Lama “pudipudi k’utema” lo tena nɛ dia wolo

VITTORIO MESSORI lele jurnalistɛ y’oseka Mupɛ akafunde lo kɛnɛ kendana l’awui wa dieyanelo dia kɔlɔ weke kasalema l’atei w’ɔtɛmwɛlɔ w’aseka Mupɛ wa lo wodja wa Italie lo jurnalɛ mɔtshi yelɛwɔ La Stampa ɔnɛ: “Ndoko onto lakoka mbidja tâmu dia nama lɔkɛwɔ la pudipudi ekɔ tshondo y’okakatanu l’atei w’ɔtɛmwɛlɔ w’aseka Mupɛ ɛlɔ kɛnɛ. Ndo asasɛrdɔsɛ hawotolama lɔkɛwɔ la pudipudi naka vɔ mbasha lotshungɔ la ntshukana lam’ele pursa 80 l’atei awɔ mbeyanaka la wanyawɔ apami kana l’ana w’apami w’akɛnda.”

Aha la tâmu, woho wambokokanɛ akambo wa kɔlɔ ekɔ djembetelo yɛnya dia tekɔ lo nsɛna lo “nshi y’ekumelu” ya dikongɛ di’akambo nɛ. (2 Tim. 3:1-5) Oko wadiɛnya eyangelo weke kasalema, woho wambolana lɔkɛwɔ l’ɔtɛ w’awui asɔ ekɔ la shɛngiya ya kɔlɔ aha paka le anto lo tshɛ kawɔ, koko ndo le wanɛ wayata ɔnɛ ekambi waki Nzambi mbewɔ. Etema awɔ wa kɔlɔ ndo wa mindo mbatshutshuyaka dia ntsha akambo wa kɔlɔ. (Ef. 2:2) Ɔnkɔnɛ, Yeso kondjakesa etena kakandate dia “uma l’utema katutumbaka tukanyi ta kolo, diakanelu, luseka, munanyi, uvi, omenyi wa kashi, la dimamanyelu.” (Mat. 15:19) Koko, Jehowa Nzambi kombolaka di’ekambi ande nanga “pudipudi k’utema.” (Tuk. 22:11) Lâsɔ, ngande wakoka Okristo nama otema wa pudipudi lo tena nɛ dia wolo?

Kɛnɛ kalembetshiya monga la “utema wa pudipudi”

Mbala efula Bible kambaka la tshɛkɛta “otema” lo yoho ya didjidji. Lo ndjela dibuku dimɔtshi, tshɛkɛta ya lo Bible yokadimɔmi ɔnɛ otema nembetshiyaka “etenyi koshami etale l’etei ka demba di’onto” ndo tɔ “kekɔ etenyi ka lo demba di’onto kele l’ohomba lo washo wa Nzambi, kohikami diɔtɔnganelo diele lam’asa onto la Nzambi ndo kashikikɛ lɔkɛwɔ lahomba onto monga la lɔ.” Otema nembetshiyaka mɛtɛ lonto laso la l’etei k’otema. Oko wɛnyamidiɔ l’ɛtɛkɛta woshidiso la diko engo, Jehowa tɔsɛdingolaka otema w’ekambi ande ndo towɔsaka la nɛmɔ.—1 Pet. 3:4.

Lo Bible, tshɛkɛta “pudipudi” nembetshiyaka pudipudi ka lo demba. Koko, tshɛkɛta shɔ nembetshiyaka nto lɔkɛwɔ kana ɔtɛmwɛlɔ wele bu mindo. Lo Dako diande dia lo dikona, Yeso akate ate: “Wane weli la etema wa pudipudi, weko la otshoko.” Lo divɛsa nɛ, nde akatɛkɛtaka dia wanɛ wele pudipudi l’etei. (Matt. 5:8) Nango, nsaki ndo eyango awɔ wekɔ pudipudi. Vɔ nangaka Jehowa l’etema awɔ tshɛ, oma k’ɛse otema koko aha lâdiko di’ɛlɔmɔ l’ɔtɛ wa ngandji ndo lowando lele la wɔ. (Luka 10:27) Shi wɛ lawɔ nangaka monga pudipudi lo yoho ya ngasɔ?

Nama “utema a pudipudi” bu dui dia wɔdu

Ekambi wa Jehowa hawohombe monga tsho ‘l’anya wele bu l’onongo,’ koko vɔ pombaka monga ndo la “utema a pudipudi.” (Osam. 24:3, 4) Ɛlɔ kɛnɛ mbamboleka ekambi waki Nzambi monga l’okakatanu dia nama “utema a pudipudi.” Satana l’andja walɔmbɔlande, mbidja ndo demba diaso diele bu kokele diekɔ lo tɔsɛngiya dia sho mangana la Jehowa. Dia nshika tanga la ntondo ka tɔsɛngiya tɔsɔ, ekɔ ohomba efula dia sho nanga “pudipudi k’utema” ndo kikukutɛ. Nsala ngasɔ ayotokokɛ ndo ayotokimanyiya dia ntetemala monga angɛnyi wa Nzambi. Ngande wakokaso nama otema wa pudipudi?

