“Handjɔfɔnya nto dia dimi koka ntshikitanya andja ɔnɛ”

NSHI YAMI YAKETE:

Oma ko dikɛnda diami, lakalangaka weho tshɛ wa ditongatonga. Ase nkumbo kami wakatshɔka mbala la mbala l’ekonda wa diambo efula ndo w’elangala waki suke l’osomba aso wa Jyväskylä waki l’atei atei wa wodja wa Finlande. Ndo nto, dimi nangaka nyama, ndo etena kakimi dikɛnda lakɛmbaka nyawo kana mfɔ tshɛ kakamɛnaka. Etena kakamayolaka, lakanyangaka efula dia mɛna woho wakasɔkishaka anto waa nyama. L’ɔkɔngɔ diko, lakayotatɛ nkamba lo tshunda dimɔtshi diakamɛka lotshungɔ lele la waa nyama ndo lakahomana l’anto akina waki la mi kanyi ɔtɔi.

Takayasha tshɛ dia mamɛ lotshungɔ lele la waa nyama. Takatɛ anto kɛnɛ kakawahombe nsala dia ndjikokɛ ndo takatshumanyaka nyemba y’anto dia nkɛndakɛnda lo toshinga dia mɛnya dia keema dimɛna nsondja dikoho dia waa nyama kana nkamba la nyama lo waa mashinyi w’aseka enganga dia mpemba awui amɔtshi. Takayokoma polo lo nkenga tshunda diaso dia kokɛka waa nyama. Awui asɔ tshɛ wakatokonya dia sho monga l’ekakatanu l’ewandji wa lɛɛta mbala la mbala. Lakandama ndo lakalomboshama mbala efula.

Laadiko dia nkokɛ waa nyama, awui akina wakasalemaka l’andja ɔnɛ wakakiyanyaka. Dui sɔ diakakonya dia dimi nkamba lo atshunda efula, ɛnyɛlɔ l’atshunda wakokɛ esongo ndo waa nyama welɛwɔ Amnesty International ndo Greenpeace. Lakayasha tshɛ l’elimu wa l’atshunda asɔ. Lakaamɛka ase wola, avushi ndjala ndo wanɛ waki komonga l’ekondjelo ka dimɛna.

Yema yema, lakayoshihodiaka dia halokoke ntshikitanya andja ɔnɛ. Ekɔ mɛtɛ di’atshunda asɔ wakakandolaka ekakatanu ɛmɔtshi wa totshitshɛ, koko vɔ kokandola ekakatanu wa weke. Ndjaka wɛ menda akambo wakasalemaka lo nshi shɔ, ko wate akambo wa kɔlɔ mɛtɛ wambodja akambo w’ɔlɔlɔ otshumba. Lakayɛnaka dia ndooko k’ɔlɔ kakokami nsala.

WOHO WAKATSHIKITANYA BIBLE LƆSƐNƆ LAMI:

Lam’ele dimi komonga l’akoka wa ntshikitanya awui asɔ, lakatatɛ nkanyiya awui wendana la Nzambi ndo la Bible. La ntondo ka dimi ndjotatɛ nkamba lo atshunda asɔ, lakateki Bible l’Ɛmɛnyi wa Jehowa. Kaanga mbakamɛnyi di’Ɛmɛnyi wa Jehowa waki anto w’ɛlɔlɔ ndo wakayashaka efula le mi, dimi komonga suke dia ntshikitanya yoho yami ya lɔsɛnɔ. Koko mbala kɛnɛ, akambo wakatshikitana.

