Losango loleki ohomba la lo Bible mendanaka la Diolelo diaki Nzambi. Jehowa ayokamba la Diolelo sɔ dia nkotsha sangwelo diande di’oma k’etatelo lo dikambo dia nkɛtɛ. Diolelo kɛdikɛdi na? Ngande weyaso dia diɔ diekɔ lo mbolɛ? Kakɔna kamboshila nsala Diolelo sɔ? Ndo kakɔna kayodiosala lo nshi yayaye? Wekelo ɔnɛ ndo wekelo ehende wayela wayokadimola ambola asɔ.

1. Diolelo diaki Nzambi kɛdikɛdi na ndo ele Nkumekanga kadiɔ?

Diolelo ekɔ lowandji lɔmɔtshi lakashikikɛma oma le Jehowa Nzambi. Yeso Kristo mbele Nkumekanga ka Diolelo sɔ ndo nde ekɔ lo mbolɛ oma l’olongo. (Mateo 4:17; Joani 18:36) Bible mbutaka lo dikambo dia Yeso ɔnɛ: “Nde ayonga Nkumekanga . . . pondjo pondjo.” (Luka 1:32, 33) Oko wende Nkumekanga ka Diolelo diaki Nzambi, Yeso ayolɛ laadiko di’onto tshɛ lele lanɛ la nkɛtɛ.

2. Waa na wayolɛ kaamɛ la Yeso?

Yeso holɛ ndaamɛ. Anto w’oma lo “waoho tshɛ, ɛtɛkɛta tshɛ, weho w’anto tshɛ ndo wedja tshɛ . . . wayolɛ nkɛtɛ oko nkumi ya dikanga.” (Ɛnyɛlɔ 5:9, 10) Anto angana wayolɛ kaamɛ la Kristo? Ntatɛ etena kakaye Yeso la nkɛtɛ, miliyɔ y’Akristo wakakome ambeki ande. Koko paka anto 144 000 l’atei awɔ mbayotshɔ l’olongo dia tolɛ kaamɛ la Yeso. (Adia Ɛnyɛlɔ 14:1-4.) Akristo akina tshɛ wa la nkɛtɛ wayokoma ambolami wa Diolelo.​—Osambo 37:29.

3. Ngande woleki Diolelo diaki Nzambi mandji y’ana w’anto?

Kaanga etena kasala ewandji w’ana w’anto la wolo dia nsala awui w’ɛlɔlɔ, vɔ bu la wolo wa nsala kɛnɛ tshɛ kalangawɔ. L’ɔkɔngɔ diko, vɔ ndjɔhɛnamaka oma le ewandji ekina wahayakiyanya dikambo di’ambolami awɔ. Koko Yeso, Nkumekanga ka Diolelo diaki Nzambi hatɔhɛnyama pondjo oma le onto okina. Nzambi akashikikɛ “Diolelo diahalanyemaki pondjo.” (Danyɛlɛ 2:44) Yeso ayolɛ laadiko dia nkɛtɛ k’otondo, ndo nde hatonga la shɔnɔdi. Nde ekɔ la ngandji, nde ekɔ ɔlɔlɔ ndo la losembwe ndo nde ayetsha anto dia salanɛ akambo woho akɔ waamɛ, mbuta ate la ngandji ndo la losembwe.​—Adia Isaya 11:9.

4. Lowandji lele la wolo efula layɔlɔmbɔla nkɛtɛ k’otondo

Yeso Kristo ekɔ la wolo w’efula wa nɔmbɔla oleki ɔnɔmbɔdi akɔna tshɛ. Nyadia Mateo 28:18, ndo oma laasɔ, nyɔkɛtshanya dimbola nɛ:

• Ngande wele lowandji laki Yeso ndeka mandji tshɛ y’ana w’anto dimɛna?

Mbala efula, mandji y’ana w’anto tshikitanaka, ndo yɔ tshɛ nɔmbɔlaka paka lo yɛtshi mɔtshi ya nkɛtɛ. Ko kayotota dia Diolelo diaki Nzambi? Nyadia Danyɛlɛ 7:14, ndo oma laasɔ, nyɔkɛtshanya ambola anɛ:

• Lande na kele ekɔ dimɛna lo woho wele Diolelo diaki Nzambi ‘hadiolanyemaki’?

