Kamba kâmɛ kimanyiyaka dia nkumbo pama lo nyuma

YIMBA ya kamba kâmɛ yekɔ ohomba le nkumbo yalanga pama lo nyuma. Etena kakatonge Jehowa atshukanyi wa ntondo, nde akadje dikako vɔlɛ l’ohomba wa vɔ kamba kâmɛ. Eva akahombe kamba la Adama oko “ukimanyidi.” (Etat. 2:18) Wadi l’omi wotshukanyi pombaka kamba kâmɛ dia kimanyiyana. (Und. 4:9-12) Dia kotsha ɔkɛndɛ wakasha Jehowa ambutshi l’ana nɔmbaka nto dia vɔ kamba kâmɛ.

Nyɔtɛmɔlake Nzambi kâmɛ oko nkumbo

Barry nde la Heidi wekɔ l’ana atanu. Vɔ mɛnaka dia mbekaka Bible kâmɛ mbala la mbala lo nkumbo mbakimanyiyaka dia vɔ pama lo nyuma. Barry mbutaka ɔnɛ: “Lo wekelo wa nkumbo, dimi mbishaka ana tɔkɛndɛkɛndɛ tena la tena. Dimi mbeyaka mbalɔmba dia vɔ nɔngɔsɔla kɔmatɛrɛ y’oma lo asawo wa lo Réveillez-vous ! Sho mvusolaka nto kâmɛ mbɔtwɛlɔ yahombaso kamba la yɔ l’esambishelo di’ɔna tshɛ ndjimanyamanya.” Heidi kotshaka ɔnɛ: “Sho tshɛ tekɔ la listɛ l’eyango wa lo nyuma wahombaso kotsha ndo sho mvusolaka eyango ɛsɔ tena la tena lo wekelo wa lo nkumbo dia mɛna ehamelo watatasale.” Atshukanyi asɔ mɛnaka nto dia mbewɔ dia menda televiziɔ l’akɔlɔ amɔtshi kimanyiyaka nkumbo k’otondo dia ndjasha lo wadielo.

Nsanganya ya l’etshumanelo

Mike la Denise wakodia ana anɛi. Ngande wakakondja nkumbo kawɔ wahɔ lo kamba kâmɛ? Mike mbutaka ate: “Tena dimɔtshi, kânga mbakatayalɔngɔsɔlaka dimɛna dikambo dia nsanganya, sho kokomaka la wonya, koko takayɛna dia kamba kâmɛ akatokimanyiya dia sho komaka la wonya lo nsanganya.” Denise mbutaka nto ate: “Etena kakayolaka ana, vɔ tshɛ waki l’elimu wa sala. Kim, ɔnaso la womoto akakimanyiyaka dia katɛ ndo kitsha diangɔ dia ndɛ lo mɛsa.” Michael w’ɔnawɔ mbohɔka ɔnɛ: “Takongaka la losanganya lɔmɔtshi la l’etshumanelo Lushi la hende lo luudu laso. Ɔnkɔnɛ, takɔmbaka luudu, takasolaka odihe ndo takalɔngaka nkɔsa.” Matthew, ɔnawɔ okina kotshaka ɔnɛ: “Papa akayashikikɛka dia kalola esadi oma l’olimu lushi la losanganya dia tokimanyiya dia sho tshɛ monga suke.” Etombelo akɔna wakonge?

Welo wadja ase nkumbo tshɛ wekɔ ohomba

Mike mbutaka ɔnɛ: “Lo 1987, dimi la Denise takatatɛ kamba oko ambatshi mboka. L’etena kɛsɔ ko anaso asato wakikɔ la ngelo. Ahende l’atei awɔ nto wakayakomaka ambatshi mboka ndo akina wakayokambaka olimu wa wokelo wa mvudu lo Bɛtɛlɛ. Dui di’ɔngɛnɔngɛnɔ ele lo tshɛ kaso takakimanyiya anto 40 dia vɔ ndjakimɔ le Jehowa ndo batizama. Taki nto la diɛsɛ dia ntshɔ tokamba oko nkumbo l’olimu wa wokelo lo wedja ekina.”

Eelo, welo wadja nkumbo dia kamba kâmɛ wekɔ ohomba. Onde wɛ ambɛna toho tokina takokayɛ kamba kâmɛ la nkumbo kayɛ? Wɛ kokaka ndjashikikɛ dia monga la yimba ya kamba kâmɛ ayokimanyiya nkumbo kayɛ dia tɔ nyomohama lo nyuma.

[Osato wa lo lɛkɛ 28]

Mvusola mbɔtwɛlɔ kimanyiyaka di’onto pamia diewo diande dia sambisha