‘Lakendaka ditongami diasɛna’

Aha la taamu, Ɛzɛkiyɛlɛ akɛnaka mpingu ya weke ya ngɔmbɛ yele l’ahafu ndo ya ntambwɛ yele l’ɔtɛ w’onto yemadi oko alami l’asoko wa mvudu ya nkumi ya dikanga ndo lo tɛmpɛlɔ. Mpingu shɔ yakatanemaka l’Asuriya w’edjedja w’otondo ndo la Babilɔna. L’ɛnyɛlɔ k’anto tshɛ wakendaka, nde akahombe mambiyama l’ɔtɛ wa ditongami dia diambo sɔ, dimɔtshi diaki l’otale wa mɛtrɛ suke la 6. Koko, oyadi woho wakɛnamaka dia ditongami sɔ diaki la wolo, diɔ komonga la lɔsɛnɔ, diɔ diakasalema la ave.

Koko, ditongami nɛi diakɛnyi Ɛzɛkiyɛlɛ lo ɛnɛlɔ, diaki “ditongami diasɛna.” Ande otshikitanu lee! Dui sɔ diaki la shɛngiya ya wolo le Ɛzɛkiyɛlɛ diakɔ diakandate ɛtɛkɛta w’ɔnɛ “ditongami diasɛna” mbala 11 lo mbɔtwɛlɔ ka prɔfɛsiya kande. (Ɛzk. 1:5-22) Ɛnɛlɔ ka ditongami nɛi diasɛna diatatshu lɛkɛ laamɛ l’etena kakɔ kaamɛ l’ɛse ka kiti ka lowandji ka Nzambi kakahombe nshikikɛ Ɛzɛkiyɛlɛ dimɛna ɔnɛ Jehowa mbalɔmbɔla diangɔ tshɛ diakatongama. Ndo ɛlɔ kɛnɛ, ɛnɛlɔ ka diambo kɛsɔ toshikikɛka ɔnɛ Jehowa ekɔ la wolo wahadjama anya ndo ɔnɛ lowandji lande lekɔ la nkudu k’efula.​—1 Ɛk. 29:11.