Lokumu l’ɔlɔlɔ lo ɛtɛkɛta 500

ETENA kakalɔmaka ta dimɔtshi lo wodja wa Rwanda, djui y’akadimudi amɔtshi wakalawɔ oma lo mvudu yawɔ ndo vɔ wakatshike diangɔ diawɔ tshɛ. Koko vɔ wakasale la wolo dia ntshɔ la waa ɔrdinatɛrɛ wa totshitshɛ lo mpango y’ase dawo. Lande na? Dia vɔ totetemala nkadimola ekanda walembetshiya Bible l’ɔtɛkɛta wa Kinyarwanda.

Osekaseka ɔmɔtshi wa lo sidɛ-ɛstɛ ka Asiya akafundaka lo ɔrdinatɛrɛ ande polo la dikɔlɔ di’otsho, alɔshana la ɔlɛmbɛlɔ, la dungu diaki l’etei ka luudu ndo woho wakahembɔhembɔka kura akokonya dia tokemadia olimu w’okadimwelo. Oyango akɔna waki la nde? Oyango waki la nde ele wa ekanda wakandakadimolaka ntondjama la wonya.

Akadimudi asɔ wekɔ l’atei w’akadimudi 2 300 wayakimɔ la lolango lawɔ dia nkamba olimu ɔsɔ l’ahole ndekana 190 l’andja w’otondo. Vɔ wekɔ l’ɛnɔnyi oma lo 20 polo suke la 90 ndo vɔ wekɔ lo nsala la wolo dia nkamba olimu ɔsɔ l’etete di’anto nsambema la losango l’oma lo Bible l’ɛtɛkɛta 500.—Enyelo 7:9.

Woho wa nsambisha anto wa l’ɛtɛkɛta efula

Lo ɛnɔnyi weke kambeta, olimu w’okadimwelo wa Ɛmɛnyi wa Jehowa wakahame lo yɛdikɔ yahawatahamaka ndoko lushi. Ɛnyɛlɔ, woho wakatondjamaka Tshoto y’Etangelo lo 1985 l’ɛtɛkɛta 23 mbala kakɔ ɔtɔi akɔsamaka oko dikambo dia mamba l’etena kɛsɔ. Ɛlɔ kɛnɛ, Tshoto y’Etangelo yotondjamaka l’ɛtɛkɛta oko 176 mbala kakɔ ɔtɔi dia ambadi wa l’andja w’otondo mbeka awui akɔ wâmɛ l’etena kakɔ kâmɛ.

Tshoto y’Etangelo mbele jurnalɛ yakɔ yâmɛ yatondjama mbala la mbala l’ɛtɛkɛta suke la 50. Lande na? Nɛ dia atshunda watondja ekanda dia mbasondja hawɔshi di’ekɔ ohomba ntondja ekanda l’ɛtɛkɛta watɛkɛtama l’ahole wodjashiwɔ. Koko, Ɛmɛnyi wa Jehowa wa l’andja w’otondo kimɔka weshasha wa la lolango dia Ɔtɛkɛta waki Nzambi ndo ekanda walembetshiya Bible monga dihole tshɛ diewɔ l’ohomba.—2 Koreto 8:14.

Anto mbɔsaka losango l’oma lo Bible lele l’ɔtɛkɛta awɔ la nɛmɔ di’efula. Ɛnyɛlɔ, ekanda walembetshiya Bible wakatondjama atete edja l’ɔtɛkɛta wa Miskito, ɔtɛkɛta watɛkɛtama oma le anto suke la 200 000 lo wodja wa Nicaragua. Womoto ɔmɔtshi akalɔmbɛ Buku di’ɛkɔndɔ wa lo Biblea l’ɔtɛkɛta wa Miskito, ndo pastɛrɛ kɛmɔtshi ka lo ngelo kawɔ aki lawɔ etena kakawawosha dibuku diakɔ. Lam’akandɛnyi dibuku dia dimɛna sɔ, pastɛrɛ kɛsɔ akakombola dia nde mboshadiɔ. Womoto ɔsɔ kombetawɔ mboshadiɔ kânga mbakawotɛ pastɛrɛ dia mbosha kilɔ 20 y’eloko dia mengɔnya la dibuku!

