Wakayakimɔ la lolango dia tokimanyiya la New York

AMBETA ɛnɔnyi ɛmɔtshi wele Cesar nde la wadɛnde Rocio wakasɛnaka lɔsɛnɔ la dimɛna la Californie ndo lɛkɔ, Cesar akakambaka olimu wakawɔsɛka lushi l’otondo lo kɔmpanyi katshula dihomɔ diadiya djungudungu lo luudu ndo diadja tshitshi diele oko vatilatɛrɛ ndo klimatizɛrɛ. Rocio ya wadɛnde akakambaka olimu waki kombɔsɛka lushi l’otondo lo biro waki dɔkɔtɛlɛ. Vɔ wakikɔ la luudu lawɔ, ndo vɔ komonga l’ana. Koko dui dimɔtshi diakayotombaka diakatshikitanya nsɛnɔ yawɔ. Naa dui diakɔ?

Lo Ngɔndɔ ka dikumi 2009, Bɛtɛlɛ ka l’États-Unis akatome mukanda lo tshumanelo tshɛ dia lɛkɔ dia nɔmba anto wayakimɔ la lolango wele l’akoka dia vɔ ndjosha lonya lo Bɛtɛlɛ lo tshanda mɔtshi l’onunyelo wa mvudu ya Bɛtɛlɛ ya la Wallkill, New York. Kaanga wanɛ wakashile ndekanya ɛnɔnyi walɔmbama dia mbɔtɔ lo Bɛtɛlɛ wakelamɛ dia tosha lonya. Cesar nde la Rocio mbutaka ɔnɛ: “Kaanga mbele laasɔ ko taya l’ɛnɔnyi efula, takɛnyi ɔsɔ aki diɛsɛ diakoka ndja mbala ɔtɔi lo lɔsɛnɔ dia tokamba lo Bɛtɛlɛ. Takatahombe mpandja diaaso sɔ l’ɔtɛ wa dui dikina tshɛ.” Aha la ntshimbatshimba, vɔ wakalodia adɛmandɛ.

Akalekana ɔnɔnyi w’otondo oma laasɔ wele Cesar nde la Rocio konongola leeta l’otsha lo Bɛtɛlɛ. Kaanga mbakidiɔ ngasɔ, vɔ wakatakola wanya wotshikitanyi dia nkotsha oyango awɔ lo mbetɛ nsɛnɔ yawɔ ɛsɛlɛngɛ. Cesar mbutaka ate: “Takatodjasɛka lo yidudu yakatake lo garajɛ kaso l’oyango w’anto akina futɛka lo luudu laso. Takonɔ oma lo luudu laso lakatalangaka efula laki la mɛtrɛ 200 lakatake atete ɛnɔnyi efula ko takatodjasɛka lo yidudu yaki la mɛtrɛ 25.” Nde kotshaka: “Woho wakatasale etshikitanu ɛsɔ, akatokimanyiya dia sho monga suke dia mbetawɔ leeta l’otsha lo Bɛtɛlɛ oyadi kakɔna kakakoke ntomba.” Kakɔna kakayotombaka oma laasɔ? Rocio mbutaka ate: “Ngɔndɔ ɔtɔi l’ɔkɔngɔ wa sho monɔ otsha lo yidudu yaso ya tshitshɛ, takalongola leeta dia tokamba oko anto wamboyakimɔ la lolango lo tshanda mɔtshi la Wallkill. Akɛnama dia l’ɔtɛ wakatetɛ nsɛnɔ yaso ɛsɛlɛngɛ, takasha Jehowa diaaso dia nde tɔtshɔkɔla.”

YIMBA YAWƆ YA NDJAHOMBIA YEKƆ LO MBAELA ƐTSHƆKƆ

L’ɛnyɛlɔ ka Cesar nde la Rocio, nkama y’anangɛso l’akadiyɛso wakayahombia dia ndjasha l’olimu wa wokelo wasalema la New York. Efula ka l’atei awɔ wekɔ lo mbisha lonya lo onunyelo wa Bɛtɛlɛ ka la Wallkill ndo akina wekɔ la diɛsɛ dia mbisha lonya lo wokelo wa mbalasa k’oyoyo kalɔmbɔla olimu wa l’andja w’otondo ka la Warwick.a Atshukanyi efula wakatshike mvudu, elimu awɔ w’amɛna ndo dongalonga l’oyango wa ndeka kambɛ Jehowa. Onde Jehowa akatshɔkɔla yimba yawɔ ya ndjahombia shɔ? Eelo.

