Ambola w’oma le ambadi
Lo mukanda ande wakandafundɛ ase Hɛbɛru, ɔpɔstɔlɔ Paulo akatɛkɛta dia “ahelu k’anya”. Onde nde akatɛkɛtaka dia ɔsɔnamelo wa dikumanyi kana dia dikambo dikina diotshikitanyi?—Heb. 6:2.
Ndoko ɔkɔkɔ wele la so wa monga l’eshikikelo, koko ondo Paulo akatɛkɛtaka dia wahelo w’anya l’oyango wa mbisha anto weshasha wa nyuma.
Bible hatɛkɛta dia wahelo w’anya wendana la ɔsɔnamelo w’emendji l’atei w’okongamelo. Mɔsɛ ‘akahɛ Jashua anya’ etena kakandɔsɔnɛ dia nde monga okitɔ ande. (Euh. 34:9) L’etshumanelo k’Akristo, apami amɔtshi waki l’akoka wakasɔnama lo tshimbo ya wahelo w’anya. (Etsha 6:6; 1 Tim. 4:14) Paulo akalake Timɔtɛ diaha mbahɛka anto anya esadi.—1 Tim. 5:22.
Koko, Paulo akakeketsha Akristo wa la Hɛbɛru dia vɔ ‘sala la wolo dia tshunda’ etena kakawashile la tshika “dietshelu dia ntunduntundu.” Oma lâsɔ, nde akatɛkɛta dikambo “di’ekadimwelu k’etema k’uma lu etsha wa nyoi ntu, ndu dia mbetawo k’utsha le [Nzambi], kame la wetshelu wa batiza, la ahelu k’anya.” (Heb. 6:1, 2) Onde ɔsɔnwɛlɔ wa dikumanyi waki dikambo dia ntondotondo diakahombe Akristo sala la wolo dia tshunda? Ndooko. Monga ekumanyi l’atei w’etshumanelo ekɔ oyango wahomba apami wambotshunda ndjadjɛ ndo vɔ pombaka mbɔ̂ngɛnangɛna.—1 Tim. 3:1.
Koko, wakakambaka la wahelo w’anya lo yoho kina. Lo ntambe ka ntondo, Jehowa akakadja wodja w’Isariyɛlɛ wa lo demba, ko aketawɔ Isariyɛlɛ wa lo nyuma oko wodja ande mbuta ate, etshumanelo k’Akristo w’akitami. (Mat. 21:43; Etsha 15:14; Ngal. 6:16) Weshasha wa nyuma wa sala ahindo, wele oko tɛkɛta l’ɛtɛkɛta ekina, aki djembetelo mɔtshi yakɛnyaka otshikitanu ɔsɔ. (1 Kor. 12:4-11) Etena kakakome Kɔnɛliyɔ nde la nkumbo kande ambetawudi, ambeki w’eyoyo asɔ wakalongola nyuma k’ekila, nɛ dia vɔ ‘wakatɛkɛta l’ɛtɛkɛta ekina.’—Etsha 10:44-46.
Lo tena dimɔtshi, weshasha wa sala ahindo wakashamaka oma lo wahelo w’anya. Etena kakasambisha Filipɛ lokumu l’ɔlɔlɔ la Samariya, anto efula wakabatizama. Olui-walɔmbɔla wakatome ɔpɔstɔlɔ Petero nde la Joani lɛkɔ. Lande na? Sho mbadiaka ɔnɛ: “[Apami ahende asɔ wakahɛ anto waki oma la batizama] anya, ku vo wakalungula nyuma k’ololo.” Dui sɔ diakalembetshiyaka dia vɔ wakalongola weshasha wa nyuma, mbuta ate akoka wakakoke anto akina mɛna. Sho mbeyaka dikambo sɔ nɛ dia Simɔna, ɔnɛ lakasalaka ntondo awui wa maji, akɛnyi akambo wakasale nyuma asɔ ndo la lokaki tshɛ nde akayange dia somba dikoka dia mbahɛ anto akina anya dia mbasha nyuma k’ekila dia vɔ sala ahindo. (Etsha 8:5-20) L’ɔkɔngɔ diko, anto 12 wa l’Ɛfɛsɔ wakayobatizama. Sho mbadiaka ɔnɛ: “Lam’akawahe Paulu anya, vo wakalungula nyuma k’ololo. Vo wakateketa l’eteketa ekina, wakati akambu wahatayi.”—Etsha 19:1-7; ɛdika la 2 Timote 1:6.
Ɔnkɔnɛ, lo Heberu 6:2, ondo Paulo akatɛkɛtaka dia wahelo w’anya dia mbisha ambetawudi w’eyoyo weshasha wa nyuma.