• Lande na kele ekɔ dimɛna dia diɔ mbolɛ laadiko dia nkɛtɛ k’otondo?

5. Lowandji l’ana w’anto pombaka mpɛnyama

Lande na kahomba Diolelo diaki Nzambi mpɛna mandji y’ana w’anto? Nyende VIDƐO, ndo oma laasɔ, nyɔkɛtshanya dimbola diayela nɛ:

VIDƐO: Diolelo diaki Nzambi kɛdikɛdi na?​—Etenyi (1:41)

• Etombelo akɔna wambonga l’ɛlɔmbwɛlɔ k’ana w’anto?

Nyadia Ondaki 8:9, ndo oma laasɔ, nyɔkɛtshanya ambola anɛ:

• Onde wɛ fɔnyaka dia Diolelo diaki Nzambi pombaka mpɛna mandji y’ana w’anto? Lande na?

6. Diolelo diaki Nzambi diekɔ l’ɛnɔmbɔdi weya ndjadja lo dihole diaso

Lam’ele Nkumekanga kaso, Yeso, akasɛnɛ oko onto, nde kokaka “toka kɛtshi lo wɛɔdu aso.” (Hɛbɛru 4:15) Anto 144 000, apami la wamato wa kɔlamelo wanɛ wayolɛ kaamɛ la Yeso wakasɔnama oma le Jehowa “oma lo waoho tshɛ, ɛtɛkɛta tshɛ, weho w’anto tshɛ ndo wedja tshɛ.”​—Ɛnyɛlɔ 5:9.

• Onde wɛ keketshamaka lo mbeya dia Yeso la wanɛ tshɛ wayolɛ kaamɛ la nde mbeyaka kɛnɛ kalembetshiya nsɛna oko anto? Lande na?

7. Diolelo diaki Nzambi diekɔ l’ɛlɛmbɛ woleki w’anto amɛna

Mandji y’ana w’anto mbidjaka ɛlɛmbɛ wɛnama diele oko wayonga la wahɔ ndo wayokokɛ anto walɔmbɔlawɔ. Diolelo diaki Nzambi diɔ lawɔ diekɔ l’ɛlɛmbɛ wahomba ambolami adiɔ ndjela. Nyadia 1 Kɔrɛtɔ 6:9-11, ndo oma laasɔ, nyɔkɛtshanya ambola anɛ:

• Oko le yɛ, ngande wayonga andja ɔnɛ naka onto tshɛ ndjela ɛlɛmbɛ waki Nzambi wendana la lɔkɛwɔ?a

• Onde wɛ fɔnyaka dia ekɔ dui di’ɔlɔlɔ dia Jehowa nongamɛ di’ambolami wa Diolelo nɛmiya ɛlɛmbɛ ɛsɔ? Lande na?

• Kakɔna kɛnya di’anto wahakitanyiya ɛlɛmbɛ ɛsɔ kokaka ntshikitanya yoho yawɔ ya lɔsɛnɔ?​—Enda divɛsa 11.

LO TSHENA PE

Diolelo diaki Nzambi diekɔ lowandji la mɛtɛ la l’olongo layɔlɔmbɔla nkɛtɛ k’otondo.

Ovuswelo

• Waa na wele emboledi wa Diolelo diaki Nzambi?

• Ngande woleki Diolelo diaki Nzambi mandji tshɛ y’ana w’anto?

• Naa awui amɔtshi walongamɛ Jehowa le ambolami wa Diolelo?

SALA EYANGELO

Sɛdingola kɛnɛ kaketsha Yeso lo kɛnɛ kendana la oma lɛnɛ ayɔlɔmbɔla Diolelo.

