Tonge la ekanelo k’ɔlɔlɔ ndo la wɛdimo
“Otetemale mbaohola dia vɔ . . . monga la ekanelo k’ɔlɔlɔ.”—TITO 3:1, 2, nɔtɛ ka l’ɛse ka dikatshi ka NW.
1, 2. Kakɔna kata Afundelo lo kɛnɛ kendana la ohomba wa monga la ekanelo k’ɔlɔlɔ ndo lande na kele dui sɔ diekɔ ɔlɔlɔ?
JEHOWA Shɛso ka l’olongo ka ngandji ekɔ la lomba laha la elelo. Oko weso ditongami diande, sho mendɛka le nde dia nde nɔmbɔla nsɛnɔ yaso. (Osam. 48:14) Ombeki w’Okristo Jakɔba totɛka dia “yimba yakahulo uma l’ulungu, ntundu yeko pudipudi, l’okongo yeli ki, la memakana, [kana ekanelo k’ɔlɔlɔ]. Yo yambulula too la ketshi la elua w’ololo, yaha la tamu, yaha la lukesu.”—Jak. 3:17.
2 Ɔpɔstɔlɔ Paulo tokeketshaka ate: “Memakana kanyu keyami le antu tshe.”a (Fil. 4:5) Kristo Yeso ekɔ Nkumadiɔndjɔ ndo Ɔtɛ wa etshumanelo k’Akristo. (Ef. 5:23) Ekɔ mɛtɛ ohomba efula le ɔmɔmɔ wa l’atei aso dia sala akambo la ekanelo k’ɔlɔlɔ, mbetawɔ ɛlɔmbwɛlɔ kaki Kristo ndo aha tshininala lo tokanyi taso hita lo diɔtɔnganelo diasaso la anto akina!
3, 4. a) Sha ɛnyɛlɔ kɛnya etombelo w’ɛlɔlɔ waya lo tshikanɛ dihole. b) Kakɔna kayangaso sɛdingola?
3 Sho kondjaka etombelo w’ɛlɔlɔ etena keso suke dia monga la ekanelo k’ɔlɔlɔ lo yoho yele la wɛdimo. Tɔshi ɛnyɛlɔ kɛnɛ: Lo wodja wa Grande-Bretagne, l’ɔkɔngɔ wa vɔ mbishola sheke yakɔtɔ waa terɔristɛ mɔtshi, wa pasase tshɛ ya lo waa aviyɔ yaki suke dia kitanyiya ɛlɛmbɛ wakawawadjɛ lo kɛnɛ kendana la wɛmbɛlɔ wa diangɔ dimɔtshi diakiwɔ la lotshungɔ la mɛmba ntondo. Etena katatakɛndjakɛndja mutuka, sho mɛnaka ohomba wa kanɛ toshufɛlɛ tokina, ɛnyɛlɔ etena keso l’asanga, dia sho ndjashikikɛ dia hatodjisha lɔsɛnɔ l’onto ɔmɔtshi lo wâle ndo ɔnɛ hatodihi otadimbo.
4 Le efula ka l’atei aso, kema dui dia tshitshɛ dia tshikanɛ dihole. Dia tokimanyiya, nyɛsɔ tɔsɛdingole akambo asato wahombaso monga la ekanelo k’ɔlɔlɔ lɔkɔ, mbuta ate, eyango aso, dionga diaso otsha le mandji ndo yɛdikɔ yahombaso monga la ekanelo k’ɔlɔlɔ.
Lande na kahombaso monga la ekanelo k’ɔlɔlɔ?
5. Lo Ɛlɛmbɛ wa Mɔsɛ, kakɔna kakakokaka tshutshuya ɔhɔmbɔ dia sɔna dia tshikala l’ɛse ka lowandji la nkumɛnde?
5 Dui dimɔtshi diakasalema la ntondo ka tena diaso nɛ tɔtɔmiyaka ɔkɔkɔ w’ɔlɔlɔ watotshutshuya dia monga la ekanelo k’ɔlɔlɔ. Lo Ɛlɛmbɛ wa Mɔsɛ, ase Hɛbɛru wakakome ɛhɔmbɔ wakahombaka tshungwama lo ɔnɔnyi w’esambele wa lɔhɔmbɔ lawɔ kana lo ɔnɔnyi wa Jibile, mbuta ate wɔnɛ tshɛ waketaka ntondo. Koko ɔhɔmbɔ akakokaka sɔna dia tshikala ɔhɔmbɔ. (Adia Etumbelu 21:5, 6.) Kakɔna kakakokaka tshutshuya ɔhɔmbɔ dia nde sala dikambo sɔ? Ngandji mbakakokaka tshutshuya ɔhɔmbɔ dia nde tshikala l’ɛse ka lowandji la nkumɛnde ka ngandji.
