Woho wakɔsaka Nzambi awui w’ata LO NTAMBE KA NTONDO

Kakɔna kakatombe? Lande na kele Nzambi kɔndɔshɛ ase Juda ta oko wakandasale lo nshi yakete? Kana lande na kele nde kombasha lotshungɔ la vɔ ndɔsha vɔamɛ ko ntshungɔ oma lo ɔhɛnyɔhɛnyɔ ɔsɔ? Onde kanyi yaki Nzambi yakatshikitana? Ndooko. Koko otshikitanu ɔmɔtshi wa woke efula wakasalema lo kɛnɛ kendana l’ase Juda. Vɔ wakatone Yeso Ɔna Nzambi oko Mɛsiya.(Etsha 2:36) Ɔnkɔnɛ, oko wodja, vɔ wakashisha diɔtɔnganelo dia laande diaki lam’asawɔ la Nzambi.—Mateo 23:37, 38.

Wodja w’ase Juda ndo Nkɛtɛ yawɔ ya daka komonga nto lo ekokelo ka Nzambi, ndo ase Juda kondjonga nto la lotshungɔ la ndɔ ata wele Nzambi aketawɔka kana akasukɛka. Oko wakatatshi Yeso, ɛtshɔkɔ waya oma lo mbetawɔma le Nzambi wakayomɔka oma le wodja wa lo demba wa Isariyɛlɛ otsha le wodja w’oyoyo, wodja wa lo nyuma, wodja ɔsɔ wakayelamɛka l’ɔkɔngɔ lo ndjela Bible ɔnɛ “Isariyɛlɛ wa Nzambi.” (Ngalatiya 6:16; Mateo 21:43) Etshumanelo k’Akristo w’akitami wa nyuma mbaki Isariyɛlɛ wa lo nyuma waki Nzambi. Diakɔ diele, wakaakɔkɔmiya lo ntambe ka ntondo ɔnɛ: “Kakianɛ nyaya wodja wa Nzambi.”—1 Petero 2:9, 10.

Ko lam’ele Akristo wa lo ntambe ka ntondo waki waya “wodja wa Nzambi,” onde Nzambi akalɔ ta lo wahɔ awɔ, dia mbatshungola oma lo ɔhɛnyɔhɛnyɔ w’ase Rɔmɔ? Ko kana onde nde akawasha lotshungɔ la ndɔsha wanɛ wakaahɛnyahɛnyaka? Ndooko, nde kosala ngasɔ. Lande na? Etena kakashaka Nzambi lotshungɔ la ndɔ ta, Nzambi ndamɛ mbakashikikɛka etena kakahombe ta ndɔma, oko wakɛnyisha sawo di’etshi. Nzambi kɔndwɛlɛ Akristo wa lo ntambe ka ntondo ta, ndo nde kombasha lotshungɔ la vɔ ndɔ ata wa l’emunyi. Mbokɛmaka hwe dia, ntambe ka ntondo komonga etena ka Nzambi ndɔ ta dia minya awui wa kɔlɔ ndo ɔhɛnyɔhɛnyɔ.

Ɔnkɔnɛ, l’ɛnyɛlɔ k’ekambi waki Nzambi wa lo nshi yakete, Akristo wa lo ntambe ka ntondo wakahombe nkonga polo lam’akahombe Nzambi nkomiya awui wa kɔlɔ ndo ɔhɛnyɔhɛnyɔ. L’etena kɛsɔ, vɔ konongola lotshungɔ oma le Nzambi dia ndɔsha atunyi awɔ. Yeso Kristo akɛnya dui nɛ hwe lo wetshelo ande. Ɛnyɛlɔ, nde kɔnɔmba ambeki ande dia vɔ ndɔ ta, koko nde akawatɛ ate: “Nyotetemale nanga atunyi anyu ndo nyotetemale nɔmba dikambo dia wanɛ wanyɔhɛnyahɛnya.” (Mateo 5:44) Lo mbuta la ntondo etena kakahombe Jɛrusalɛma ndanyema oma le alembe w’ase Rɔmɔ, Yeso aketsha ambeki ande diaha vɔ memala kana ndɔ ta, koko wakahombe ndawɔ, ndo kɛsɔ kakawasale.—Luka 21:20, 21.

Laadiko dia laasɔ, lo ɛlɔmbwɛlɔ ka nyuma k’ekila Pɔɔlɔ akafunde ate: “Tanyɔsɔmbɔyake, . . . oko wakadiafundama ɔnɛ: ‘Nsɔmbɔya ekɔ dikambo diami. Dimi kayɔsɔmbɔya,’ mbata Jehowa.” (Rɔmɔ 12:19) Pɔɔlɔ akashile kɛnɛ kakate Nzambi ntambe efula la ntondo oko wɔkɔndwamidiɔ lo Akambu w’Asi Lewi 19:18 ndo lo Euhwelu k’Elembe 32:35. Oko wakatadiɛnyi lo sawo di’etshi, yoho mɔtshi yakasɔmbɔyaka Nzambi lo wahɔ w’ekambi ande lo nshi yakete ele lo mbakimanyiya lo ndɔsha atunyi awɔ. Ɔnkɔnɛ, ɛtɛkɛta wa Pɔɔlɔ mɛnyaka dia kanyi ya Nzambi lo kɛnɛ kendana l’awui w’ata yatatshikitana. Lo ntambe ka ntondo, Nzambi akɔsaka awui w’ata oko yoho ya dimɛna ya nsɔmbɔya lo wahɔ w’ekambi ande ndo nkomiya weho tshɛ w’ɛhɛnyɔhɛnyɔ ndo awui wa kɔlɔ. Koko, oko wakidiɔ lo nshi yakete, Nzambi ndamɛ mbakashikikɛka etena kakahombaka ta ndɔma ndo onto lakahombaka ndɔsha ta.

Mbokɛmaka hwe dia, lo ntambe ka ntondo Nzambi kombisha Akristo lotshungɔ la ndɔsha ata. Ko kayotota ɛlɔ kɛnɛ? Onde Nzambi akasha olui ɔmɔtshi w’anto lotshungɔ la vɔ ndɔsha ata? Kana onde ɔnɛ ekɔ etena ka Nzambi mbekɛ lonya ndo ndɔsha ta lo wahɔ w’ekambi ande? Mbuta ate, ngande wɔsa Nzambi awui w’ata ɛlɔ kɛnɛ? Sawo di’ekomelo dia lo asawo anɛ diayokadimola lo ambola asɔ.