“Onde Diolelo diaki Nzambi diekɔ l’otema ayɛ?” (Sawo dia l’Ɛtɛrnɛtɛ)

Lande na kasɔna Ɛmɛnyi wa Jehowa dia mɛnya kɔlamelo yawɔ lo Diolelo diaki Nzambi, koko aha le mandji y’ana w’anto?

Wakayakimɔ dikambo dia Diolelo diaki Nzambi (1:43)

Sɛdingola kɛnɛ katosholɛ Bible lo dikambo di’anto 144 000 wakasɔnama oma le Jehowa dia mbolɛ kaamɛ la Yeso.

“Waa na watshɔ l’olongo?” (Sawo dia l’Ɛtɛrnɛtɛ)

Kakɔna kaketawoya womoto ɔmɔtshi laki lo lokanu dia paka Nzambi mbakoka mbela andja wele la losembwe?

“Lakeye yoho ya ndɔshana la wɛngiya” (Emɔ! Ngɔndɔ ka dikumi l’ɔtɔi 2011 lo Falase)

Diolelo diaki Nzambi diakatatɛ mbolɛ l’olongo l’ɔnɔnyi wa 1914. L’etena kɛsɔ mbakatatɛ nshi y’ekomelo y’ɛlɔmbwɛlɔ k’ana w’anto. Ngande weyaso dikambo sɔ? Tɔsɛdingole prɔfɛsiya ya lo Bible, awui weta l’andja ɔnɛ ndo waonga wele l’anto ntatɛ oma lo 1914.

1. Kakɔna kɛnya prɔfɛsiya ya lo Bible?

Dibuku dia lo Bible dia Danyɛlɛ diakatatshi dia Diolelo diaki Nzambi diayotatɛ mbolɛ l’ekomelo k’etena kelamɛ ɔnɛ “tena 7.” (Danyɛlɛ 4:16, 17) Ɛnɔnyi nkama l’ɔkɔngɔ, Yeso akatɛkɛta di’etena kakɔ kaamɛ lo kielɛ ɔnɛ “etena kakashikikɛma k’ase wedja,” ndo nde aketsha dia tɔ katakomɛ. (Luka 21:24) Oko wayotodiɛna, ntena esambele sɔ diakakomɛ l’ɔnɔnyi wa 1914.

2. Awui akɔna weta l’andja ɔnɛ ndo waonga akɔna wele l’anto ntatɛ oma lo 1914?

Ambeki wa Yeso wakawombola ɔnɛ: “Djembetelo yakɔna yayɛnya woongelo ayɛ ndo etena k’ekomelo ka dikongɛ di’akambo?” (Mateo 24:3) L’okadimwelo ande, Yeso akate awui efula wayosalema l’ɔkɔngɔ wa nde ntatɛ mbolɛ l’olongo oko Nkumekanga ka Diolelo diaki Nzambi. L’atei w’awui akɔ mbele, ata, ndjala ya kasha ndo adidimu wa nkɛtɛ. (Adia Mateo 24:7.) Bible kakatatshi dia waonga wayonga l’anto lo “nshi y’ekomelo” wayetɛ lɔsɛnɔ “wolo mbikikɛ.” (2 Timɔte 3:1-5) Awui ndo waonga asɔ wakatatɛ mɛnama oma lo 1914.

3. Lande na kamboleka monga awui wa kɔlɔ ntatɛ lam’akatatɛ mbolɛ Diolelo diaki Nzambi?

Yema tshitshɛ l’ɔkɔngɔ wa Yeso ntatɛ mbolɛ oko Nkumekanga ka Diolelo diaki Nzambi, nde akalɔ ta l’olongo nde la Satana l’ɛdiɛngɛ ande. Satana akalɛndjama lo ta sɔ. Bible mbutaka ɔnɛ: “Wakawokasha la nkɛtɛ nde l’andjelo ande.” (Ɛnyɛlɔ 12:9, 10, 12) Satana ekɔ la nkɛlɛ k’efula nɛ dia nde mbeyaka dia nde ayolanyema. Diakɔ diɛnyande anto paa ndo diasoyande anto wa lo nkɛtɛ k’otondo. Aha la taamu, akambo wa l’andja ɔnɛ waya kɔlɔ efula! Diolelo diaki Nzambi diayonya ekakatanu ɛsɔ tshɛ.

