Woho wakokayɛ shihodia Bible
2. Adiaka la yimba y’ɔlɔlɔ
Onde ɔngɛnyi ayɛ ɔmɔtshi atakotɛka awui wa kɔlɔ lo dikambo di’onto ɔmɔtshi leyɛ atɛnaka? Etena kayoyohomana l’onto ɔsɔ, onde kɛnɛ kakakotɛ ɔngɛnyi ayɛ kokaka kodiha washo diaha wɛ mɛna akoka ndo waonga w’amɛna wele l’onto ɔsɔ? Ngasɔ mbakokadiɔ monga lo dikambo dia Bible.
ƆPƆSTƆLƆ Paulo akatɛkɛta dikambo dia kɛnɛ kakoka tokomɛ naka hatadisha Bible la yimba y’ɔlɔlɔ. Lo kɛnɛ kendana l’ase Juda amɔtshi wa lo nshi yande, Paulo akafunde ate: “Dimi mbewaka mbuta dy’ɔlɔɔlɔ waakiwɔ dya vɔ weekɔ l’ohetoheto lee [Nzambi], koko ohetoheto waakiwɔ keema wa ɔnɛ w’anto wamana akambo mfundo.”—Romo 10:2, Dyokaneelo dy’Oyooyo.
Ase Juda amɔtshi wa lo ntambe ka ntondo konangaka mbetawɔ dia Yeso aki Mɛsiya kânga mbele Afundelo wa lo Hɛbɛru wakɛnyaka hwe dikambo sɔ. Yeso y’ose Nazarɛta akakotsha kɛnɛ tshɛ kakataka Afundelo wa lo Hɛbɛru lo dikambo dia Mɛsiya. Koko, tokanyi ta kɔlɔ taki la wɔ takashimbe efula k’ase Juda wa lo nshi shɔ diaha vɔ shihodia Ɔtɛkɛta wa Nzambi.
Wetshelo akɔna wakokaso kondja oma lo dikambo sɔ? Ekɔ ohomba efula dia mbadia Bible la yimba y’ɔlɔlɔ. Monga la tokanyi ta kɔlɔ kokaka shimba ombadi diaha nde shihodia akambo wa mɛtɛ wele lo Bible.
Ɛnyɛlɔ, nomb’ewo kɛmɔtshi k’awui w’ɔtɛmwɛlɔ ka la Caroline du Nord l’États-Unis akate dia Bible “kekɔ dibuku diaki anto, diele la tokanyi t’anto tele efula ka l’atei atɔ tshikitanaka lam’asatɔ ndo ndoko kanyi yakoka tosha ɛlɔmbwɛlɔ ka dimɛna lo lɔsɛnɔ.” Naka onto mbɔsa Bible oko “dibuku diakafundama oma le anto” koko aha oma le Nzambi, kete nde ayotona ɛlɔmbwɛlɔ ndo atɔndɔ wahandangɛnangɛna wele lɔkɔ.
Lo wedi okina, Bible tokeketshaka dia sho kieka l’etete. Lo kɛnɛ kendana l’ase Bɛrɔya wa lo nshi ya Paulo, Afundelo mbutaka ɔnɛ: “Vo waketawo diui l’uhetu: wakayangiayangia la lushi la lushi lu afundelu, kana akambu ane mete kewo.” (Etsha 17:11) L’ɛnyɛlɔ k’ambadi asɔ, wɛ pombaka minya tokanyi tshɛ ta kɔlɔ takoka koshimba diaha wɛ shihodia Bible. Adiaka Ɔtɛkɛta wa Nzambi la yimba y’ɔlɔlɔ ndo lomɔlomɔka dia mbishola losango la dimɛna efula l’oma le Nzambi lele lɔkɔ.