Ntɔngɔ y’akambo wa mɛtɛ yambokoma l’ahole wa tale
WODJA wa Touva wele la Russie wekɔ lo sidɛ ka wodja wa Sibérie ndo wekɔ lo sidɛ-ɛstɛ ka wodja wa Mongolie. Anto efula wa la Tuva mbidjasɛka lo ahole wa tale wele ekɔ wolo koma lɛnɛ ewɔ dia mbasambisha losango la Diolelo. Koko atete edja, olui ɔmɔtshi w’anto wakaye oma l’ahole efula wa wodja wa Touva oya lo kapitalɛ kawɔ Kyzyl dia ndjɔtɔ lo losanganya lɔmɔtshi. Maria, ombatshi mboka ɔmɔtshi wele la Kyzyl, akeye di’oyelo w’anto asɔ ndo akɔshi di’ɔsɔ ekɔ diaaso dia nde mbasambisha lokumu l’ɔlɔlɔ.
Maria kɔndɔlaka kɛnɛ kakete ate: “Kalasa yakametshaka yakalɔngɔsɔla losanganya latɛkɛta dikambo diendana l’okambelo wa kɔlɔ wa la nɔnɔ dia wolo. Anto oko 50 w’oma l’ahole wa tale wa Tuva wakaye oya lo losanganya lɔsɔ. L’atei awɔ mbaki embetsha, enganga, ekokedi w’ana ndo anto akina.” Le Maria, losanganya lɔsɔ aki diaaso dia dimɛna dia sambisha, koko ɔsɔ komonga dui dia wɔdu. Nde mbutaka ɔnɛ: “Oma ko eotwelo kami dimi lokongaka ɔsɔnyi ndo dimi mongaka l’okakatanu dia sambisha lo tshakitudi. Koko, lakalɔmbɛ Jehowa dia nde mbishami dihonga dia tondoya wɔma ami ndo dia kamba la diaaso sɔ dia sambisha.” Onde nde akatondoya?
Maria tetemalaka mbuta ɔnɛ: “Lakatane Réveillez-vous ! ɔmɔtshi wakatɛkɛtaka dikambo dia wɔma. Dimi lakɛnyi dia ‘Réveillez-vous ! ɔsɔ wayokoka ngɛnyangɛnya enganga’ ndo lakatshu la wɔ. Lushi lɔsɔ, onto ɔmɔtshi lakalakanyaka lo losanganya lɔsɔ akaye lo biro ami ndo lakawosha periodikɛ kɛsɔ. Nde akakilongola l’ɔngɛnɔngɛnɔ w’efula. Nde akate dia nde ekɔ onto loka wɔma efula. La wedi a pindju, lakɔtɔlɛ dibuku Les jeunes s’interrogent —Réponses pratiques, vɔlimɛ 1 ndo nde akadingɛnangɛna nto. Woho wakandetawɔ ekanda ɛsɔ akakonya dia dimi mbɔsa di’embetsha ekina wayɔngɛnangɛna vɔ lawɔ mbadia okanda ɔsɔ. Ɔnkɔnɛ, lakatshu la kartɔ k’otondo kaki l’abuku Les jeunes s’interrogent ndo ekanda ekina la kalasa.” Oshimu kele edja, anto wakɔshi abuku asɔ tshɛ. Maria mbutaka nto kɛnɛ kakatombe ɔnɛ: “Efula k’angɛnyi w’ombetsha wakamasha dibuku Les jeunes s’interrogent wakaye lo biro ami ndo wakamimbola ɔnɛ: ‘Lende akahawɔ abuku anɛ?’” Vɔ wakeye mɛtɛ dihole dia ndja ndjombola!
Losanganya lɔsɔ lakahombe komɛ Lushi la samalo. Maria kokambaka olimu lushi lɔsɔ, ɔnkɔnɛ nde akatshike mikanda lo mɛsa waki lo biro ande. Nde akafunde lo dibaya ɔnɛ: “Embetsha wa ngandji lee! Nyu kokaka mbɔsa ekanda ɛnɛ dikambo dianyu ndo di’ewotɔ anyu wayolanga mbadia. Mikanda w’amɛna efula ɛnɛ wayonyokimanyiya dia nyu tondoya l’olimu anyu ndo wayokeketsha nkumbo yanyu.” Kakɔna kakasalema? Maria mbutaka ate: “Lakatshu lo biro ami lushi lɔsɔ ndo lakatotanaka dia wakɔshi ekanda efula. Aha la tshimbatshimba, lakatɔsaka abuku ndo periodikɛ nkina.” L’ekomelo ka losanganya lɔsɔ, Maria akasha anto periodikɛ 380, abuku 173 ndo tobukubuku 34. Etena kakakalola anto wakɔtɔ lo losanganya lɔsɔ l’ahole wa tale wakawadjasɛka ndo wakawakambaka elimu, vɔ wakatshu l’ekanda ɛsɔ. Maria komiyaka ate: “Lekɔ l’ɔngɛnɔngɛnɔ w’efula lo woho wambokoma ntɔngɔ y’akambo wa mɛtɛ l’ahole wa tale wa wodja wa Touva!”—Und. 11:6.
[Kartɛ ka lo lɛkɛ 32]
(Dia mbeya awui tshɛ enda l’okanda)
RUSSIE
WODJA WA TOUVA