“Lotshungɔ lele la ɔna l’ohamelo wa lo nyuma”
LO NGƆNDƆ ka dikumi l’ahende 9, 2008, tshunda dimɔtshi dia lo wodja wa Suède diendana la lotshungɔ lele la ɔna diakasale losanganya lɔmɔtshi la lânde laki l’ɔtɛ a dui ɔnɛ: “Lotshungɔ lele la ɔna l’ohamelo wa lo nyuma.” Tokanyi efula takashama oma le atɛkɛtshi wakatomama oma l’ɔtɛmwɛlɔ w’ase Suède, oma l’ɛtɛmwɛlɔ ekina wa lo Lokristokristo, oma l’ɔtɛmwɛlɔ wa waa Mizilima ndo oma lo tshunda dia wanɛ wetsha dia onto la ohamelo ande pombaka mbeta la ntondo k’akambo tshɛ.
L’atei w’atɛkɛtshi asɔ mbaki ndo owandji ɔmɔtshi w’ɔtɛmwɛlɔ wakate ate: “Ndoko onto lakoka mbisha olembetshiyelo wa mɛtɛ ndo wa shikaa wɛnya ohomba w’efula wele la ɛkɔndɔ wa lo Bible lo lonyuma la ana.” Ngande wakotsha avɛsa wa l’Afundelo ehomba wa lo nyuma w’ana?
Owandji w’ɔtɛmwɛlɔ ɔsɔ akate ate: “Avɛsa ndo ɛkɔndɔ wekɔ l’akambo wakoka ana nkana la wɔ yimba lo vɔamɛ.” Nde akashile “ɔkɔndɔ wa Adama la Eva, wa Kɛna la Abɛlɛ, wa Davidi la Ngɔliyatɛ, wa eotwelo ka Yeso, wa Zakɛyɔ olongodi w’elambo, wɛɛla w’ɔna la lotshito ndo w’ose Samariya l’ɔlɔlɔ.” Vɔ wakashilama oko “ɛkɔndɔ ɛmɔtshi w’ɛnyɛlɔ wakoka nɔmbɔla tokanyi t’ɔna lo akambo w’ohomba wa lo lɔsɛnɔ l’onto ɛnyɛlɔ oko, lokeso, edimanyielo, diokanelo, lohetsho, woshelo wa sɔnyi, ofutelo w’abasa, ngandji k’onto l’ɔnango ndo kaha la lokaki.” Nde akakotsha ate: “Ɛkɔndɔ ɛnɛ mbishaka ɛnyɛlɔ k’ɔlɔlɔ kakoka monga la shɛngiya lo lɔsɛnɔ l’onto ndo mbotshutshuya dia nde mbɔsa yɛdikɔ mɔtshi.”
Lo mɛtɛ, nkeketsha anto dia mbadiaka Bible ekɔ dui dia dimɛna. Ko onde ana wekɔ mɛtɛ la akoka wa “nkana yimba lo vɔamɛ” la kɛnɛ kadiawɔ oma l’Afundelo ndo mbɔsa tɛdikɔ t’eshika?
Kânga epalanga wekɔ la ohomba w’onto ɔmɔtshi mbalembetshiya avɛsa wa l’Afundelo. Ɛnyɛlɔ, Bible totɛka dikambo dia pami kɛmɔtshi kaki komonga la akoka wa nshihodia awui wa lo nyuma lo “nkana yimba lo ndamɛ.” Pami kakɔ ko ɔlɔhɛ ɔmɔtshi w’ose Etiyɔpiya. Nde akadiaka prɔfɛsiya k’Isaya koko nde koshihodia kitshimudi yatɔ. Lam’ele nde akalangaka nshihodia losango laki ɔprɔfɛta ɔsɔ, nde aketawɔ elembetshiyelo wakawosha ombeki Filipɛ. (Etsha 8:26-40) Aha ɔlɔhɛ w’ose Etiyɔpiya ɔsɔ oto mbaki l’ohomba w’ekimanyielo. Sho tshɛ tekɔ la ohomba w’onto ɔmɔtshi tolembetshiya avɛsa wa l’Afundelo, djekoleko ana.
Bible totɛka ɔnɛ: “Akambu w’enginya watukelekamaka l’utema wa dikenda.” (Tuk. 22:15) Ana wekɔ la ohomba w’ɛlɔmbwɛlɔ ndo ambutshi awɔ wekɔ la ɔkɛndɛ wa mbasha wetshelo wendana la lɔkɛwɔ ndo wa lo nyuma w’oma lo Bible ndo w’oma lo kɛnɛ ketshama lo etshumanelo k’Akristo. Ana wekɔ la lotshungɔ la nongola wetshelo ɔsɔ. Oma ko tɔkɛndakɛnda tawɔ, vɔ wekɔ la ohomba w’ekimanyielo dia nkenga etshina ka wolo k’ohamelo awɔ wa lo nyuma dia vɔ ndjokoma ‘anto wambotshunda, wanɛ wele, oma l’ekambelo, wekɔ l’akoka wa nkana yimba wambekiyama dia ntshikitanya ɔlɔlɔ la kɔlɔ.’—Heb. 5:14.