Heberu 3:12 tɔhɛmɔlaka ɔnɛ: “Anyasu, nyewo, untu omotshi l’atei anyu atukuyala la utema wa kolo waha la mbetawo, la ntombokwela [Nzambi k]a lumu.” Hatokoke nama “utema a pudipudi” naka sho monga l’otema “waha la mbetawo.” Tokanyi takɔna tambodianganya Satana Diabolo dia ndanya mbetawɔ kele l’anto le Nzambi? L’atei wa tokanyi tɔsɔ mbele ndo wetshelo w’ohilwelo, lɔkɛwɔ la kɔlɔ lele l’ase ɛtɛmwɛlɔ ndo woho wahetawɔ anto ɔnɛ Afundelo w’Ekila wakasambiyama oma le Nzambi. Hatokoke mbetawɔ dia mbisana la tokanyi ta kɔlɔ ta ngasɔ tatɔla otsha lo nyɔi. (Kol. 2:8) Wadielo wa Bible wa lushi la lushi ndo okanelo wa yimba wekɔ ohomba efula di’onto ndjakokɛ oma lo tokanyi ta ngasɔ. Ewo ka mɛtɛ ka Ɔtɛkɛta wa Nzambi kayofudia ngandji kokaso Jehowa ndo lowando lele la so lo kɛnɛ katosalɛnde. Monga la ngandji ndo la lowando la ngasɔ ekɔ ohomba efula naka sho nangaka ntona tokanyi ta kashi ndo ntetemala monga la mbetawɔ ka wolo le Jehowa dia sho nama pudipudi k’otema.—1 Tim. 1:3-5.

Naka nsaki ya demba yambotoyɛ

Yoho kina yakokaso ndɔshama diaha nama “pudipudi k’utema” mendanaka la nsaki ya demba ndo ya lomombo la l’emunyi. (1 Joa. 2:15, 16) Ngandji ka falanga kana nsaki ka ndjamɔtshɛ ekundji ndo ka monga la diangɔ dia l’emunyi kokaka mfukutanya otema w’Okristo ndo mbokonya lo nde nsala akambo wahɔtɔnɛ la lolango la Nzambi. Akristo amɔtshi wakayoshisha losembwe lawɔ l’olimu, wakakese wanyawɔ kana wakayova falanga kana diangɔ dikina diele bu diawɔ.—1 Tim. 6:9, 10.

Lo wedi okina, naka sho mboka wɔma dia nyangiya Jehowa lo nanga losembwe ndo naka sho ndjashikikɛ dia monga la nkum’otema k’ɔlɔlɔ, kete tayɛnya dia sho nangaka “pudipudi k’utema.” Ngandji ka ngasɔ totshutshuyaka dia sho ntetemala “ndjala la [losembwe] lu akambu tshe.” (Heb. 13:18) Nsala akambo la losembwe koka monga tshondo y’esambishelo. Emilio, Ɔmɛnyi wa Jehowa wa lo wodja wa Italie wele shufɛlɛ lo kɔpanyi kɛmɔtshi kɛmbɛmbawɔ anto, akatɔngɔna tshapatapa yaki la dɔlara 680. Asekande wa l’olimu wakambe woho wakandasha owandji ande w’olimu tshapatapa shɔ ko nde akayoyishaka kanga yɔ. Angɛnyi waki Emilio amɔtshi wa l’olimu wakambe l’ɔtɛ wa losembwe lande ko wakayoyashaka lo Bible ndo wakayotatɛ mbeka. Etombelo wakayala la dikambo sɔ ele, anto esambele w’oma lo nkumbo shɔ tshɛ waketawɔ akambo wa mɛtɛ. Eelo, monga la dionga dia losembwe dioye oma l’otema wa pudipudi kokaka ntshutshuya anto akina dia vɔ ntombola Nzambi.—Tito 2:10.

Dui dikina diakoka monga la shɛngiya ya kɔlɔ lo pudipudi k’otema w’Okristo ele mbɔsa awui wa dieyanelo lo yoho ya kɔlɔ. Woho wɔsa anto efula dia ekɔ dimɛna nsala monanyi, loseka ndo dieyanelo dia lam’asa pami la pami kana womoto la womoto kokaka mfukutanya otema w’Okristo. Onto lasala dieyanelo dia mindo kokaka nsɛna lɔsɛnɔ la dungi pende lo mbishɛ pɛkato kande. Dui sɔ hɛnya mɛtɛ ɔnɛ onto ekɔ la “pudipudi k’utema.”