Lo ɛnɔnyi akumi weke kambeta ɛnɛ, ekanda walembetshiya Bible wakakadimɔma l’ɛtɛkɛta ndekana dikumi l’ehende watɛkɛta anto wa lo wodja wa Mexique, mbidja ndo ɔtɛkɛta wa Maya, wa Nahuatl ndo wa Tzotzil. Atakoke ɛnɔnyi dikumi wambeta wele lofulo la tshumanelo dia Ɛmɛnyi wa Jehowa diasala nsanganya lo ɛtɛkɛta ɛsɔ watɛkɛtama lo wodja wa Mexique ndo l’ɔtɛkɛta w’akanga a mpoke diakahame oma lo 72 polo lo ndekana 1 200. Ɛmɛnyi wa Jehowa mbeyaka monɛ losango la lo Bible l’etema w’anto, koko vɔ tshikɛka Nzambi ɔkɛndɛ wa nde ntondja ntɔngɔ y’akambo wa mɛtɛ.—1 Koreto 3:5-7.

Ekadimwelo ka Bible ka nshi nyɛ l’ɛtɛkɛta 80

L’ɛnɔnyi weke kambeta, Ɛmɛnyi wa Jehowa wakakambe olimu la wolo dia ntondja Les Saintes Écritures — Traduction du monde nouveau l’otondo kana l’etenyi l’ɛtɛkɛta 80. Etombelo akɔna waki la dui sɔ? Ɔmɛnyi wa Jehowa ɔmɔtshi wa lo wodja wa Afrique du Sud akate dikambo dia Bible kakatombe l’ɔtɛkɛta wa Tswana ate: “Ɔnɛ ekɔ ehomɔ ka dimɛna efula. Tɔ kayokimanyiya dia nshihodia ndo mbɔsa Ɔtɛkɛta waki Nzambi la nɛmɔ. Tɔtɛkɛta tele lɔkɔ tekɔ wɔdu mbadia ndo tɔ mbishaka ɔngɛnɔngɛnɔ.” Ombadi ɔmɔtshi wodjashi la Mozambique watɛkɛta ɔtɛkɛta wa Tsonga akafunde ate: “Monga l’ekanda ekina walembetshiya Bible aha la tshondo ya Bible ekɔ oko anto woka woho wakungola ndjadi la angadimu koko mvula halɔ! Koko mvula kakayɔlɔka etena kakatondjama Traduction du monde nouveau l’ɔtɛkɛta wa Tsonga.”

Lo yoho ya diambo, wanɛ wakadimola ndo wasambisha lokumu l’ɔlɔlɔ lele lo Bible wekɔ lo nkotsha prɔfɛsiya kɛmɔtshi k’edjedja. Yeso Kristo ndamɛ mbakatatshi prɔfɛsiya kɛsɔ ate: “Lukumu l’ololo lone la diulelu layusambishama lu kete tshe, uku omenyi le wedja tshe. L’okongo diku, ekumelu kayuya.”—Mateu 24:14.

[Nɔtɛ ka l’ɛse ka dikatshi]

[Tablo ka lo lɛkɛ 31]

(Dia mbeya awui tshɛ enda l’okanda)

TRADUCTION DU MONDE NOUVEAU

Kambotondjama la tshondo kana l’etenyi

1950 1*

1970 7*

1990 13*

2000 36*

2010 80*

EKANDA EKINA

1950 88*

1960 125*

1970 165*

1980 190*

1990 200*

2010 500*

*LOFULO L’ƐTƐKƐTA

[Esato wa lo lɛkɛ 30, 31]

Akadimudi oko 2 300 wamboyakimɔ la lolango lawɔ wekɔ lo nkadimola ekanda walembetshiya Bible lo ɛtɛkɛta 500

BÉNIN

SLOVÉNIE

ÉTHIOPIE

GRANDE-BRETAGNE