6. Ngande watokimanyiya ngandji dia monga la ekanelo k’ɔlɔlɔ?
6 Woho akɔ wâmɛ mbele, ngandji kokaso Jehowa totshutshuyaka dia sho ndjâkimɔ le nde ndo ndjaɔtɔnganyiya la ndjâkimɔ kaso. (Romo 14:7, 8) Ɔpɔstɔlɔ Joani akafunde ate: “Ngandji ka [Nzambi] kene, dia shu nama elembe andi: ku elembe andi hawuleki wutshu.” (1 Joa. 5:3) Woho wa ngandji kɛsɔ hayange lolango latɔ hita. (1 Kor. 13:4, 5) Lo diɔtɔnganelo diasaso la anto akina, ngandji ka wonyaso onto totshutshuyaka dia sho monga la ekanelo k’ɔlɔlɔ ndo mbetsha wahɔ awɔ la ntondo ka waso. L’ɔtɛ wa sho tshika lokaki nɔmbɔla nsɛnɔ yaso, sho pombaka mbidja yimba lo wahɔ w’anto akina.—Fil. 2:2, 3.
7. Ngande watokimanyiya ekanelo k’ɔlɔlɔ lo olimu aso wa esambishelo?
7 Ɛtɛkɛta la etsha aso hawohombe takanya anto akina. (Ef. 4:29) Lo mɛtɛ, ngandji kayototshutshuya dia sho mbewɔ sala dikambo tshɛ diakoka shimba anto w’oma l’ahole wotshikitanyi ndo wele la mbekelo yotshikitanyi dia vɔ pama lo olimu wakambɛwɔ Jehowa. Dui sɔ tɔlɔmbaka mbala efula dia sho monga la ekanelo k’ɔlɔlɔ. Ɛnyɛlɔ, akadiyɛso wele waa misiɔnɛrɛ wele la mbekelo ka shinolaka dishinolashinola kana ndɔtaka ahɔndɔ wasanga demba hawotshininala dia tetemala sala dikambo sɔ lo ahole wele sala ngasɔ mbeyaka mbasha lokumu la kɔlɔ kana takanya anto akina.—1 Kor. 10:31-33.
8. Ngande wakoka ngandji kokaso Nzambi tokimanyiya dia sho ndjaɔsa oko ‘wanɛ woleki totshitshɛ’?
8 Ngandji kokaso Jehowa tokimanyiyaka dia sho tshika otako. L’ɔkɔngɔ wa ambeki ande kakatana dia mbeya akɔna akaleke woke l’atei awɔ, Yeso akemadja ɔna dikɛnda l’atei awɔ. Nde akâlembetshiya ate: “Untu tshe lalungula kiendakenda nye lu lukumbu lami, ndi ambunungula. Untu tshe lanungula ambulungula one lakatumi, ne dia one luleki tshitshe l’atei anyu, ndi keli wuki.” (Luka 9:48; Mako 9:36) Ekɔ wolo le ɔmɔmɔ la l’atei aso dia ndjaɔsa oko “one luleki tshitshe.” Eongelo kele kema kokele kakatahowɔ ndo kanyi ya monga la otako mbeyaka totshutshuya dia monga la lokumu, koko ndjakitshakitsha ayotokimanyiya dia sho monga la ekanelo k’ɔlɔlɔ.—Romo 12:10.
9. Dia sho monga la ekanelo k’ɔlɔlɔ, kakɔna kahombaso mbetawɔ?
9 Dia sho monga la ekanelo k’ɔlɔlɔ, sho pombaka mbetawɔ lowandji l’oma le Nzambi. Akristo wa mɛtɛ tshɛ mbetawɔka tɔndɔ di’ohomba diendana la lowandji. Ɔpɔstɔlɔ Paulo akalembetshiya ase Kɔrɛtɔ tɔndɔ sɔ hwe lo mbuta ɔnɛ: “Dimi nangaka nyu mbeya nyati: Ote a pami tshe eli Kristu, la ote a wumuntu eli pami; la ote a Kristu eli [Nzambi].”—1 Kor. 11:3.
