Wakasangana lo ngandji—Alapɔlɔ w’oma lo losanganya la l’ɔnɔnyi

WANƐ wakasangana lo losanganya la l’ɔnɔnyi lo Mbalasa ka nsanganya ya weke k’Ɛmɛnyi wa Jehowa ka la Jersey City, l’osomba wa New Jersey, lo wodja w’États-Unis waki la ɔngɛnɔngɛnɔ w’efula. La pindju ka Ngɔndɔ ka dikumi 3, 2009, anto ndekana 5 000 wakasangana lo losanganya la 125 la l’ɔnɔnyi la Watch Tower Bible and Tract Society of Pennsylvania. Nunu di’anto akina wakahokamɛ ndo wakayele losanganya lɔsɔ l’ekimanyielo ka dihomɔ diatondja awui ndo l’ekimanyielo ka vidɛo lo mvudu shato ya Bɛtɛlɛ ka l’États-Unis ndo Bɛtɛlɛ ka la Canada. Anto akɔ 13 235 tshɛ wakasangana l’ɔtɛ wa ngandji kokawɔ Jehowa, wakangɛnangɛna losanganya la wenya esato wa tango lɔsɔ.

Geoffrey Jackson, ɔmɔtshi la l’Olui-walɔmbɔla mbaki ɔnɔmbɔdi wa losanganya lɔsɔ. Nde akalitatshiya lo mbɔtshiya olui w’amembi w’ase Bɛtɛlɛ wakembe esambo w’oma lo dibuku diaso di’esambo di’oyoyo. David Splane, ɔnangɛso okina la l’Olui-walɔmbɔla lakalɔmbɔla olui ɔsɔ w’amembi akɛnya lo tshena pe ohomba wa mishiki l’ɔtɛmwɛlɔ wa pudipudi. Wakalɔmbɛ ampokami dia vɔ memba esambo esato w’eyoyo. Olui w’amembi wakembe esambo akɔ ntondo, ko oma lâsɔ olui w’amembi l’ampokami ndjemba esambo ɛsɔ kâmɛ. Okambelo wa l’olui w’amembi aki tsho dia losanganya la lânde lɔsɔ. Hatɔlɔmbɛ tshumanelo, etshimbedi kana adistrikɛ dia nsala dikambo sɔ.

Alapɔlɔ w’oma lo Bɛtɛlɛ mɔtshi

Ase kɔmite ya filialɛ wakelamɛ lo losanganya lɔsɔ wakasha alapɔlɔ w’oma lo Bɛtɛlɛ tshanu. Kenneth Little akɛnya dia kema edja, Bɛtɛlɛ ka la Canada kayotatɛ ntondja periodikɛ efula dikambo dia wodja w’États-Unis ndo wa Canada. Etombelo wayonga la yɛdikɔ shɔ ele lofulo la periodikɛ latondja Bɛtɛlɛ kɛsɔ nshi nyɛ layolodiama lo dikumi. Dia nkotsha oyango ɔsɔ, mashinyi w’oyoyo watondja ekanda wambokondja Bɛtɛlɛ kɛsɔ wayokambaka wenya 16 lo lushi.

Reiner Thompson akasha alapɔlɔ wendana la olimu wa Diolelo wakambema lo wodja wa République Dominicaine, ndo Albert Olih akatɛkɛta dia elimu aso wakambema lo wodja wa Nigéria. Emile Kritzinger l’oma lo wodja wa Mozambique akate dia l’ɔkɔngɔ w’ɛnɔnyi akumi w’ɛhɛnyɔhɛnyɔ, Ɛmɛnyi wa Jehowa wa lo wodja ɔsɔ wakadjama lo dibuku dia lɛɛta lo 1992. Wedja akɔ esato ma la monga la ohamelo w’efula lo lofulo l’apandjudi. Viv Mouritz l’oma lo Bɛtɛlɛ ka l’Australie akatɛkɛta dia woho wambohama olimu la Timor Oriental, olimu walɔmbwama oma le anangɛso wa lo Bɛtɛlɛ ka l’Australie.