Gabriele akabatizama lam’akinde l’ɛnɔnyi 15 ndo nde akatatɛ nkamba olimu w’ombatshi mboka mbala kakɔ ɔtɔi. Koko l’ɔkɔngɔ diko, nde akayotatɛ ntshɔ l’ahole wakɛnyawɔ tɔkɛnyɔ l’otsho kâmɛ l’angɛnyi wa kɔlɔ. (Osam. 26:4) Kɛsɔ mbakokonya dia nde ntatɛ monga la lɔkɛwɔ la mindo ndo nsɛna lɔsɛnɔ la dungi pende, ndo nde akayotshanyemaka oma l’etshumanelo k’Akristo. Ohokwelo w’oma le Jehowa ɔsɔ akôtshutshuya dia nde nkana yimba efula. Gabriele mbutaka ate: “Lakayotatɛka nsala akambo tshɛ wakimi kosalaka ntondo l’otema ɔtɔi. Lakadiaka Bible lushi tshɛ, lahemba dia mboka kɛnɛ kakambutɛka Jehowa mɛtɛ ndo lakekaka abuku w’okongamelo la yambalo tshɛ. Lakayɛnaka dia ndjasha dia salaka wekelo w’onto ndamɛ mbishaka onto ɔngɛnɔngɛnɔ ndo wadielo wa Bible kâmɛ l’alɔmbɛlɔ wa l’etete keketshaka onto.” Dui sɔ diakakimanyiya Gabriele dia nde ntshika lɔkɛwɔ la kɔlɔ ko nyomonga la diɔtɔnganelo dia dimɛna la Jehowa.

Gabriele okamba olimu w’ombatshi mboka nto kâmɛ la wadɛnde. Kɛnɛ kakokomɛ shikikɛka dia wekelo wa Bible ndo wa ekanda watondja ‘ɔhɔmbɔ wa kɔlamelo ndo wa kɛsɔ’ kokaka nkimanyiya onto dia nde monga la otema wa pudipudi ndo ntona akambo wa mindo.—Mat. 24:45; Osam. 143:10.

Woho wa nama “pudipudi k’utema” la ntondo k’ohemba

Tɔsɛngiya t’oma le andɔshi, ekakatanu wendana l’ekondjelo ndo hemɔ ya wolo yekɔ lo kiɔkɔ y’ɔkɔmwɛlɔ w’ekambi ɛmɔtshi waki Nzambi. Lo diaaso dimɔtshi, etema awɔ ndjongaka la shɛngiya ya kɔlɔ le wɔ. Kânga nkumekanga Davidi akayaoke ngasɔ ndo akate ate: “Lumu lami lambolembiama, ndu utema ami ambukalema.” (Osam. 143:4) Kakɔna kakokimanyiya dia nde ntondoya lo tena dia ngasɔ? Davidi akohɔ woho wasalɛ Jehowa ekambi ande akambo ndo woho wakandôtshungola nde ndamɛ. Nde akakane yimba lo kɛnɛ kakasale Jehowa dia wahɔ wa lokombo lande la woke. Davidi akatetemala nkanyiya di’elimu waki Nzambi. (Osam. 143:5) Woho akɔ wâmɛ mbele, nkana yimba lo dikambo dia Otungi aso ndo kɛnɛ tshɛ kambondosala ndo katetemalande la tosalɛ ayotokimanyiya etena keso l’ohemba.

Sho koka monga la lonyangu etena katonyangiyawɔ. Kanyiyaka dui sɔ mbala la mbala koka tokonya dia sho nkanɛ anangɛso kɔlɔ. Sho mbeyaka ndjokoma polo lo hatoyokana l’anto akina lo nkakitɔna la wɔ ndo lo ntona dia ndjasha le wɔ. Ko onde nsala ngasɔ ayɔtɔnɛ la nsaki kele la so ka monga la “pudipudi k’utema”? Mbokɛmaka hwe dia, ndjadjɛ oyango wa monga la woho w’otema wa ngasɔ mendanaka la diɔtɔnganelo diasaso la wanyaso Akristo ndo la kɛnɛ kasalaso etena katomba ekakatanu.

L’andja ɔnɛ wataleke mfukutana tsho ndo wele lɔkɛwɔ l’anto wasɛna lɔkɔ lekɔ lo talana, sho Akristo wa mɛtɛ ntshikitana l’anto akina l’ɔtɛ walangaso “pudipudi k’utema.” Etena keso la ki ka l’etei k’otema kaya oma lo woho wasalaso lolango laki Nzambi, sho mongaka la nsɛnɔ y’amɛna. Lâdiko di’akambo tshɛ, sho ngɛnangɛnaka diɔtɔnganelo dia ma ma diasaso la Otungi aso Jehowa Nzambi lalanga wanɛ wele la “etema wa pudipudi.” (Osam. 73:1) Eelo, oko wakadite Yeso, ndo sho koka monga l’atei wa wanɛ wayonga l’ɔngɛnɔngɛnɔ nɛ dia “vo wayena [Nzambi]” etena kayondofuta wanɛ walanga “pudipudi k’utema.”—Mat. 5:8.