10. Woho wetawɔso lowandji laki Jehowa mɛnyaka na?
10 Mbetawɔ lowandji laki wanɛ wakasɔnama oma le Nzambi mɛnyaka dia sho ndjaɛkɛka le Shɛso ka ngandji. Nde mbeyaka kɛnɛ tshɛ keta ndo kokaka tofuta woho akɔ wâmɛ. Ekɔ ohomba efula sho mbohɔka dikambo sɔ etena katɔnyɔla anto akina kana katokawɔ kɛlɛ ndo kashishawɔ ndjakimɛ kawɔ. Paulo akafunde ate: “Nyutshaki akambu tshe weyanyu ntsha, dia mbidjase la antu tshe ki.” Paulo akatɔtɔmiya dako sɔ la ɛtɛkɛta wayela ɛnɛ: “Anyasu wa ngandji, tanyuyasombweyaki; nyutshikeli kele ka [Nzambi] dihuli. Ne dia wakafundi vati: Somboya keli dikambu diami. Dimi layulemanya la wo, mbata Khumadiondjo.”—Romo 12:18, 19.
11. Ngande wakokaso mɛnya dia sho nɛmbɛka lowandji la Kristo?
11 L’atei wa etshumanelo sho pombaka nto mbetawɔ lowandji la wanɛ wakasɔnama oma le Nzambi. Enyelo tshapita 1 mɛnyaka Kristo Yeso okime “toto” ta lo etshumanelo lo lonya lande la pami. (Eny. 1:16, 20) Lo tshɛ katɔ, “toto” tɔsɔ tekɔ didjidji dia elui wa dikumanyi kana emendji wele lo tshumanelo. Emendji wakasɔnama ɛsɔ nɛmbɛka lowandji la Kristo ndo vɔ mbokoyaka yoho yakandasɛnaka la anto akina la ngandji tshɛ. Anto tshɛ wa lo etshumanelo mbetawɔka yɛdikɔ yakɔshi Yeso ya ‘ɔhɔmbɔ wa kɔlamelo ndo wa kɛsɔ’ mbashaka mbo ya ndɛ ya lo nyuma lo etena kakoka. (Mat. 24:45-47) Ɛlɔ kɛnɛ, woho walangaso mbeka ndo kamba la awui akɔ mɛnyaka dia sho nɛmbɛka lowandji la Kristo lo ɔmɔmɔ ndo kɛsɔ kimanyiyaka dia ki ndo kâmɛ monga.—Romo 14:13, 19.
Lo yɛdikɔ yakɔna yahombaso monga la ekanelo k’ɔlɔlɔ?
12. Bonde kele okitanyiya aso otsha le ewandji wekɔ la elelo?
12 Koko monga la ekanelo k’ɔlɔlɔ halembetshiya dia sho pombaka takɔ mbetawɔ kaso kana tona dia kitanyiya atɔndɔ wa Nzambi. Yɛdikɔ yakɔna yakɔshi Akristo wa lo ntambe ka ntondo lam’akawadjangɛ ewandji w’ɛtɛmwɛlɔ dia tshika mbetsha anto lo lokombo la Yeso? Petero la apɔstɔlɔ akina wakate la dihonga tshɛ ɔnɛ: “Dieli la su dia nkitanyia aui wa [Nzambi], aha aui w’antu atu.” (Etsha 4:18-20; 5:28, 29) Ɔnkɔnɛ, lam’atotshutshuya ewandji wa lɛɛta dia tshika sambisha lokumu l’ɔlɔlɔ ɛlɔ kɛnɛ, sho hatotshike, kânga mbakokaso tshikitanya toho taso ta sambisha dia kandola okakatanu ɔsɔ la ɔkɔmi tshɛ. Naka wambotoshimba dia sambisha lo luudu la luudu, sho mbeyaka nyanga toho tokina totshikitanyi ta sawola la akanga wa luudu ndo tetemala mɛmba ɔkɛndɛ wakatosha Nzambi. Woho akɔ wâmɛ mbele, etena kashimba “embuledi” nsanganya yaso, sho sanganaka lo woshɛshɛ lo elui wa totshitshɛ.—Romo 13:1; Heb. 10:24, 25.