Ɛnyɛlɔ, Way leya awui wa kura nde la Debra wanɛ waki l’ɛnɔnyi 50 l’ɛmɔtshi, wakasondja luudu lawɔ ndo efula ka diangɔ diaki lawɔ la Kansas ko wakonɔ otsha la Wallkill dia tokamba oko anto wakayakimɔ la lolango dia kɛlakɛlaka tokamba lo Bɛtɛlɛ.b Kaanga mbele dui sɔ akalɔmbɛ dia vɔ nsala etshikitanu lo lɔsɛnɔ, vɔ wekɔ lo mɛna dia olimu awɔ mbashaka ɔngɛnɔngɛnɔ. Debra mbutaka lo kɛnɛ kendana la elimu tshɛ wakambande lo Bɛtɛlɛ ɔnɛ: “Dimi ndjaokaka diele oko lekɔ ɔmɔtshi l’atei w’anto wasangawɔ lo ekanda aso watake mvudu lo Paradiso.”

Melvin nde la Sharon wakasondja luudu ndo diangɔ diaki lawɔ la Caroline du Sud dia tosha lonya l’olimu wakambema la Warwick. Kaanga mbele komonga yana ya dikambo dia vɔ ndjahombia lo yoho shɔ, wadi l’omi asɔ wakɛnyi dia ekɔ tshondo ya diɛsɛ dia vɔ tosha lonya lo wokelo ɔsɔ wayotshikala lo ɛkɔndɔ. Vɔ mbutaka ɔnɛ: “Ɔlɔ w’efula mongaka lo mbeya di’anangɛso wa l’andja w’otondo wayokondja wahɔ oma lo kɛnɛ kasalayɛ.”

Kenneth lele ombiki wa mvudu nde la Maureen wanɛ waya l’ɛnɔnyi 50 l’ɛmɔtshi wakonɔ oma la Californie dia tosha lonya lo wokelo wasalema la Warwick. Dia vɔ monɔ, wakokana la kadiyɛso kɛmɔtshi ka lo etshumanelo kawɔ dia mbalamɛ luudu lawɔ ndo wakalɔmbɛ ase nkumbo kawɔ dia vɔ kokɛka she aki Kenneth laki aya osombe. Onde vɔ wekɔ la lonyangu lo woho wakawayahombia dia tokamba lo Bɛtɛlɛ? Ndooko. Ken mbutaka ate: “Tekɔ lo nkondja waahɔ efula. Kɛsɔ hɛnya dia hatohomana l’ekakatanu, koko tekɔ lo nkondja ɛtshɔkɔ ndo l’etema aso tshɛ, sho keketshaka anto akina dia vɔ ndjasha l’olimu ɔnɛ.”

WEKƆ LO NTONDOYA EKAKATANU

Efula k’anto wakayakimɔ la lolango wakahombe ntondoya ehemba ɛmɔtshi. Ɛnyɛlɔ, William nde la Sandra wanɛ waya la ɛnɔnyi 60 l’ɛmɔtshi, wakasɛnaka dimɛna la Pennsylvanie. Vɔ waki la kɔpanyi kakatshulaka mbolo ya lo waa mashinyi ndo waki l’ase olimu 17. Vɔ waki paka lo etshumanelo kakɔ kaamɛ ntatɛ oma ko tɔkɛndakɛnda tawɔ ndo ewotɔ awɔ efula waki lo ɛtshi kakɔ ka nkɛtɛ. Etena kakawakondja diaaso dia tokamba anto wakayakimɔ la lolango wakɛlakɛla dia tokamba lo Bɛtɛlɛ ka la Wallkill, vɔ wakɛnyi dia ekɔ ohomba ntshika suke la diangɔ diawɔ tshɛ ndo anto wakeyanaka lawɔ. William mbuta ate: “Okakatanu wakaleke woke ele, ntshika ngelo kaso ka dimɛna efula.” Koko l’ɔkɔngɔ wa vɔ nsala alɔmbɛlɔ efula, wakonɔ ndo vɔ hawonyange lo yɛdikɔ yakawɔshi shɔ. William kotshaka ate: “Ɔngɛnɔngɛnɔ waya lo nkamba kaamɛ l’ase nkumbo ka Bɛtɛlɛ hakoke mbɛdikama la oseka ɛngɔ tshɛ. Dimi la Sandra taya l’ɔngɛnɔngɛnɔ wele tatongaka lawɔ ndooko lushi.”