NYOMOTSHIMOLA

4. Awui wa lo Bible wɔlɔngami lo ndjela woho wakawayasalemaka mɛnyaka dia Diolelo diaki Nzambi diakatatɛ mbolɛ lo 1914

VIDƐO: Diolelo diaki Nzambi diakatatɛ mbolɛ lo 1914 (5:02)

Nzambi akasale dia nkumekanga Nɛbukadinɛza ka la Babilɔna k’edjedja mɛna dɔ dimɔtshi dia prɔfɛsiya. Dɔ sɔ ndo elembetshiyelo wakasha Danyɛlɛ mɛnyaka dia dɔ sɔ diakendanaka la ɛlɔmbwɛlɔ ka Nɛbukadinɛza ndo la Diolelo diaki Nzambi.​—Nyadia Danyɛlɛ 4:17.a

Nyadia Danyɛlɛ 4:20-26, ndo oma laasɔ, nyokambe la tablo dia nkadimola ambola wayela anɛ:

• A) Kakɔna kakɛnyi Nɛbukadinɛza lo dɔ diande?​—Enda divɛsa 20 ndo 21.

• B) Kakɔna kakahombe nkomɛ osongo?​—Enda divɛsa 23.

• C) Kakɔna kakahombe salema l’ekomelo ka “tena 7.”​—Enda divɛsa 26.

Woho wendana dɔ di’osongo la Diolelo diaki Nzambi

PRƆFƐSIYA (Danyɛlɛ 4:20-36)

Ɛlɔmbwɛlɔ

A) Shaka y’osongo

Ɛlɔmbwɛlɔ kambokomɛ

B) “Nyɔkɔtɛ osongo akɔ,” ndo nyotshike dia “tena 7 diawetee”

Ɛlɔmbwɛlɔ kambotatɛ nto

C) “Diolelo diayɛ diayonga diayɛ nto”

L’okotshamelo wa ntondo wa prɔfɛsiya kɛnɛ . . .

• D) Osongo waki didjidji di’onto akɔna?​—Enda divɛsa 22.

• E) Ngande wakakomɛ ɛlɔmbwɛlɔ kande?​—Nyadia Danyɛlɛ 4:29-33.

• F) Kakɔna kakakomɛ Nɛbukadinɛza l’ekomelo ka “tena 7”?​—Nyadia Danyɛlɛ 4:34-36.

OKOTSHAMELO WA NTONDO

Ɛlɔmbwɛlɔ

D) Nɛbukandinɛza, nkumekanga ka Babilɔna

Ɛlɔmbwɛlɔ kambokomɛ

E) L’ɔkɔngɔ w’ɔnɔnyi wa 606 N.T.D., Nɛbukadinɛza akadjɔ dadi ndo nde komonga l’akoka wa nɔmbɔla l’edja k’ɛnɔnyi esambele wa mɛtɛ mɛtɛ

Ɛlɔmbwɛlɔ kambotatɛ nto

F) Nɛbukadinɛza amboshila dadi ndo ambotatɛ mbolɛ nto

L’okotshamelo wa hende wa prɔfɛsiya kɛnɛ . . .

• G) Osongo waki didjidji di’anto akɔna?​—Nyadia 1 Ɛkɔndɔ 29:23.

• H) Ngande wakahembɔ ɛlɔmbwɛlɔ kawɔ? Ngande weyaso dia tɔ kakakomɛ polo ndo l’etena kaki Yeso lanɛ la nkɛtɛ?​—Nyadia Luka 21:24.

• I) Etena kakɔna ndo lende akakaloyama lowandji lɔsɔ?

