ASAWO WƆTƆNƐ L’ƆTƐ A DUI WA LO LOHOSO | WAA NA WELE ƐMƐNYI WA JEHOWA?
Lande na kasambishaso?
Ondo ndooko dui diatotshikitanya l’anto akina ko ndeka olimu aso w’esambishelo wambohama efula. Tekɔ lo nsambisha lo luudu la luudu, lo ahole wa lo sɛkɛ ndo lo dihole tshɛ diatanaso anto. Lande na kasalaso ngasɔ?
Ɛmɛnyi wa Jehowa sambishaka dia ntombola Nzambi ndo dia mbeyanya lokombo lande. (Hɛbɛru 13:15) Sho nangaka nto nkitanyiya Yeso Kristo lakatodjangɛ ate: “Ɔnkɔnɛ, nyotshu ndo nyetɛ anto wa lo wedja tshɛ ambeki, . . . nyowaetshake dia nkitanyiya akambo tshɛ wambomonyodjangɛ.”—Mateo 28:19, 20.
Laadiko dia laasɔ, sho nangaka onyaso onto. (Mateo 22:39) Lo mɛtɛ, sho mbeyaka dia anto efula wekɔ la mbekelo ya l’ɛtɛmwɛlɔ awɔ ndo aha onto tshɛ mbayoyasha lo losango laso. Koko, sho mbeyaka dia wetshelo wa lo Bible shimbɛka nsɛnɔ. Diakɔ diele, tekɔ lo ntetemala “mbetsha ndo mbewoya lokumu l’ɔlɔlɔ lendana la Kristo,” oko akasalaka Akristo wa lo ntambe ka ntondo.—Etsha 5:41, 42.
Antonio Cova Maduro, ombewi wa sosioloji akatɛkɛta dia “welo wadja Ɛmɛnyi wa Jehowa ndo paa kayashawɔ polo ndo vɔ nɛmba . . . , dia afundelo w’ekila nkoma lo atshuku woleki etale wa lo nkɛtɛ.”—El Universal jurnalɛ ya lo Vénézuéla
Efula ka wanɛ wadia ekanda aso bu Ɛmɛnyi wa Jehowa. Ndo miliyɔ y’anto weka la so Bible wekɔ l’ɛtɛmwɛlɔ awɔ. Koko vɔ wekɔ la lowando nɛ dia Ɛmɛnyi wa Jehowa wekɔ lo mbaasambisha.
Lo mɛtɛ, ondo wɛ mbeyaka monga la ambola akina lo dikambo dia Ɛmɛnyi wa Jehowa. Sho kɔlɔmbaka dia wɛ nkondja ekadimwelo lo
Mimbola Ɔmɛnyi wa Jehowa ɔmɔtshi.
Ntshɔ lo sitɛ kaso k’Ɛtɛrnɛtɛ, ka www.jw.org.
Ntshɔ lo nsanganya yaso, yasalema ofele ndo lo sɛkɛ.