Kɔmite ya lo Olui-walɔmbɔla

Lo 1976, elimu tshɛ w’Ɛmɛnyi wa Jehowa wakatatɛ nɔmbwama oma le kɔmite shamalo ya lo Olui-walɔmbɔla. L’ɔkɔngɔ diko, anto w’oma l’olui w’ɛkɔkɔ ekina wakasɔnama oko akimanyedi. Nshi nyɛ, anto 23 w’oma l’atei w’ɛkɔkɔ ekina wekɔ lo nkamba oko akimanyedi. Wakakɔnya asamalo oma l’atei awɔ. Lo tshɛ kawɔ, vɔ waketsha ɛnɔnyi 341 l’olimu wa lo tena tshɛ, mbuta ate yɛdikɔ ya l’atei atei y’ɛnɔnyi 57 l’onto ndo l’onto.

Don Adams, lakɔtɔ lo Bɛtɛlɛ lo 1943, akalembetshiya dia Kɔmite kalɔmbɔla kengama la ɛnɔmbɔdi wa kɔmite nkina tshanu. Tɔ ndjashikikɛka dia kɔmite nkina tshanu yekɔ lo nkɛndakɛnda dimɛna. Kɔmite kɛsɔ mendaka nto akambo wa wanyandja wa weke, ɛhɛnyɔhɛnyɔ, mpokoso ndo akambo akina wa wanyandja wakomɛ Ɛmɛnyi wa Jehowa wa l’andja w’otondo.

Dan Molchan akatɛkɛta di’olimu wakamba Kɔmite kenda ase Bɛtɛlɛ. Tɔ mbele l’ɔkɛndɛ wa nkotsha ehomba wa lo nyuma ndo wa lo demba w’ase Bɛtɛlɛ 19851 wa l’andja w’otondo. David Sinclair akɛnya dia Kɔmite ka otondjelo w’ekanda mbênda olimu w’osombelo wa diangɔ dia ndɛ ndo dihomɔ di’olimu diakamba l’ase Bɛtɛlɛ. Oma lâsɔ, Robert Wallen, lambokamba suke l’ɛnɔnyi 60 lo Bɛtɛlɛ, akate dia Kɔmite k’olimu mbênda olimu w’esambishelo w’ekambi waki Jehowa ndo olimu wakambema lo tshumanelo. William Malenfant akatɛkɛta di’olimu wa wolo wakamba Kɔmite ka wetshelo dia nɔngɔsɔla ekongelo ka nsanganya ya weke. Ndo l’ekomelo, John Wischuk akɛnya woho wenda Kɔmite k’ofundelo dia olimu w’ɔlɔngɔswɛlɔ ndo w’okahanyelo w’ekanda aso mbeta dimɛna.a

Divɛsa dia l’ɔnɔnyi 2010 tɛkɛtaka dia ngandji

Oma lâsɔ, asawo asato wakashama oma le ase Olui-walɔmbɔla. Gerrit Lösch akatatshiya sawo diande la dimbola di’ɔnɛ: “Onde wɛ nangaka anto akina kôka ngandji?” Nde akate dia ngandji ekɔ dui diele ohomba le anto ndo sho tshɛ ndjaokaka dimɛna etena katoka anto ngandji. Diɛsɛ oma lo ngandji ka Jehowa mbeso la lɔsɛnɔ, nɛ dia nde akatotonge oma lo ngandji k’otamanya kele la nde. Dui dia ntondo diatotshutshuya dia nsambisha ndo mbetsha anto akina ele ngandji kokaso Jehowa.

Ngandji kohikami lo atɔndɔ wa lo Bible hatotshutshuya tsho dia nanga wanyaso, koko ndo atunyi aso. (Mat. 5:43-45) Ampokami wakakeketshama dia nsɛdingola kɛnɛ kakakomɛ Yeso l’ɔtɛ aso, mbuta ate wakɔkɔmɔla eshingɔ, wakɔsɔkɛ, wakawotɛ sɔi ndo wakawongola dikɔnga. Kânga mbakôkomɛ awui asɔ, nde akalɔmbɛ dikambo di’asɔlayi wakôhanɛ l’otamba. Onde dui sɔ hatotshutshuya dia mbôka ngandji k’efula? Oma lâsɔ, ɔnangɛso Lösch akewoya divɛsa dia l’ɔnɔnyi 2010, divɛsa diakɔ ko: 1 Koreto 13:7, 8 lɛnɛ adiaso ɔnɛ: ‘Ngandji mbikikɛka akambo tshɛ. Ngandji hahekɔ pondjo.’ Hatolongamɛ tsho dia nsɛna pondjo pondjo, koko ndo dia sho mboka anto ngandji ndo mbokama ngandji pondjo pondjo.