Wakalɔmbɛ Ricky lakalɔmbɔlaka olimu wa wokelo lo tshunda dimɔtshi la Hawaii, dia tokamba la Warwick oko onto lakayakimɔ la lolango dia kɛlakɛlaka tokamba lo Bɛtɛlɛ. Kendra ka wadɛnde akalangaka dia omɛnde mbetawɔ leeta lɔsɔ. Koko dui dimɔtshi diakaakiyanyaka ele, vɔ waki la Jacob y’ɔnawɔ la pami laki la ɛnɔnyi 11. Vɔ wakayambolaka dia kana ayonga dimɛna nkumbo k’otondo monɔ otsha la New York ndo kana ɔnawɔ ayotokoka toyaɔtɔnganyiya la yoho ya lɔsɛnɔ ya lɛkɔ.

Ricky mbutaka ate: “Dui dimɔtshi diakatakombolaka ele, totana etshumanelo kele l’ana watahame dimɛna lo nyuma. Takakombolaka dia Jacob monga la lɔngɛnyi l’oshika.” Etshumanelo kakawatɔtɔka komonga l’ana efula koko kaki l’ase Bɛtɛlɛ efula. Ricky kotshaka ate: “L’ɔkɔngɔ wa losanganya la ntondo lakatɔtɔ, lakambola Jacob woho wakandayaoke lo etshumanelo k’oyoyo kɛsɔ djekoleko lo woho waki komonga ana wa lo lɔlɔnga lande. Nde akambutɛ ate: ‘Toyakiyanyake Ipa, ase Bɛtɛlɛ w’ɛlɔngɔlɔngɔ mbayonga angɛnyi ami.’”

Ase Bɛtɛlɛ w’ɛlɔngɔlɔngɔ wakɔtɔ la Jacob lɔngɛnyi. Etombelo akɔna waki la dui sɔ? Ricky mbutaka ate: “Lushi lɔmɔtshi l’otsho etena kakamatetaka suke la shambrɛ yaki Jacob, mɛnyi ko atala waakahɛtɛ. Lakafɔnya dia layowotana akɛnya tɔkɛnyɔ ta l’ɔrdinatɛrɛ, koko lakatootanaka adia Bible. Etena kakamawombola dia mbeya kɛnɛ kasalande, Jacob akankadimola ate: ‘Lekɔ ose Bɛtɛlɛ ndo layanga mana mbadia Bible k’otondo l’ɔkɔngɔ w’ɔnɔnyi ɔtɔi.’” Ricky nde la Kendra wekɔ l’ɔngɛnɔngɛnɔ aha tsho nɛ dia Ricky ekɔ lo ndjasha l’olimu wa wokelo wa la Warwick koko ndo l’ɔtɛ wele wonwelo awɔ ambokimanyiya dia ɔnawɔ la pami mpama lo nyuma.—Tuk. 22:6.

VƆ HAWOYAKIYANYA LO KƐNƐ KENDANA LA NSHI Y’OTSHA LA NTONDO

Olimu wa wokelo wa la Wallkill ndo la Warwick wayokomɛ, diakɔ diele wanɛ wakelamɛ dia tosha lonya mɛnaka dia olimu awɔ wa lo Bɛtɛlɛ ekɔ wa lo tshanda mɔtshi tsho. Onde anangɛso l’akadiyɛso asɔ wekɔ lo ndjakiyanya lo yoho yamboleka dia mbeya lɛnɛ ayowotshɔ ndo kɛnɛ kayowosala lo nshi y’otsha la ntondo? Ndooko. Efula ndjaokaka oko wakayaoke atshukanyi amɔtshi w’omala Floride waya la ɛnɔnyi akumi atanu la ɛmɔtshi. John lakalɔmbɔlaka olimu wa wokelo lo tshunda dimɔtshi akayakimɔ la lolango nde la Carmen dia tokamba la Warwick. Vɔ mbutaka ɔnɛ: “Tambɛna woho wakotsha Jehowa ehomba aso polo l’etena kɛnɛ. Jehowa kotela lanɛ l’oyango wa ndjotokalɛ l’ɔkɔngɔ.” (Osam. 119:116) Luis lakakambaka olimu wa tadimaka dja, ekɔ lo nkamba la Wallkill nde la Quenia ya wadɛnde. Vɔ mbutaka ɔnɛ: “Tambɛnaka dia Jehowa ekɔ la lokaho lo woho wakotshande ehomba aso wa l’emunyi. Kaanga mbele hateye etena, dihole ndo woho wayotokokɛ Jehowa, tekɔ la eshikikelo dia nde ayotetemala tokokɛ.”—Esam. 34:10; 37:25.