13. Kakɔna kakate Yeso lo dikambo dia nɛmbɛ ewandji?
13 Lo Dako diande dia lo Dikona, Yeso akakɛnɛmɔla ohomba wa nɛmbɛ ewandji lo mbuta ate: “Naka untu omotshi nangaka dia ntukufunda, dia mbosa ukutu aye, kûkimo, ndi kose ndu koti diaye. Naka untu ambukokendjakendja kilometere otoi la wulu, kutshu la ndi kilometere hyendi.” (Mat. 5:40, 41)b Woho walɛmiyaso anto akina ndo wakombolaso mbakimanyiya totshutshuyaka nto dia sho sala kɛnɛ koleki kɛnɛ kakawatɔsɛngɔdi.—1 Kor. 13:5; Tito 3:1, 2.
14. Lande na kahatahombe pondjo ndjela wetshelo wa waa apɔsta?
14 Nsaki kaso ka monga la ekanelo k’ɔlɔlɔ hahombe pondjo tokonya dia sho mbetawɔ awui wa waa apɔsta. Lo kɛnɛ kendana la ‘anyaso wa kashi’ Paulo akafunde ate: “Keli shu kumbasha dihuli dia mbalembela nduku etenyi ka unya otoi, ne dia mete ka lukumu l’ololo kayali le nyu.” (Ngal. 2:4, 5) Kânga mbahaleke Akristo wa kɔlamelo pomana la wetshelo wa waa apɔsta, etena kahomanawɔ la wɔ, vɔ kukutɛka kɛnɛ kele mɛtɛ.
Ekɔ ohomba dia emendji monga la ekanelo k’ɔlɔlɔ
15. Lo yoho yakɔna yakoka emendji w’Akristo monga la ekanelo k’ɔlɔlɔ etena kasanganawɔ kâmɛ?
15 Dikambo dimɔtshi dialɔmbama le wanɛ wasɔnama dia kamba oko emendji ele monga la ekanelo k’ɔlɔlɔ. Paulo akafunde ate: “Umendji . . . ayali la memakana [la ekanelo k’ɔlɔlɔ].” (1 Tim. 3:2, 3) Dikambo sɔ diekɔ ohomba djekoleko etena kahomana apami wakasɔnama dia vɔ kɛtshanya awui wendana la etshumanelo. La ntondo ka vɔ mbɔsa yɛdikɔ mɔtshi, ɔmɔmɔ la l’atei awɔ ekɔ la lotshungɔ la mbisha kanyi yande, kânga mbele halɔmbama dia paka ekumanyi tshɛ mbisha kanyi mɔtshi. Etena kakɛtshanyawɔ, ekumanyi kɛmɔtshi mbeyaka tshikitanya kanyi yande l’ɔkɔngɔ wa dikumanyi dikina kotola yambalo yande oya lo atɔndɔ wa lo Afundelo wendana la dikambo diakɛtshanyawɔ. L’ɔtɛ wa tshininala kana kukutɛ kanyi yande hita, ekumanyi kambotshunda mbetawɔka kanyi ya dikumanyi dikina. Lo etatelo ka sawo, vɔ mbeyaka monga la tokanyi totshikitanyi, koko kana yimba lo ekimanyielo ka dɔmbɛlɔ kimanyiyaka dia dikumanyi diele la okitshakitsha ndo la ekanelo k’ɔlɔlɔ monga kâmɛ lam’asawɔ.—1 Kor. 1:10; Adia Efeso 4:1-3.
16. Dionga diakɔna diahomba kɛnɛmɔla omendji w’Okristo?
16 Lo elimu ande tshɛ, ekumanyi k’Okristo pombaka sala la wolo dia sukɛ tɛdikɔ ta teokrasi. Nde pombaka kɛnɛmɔla dionga sɔ kânga etena kembolande ɛkɔkɔ, nɛ dia diɔ diayowokimanyiya dia nɛmiya anto akina. Petero akafunde ate: “Nyulamaki ekoko wa [Nzambi] weli l’atei anyu. Nyuwalami, aha la khudu, keli la etema w’ongenongeno, uku eli lulangu la [Nzambi], aha dikambu di’ukundji, keli la yimba yolongoswami.”—1 Pet. 5:2.