Onde wɛ ekɔ lo tatshu la mutuka wayanga nshila esasɛ?

Samuel Herd akatatɛ sawo diande la ɛnyɛlɔ kɛmɔtshi. Ohɔsa dia ɔngɛnyi ayɛ ɔmɔtshi ambokɔsa dia nyu munda lɔkɛndɔ la kilɔmɛtɛlɛ 50 lo mutuka. Wɛ ambodjasɛ ndo ambɛna dia esasɛ wayanga nshila lo mutuka. Wɛ ambotɛ ɔngɛnyi ayɛ dia esasɛ wayanga nshila. Koko nde ate toyakiyanyake, teke la litɛlɛ nyɛi y’etondo lo dihole diadjawɔ esasɛ. Koko oshimu kele edja, esasɛ wamboshila. Onde ekɔ dui dia lomba dia ntetemala nkɛndjakɛndja mutuka ‘la yema y’esasɛ ya tshitshɛ,’ êya dia vɔ kokaka toshila lo mboka? Shi ayoleka dimɛna ndodja esasɛ tɔɔ lo mutuka? Lo yoho ya didjidji, sho pombaka ndodjaka esasɛ tɔɔ lo wɔɔngɔ aso, esasɛ ɛsɔ ko ewo ka Jehowa.

Oma lɔkɔ, sho pombaka monga la ekanda k’ɔlɔlɔ k’esasɛ ndo mbidjaka esasɛ akɔ mbala la mbala. Ekɔ toho tɔnɛi tasalaso dui sɔ. Yoho ya ntondo ele, wekelo w’onto ndamɛ, mbuta ate ndjaekesanyiya la Bible lo kiadaka lushi la lushi. Lo dihole dia mbadiaka tɔtɛkɛta toto, sho pombaka nshihodia kɛnɛ kadiaso. Yoho ya hende ele, sho pombaka nkamba dimɛna la Ɔtɛmwɛlɔ aso wa lo nkumbo wa la dikɔlɔ. Onde sho mbɔsaka etena lomingu la lomingu dia ndodja esasɛ ko kana sho mbidjaka yema tshitshɛ? Yoho ya sato ele, wɔtwɛlɔ wa lo nsanganya ya l’etshumanelo. Yoho ya nɛi ele, kanaka yimba la mboka yaki Jehowa lo dihole dia ki yɔɔ. Osambu 143:5 mbutaka ɔnɛ: “Dimi latuhoka nshi y’edjedja, latukanaka yimba lu etsha aye tshe.”

“Antu w’ololo wayoheta”

John Barr akasha sawo dia sato ndo di’ekomelo diakalembetshiya wɛɛla waki Yeso w’eponga la kangaka. (Mat. 13:24-30, 38, 43) Wɛɛla ɔsɔ tɛkɛtaka dia etena ka “dinela,” etena kele “ana wa diulelu” wekɔ lo tshumanyema ndo kangaka yekɔ lo kelekama dia tshumbama.

