“Olami wa diambo ndo ɔngɛnyi w’oshika”
JOHN (JACK) BARR, laki ose Olui-walɔmbɔla w’Ɛmɛnyi wa Jehowa, akashidiya esakelo kande ka lowango la nkɛtɛ Lushi la samalo la pindju, Ngɔndɔ ka dikumi l’ahende 4, 2010. Nde aki l’ɛnɔnyi 97. Nde akeyamaka oko “olami wa diambo ndo ɔngɛnyi w’oshika.”
Ɔnangɛso Jack Barr akotɔ l’osomba wa Aberdeen lo wodja w’Écosse ndo nde aki ɔna l’ekomelo lo ana asato wakotɔ lo nkumbo kawɔ. Ambutshi ande akɔ ahende waki Akristo w’akitami. Ɔnangɛso Barr akatɛkɛtaka mbala efula la ngandji dikambo dia lɔsɛnɔ la lo nkumbo kande lam’akinde eke dikɛnda ndo nde aki la lowando l’ɛnyɛlɔ ka dimɛna kakôtshikɛ ambutshi ande wa ngandji.
Lam’akandakotsha ɛnɔnyi dikumi l’ɛmɔtshi, Jack aki l’okakatanu dia nsambisha anto wahandeye. Koko, nde akasale la wolo dia ntondoya dikambo sɔ ndo Lushi la lomingu lɔmɔtshi la dikɔlɔ lo 1927 etena kakinde l’ɛnɔnyi 14, nde akatɛ she dia nde aki suke dia mbotshindɛ l’olimu w’esambishelo wa lo luudu la luudu. Ɔsɔ mbaki etatelo k’ɛnɔnyi w’efula wakandakambɛ Jehowa. Ntatɛ oma lo lushi lɔsɔ polo ndo lo nyɔi kande, ɔnangɛso Barr aki l’ohetoheto l’esambishelo ka lokumu l’ɔlɔlɔ.
Aksida wakayokonyaka nyango ka ngandji dia nshisha lɔsɛnɔ akatshutshuya ɔlɔngɔlɔngɔ Jack dia nde nkana yimba dimɛna lo kɛnɛ kendana l’oyango wele la lɔsɛnɔ ndo l’ɔnɔnyi 1929, nde akayakimɔ le Jehowa lo dɔmbɛlɔ ndo lo 1934 nde akɛnya ndjakimɔ kande lo abatizama lo diaaso dia ntondo diakandɛnyi nsanganya ya weke yasalema. Lo 1939, nde akayala ose nkumbo ka Bɛtɛlɛ ka la Londres lo wodja w’Angleterre. L’etena kɛsɔ mbakandatatɛ olimu wa lo tena tshɛ wakandakambe lo yɛdikɔ y’ɛnɔnyi 71.
Etena kakandatshukana la kadiyɛso Mildred Willett kaki ombatshi mboka w’edjedja ndo misiɔnɛrɛ lo Ngɔndɔ ka dikumi 29, 1960, ɔnangɛso Barr akelɛ diɔtɔnganelo diaki lam’asawɔ ɔnɛ “diɔtɔnganelo dia lânde.” Ɔnangɛso la kadiyɛso Barr wakeyamaka oko atshukanyi wakashaka ɛnyɛlɔ ka dimɛna ndo wakalame dionga sɔ polo ndo l’etena kakashidiya kadiyɛso Mildred esakelo kande ka lowango ka la nkɛtɛ lo Ngɔndɔ ka dikumi 2004. Ɔnangɛso la kadiyɛso Barr waki la mbekelo ka mbadiaka Bible kâmɛ edja tshɛ ka lɔsɛnɔ lawɔ l’atshukanyi.
Le wanɛ wakaweyaka, lokombo Jack Barr mbaoholaka dia nde aki onto lakawashaka alako la wɛdimo, aki onto ɔlɔlɔ ndo akayashaka efula l’Afundelo. Nde akakambaka olimu efula, akɔsaka anto akina la nɛmɔ, aki olami wakokaka anto akina ngandji ndo nde aki ɔngɛnyi w’oshika. Kɔmatɛrɛ yande, asawo wakandashaka ndo alɔmbɛlɔ ande wakakɛnɛmɔlaka ngandji k’efula kaki la nde k’akambo wa mɛtɛ ndo diɔtɔnganelo dia ma ma diaki lam’asande la Jehowa.
Kânga mbeso la lonyangu lo woho wambovɔ ɔnangɛso la ngandji Barr, tekɔ lo ngɛnangɛna kâmɛ la nde lo woho wambondolongola difuto diande dia lɔsɛnɔ lahavu, diɛsɛ diakandakongɛka l’asolo walomɔlomɔ ndo diakandasambishaka anto akina. Kɛsɔ mbakandalongamɛka.—1 Kor. 15:53, 54.a
[Nɔte ka l’ɛse ka dikatshi]
a Ɔkɔndɔ wa lɔsɛnɔ laki John Barr tanemaka lo Tshoto y’Etangelo ya Ngɔndɔ k’esambele 1, 1987, lɛkɛ 26 polo 31, lo Falase.