Onde wɛ âkohɔ?

Onde wɛ akangɛnangɛna wadielo wa numɛlɔ ya Tshoto y’Etangelo yeke katomba? Naka ngasɔ, kete enda dia kana wɛ kokaka kadimola ambola wayela anɛ:

• Ngande wakokaso tɛkɛta ‘ɔtɛkɛta wa pudipudi,’ mbuta ate akambo wa mɛtɛ wendana la Nzambi ndo la asangwelo ande dimɛna? (Zef. 3:9)

Oko wediɔ lo kɛnɛ kendana la tɛkɛta ɔtɛkɛta ɔmɔtshi, dia tɛkɛta ‘ɔtɛkɛta wa pudipudi,’ sho pombaka mpokamɛka dimɛna, mbokoya wanɛ watɛkɛta ɔtɛkɛta akɔ dimɛna, kimɛ nkombo y’abuku wa lo Bible ndo avɛsa amɔtshi, mboholaka awui wekaso, mbadiaka la dui dia wolo, sɛdingolaka gramatika, kana lokongɛ l’akambo wa mɛtɛ, tetemala pama, kongɛ wenya shikaa dia mbekaka ndo ‘tɛkɛtaka’ ɔtɛkɛta wa pudipudi.​—15/8, lɛkɛ 21-25.

• Naa awui amɔtshi wahombama dia mbeya woho wele Nzambi?

“[Jehowa] keli lukumbu landi,” ndo nde nangaka dia sho mbêya lo lokombo lɔsɔ. (Etum. 15:3) Nde ekɔ “[Nzambi k]a ngandji la ki.” (2 Kor. 13:11) Nde ekɔ “[Nzambi k]eya akambu tshe” ndo ka “panda.” (1 Sam. 2:3; Osam. 25:5) Nzambi ayoyasukanya la wanɛ waweya.​—1/9, lɛkɛ 4-7, lo Falase.

• Ngande wakoka kanyi ya “ushinga weli l’ekodi esatu” mendana la diwala?

“Ushinga weli l’ekodi esatu” ekɔ etelo ka didjidji. (Und. 4:12) Etena kakambawɔ la etelo kɛsɔ lo diwala, tɔ mendanaka la wadi l’omi wele ɛkɔdi ehende wokakatanyi la Nzambi lele ɔkɔdi wa woke. Atshukanyi wadja Nzambi lo diwala diawɔ mongaka la wolo wa lo nyuma wâkimanyiya dia vɔ ndɔshana la ekakatanu ndo dia vɔ monga la ɔngɛnɔngɛnɔ.​—15/9, lɛkɛ 16.

• “Ahelu k’anya” katɛkɛtama lo Heberu 6:2 mendanaka la dui diakɔna?

Wahelo w’anya ɔsɔ hawendana la ɔsɔnamelo wa dikumanyi di’Akristo, ondo vɔ mendanaka la wahelo w’anya dia mbisha weshasha wa nyuma k’ekila. (Etsha 8:14-17; 19:6)​—15/9, lɛkɛ 32.

• Ombutshi wa pami w’ɔlɔlɔ mbeyaka dia anande wekɔ l’ohomba wa na?

Ehomba awɔ ɛmɔtshi vɔɛnɛ: 1) ngandji kande, 2) ɛnyɛlɔ k’ɔlɔlɔ, 3) dihole di’ɔngɛnɔngɛnɔ, 4) mbetshama atɔndɔ wa lo nyuma, 5) ohokwelo, 6) ekokelo.​—1/10, lɛkɛ 18-21, lo Falase.

• Ngande wakoka wanɛ walɔmbɔla mɛnya dia vɔ nɛmiyaka anto akina?

Yoho mɔtshi yakoka ekumanyi sala dui sɔ ele nde hahombe pondjo nɔmba anto akina dia vɔ sala awui wahandetawɔ sala. Ndo nto, nde nɛmiyaka anto akina lo mbasha ɛkɔkɔ wâlɔmbande dia vɔ sala dui dimɔ kana wa ɛlɔmbwɛlɔ kawashande.​—15/10, lɛkɛ 22.

• Naa awui amɔtshi wakimanyiya dia nama dɔkɔlɔkɔ dia lo diwala?

Awui ahende anɛ wayonyokimanyiya: 1) Mbetsha diwala diayɛ lo dihole dia ntondo. 2) Monga la kɔlamelo l’akambo tshɛ. Oyadi diwala diayɛ diekɔ nge kana diekɔ lo ndjɛkayɛka, olonganyi ayɛ ekɔ l’ohomba wa mbeya dia wɛ ekɔ lo sala la wolo dia tondoya diwala dianyu.​—1/11, lɛkɛ 18-21, lo Falase.

• Wetshelo akɔna wakoka kondja ekumanyi k’Okristo oma lo woho wakakambaka olami w’ɛkɔkɔ w’ose Isariyɛlɛ la ɔkɔmba?

Olami w’ɛkɔkɔ akakambaka la ɔkɔmba dia nɔmbɔla ɛkɔkɔ ande. Etena kakɔtɔka kana kakatombaka ɛkɔkɔ oma lo lokoto, vɔ ‘waketaka l’ɛse k’ɔkɔmba’ dia nde mbâdia. (Lew. 27:32) Woho akɔ wâmɛ mbele, olami w’Okristo pombaka mbeya ndo mbidja ɛkɔkɔ waki Nzambi walamande yimba.​—15/11, lɛkɛ 9.

• Ngande wakoka mama ka nkumbo mɛnya dia nde mbɔsaka dia pudipudi ekɔ dui di’ohomba?

Diangɔ dia ndɛ kokaka mbɔtɔ mindo lo toho efula, omalɔkɔ nde pombaka solaka anya la ntondo ka toka mma ndo mbifɛka ofidi lo diangɔ dia ndɛ. Nde pombaka nama luudu pudipudi diaha bidi, mpɛkɛsɛnɛ la tolambalamba ndanya diangɔ. Nde pombaka nto solaka ndo kɔmaka ahɔndɔ mbala la mbala. Akambo asɔ tshɛ mbɔtɔnɛka la kɛnɛ kata Bible.​—1/12, lɛkɛ 9-11, lo Falase.