Yasukanya la Nzambi

Jehowa mbɔsaka anto wele la memakana la nɛmɔ

Walelu 12:1-15

OTAKO, kandjema ndo lotamanya mbele waonga waleka mɛnama le anto walanga monga la lokumu l’andja ɔnɛ. Ko onde waonga asɔ koka tosukanya la Jehowa Nzambi? Kema, Jehowa mbɔsaka atɛmɔdi ande wele la memakana la nɛmɔ. Dikambo sɔ mɛnamaka hwe oma l’ɔkɔndɔ wele lo Walelu tshapita 12. Awui akɔ wakasalema l’oswe wa Sinai, l’ɔkɔngɔ w’ase Isariyɛlɛ tshungɔ oma l’Edjibito.

Miriyama nde la Arɔna nondo diaki Mɔsɛ ‘wakatatɛ tɛkɛta kɔlɔ lo dikambo dia’ Mɔsɛ wa kosɛwɔ. (Divɛsa 1) Lo dihole dia vɔ mbewoya Mɔsɛ ndamɛ, vɔ wakɔtɛndɛ ndo ondo lo dianganya engunungunu awɔ lo pango k’otondo. Ondo Miriyama mbakahɔhɔla dui sɔ. Ɔkɔkɔ wa ntondo wakawangunanguna ele ɔnɛ Mɔsɛ ambotshuka womoto l’ose Kushi. Onde Miriyama aki la kandjema lo woho wakandafɔnyaka dia yambalo ya wamato akina yayotshɔ otsha le womoto ɔsɔ laki komonga ose Isariyɛlɛ?

Vɔ wakangunanguna nto l’ɔtɛ w’ɛkɔkɔ ekina. Miriyama l’Arɔna wakatetemalaka mbuta ɔnɛ: “Undi, [Jehowa] . . . nteketa[ka] paka uma le Mose utu? Ndi konteketa ndu uma le su?” (Divɛsa 2) Ɔkɔkɔ wa mɛtɛ wakawangunangunaka aki nsaki ka nyomonga la lowandji ndo la lokumu.

L’ɔkɔndɔ ɔsɔ, Mɔsɛ kombakadimola ndoko dui l’engunungunu awɔ. Ondo nde akakikɛ awui asɔ. Woho wakinde la solo dia lotutsha shikikɛka kɛnɛ kata Bible lo dikambo diande ɔnɛ nde aki “untu kanga memakana ka wulu” la nkɛtɛ.a (Divɛsa 3) Mɔsɛ kondjaswɛlɛ lo mbewoya anto lande na kakakambaka Jehowa la nde. Jehowa akahokamɛ ndo akasukɛ Mɔsɛ.

Jehowa akɔshi dia nde mbakawangunɛngunɛka koko aha Mɔsɛ. Ekɔ ngasɔ, nɛ dia nde mbakasɔnɛ Mɔsɛ. Lo pangwɛ wanɛ wakangunangunaka, Nzambi akawaohola dia nde aki la diɔtɔnganelo dia lânde la Mɔsɛ lo mbuta ɔnɛ: “Latoteketaka la ndi hwe l’unyo.” Oma lâsɔ, Jehowa akambola Miriyama l’Arɔna ɔnɛ: “Okoko wana wakinyu kumbuka woma dia nsemanela la . . . Mose?” (Divɛsa 8) Lo ngunɛngunɛ Mɔsɛ, vɔ mɛtɛ wakatɛkɛta kɔlɔ lo dikambo dia Nzambi. L’ɔtɛ wa dikambo sɔ, vɔ wakahombe mɛna kɛlɛ kaki Nzambi.

Miriyama lele ondo aki ɔpɔhɔdi wa dikambo sɔ akandama la hemɔ ka sudi. Aha la tshimbatshimba, Arɔna akasɛngasɛnga Mɔsɛ dia nde nɔmba Nzambi dikambo dia Miriyama. Ohokanyiya yema dia ɛkɔnwɛlɔ kaki Miriyama kolemanɛ kakianɛ l’onto lakandatɛkɛta kɔlɔ lo dikambo diande! La memakana tshɛ, Mɔsɛ akasale kɛnɛ kakawɔlɔmbɛ. Etena kakandatɛkɛta mbala ka ntondo l’ɔkɔndɔ ɔsɔ, Mɔsɛ akasɛngasɛnga Jehowa l’otema ɔtɔi lo dikambo dia kadiyɛnde. Miriyama akakɔnɔ, koko nde akahombe mbikikɛ sɔnyi l’edja ka nshi esambele yakandanganyema l’anto.

Ɔkɔndɔ ɔsɔ tokimanyiyaka dia mbeya waonga wangɛnyangɛnya Jehowa ndo etsha watonande. Naka sho nangaka ndjasukanya la Jehowa, kete sho pombaka sala la wolo dia minya lotamanya, kandjema ndo otako. Jehowa nangaka paka anto wele la memakana. Nde akalake ate: “Akanga a memakana wayukita kete, ndu wayongenangena la etshoko efula wa ki.”​—Osambu 37:11; Jakoba 4:6.

[Nɔte ka l’ɛse ka dikatshi]