‘WEKƆ LO TSHƆKWAMA POLO LO YƐDIKƆ YAHA MPOMBA KAANGA ƐNGƆ’

Efula ka wanɛ wakelamɛ dia tosha lonya lo wokelo wa la New York, wakakoke monga l’ɛkɔkɔ waha ndjakimɔ la lolango. Koko vɔ wakadje Jehowa l’ohemba oko watotɛnde ɔnɛ: “Nyumpimbi kakiane, . . . naka dimi halunyudihwela adidishi wa l’ulungu dia nyutshulwela otshoko, wuhu wahaweyi nkuka lu luudu.”—Mal. 3:10.

Onde wɛ lawɔ ayodja Jehowa l’ohemba dia nkondja ɛtshɔkɔ ande? Sɛdingola l’ekimanyielo ka dɔmbɛlɔ dia mbeya kɛnɛ kakokayɛ nsala dia mbisha lonya l’olimu w’ɔngɛnɔngɛnɔ ɔsɔ oyadi la New York kana lo ahole akina wasalema olimu wa wokelo l’okongamelo, ko wɛ ayɛna dia Jehowa ayokɔtshɔkɔla.—Makɔ 10:29, 30.

Dale lele ɛjɛnyiyɛrɛ nde la Cathy ya wadɛnde w’oma la Alabama, ngɛnangɛnaka yoho y’olimu shɔ efula. Lam’ele vɔ wakayakimɔ la lolango dia tokamba la Wallkill, vɔ mbutaka ɔnɛ: “Naka wɛ nkeketsha otema dia ntshika ngelo kanyu ka dimɛna, kete wɛ ayokondja diaaso dia mɛna woho wakamba nyuma kaki Jehowa olimu.” Kakɔna kahombama dia wɛ monga suke? Dale kotshaka ate: “Etɛ lɔsɛnɔ layɛ ɔsɛlɛngɛ lo yoho y’efula ko wɛ hatonyanga pondjo.” Gary, l’oma la Caroline du nord, akalɔmbɔla elimu wa wokelo l’edja ka ɛnɔnyi 30. Nde la Maureen ya wadɛnde mbutaka dia ɔtshɔkɔ ɔmɔtshi wambowokondja la Warwick ele “woho wakambawɔ kaamɛ l’anangɛso ndo l’akadiyɛso wakalambola nsɛnɔ yawɔ dia kambɛ Jehowa lo Bɛtɛlɛ.” Gary kotshaka ate: “Dia nkamba lo Bɛtɛlɛ, ekɔ ohomba nsɛna lɔsɛnɔ l’ɔsɛlɛngɛ ndo ɔsɔ mbele yoho ya dimɛna ya nsɛna lo dikongɛ nɛ di’akambo.” Jason lakakambaka lo awui wendana la kura ndo Jennifer l’oma la Illinois, mbutaka dia mbisha lonya lo onunyelo wa Bɛtɛlɛ ka la Wallkill, ekɔ “yoho yoleki dimɛna ya mɛna woho wayotetaka akambo l’andja w’oyoyo.” Jennifer kotshaka ate: “Ekɔ dui di’ohomba dia mbeya ɔnɛ kɛnɛ tshɛ kasalayɛ kekɔ lo mandɔma le Jehowa ndo kayotokimanyiya lo andja w’oyoyo watɔlɔngɔsɔlɛnde. Jehowa ekɔ lo mɛna dia tekɔ lo nsala kɛnɛ keso l’akoka wa nsala.”