OKOTSHAMELO WA HENDE

Ɛlɔmbwɛlɔ

G) Nkumi ya dikanga y’Isariyɛlɛ nyɛ yaki didjidji di’ɛlɔmbwɛlɔ ka Nzambi

Ɛlɔmbwɛlɔ kambokomɛ

H) Jɛrusalɛma yambolanyema ndo ɔlɔndji wa nkumi ya dikanga y’Isariyɛlɛ wambokomɛ ambeta ɛnɔnyi 2 520

Ɛlɔmbwɛlɔ kambotatɛ nto

I) Yeso ambotatɛ mbolɛ l’olongo oko Nkumekanga ka Diolelo diaki Nzambi

5. Andja wakatshikitana ntatɛ lo 1914

Nyende VIDƐO.

VIDƐO: Andja wakatshikitana ntatɛ lo 1914 (1:10)

Yeso akatatshi akambo wakahombe salema l’ɔkɔngɔ wa nde nkoma Nkumekanga. Nyadia Luka 21:9-11, ndo oma laasɔ, nyɔkɛtshanya dimbola nɛ:

• Naa dui dimɔtshi l’atei w’awui asɔ diamboyɛna kana diamboyoka?

Ɔpɔstɔlɔ Pɔɔlɔ akalembetshiya woho wayonga anto lo nshi y’ekomelo k’ɛlɔmbwɛlɔ k’ana w’anto. Nyadia 2 Timɔte 3:1-5, ndo oma laasɔ, nyɔkɛtshanya dimbola nɛ:

• Naa dionga dimɔtshi l’atei wa waonga asɔ diɛnayɛ le anto ɛlɔ kɛnɛ?

6. Ɛlɔmbwɛlɔ ka Diolelo diaki Nzambi pombaka tokeketsha

Nyadia Mateo 24:3, 14, ndo oma laasɔ, nyɔkɛtshanya ambola anɛ:

• Naa olimu w’ohomba wɛnya dia Diolelo diaki Nzambi diekɔ lo mbolɛ?

• Ngande wakokayɛ mbisha lonya l’olimu ɔsɔ?

Diolelo diaki Nzambi diekɔ lo mbolɛ, ndo lushi layodiɔlɔmbɔla akambo tshɛ wa la nkɛtɛ laya suke. Nyadia Hɛbɛru 10:24, 25, ndo oma laasɔ, nyɔkɛtshanya dimbola nɛ:

• Kakɔna kahombaso sho tshɛ nsala oko “wɛnaso dia lushi lakɔ laya suke”?

LO TSHENA PE

Prɔfɛsiya ya lo Bible, woho wakayahɔnaka akambo ndo awui weta l’andja ɔnɛ mɛnyaka dia Diolelo diaki Nzambi diekɔ lo mbolɛ. Sho mɛnyaka dia sho mbetawɔka dui sɔ lo nsambisha awui wendana la diɔ ndo lo mbɔtɔka lo nsanganya ya l’etshumanelo.

Ovuswelo

• Kakɔna kakatombe l’ekomelo ka ntena esambele diakatatami lo dibuku dia Danyɛlɛ?

• Kakɔna kaketawoya dia Diolelo diaki Nzambi diakatatɛ mbolɛ lo 1914?

• Ngande wakokayɛ mɛnya dia wɛ mbetawɔka dia Diolelo diaki Nzambi diekɔ lo mbolɛ?

SALA EYANGELO

Tende kɛnɛ kata ambewi w’ɛkɔndɔ ndo anto akina lo woho wambotshikitana andja ɔnɛ ntatɛ oma lo 1914.

“Etena kakalana nkɛwɔ y’anto lo yoho ya kɔlɔ efula” (Emɔ!, Ngɔndɔ ka nɛi 2007 lo Falase)

Adia woho wakonge prɔfɛsiya ka lo Mateo 24:14 la shɛngiya lo lɔsɛnɔ la pami kɛmɔtshi.

“Lakalangaka mponde ka Baseball oleki ɛngɔ kekina tshɛ!” (Tshoto y’Etangelo No. 3 2017 lo Falase)

Ngande weyaso dia prɔfɛsiya ka lo Danyɛlɛ tshapita 4 mendanaka la Diolelo diaki Nzambi?

