Lɔsɛngɔ tutshaka ɔkɛyi
ETENA kakiwɔ l’esambishelo, George nde la Manon wadjasɛ lo wodja wa Pays-Bas wakatane womoto l’osombe lakawelɛka Rie l’ɔkɛyi w’efula l’ɔtɛ wakandavusha omɛnde la ntondo ko ndjovusha ndo la hende mbidja ndo ɔnande la pami. Ndo nto, nde aki la hemɔ ka l’asɔnga. Kânga mbakandahembe ndjakeketsha etena kakawosambishaka, nde komonga kânga la yema y’ɔngɛnɔngɛnɔ.
Koko George akatɛ Manon dia vɔ tɔlɛ womoto ɔsɔ divundja di’alɛmbɔlɛmbɔ lo wendelo w’oyoyo l’ɔtɛ wakandayaokaka opoko ndo wakinde la lonyangu efula. Lam’akawawosha alɛmbɔlɛmbɔ akɔ, Rie akangɛnangɛna efula. Koko lam’ele nde komonga l’etena ka vɔ nsawola, nde akawatɛ dia vɔ ndjoya lushi lokina. George nde la Manon wakayoyaka lushi lɔsɔ, koko vɔ kombotana. Vɔ wakayoya nto mbala nkina efula, koko vɔ kombotana. Ɔnkɔnɛ, vɔ wakayotatɛ mfɔnya ɔnɛ nde ekɔ lo mbalawɔ.
Lushi lɔmɔtshi, vɔ wakayôtanaka la ngelo. Nde akâlɔmbɛ edimanyielo lo woho wakinde kɔnɛmiya ɛtɛkɛta ande awatɛ ɔnɛ nshi shɔ tshɛ nde aki lo lopitadi. Nde akakotsha ɔnɛ: “Ko onde nyu mbeyaka kɛnɛ kakamasalaka l’ɔkɔngɔ wa sho nkakitɔna? Lakadiaka Bible.” Sawo diakamɔtɛ ndo vɔ wakatatɛ mbeka la nde Bible.
Etena kakatâtetemalaka wekelo, ɔkɛyi waki la Rie wakashile ko nde akatatɛ monga l’elungi k’ɔmɔnɔmɔnɔ. Kânga mbakinde kotshɔka ndoko mboka, nde akatatɛ nsambisha anto tshɛ wakayaka dia ndjowenda. Nde komonga l’akoka wa tshɔka mbala efula lo nsanganya nɛ dia nde aki la demba dia kɔnyangakɔnyanga, koko wembwelo w’anangɛso l’akadiyɛso wakôkeketshaka. Lushi lakandakotsha ɛnɔnyi 82, nde akɔtɔ lo Losanganya l’otshimbedi ndo akabatizama.
Nde akavu ngɔndɔ ngana oma lâsɔ, ndo anto wakayoshola pɔɛmɛ kakandatafundji. Lo pɔɛmɛ kakɔ, nde akɛnya pâ konga l’esombe wambovusha elonganyi awɔ ndo akɛnya ɔnɛ ekɔ ohomba kɛnɛmwɛ anto wa ngasɔ lɔsɛngɔ. Manon mbutaka ate: “Ɛtɛkɛta wa lo pɔɛmɛ kɛsɔ wakamunanda efula etena kakamawadia ndo lekɔ l’ɔngɛnɔngɛnɔ hangɔnɛ lo woho wakakimanyiya Jehowa dia dimi mɛnya Rie lɔsɛngɔ.”
Aha la tâmu, kɛnɛ katosalɛ Jehowa ndamɛ totshutshuyaka dia sho mɛnya anto akina ngandji ndo lɔsɛngɔ la ngasɔ. (Ef. 5:1, 2) Naka sho monga la lɔsɛngɔ l’esambishelo, kete tayokondja etombelo w’amɛna nɛ dia ‘tayoyaeyanya oko ekambi waki Nzambi diɛsɛ la lɔsɛngɔ’ laso.—2 Kor. 6:4, 6.