17. Ngande wakoka ase etshumanelo tshɛ monga la ekanelo k’ɔlɔlɔ lo diɔtɔnganelo diawɔ la anto akina?
17 Esombe wa lo etshumanelo mandolaka ekimanyielo kawasha akɛnda ndo woho wawaɔsawɔ la nɛmɔ. Ndo nto, ɛlɔngɔlɔngɔ l’esekaseka nɛmiyaka epalanga waya la ɛnɔnyi efula lo olimu wa Jehowa. (1 Tim. 5:1, 2) Emendji wa Akristo nyangaka apami wele l’akoka wakoka nongola ɛkɛndɛ ndo vɔ mbowalowanyaka dia vɔ kokɛ ɛkɔkɔ wa Nzambi. (2 Tim. 2:1, 2) Okristo tshɛ la dia mbɔsa dako diaki Paulo diakasambiyama nɛ la nɛmɔ: “Nyukitanyia aui w’elombodi anyu, nyuyali l’okongo awo [kana ekanelo k’ɔlɔlɔ], ne dia vo watosenaka dia etema anyu, uku antu wayedika la [Nzambi] diango. Vo watutshaka dikambu so la ongenongeno, aha la lunyangu, ne dia dikambu diako hadiunyusha nduku waho.”—Heb. 13:17.
Ase nkumbo la dia monga la ekanelo k’ɔlɔlɔ
18. Lande na kele ekɔ dimɛna monga la ekanelo k’ɔlɔlɔ lo nkumbo?
18 Ase nkumbo lawɔ la dia monga la ekanelo k’ɔlɔlɔ. (Adia Kolosai 3:18-21.) Bible mɛnyaka ɛkɛndɛ wele la onto tshɛ la lo nkumbo k’Akristo. Ombutshi wa pami mbele owandji wa wadɛndɛ ndo onto la ntondo lahomba nɔmbɔla anande. Wadi pombaka mbetawɔ lowandji laki olonganyi ande ndo ana pombaka sala la wolo dia monga la okitanyiya, dionga diangɛnyangɛnya Nkumadiɔndjɔ. Ose nkumbo tshɛ kokaka kimanyiya dia kâmɛ ndo ki monga lɔkɔ lo monga la ekanelo k’ɔlɔlɔ ndo la wɛdimo. Bible kekɔ la bɛnyɛlɔ dimɔtshi diatokimanyiya dia nembetshiya dikambo sɔ.
19, 20. a) Sha otshikitanu wele lam’asa ɛnyɛlɔ ka Eliya la ka Jehowa lo kɛnɛ kendana la monga la ekanelo k’ɔlɔlɔ. b) Wetshelo akɔna wakoka ambutshi kondja oma lo bɛnyɛlɔ nɛ?
19 Lam’aki Samuɛlɛ eke dikɛnda, Eliya akakambaka oko ɔlɔmbɛdi wa lâdiko lo Isariyɛlɛ. Koko ana w’apami waki Eliya, Hɔfeni la Finehasi waki ‘anto w’anyanya’ waki ‘kɔnɛmiyaka Jehowa.’ Eliya akoke nkumu ya kɔlɔ lo dikambo diawɔ, mbidja ndo monanyi kakawasalaka la wamato wakakambaka lo ɛɔtwɛlɔ ka luudu la dipɛma l’esanganelo. Kakɔna kakandasale? Eliya akawatɛ ɔnɛ naka Jehowa mbakawasalɛ pɛkato, kete ndoko onto lakahombe mbalɔmbɛ. Koko nde kombasha dilanya ndo kombâhokola. Etombelo wakayala ele ana w’apami waki Eliya wakatetemala ndjala la lɔkɛwɔ la kɔlɔ. Lo ekomelo, Jehowa akate la losembwe tshɛ dia vɔ wakahombe ndjakema. Etena kakandoke losango la nyɔi kawɔ, Eliya ndamɛ akakamɛ om’a lonya. Ɔsɔ aki mɛtɛ etombelo wa kɔlɔ! Mbokɛmaka hwe dia woho wakadihe Eliya washo lo etsha awɔ wa kɔlɔ, ndo woho wakandetawɔ dia vɔ tetemala la etsha akɔ ɛsɔ, komonga dimɛna.—1 Sam. 2:12-17, 22-25, 34, 35; 4:17, 18.
