Okandwelo ɔmɔtshi wa diambo efula

ANANGƐSO asato w’ɛlɔngɔlɔngɔ wa lo Afrique centrale wakakombolaka dia tɔtɔ lo losanganya lɔmɔtshi la distrikɛ lakahombe salema lo ɛtshi kawɔ ka nkɛtɛ. Ngande wakawahombe koma lɛkɔ? Dihole sɔ diakangana la wɔ yɛdikɔ ya kilɔmɛtɛlɛ 90 lo mboka y’akona ndo ya ditshu ndo vɔ komonga la falanga ya futa mutuka. Vɔ wakɔshi yɛdikɔ ya mamba akalo asato, koko vɔ kokoka tana akalo w’amɛna.

Ekumanyi kɛmɔtshi ka l’etshumanelo kawɔ akɛnyi okakatanu waki lawɔ, ko nde akawasha dikalo diande di’omusu, koko diaki dieke dimɛna. Nde akâlembetshiya kɛnɛ kakandasale nde la anto akina l’ɛnɔnyi wakete dia vɔ ntshɔ lo losanganya lɔmɔtshi la distrikɛ. Ekumanyi kɛsɔ akâlɔmbɛ dia vɔ asato tengɔnyaka dikalo ɔtɔi. Ɔsɔ aki okandwelo wa wɔdu, koko waki wolo efula. Ngande wakakoke anto asato mbahema dikalo ɔtɔi na?

Dia mbewɔ yanyi ya wolo yakikɔ, anangɛso asɔ wakahomana la yosose ko wakakeleka eshikɔ awɔ lo dikalo. Oma lâsɔ, ɔmɔtshi l’atei awɔ akahemaka lo dikalo ko nde ntshɔ. Asekande ahende wakayawoyelaka l’ekolo esadi esadi. Lâdiko dia vɔ sala mɛtɛlɛ oko nkama tshanu, nde akahɔka ndo akɛkɛka dikalo la eshikɔ l’otamba ɔmɔtshi. L’etena kakɔ kâmɛ, nde akɛkɛka dikalo lo dihole diakakokaka asekande ahende diɛna diaha ambetshetshi a mboka diva. Ombahemi wa ntondo akatetemalaka la lɔkɛndɔ l’ekolo.

Etena kakakomaka asekande ahende lam’akandɛkɛ dikalo, ɔmɔtshi l’atei awɔ akadiahemaka, ko okina akatetemalaka kɛndakɛnda oko mɛtɛlɛ nkama tshanu l’ekolo ntondo ka ndjokoma mbala kande. Ɔnkɔnɛ, la ekongelo k’ɔlɔlɔ ndo la eshikikelo, anangɛso asato asɔ waki l’akoka wa kitshakitsha otale wa lɔkɛndɔ lawɔ la l’ekolo oma lo kilɔmɛtɛlɛ 90 otsha lo kilɔmɛtɛlɛ suke la 60. Welo awɔ komonga anyanya. Vɔ wakatônga kâmɛ l’anangɛwɔ ndo l’akadiyɛwɔ w’Akristo lo losanganya la distrikɛ lɔsɔ ndo wakaliyele l’ɔngɛnɔngɛnɔ tshɛ. (Euh. 31:12) Onde wɛ ayokoka sala kɛnɛ kakokayɛ sala ɔnɔnyi ɔnɛ dia mbɔtɔ lo losanganya la distrikɛ layosalema lo ɛtshi kanyu ka nkɛtɛ?