Lakɔshi Bible kami ndo lakatatɛ kiadia. Kɛnɛ kakamadia kakakeketsha efula. Lakashola avɛsa efula wa lo Bible wɛnya dia bu dimɛna nsɔkisha nyama. Ɛnyɛlɔ, Tukedi 12:10 mbutaka ɔnɛ: “Anto w’ɛlɔlɔ watokokɛka nyama yawɔ.” (Good News Translation) Lakashihodia nto diaha Nzambi mbele lo kiɔkɔ y’awui wa kɔlɔ weta l’andja ɔnɛ. Lakɛnyi di’ekakatanu wakatafulanɛka dikambo anto efula konangaka dia Nzambi mbalɔmbɔla. Lakaambe woho w’anyanya dia mbeya ɔnɛ Jehowa mbokaka anto ngandji ndo ekɔ la solo dia lotutsha otsha le wɔ.—Osambu 103:8-14.

L’etena kɛsɔ, lakalodia dikatshi diɛnya woho walɔmbawɔ dibuku Bible etshatɔ mɛtɛ? ndo lakaditome. Ɔtɛkɛta kele edja, wadi l’omi amɔtshi w’Ɛmɛnyi wa Jehowa wakaye ndo wakanɔmbɛ dia mbetshakami Bible, ko laketawɔ. Lakatatɛ ntshɔ lo nsanganya y’Akristo lo Mbalasa ka Diolelo. Ngasɔ mbakamatatɛ nkakatshiya akambo wa mɛtɛ l’otema ami.

Bible kakakimanyiya dia nsala etshikitanu w’efula. Lakatshike nnɔ mfɔka ndo wanu lo tshambandeko. Lakalɔngɔsɔla ɛnamelo ndo ɛtɛkɛta ami. Lakayotatɛ mbetawɔ awui w’ewandji wa l’andja ɔnɛ. (Rɔmɔ 13:1) Lakatshike yoho ya lɔsɛnɔ lami la mindo yakamayashaka lɔkɔ efula.

Okakatanu wakaleke wolo le mi aki wa ntomba oma l’atshunda wakamɛka lotshungɔ lele la waa nyama. Dui sɔ kosalema lo mayi ka sso. L’etatelo, lakafɔnyaka dia naka dimi ntshika nkamba l’atshunda asɔ, kete layɔsama oko ofungi. Koko lakayeyaka dia paka Diolelo diaki Nzambi mbayokandola ekakatanu wa l’andja ɔnɛ. Lakɔshi yɛdikɔ ya nsukɛ Diolelo sɔ ndo nkimanyiya anto akina dia vɔ mbeka awui wendana la diɔ.—Mateo 6:33.

WAHƆ WAMBOMOKONDJA:

Etena kakamakambaka lo atshunda asɔ, lakaatanyaka anto l’elui ehende: Anto w’ɛlɔlɔ l’anto wa kɔlɔ ndo lakalɔshaka wanɛ wakamɔsaka oko anto wa kɔlɔ. Bible kambokimanyiya dia ntshika mpetsha anto ndo dia monga la ngandji k’Okristo le anto tshɛ. (Mateo 5:44) Yoho mɔtshi yawaɛnyami ngandji kɛsɔ, ele lo mbasambisha lokumu l’ɔlɔlɔ la Diolelo diaki Nzambi. Dimi ngɛnangɛnaka dia mɛna woho wakimanyiya olimu ɔsɔ anto dia vɔ mbidjasɛ ki, monga l’ɔngɛnɔngɛnɔ ndo l’elongamelo k’oshika.

Kakianɛ, laya la ki ka lo yimba nɛ dia lambotshika awui tshɛ l’anya wa Jehowa. Lekɔ l’eshikikelo dia oko wende Otungi, nde hatetawɔ di’anto la nyama ntetemala sɔkishama pondjo pondjo, kana di’okama wa nkɛtɛ ndanyema. Ndo nto, l’ekimanyielo ka Diolelo diande, nde ayanga nɔngɔsɔla kɛnɛ tshɛ kambolana. (Isaya 11:1-9) Lekɔ l’ɔngɛnɔngɛnɔ w’efula, aha tsho lo woho wamomeya akambo wa mɛtɛ asɔ, koko ndo lo woho wakimanyiyami anto akina dia vɔ mbaeya. Handjɔfɔnya nto dia dimi koka ntshikitanya andja ɔnɛ.