“Etena kakɔna kakatatɛ Diolelo diaki Nzambi mbolɛ? (Etenyi 1)” (Tshoto y’Etangelo, Ngɔndɔ ka dikumi 1, 2014)

Kakɔna kɛnya dia “tena 7” diɔtɛkɛtami lo Danyɛlɛ tshapita 4 diakakomɛ lo 1914?

“Etena kakɔna kakatatɛ Diolelo diaki Nzambi mbolɛ? (Etenyi 2)” (Tshoto y’Etangelo, Ngɔndɔ ka dikumi l’ɔtɔi 1, 2014)

Diolelo diaki Nzambi diamboshilaka ntatɛ la mbolɛ. Keem’edja, diɔ diayela etshikitanu wa weke lanɛ la nkɛtɛ. Tende awui amɔtshi w’amɛna wakokayɛ nongamɛ l’asolo walomɔlomɔ l’ɛlɔmbwɛlɔ ka Diolelo.

1. Ngande wayela Diolelo diaki Nzambi wɔladi ndo losembwe la nkɛtɛ?

Yeso, Nkumekanga ka Diolelo diaki Nzambi ayolanya anto wa kɔlɔ ndo mandji lo ta di’Aramangɛdɔna. (Ɛnyɛlɔ 16:14, 16) L’etena kɛsɔ, daka dia lo Bible diayela nɛ diayokotshama tshɛ lo tshɛ: “Etena ka tshitshɛ keto kambotshikala, ko kanga kɔlɔ hatonga nto.” (Osambo 37:10) Oma lo tshimbo ya Diolelo, Yeso ayosala woho wa wɔladi ndo losembwe ndola la nkɛtɛ.​—Adia Isaya 11:4.

2. Ngande wayonga lɔsɛnɔ l’etena kayosalema lolango la Nzambi la nkɛtɛ?

L’ɛlɔmbwɛlɔ ka Diolelo diaki Nzambi, “anto w’ɛlɔlɔ wayokita nkɛtɛ, ndo wayodjasɛka lɔkɔ pondjo pondjo.” (Osambo 37:29) Ohɔsa dia wɛ ɔsɛna l’andja wele anto waya anto w’ɛlɔlɔ ndo wele anto tshɛ woka Jehowa ngandji ndo wokana ngandji lam’asawɔ! Ndooko onto layonga la hemɔ ndo onto tshɛ ayɔsɛna pondjo pondjo.

3. Kakɔna kayosala Diolelo diaki Nzambi l’ɔkɔngɔ w’anto wa kɔlɔ ndanyema?

L’ɔkɔngɔ w’anto wa kɔlɔ ndanyema, Yeso ayolɛ oko Nkumekanga l’edja k’ɛnɔnyi 1 000. L’etena kɛsɔ, nde l’anto 144 000 wanɛ wayolɛ kaamɛ la nde wayokimanyiya anto wa lanɛ la nkɛtɛ dia nkoma kokele. L’ekomelo k’ɛnɔnyi kinunu, nkɛtɛ kayonga paradiso ka dimɛna efula ndo anto tshɛ wayonga l’ɔngɛnɔngɛnɔ l’ɔtɛ wakitanyiyawɔ ɛlɛmbɛ wa Jehowa. Oma laasɔ, Yeso ayokaloya Diolelo le Jehowa, She. ‘Lokombo la Jehowa layokidiama’ lo yoho yelɔ yatakidiamaka ndooko lushi. (Mateo 6:9, 10) Kɛsɔ ayɛnya dia Jehowa ekɔ Ɔnɔmbɔdi wa dimɛna wayakiyanya dikambo di’anto. Oma laasɔ, Jehowa ayodiaka Satana, ɛdiɛngɛ, ndo anto tshɛ watɔmbɔkwɛ lowandji lande. (Ɛnyɛlɔ 20:7-10) Lɔsɛnɔ la kokele layela Diolelo diaki Nzambi layotshikala pondjo pondjo.

NYOMOTSHIMOLA

4. Diolelo diaki Nzambi diayokomiya mandji y’ana w’anto

“Onto mbolɛka wonyande onto dia mbosalɛ kɔlɔ.” (Ondaki 8:9) Lo tshimbo ya Diolelo diande, Jehowa ayokomiya awui waha la losembwe asɔ.

