Onga la lomba ko wɛ ayonga la ‘diewo dia nɔmbɔla’

Onto lele la lɔsɛnɔ ekɔ oko onto latande lɔkɛndɔ l’otale lo masuwa. Koko, ekimanyielo kasha anto kekɔ l’elelo ndo tɔ hakoke tokimanyiya dia sho monga la diewo dia nɔmbɔla lɔsɛnɔ laso dimɛna. Lonyangu ko, anto efula wakahomɔ mpokoso ya weke l’ɔtɛ wakiwɔ komonga la diewo dia nɔmbɔla nsɛnɔ yawɔ. (Osam. 107:23, 27) Ko bonde kɛdikama ekakatanu wa lo lɔsɛnɔ la wa lo lɔkɛndɔ la lo masuwa?

Lo nshi yakafundamaka Bible, munda lɔkɛndɔ lo masuwa aki dui dia wolo diakalɔmbaka paka onto ndjala la diewo di’efula. Mbala efula, amɛngɔdi wa lo masuwa wakɔsaka nshi efula dia mbeka woho wa nkɛndjakɛndja oma le akɛndjikɛndji wa tomanamana. (Etsha 27:9-11) Asango efula wa lo nshi shɔ mɛnyaka ɔkɛndɛ wa woke waki l’akɛndjikɛndji lo mbasanga vɔ weke ndeka anto akina. Dia nkoma tomanyi l’ɔkɛndjɛkɛndjɛlɔ wa masuwa, anto wa lo nshi shɔ wakekaka awui wendana la tɔɔtɔ, mpɛpɛ ndo la diangɔ dikina. Bible mbelɛka akɛndjikɛndji wa masuwa ɔnɛ akanga wa ‘diewo,’ mbuta ate akanga wa “tumba.”—Ezek. 27:8.

Ekakatanu wahomana la so ɛlɔ kɛnɛ koka mbɛdikama l’ekakatanu wakahomanaka l’akɛndjikɛndji wa masuwa lo nshi yakafundamaka Bible. Ko ayotokimanyiya dia sho monga la diewo dia nɔmbɔla lɔsɛnɔ laso?

NGANDE WAKOKAYƐ MONGA LA ‘DIEWO DIA NƆMBƆLA’?

Lo mbɛdika onto lele la lɔsɛnɔ la ɔnɛ latande lɔkɛndɔ, Bible mbutaka ɔnɛ: ‘Ɔnɛ lahokamɛ ndo layanga dia nyomomana akambo fundo mbele kanga lomba ndo kanga ewo mbatongaka la diewo dia nɔmbɔla.’ (Tuk. 1:5, 6) Tshɛkɛta ya lo Hɛbɛru yokadimɔmi ɔnɛ ‘diewo dia nɔmbɔla’ koka mbela kanyi y’ɔkɛndjikɛndji wa masuwa wele la dikoka dia nkɛndjakɛndja masuwa la diewo tshɛ.

Naka wɛ mbidja welo l’otema ɔtɔi dia nkandola ekakatanu wahomana la yɛ, kete wɛ koka monga oko ɔkɛndjikɛndji wele la ‘diewo dia nɔmbɔla’ masuwa ande dimɛna. Oko wadita dibuku dia Tukedi, wɛ pombaka monga la ‘lomba,’ la ‘ewo’ ndo la ‘shɛnɔdi.’ (Tuk. 1:2-6; 2:1-9) Ndo nto, wɛ pombaka ntetemala nyanga ɛlɔmbwɛlɔ ka Nzambi nɛ di’anto wa kɔlɔ ‘nɔmbɔlaka’ l’eyango wa kɔlɔ.—Tuk. 12:5.

Ɔnkɔnɛ, ekɔ ohomba efula sho mbekaka Bible l’etete nɛ dia wekelo ɔsɔ wayotokimanyiya dia mbeya awui w’amɛna efula wendana la Jehowa ndo la Yeso Kristo. (Joa. 14:9) Ndo nto, etena katshɔso lo nsanganya, sho tolongolaka alako w’amɛna efula. Lâdiko di’akambo asɔ tshɛ, anto akina wambohokɔ akambo, mbidja ndo ambutshi ayɛ, kokaka kokimanyiya.—Tuk. 23:22.

ƐNA WÂLE LA NTONDO NDO YALƆNGƆSƆLA

Mbala efula, sho mongaka l’ohomba wa ‘diewo dia nɔmbɔla’ djekoleko etena kahomanaso l’ekakatanu. Naka wɛ heyi kɛnɛ ka nsala la ntondo k’okakatanu ɔmɔtshi, kete dui sɔ mbeyaka monga l’etombelo wa kɔlɔ efula le yɛ.—Jak. 1:5, 6.

