akatshi awɔ hawɔlɛngɛ. Ndo kɛnɛ tshɛ kasalande kayolowana.”​—Os. 1:2, 3.

29. Lande na kalangayɛ mbɔtɔka lo nsanganya ndo mbishaka kɔmatɛrɛ?

• “Dimi layewoya analengo lokombo layɛ; layokotombola l’atei w’etshumanelo.”​—Os. 22:22.

• “Nyɛsɔ todjanake yimba dia tshutshuyana lo ngandji ndo lo etsha w’ɛlɔlɔ, tatotshikake sanganaka kaamɛ oko wele mbekelo k’anto amɔtshi, koko tokeketshanake lam’asaso ndo toleke nsala dikambo sɔ oko wɛnanyu dia lushi lakɔ laya suke.”​—Hɛb. 10:24, 25.

30. Naa olimu woleki ohomba wakatosha Yeso dia sho nsala?

• “Ɔnkɔnɛ, nyotshu ndo nyetɛ anto wa lo wedja tshɛ ambeki, nyaabatize . . . , nyowaetshake dia nkitanyiya akambo tshɛ wamomonyodjangɛ.”​—Mat. 28:19, 20.

31. Etena kakimɔso weshasha lo dikambo dia wahɔ wa Diolelo kana dia nkimanyiya anangɛso l’akadiyɛso, dionga diakɔna diangɛnyangɛnya Jehowa?

• “Ɔlɛmiya Jehowa la diangɔ diayɛ dia nɛmɔ.”​—Tok. 3:9.

• “Onto l’onto akimɔ oko wakandashikikɛ l’otema ande, aha la lonyangu kana lotshutshuya, nɛ dia Nzambi nangaka onto lakimɔ l’ɔngɛnɔngɛnɔ.”​—2 Kɔr. 9:7.

32. Ekakatanu akɔna walongamɛ Akristo dia mpomana la wɔ?

• “Ɔngɛnɔngɛnɔ le wanɛ wahɛnyahɛnyama l’ɔtɛ wasalawɔ kɛnɛ kele ɔlɔlɔ, nɛ dia Diolelo dia l’olongo diekɔ diawɔ. Ɔngɛnɔngɛnɔ le nyu etena kayowonyɔtɛnga, kayowonyɔhɛnyahɛnya ndo kayowonyomamatanyiyɛ weho tshɛ w’akambo wa kɔlɔ lo dikambo diami. Nyɔngɛnɛngɛnɛ, nyonge l’ɔlɔ w’efula, nɛ dia difuto dianyu diekɔ woke l’olongo, dikambo ngasɔ mbakawahɛnyahɛnya amvutshi waki la ntondo kanyu.”​—Mat. 5:10-12.

33. Lande na kele ekɔ diɛsɛ dia laande dia batizama oko Ɔmɛnyi wa Jehowa?

• “Ɔtɛkɛta ayɛ wakayala le mi ɔngɛnɔngɛnɔ ndo ɔlɔ w’otema ami, nɛ dia Jehowa Nzambi kanga lolembelembe le, wakambelɛ lo lokombo layɛ.”​—Jɛr. 15:16.

Mbala efula, anto batizamaka lo nsanganya ya weke y’Ɛmɛnyi wa Jehowa. L’ekomelo ka sawo dia batisimu, ɔtɛkɛtshi ayɔlɔmba wanɛ walanga batizama dia memala ndo dia nkadimola ambola ahende wayela anɛ la dui dia wolo:

1. Onde wɛ akayatshumoya oma lo pɛkato yayɛ, akayakimɔ le Jehowa ndo aketawɔ panda kasha Jehowa lo tshimbo ya Yeso Kristo?

2. Onde wɛ ambomana mfundo ɔnɛ batisimu kayɛ mɛnyaka dia wɛ aya Ɔmɛnyi wa Jehowa ndo aya l’okongamelo wa Jehowa?

Nkadimola ɔnɛ eelo lo ambola anɛ mbele “wotelo wa lo sɛkɛ” wa mbetawɔ kele la wanɛ walanga batizama l’oshinga w’etshungwelo, ndo djembetelo yɛnya dia wamboyakimɔ la tshondo le Jehowa. (Rɔmɔ 10:9, 10) Wanɛ walanga batizama pombaka takanyi yimba ndo talɔmbi ntondo lo dikambo dia ambola asɔ dia vɔ ndjokadimola lo ndjela dietawɔ diawɔ hita.

Onde wɛ amboyakimɔka wɛmɛ le Jehowa lo dɔmbɛlɔ, lo mbolaka dia mbɔtɛmɔlaka paka ndamɛ oto ndo lo nsala dia lolango lande monga dui dioleki tshɛ ohomba lo lɔsɛnɔ layɛ?

Onde kakianɛ wɛ amboshikikɛ dimɛna dia wɛ pombaka batizama aha la ntshimbatshimba?

Naa ɔlɔtɔ wakoka lo batisimu? (1 Tim. 2:9, 10; Jni. 15:19; Flpɛ. 1:10)

Sho pombaka ndɔta ɔlɔtɔ wele la “wɛdimo ndo la yimba y’ɔlɔlɔ” dia mɛnya dia sho tekɔ lo “mamema Nzambi.” Ɔnkɔnɛ, wanɛ wayobatizama hawohombe ndɔta ahɔndɔ wɔkawɔ ashi wasanga demba kana ahɔndɔ wele la efundelo w’ase andja ɔnɛ kana la waa slɔga y’ase okanda. Vɔ pombaka ndɔta ahɔndɔ w’amɛna, wa pudipudi ndo wakoka lo ndjela dihole diatanemawɔ.

Dionga diakɔna diahomba onto monga la diɔ etena kabatizamande? (Luka 3:21, 22)

Batisimu ka Yeso ekɔ ɛnyɛlɔ ka batisimu k’Akristo ɛlɔ kɛnɛ. Nde akeyaka dia batisimu ekɔ nna di’ohomba efula ndo kɛsɔ akɛnama lo dionga ndo lo etsha ande. Ɔnkɔnɛ, dihole dia batisimu hadiohombe monga dihole dia nsala tɔsɛkɛsɛkɛ, tɔkɛnyɔ, dia nsala osale, kana weho ekina w’awui wakoka nanya kɛnɛmɔ k’efula kele la diaaso sɔ. Okristo w’oyoyo hahombe ngɛnangɛna lo yoho ya kɔlɔ yele oko onto lambodja otshumba ɔmɔtshi wa woke. Kaanga mbele batisimu ekɔ diaaso di’ɔngɛnɔngɛnɔ, ɔngɛnɔngɛnɔ ɔsɔ pombaka mɛnyama lo yoho ya kɛnɛmɔ.

Ngande wele sanganaka mbala la mbala kaamɛ l’etshumanelo ayokokimanyiya dia nkotsha ndjakimɔ kayɛ le Jehowa?

L’ɔkɔngɔ wa batisimu kayɛ, lande na kele ayonga ohomba wɛ ntetemala monga la ekongelo ka dimɛna ka wekelo w’onto ndamɛ ndo sambishaka mbala la mbala?