Ɔnangɛso Barr akalembetshiya hwe dia otshumanyelo wayokomɛ. Nde akatɛkɛta dia Mateu 24:34, divɛsa diata ɔnɛ: “Antu wa lolonga lone hawushila, tshikima akambu aso tshe wambushidiyama.” Nde akakalolɛ ɛtɛkɛta wayela ɛnɛ mbala hiende: “Mɛnamaka dia Yeso akalangaka mbuta dia akitami waki la lɔsɛnɔ l’etena kakatatɛ djembetelo mɛnama lo 1914 wakahombe nsɛna l’etena kâmɛ l’akitami wayɛna etatelo ka fɔnu ka woke.” Sho hateye shikaa lofulo l’ɛnɔnyi lɔsa “lolonga lone,” koko lɔ mendanaka la elui ehende w’anto ɛsɔ wasɛna lo etena kâmɛ. Kânga mbele akitami l’ɛnɔnyi wotshikitanyi, anto wa l’elui ehende ɛsɔ wakenga lɔlɔnga wekɔ lo nsɛna lo etena kâmɛ ka nshi y’ekomelo. Ekɔ dikambo di’ekeketshelo dia mbeya dia akitami woleki akɛnda wasɛna l’etena kakɔ kâmɛ la akitami waya esombe wanɛ wakɛnyi djembetelo lam’akatatɛ djembetelo yakɔ mɛnama lo 1914 hawotovɔ la ntondo ka fɔnu ka woke ntatɛ.

“Ana wa diulelu” wekɔ lo kongɛ difuto diawɔ dia l’olongo l’asolo walomɔlomɔ, koko sho tshɛ pombaka ntshikala la kɔlamelo ndo ntetemala la ngamula osase aso polo l’ekomelo. Tekɔ mɛtɛ la diɛsɛ dia woke dia mɛna otshumanyelo wa “epunga” lo nshi yaso nyɛ.

L’ɔkɔngɔ w’osambo w’ekomelo, ɔnangɛso Theodore Jaracz la l’Olui-walɔmbɔla akasale dɔmbɛlɔ dia ndjihelo. Losanganya la l’ɔnɔnyi lɔsɔ lakakeketsha mɛtɛ wanɛ wakɔtɔ lɔkɔ!

[Nɔtɛ ka l’ɛse ka dikatshi]

[Kiombo ya lo lɛkɛ 5]

KALASA KA DIKUMANYI

Lo losanganya la l’ɔnɔnyi lɔsɔ, Anthony Morris la lo Olui-walɔmbɔla akewoya dia olowanyelo wa dikumanyi dia l’etshumanelo wayotetemala salema. Kalasa ka dikumanyi dia l’États-Unis kakatatɛ l’etatelo k’ɔnɔnyi 2008 la Patterson, New York dihole diasalema kalasa yotshikitanyi. Kalasa ka 72 keke kashila ndo tɔ kakalowanya dikumanyi 6 720. Akambo wa nsala weke efula. Lo États-Unis oto, dikumanyi diekɔ 86 000. Ɔnkɔnɛ, Olui-walɔmbɔla aketawɔ dia kalasa nkina salema la Brooklyn, New York, ntatɛ Ngɔndɔ ka dikumi l’ahende 7, 2009.

L’edja ka ngɔndɔ hiende, emendji ɛnɛi weteta wakahombe ndowanyema dia tônga embetsha la Patterson. Vɔ wakahombe tomama la Brooklyn dia tetsha ndo emendji ekina ɛnɛi wakahombe ndowanyema. Vɔ wakahombe tetsha lo kalasa ya la Brooklyn ndo anɛi wanɛ waketshama ntondo wakahombe tetsha lo kalasa yakahombe salema lo Mbalasa ya nsanganya ya weke ndo lo Mbalasa ya Diolelo. Olowanyelo waki la dia ntetemala edja ndo taya la embetsha 12 wakahombe ndakanyaka lo kalasa shamalo lo Angɛlɛ l’États-Unis. Oma lâsɔ, embetsha ɛnɛi wakahombe ndowanyema dia mbetshaka lo espagnol. Kalasa kɛsɔ hokita Kalasa k’olimu wa Diolelo kasalema nshi nyɛ, koko oyango atɔ ele wa mpamia lonyuma la dikumanyi. Filialɛ ya l’andja w’otondo yayotatɛ ndihola kalasa shɔ lo Mbalasa ya nsanganya ya weke ndo lo Mbalasa ya Diolelo lo ɔnɔnyi w’olimu 2011.

[Osato wa lo lɛkɛ 4]

Losanganya la l’ɔnɔnyi lakatatshiyama la wembelo w’osambo w’oma lo dibuku diaso di’esambo di’oyoyo diele l’ɔtɛ a dui ɔnɛ: “Tembe Jehowa”