Kɛnɛ katambiya yema ele, tshɛkɛta yokadimɔmi ɔnɛ ‘diewo dia nɔmbɔla’ koka mendana ndo l’awui w’ata. Bible mbutaka ɔnɛ: “Oloki ta paka la [diewo dia nɔmbɔla], ne dia elembielo keko lam’eli ului w’andaki wa yimba.”—Tuk. 20:18; 24:6.

L’ɛnyɛlɔ k’ɔnɔmbɔdi w’alembe, wɛ pombaka tɛnyi wâle wakoka koshishɛ lonyuma layɛ la ntondo ndo ndjalɔngɔsɔla. (Tuk. 22:3) Tɔshi dia wambokotɛ dia kosha olimu okina kana dia kodiya mpɛtɛ l’olimu wakambayɛ. Ekɔ mɛtɛ dia wɛ ayɔsɛdingola difuto, lofulo la wenya layoyosalaka lo ntshɔ la nkalola ndo akambo akina. Koko, ekɔ ohomba wɛ ndjambola ɔnɛ: Onde olimu wamometawɔ ɔnɛ halɔshana l’atɔndɔ wa lo Bible? Wayɔmbɔsɛka wenya engana? Onde wayombishaka etena ka dimi ndjasha l’akambo wa lo nyuma?—Luka 14:28-30.

Tɔshi ɛnyɛlɔ ka Loretta lele Ɔmɛnyi wa Jehowa. Nde akakambaka olimu wa dimɛna lo kɔpanyi kɛmɔtshi. Etena kakawasɛkɔla kɔpanyi kɛsɔ dihole dikina, owandji ande w’olimu akawosha dihole dia dimɛna efula awotɛ ate: “Yele wɛnɛ ehende, kete ekoho. Etawɔ dia ntshɔ lɛkɔ nɛ dia Mbalasa ka Diolelo kekɔ suke.” Koko Loretta kombetawɔ olimu ɔsɔ nɛ dia nde akalangaka ndeka kambɛ Otungi ande. Nde akɛnyi dia mbetawɔ olimu ɔsɔ ayokitshakitsha wenya wahombande ndjasha l’akambo wa lo nyuma. Ɔnkɔnɛ, kânga mbakawotɛ owandji ande w’olimu ɔnɛ nde mbele ose olimu lalekawɔ mbɛkɛ otema ndo lakamba dimɛna, nde akawosha mukanda wɛnya dia nde hayokamba olimu nto. Aya ɛnɔnyi 20 wakamba Loretta oko ombatshi mboka wa pondjo ndo nde ekɔ l’eshikikelo dia nde ambokondja etombelo w’amɛna l’ɔtɛ wakinde la ‘diewo dia nɔmbɔla,’ mbuta ate wakandakambe l’alako watanema l’Ɔtɛkɛta wa Nzambi. Nde ambokeketsha diɔtɔnganelo diasande la Jehowa ndo ôkimanyiya anto efula dia vɔ mbeya akambo wa mɛtɛ.

Ekɔ ohomba monga la ‘diewo dia nɔmbɔla’ ndo lo nkumbo. Mbodia ana kema yana ya dikambo ndo eyango wayadjɛ ambutshi koka monga la shɛngiya ya dimɛna kana ya kɔlɔ le anawɔ. (Tuk. 22:6) Ɔnkɔnɛ, ambutshi w’Akristo koka ndjambola ɔnɛ: ‘Onde asawo ndo ɛnyɛlɔ kaso mbetshaka anaso dia vɔ mbɔsa eyango wa lo nyuma wayowakimanyiya dia vɔ ndjokoma etshundju w’anto la nɛmɔ? Onde yoho yaso ya lɔsɛnɔ mbakimanyiyaka dia vɔ nshihodia ohomba wa monga la lɔsɛnɔ l’ɔsɛlɛngɛ ndo wa ndeka ndjasha l’akambo wa lo nyuma?’—1 Tim. 6:6-10, 18, 19.

Tolembete di’aha paka onto mbongi la lomombo ko nde monga l’ɔngɛnɔngɛnɔ oko wafɔnya anto efula ndo kânga Sɔlɔmɔna akashihodia dui sɔ lo mfunda ɔnɛ: “Waku watukaka [Nzambi] woma, wayuhomo lukulu l’olo, ne dia vo watukaka woma la ntundu kandi.” (Und. 8:12) Ɔnkɔnɛ, tambokokeketsha dia wɛ ntetemala nkitanyiya kɛnɛ kata Bible dia wɛ monga la ‘diewo dia nɔmbɔla.’—2 Tim. 3:16, 17.

[Osato wa lo lɛkɛ 30]

Dia mɛnya ɔkɛndɛ wa woke waki l’akɛndjikɛndji wa masuwa, wakâsangaka vɔ weke ndeka anto akina

[Efundelo wɛnya kanga]

Su concessione del Ministero per i Beni e le Attività Culturali. Ndoko onto lele la lotshungɔ la nsangola osato ɔnɛ oyadi lo yoho yakɔna kana lo tshimbo y’onto akɔna tshɛ.