Nyadia Danyɛlɛ 2:44 ndo 2 Tɛsalɔnika 1:6-8, ndo oma laasɔ, nyɔkɛtshanya ambola anɛ:

• Kakɔna kayosalɛ Jehowa nde l’Ɔnande Yeso mandji y’ana w’anto ndo wanɛ tshɛ wayisukɛ?

• Ngande wambokoshikikɛ kɛnɛ kamboyeka lo dikambo dia Jehowa nde la Yeso dia etsha awɔ wekɔ losembwe ndo ɔlɔlɔ?

5. Yeso ekɔ Nkumekanga k’oshika

Oko Nkumekanga ka Diolelo diaki Nzambi, Yeso ayokimanyiya anto wa lanɛ la nkɛtɛ lo toho efula. Nyende VIDƐO dia mɛna woho wakɛnya Yeso dia nde nangaka nkimanyiya anto ndo ɔnɛ Nzambi mbakawosha wolo wa nkimanyiya anto.

VIDƐO: Yeso akɛnya kɛnɛ kayosala Diolelo (1:13)

Akambo wakasale Yeso lam’akinde lanɛ la nkɛtɛ waki paka dɛtɔ dia kɛnɛ kayoyosala Diolelo diaki Nzambi. L’ɛtshɔkɔ woshidiwɔ lanɛ, wakɔna walekayɛ nkombola mɛna ekotshamelo kawɔ? Nyadia avɛsa wayela anɛ watokimanyiya dia mbeya awui efula wendana l’ɛtshɔkɔ ɛsɔ.

6. Diɛsɛ la Diolelo diaki Nzambi, anto wayoyala la nshi yayaye y’amɛma efula

VIDƐO: Dɛtɔ diendana la nshi yayaye ya diambo (4:38)

Nyadia Osambo 145:16, ndo oma laasɔ, nyɔkɛtshanya dimbola nɛ:

• Ngande wayaokayɛ lo mbeya dia Jehowa ayokotsha “nsaki ka ɛngɔ tshɛ kasɛna”?

LO TSHENA PE

Diolelo diaki Nzambi diayokotsha oyango adiɔ. Diɔ diayokadimola nkɛtɛ k’otondo paradiso koludi l’anto w’ɛlɔlɔ wayɔtɛmɔlaka Jehowa pondjo pondjo.

Ovuswelo

• Ngande wayokidia Diolelo diaki Nzambi lokombo laki Jehowa?

• Lande na kakokaso mbetawɔ dia Diolelo diaki Nzambi diayokotsha alaka wa lo Bible?

• L’akambo w’amɛna tshɛ wayela Diolelo diaki Nzambi, diakɔna dialekayɛ nkombola mɛna?

SALA EYANGELO

Yanga dia mbeya kɛnɛ kalembetshiya Aramangɛdɔna.

“Ta di’Aramagɛdɔna kɛdikɛdi na?” (Sawo dia l’Ɛtɛrnɛtɛ)

Tɔsɛdingole akambo wayosalema letena ka kelɛ Yeso ɔnɛ: “Mfɔnu ka woke.”—Mateo 24:21.

Mfɔnu ka woke kɛdikɛdi na” (Sawo dia l’Ɛtɛrnɛtɛ

Enda woho wakoka waa nkumbo nkana yimba kaamɛ l’ɛtshɔkɔ wayela Diolelo lo nshi yayaye.

Onga oko onto layaɛna lo Paradiso (1:50)

L’ɔkɔndɔ wa lɔsɛnɔ wata ɔnɛ: “Ambola efula wakatshindjaka wɔɔngɔ,” enda woho wakatane ɔtɔmbɔki ɔmɔtshi w’ose pɔlitikɛ ekandwelo wakandatayangaka.

“Bible tshikitanyaka nsɛnɔ y’anto” (Tshoto y’Etangelo, Ngɔndɔ ka ntondo 1, 2012 lo Falase)