Ambola w’oma le ambadi
Lam’ele Yeso akasambisha l’Isariyɛlɛ w’otondo, ngande wakakoke ɔpɔstɔlɔ Petero mbuta dia ase Juda ndo ewandji awɔ wakadiakisha Yeso ‘aha la mbeya’ kɛnɛ kakawasale?—Etsha 3:17.
Etena kakandatɛkɛta l’olui w’ase Juda lo kɛnɛ kendana la ɔkɛndɛ waki lawɔ lo nyɔi ka Mɛsiya, ɔpɔstɔlɔ Petero akate ate: “Nyu nyakatshi dikambu so ne dia nyu kudieya, uku akatshi ndu embuledi anyu.” (Etsha 3:14-17) Ondo ase Juda amɔtshi kombeya ele Yeso ndo koshihodia wetshelo ande. Le akina, kɛnɛ kakakonya diaha vɔ mbetawɔ Mɛsiya ele woho wakiwɔ komonga la nsaki ka ngɛnyangɛnya Nzambi, woho wakawakananɛka kɔlɔ, ɔkɔmiya ndo lohetsho laki lawɔ.
Tende woho wakiwɔ komonga la nsaki ka ngɛnyangɛnya Nzambi la shɛngiya lo woho wakawɔsaka wetshelo waki Yeso. Yeso akakambaka mbala efula la wɛɛla lo wetshelo ande ndo nde akalembetshiyaka wanɛ tshɛ wakalangaka nyomeya awui akina. Koko amɔtshi l’atei awɔ wakahokamɛ Yeso wakayanganya la nde ndo kombidja welo efula dia shihodia dimɛna wetshelo ande. Lo diaaso dimɔtshi, kânga ambeki ande wakomala oma lo ɔtɛkɛta wa didjidji wakakambe la Yeso. (Joa. 6:52-66) Vɔ koshihodia dia Yeso akasha wɛɛla ɛsɔ dia menda woho wakiwɔ suke dia tshikitanya tokanyi ndo etsha awɔ. (Is. 6:9, 10; 44:18; Mat. 13:10-15) Vɔ kombeyaka nto ɔnɛ prɔfɛsiya kakatɛkɛta ɔnɛ Mɛsiya ayokamba la wɛɛla lo wetshelo ande.—Osam. 78:2.
L’ɔtɛ wakawakananɛka kɔlɔ, akina kombetawɔ wetshelo waki Yeso. Etena kakandetsha lo shinangɔnga ya lo ngelo kande Nazarɛta anto “wakambi.” Koko lo dihole dia mbetawɔ Yeso oko Mɛsiya, vɔ wakadje tâmu lo kɛnɛ kendana la oma lɛnɛ akandaye: “Uma lendi ambuyala untu one la akambu aso? . . . Aha utshudi mbendi, on’a Mariya, onangu Jakoba, Josefu, Judasi, la Simona? Akadiendi waha l’atei asu uka?” (Mako 6:1-3) Le ase Nazarɛta, wetshelo waki Yeso waki anyanya l’ɔtɛ wakandodiama lo nkumbo k’anyanya.
Ko kayotota dikambo di’ewandji w’ɛtɛmwɛlɔ? Efula ka l’atei awɔ kombidja yimba lo wetshelo waki Yeso l’ɔtɛ w’ɛkɔkɔ wa woho akɔ wâmɛ. (Joa. 7:47-52) Vɔ wakatone nto wetshelo ande nɛ dia vɔ wakakɔmiyaka Yeso l’ɔtɛ wakakotwama yambalo y’anto otsha le nde. (Mako 15:10) Aha la tâmu, anto efula wa lokumu wakanyange efula etena kakandashola dionga diawɔ dia dungi pende ndo lokeso lawɔ. (Mat. 23:13-36) Yeso aki la shadiya ya mbanya l’ɔtɛ wakawatshininalaka aha la mbidja yimba lo dikambo diande lo mbuta ɔnɛ: “Fono kayayi le nyu, embeyi w’elembe! Ne dia nyu nyakakosola ona sapi k’akambu wa bewu. Nyu nyame komboto [lo Diolelo], keli nyu nyakashimbi wane wakayangi mboto.”—Luka 11:37-52.
L’edja k’ɛnɔnyi esato l’etenyi, Yeso akasambisha lokumu l’ɔlɔlɔ lo wodja w’otondo. Nde aketsha nto anto efula dia vɔ mbisha lonya l’olimu ɔsɔ. (Luka 9:1, 2; 10:1, 16, 17) Yeso nde l’ambeki ande waketshaka dimɛna diakɔ diele Afarisɛ wakakiyana lo mbuta ɔnɛ: “Enda, wa la kete tshe wambûyela.” (Joa. 12:19) Ɔnkɔnɛ, hatokoke mbuta di’ase Juda efula kombeyaka ndoko ɛngɔ lo dikambo dia Yeso. Koko, vɔ wakatshininala dia tona ‘mbeya’ akambo wendana la Yeso Mɛsiya. Vɔ wakakoke pamia ewo ndo ngandji kakawokaka Mɛsiya, koko vɔ kosala dikambo sɔ. Amɔtshi wakasha lonya dia ndjakisha Yeso. Ɔnkɔnɛ, ɔpɔstɔlɔ Petero akakeketsha efula ka l’atei awɔ ɔnɛ: “Nyukadimuli etema, nyusikiso dia kolo yanyu nyimanyiama, dia deku dia nyodia ndja uma la ntundu ka Khumadiondjo. Ndi ayunyutumela Kristu lakandanyosonwela, Jesu ndame.” (Etsha 3:19, 20) Ekɔ dui di’ohomba efula dia mbeya dia nunu di’ase Juda wakatatɛ mbidja yimba lo wetshelo kâmɛ ndo “elombedi efula waketawo.” Vɔ kosalaka nto akambo aha la mbeya. Koko, vɔ wakayatshumoya ndo waketawɔma oma le Jehowa.—Etsha 2:41; 4:4; 5:14; 6:7.