20 Koko nyɛsɔ tɔsɛdingole sawo diaki lam’asa Nzambi la andjelo ande. Ɔprɔfɛta Mikaya akɛnyi ɛnɛlɔ ka diambo efula ka losanganya lɔmɔtshi lakɔtɔ Jehowa la andjelo ande. Jehowa akambola dia mbeya ondjelo akɔna wakakoke tokesa nkumekanga k’Isariyɛlɛ Ahaba dia mbâhola oma l’okudi. Jehowa akahokamɛ tokanyi takasha anande wa lo nyuma. Oma lâsɔ ondjelo ɔmɔtshi akate ate nde ayosala dikambo sɔ. Jehowa akawombola woho akɔna wayondodisala. Jehowa akangɛnangɛna kɛnɛ kakandawotɛ ko akawɔsɛngɔla dia nde tokotsha kanyi yakɔ. (1 Khum. 22:19-23) Shi kanga anto, mbuta ate ase nkumbo, kokaka kondja wetshelo oma lo ɔkɔndɔ ɔsɔ? Omi l’Okristo lele ndo ombutshi wa pami kokaka mbetawɔ tokanyi ta wadɛnde ndo t’anande. Lo wedi okina, waa wadi la ana la dia mbeya ɔnɛ naka wambosha kanyi mɔtshi, ayonga ɔlɔlɔ vɔ monga la ekanelo k’ɔlɔlɔ lo mbetawɔ ɛlɔmbwɛlɔ ka ɔnɛ lele Afundelo mboshaka lotshungɔ la mbɔsa yɛdikɔ.
21. Kakɔna kayotɔsɛdingola lo sawo diayela?
21 Tekɔ mɛtɛ la lowando le Jehowa lo kɛnɛ kendana la waohwelo ande wa ngandji ndo wa lomba lo dikambo dia monga la ekanelo k’ɔlɔlɔ! (Osam. 119:99) Lo sawo diayela, tayɔsɛdingola woho wele monga la ekanelo k’ɔlɔlɔ ndo la wɛdimo kimanyiyaka dia ɔngɛnɔngɛnɔ monga lo diwala.
[Nɔte ya l’ɛse ka dikatshi]
a Ɔpɔstɔlɔ Paulo akakambe la tshɛkɛta yele ekɔ wolo ndjikadimola lo tshɛkɛta ɔtɔi lo Ɔtɛtɛla. Dibuku dimɔtshi mbutaka ɔnɛ: “Monga la ekanelo k’ɔlɔlɔ nembetshiyaka mbetawɔ tokanyi t’anto akina ndo mɛnya dia sho mbaɔsaka la nɛmɔ.” Ɔnkɔnɛ tshɛkɛta shɔ yekɔ la kanyi ya aha tshininala lo tokanyi taso hita, mbuta ate aha tɛtɛɛ dia ndjela kiambokambo tshɛ ya lo ɛlɛmbɛ kana mpika dia paka tokanyi taso mbetshi la ntondo ko nkɛtɛ mbɔla. Yoho yɛnyaso dia tekɔ la memakana ele lo mbewɔ dia tshininala lo tokanyi taso hita.
b Enda sawo diele la ɔtɛ a dui ɔnɛ: ‘Naka wambokodjangɛ,’ diele lo Tshoto y’Etangelo ya Ngɔndɔ ka hende 15, 2005, lɛkɛ 23-26, lo Falase.
Ngande wayoyokadimola?
• Naa etombelo w’ɛlɔlɔ wakoka ndja oma lo monga la ekanelo k’ɔlɔlɔ?
• Ngande wakoka emendji mɛnya dia wekɔ la ekanelo k’ɔlɔlɔ?
• Lande na kele ekɔ ɔlɔlɔ monga la ekanelo k’ɔlɔlɔ l’atei wa nkumbo?
[Osato wa lo lɛkɛ 4]
Dikumanyi mbokoyaka yoho yakasɛnaka Kristo la anto akina la ngandji tshɛ
[Osato wa lo lɛkɛ 6]
Etena kasangana dikumanyi, kana yimba lo ekimanyielo ka dɔmbɛlɔ ndo monga la ekanelo k’ɔlɔlɔ kimanyiyaka dia kâmɛ monga