Ekadimwelo lo ambola anyu
◼ Lande na kele ekɔ ohomba monga la ekanelo k’ɔlɔlɔ etena kakambaso la telefɔnɛ dia nkimanyiya wanyaso wahakoke ndja lo nsanganya ya l’etshumanelo dia vɔ ndjiyela oma lawakawɔ?
Tshumanelo efula diakayalɔngɔsɔla dia kimanyiyaka anto wele tena dimɔtshi kema l’akoka wa ntshɔ lo nsanganya yasalema lo Mbalasa ya Diolelo l’ɔtɛ wa hemɔ kana wesanu ekina dia vɔ ndjiyela oma lawakawɔ lo tshimbo ya telefɔnɛ. Dia mbeya kana wanɛ wakamba la yɛdikɔ yoludi la ngandji shɔ wekɔ wanɛ wele mɛtɛ l’ohomba ayɔ, sho pombaka monga la ekanelo k’ɔlɔlɔ ndo ndjakongɛ dimɛna. Oma lɔkɔ mbele, dikumanyi dialɔmbɔla yɛdikɔ shɔ pombaka ndjakongɛ dimɛna ndo nsɛna wolo lo dikambo sɔ dia ‘akambo tshɛ nsalema dimɛna ndo aha la ofukutanu.’—1 Kor. 14:40.
Dikumanyi diayɔsɛna wolo dia yɛdikɔ shɔ monga la wahɔ ntondotondo le apandjudi wa l’etshumanelo kawɔ wele la hemɔ yahakɔnɔ kana wele la dikɔmɔ kana wele l’ɛkɔkɔ ekina wahawasha diaaso dia ndja lo nsanganya. Opandjudi wele la hemɔ lo tshanda mɔtshi kana waya kema l’akoka wa nkɛndakɛnda kana ombeki wa Bible watahame wele la tohemɔhemɔ mbeyaka nkondja wahɔ oma lo yɛdikɔ shɔ ndo mbadiema l’atei w’anto wakayedi nsanganya. L’ahole wele telefɔnɛ bu dia nkimanyiya anto wele kema l’akoka wa ntshɔ lo Mbalasa ka Diolelo, ondo tɛdikɔ tokina mbeyaka mbɔsama, ɛnyɛlɔ mbâsangwɛ awui wakatami lo nsanganya lo bandɛ kasɛtɛ.
Lo mɛtɛ, ndoko ɛngɔ kakokaso mbɛdika la wahɔ wayotokondja lo mbɔtɔka lo nsanganya yaso. Monga lo Mbalasa ka Diolelo kâmɛ l’anangɛso l’akadiyɛso tokimanyiyaka dia sho ‘keketshana lam’asaso’ ndo kimanyiyaka eyoyo dia vɔ ndeka nshihodia ohomba wa mbɔtɔka lo nsanganya. Etena keso lo nsanganya yaso, sho mbekaka akambo efula oma lo wɛnyɛlɔ wasalema, sho kokaka nkondja ekimanyielo oma le dikumanyi ndo sho mɛnaka ngandji ka la wangasanu kele lam’asaso. L’ɔkɔngɔ w’onto ɔmɔtshi nkumbatɛ kadiyɛso kɛmɔtshi la wangasanu tshɛ etena kakandayatombaka oma lo Mbalasa ka Diolelo, nde akate ate: “Hawokoke kosalɛ nganɛ lo telefɔnɛ!” Ɛtɛkɛta ande ɛsɔ wekɔ mɛtɛ.—Romo 1:11, 12.
L’ɛnyɛlɔ ka Ana ‘laki kombetshaka lo tɛmpɛlɔ,’ ɛlɔ kɛnɛ epalanga efula w’Akristo ntshɔka mbala la mbala lo nsanganya y’Akristo etena kekewɔ la wolo wa demba ndo kewɔ la diaaso. (Luka 2:36, 37) Kânga mbakambawɔ la telefɔnɛ dia ndjela nsanganya oma lawakawɔ naka ekɔ ohomba, vɔ hawɔshi dia ɔsɔ ekɔ yoho kina yakokawɔ ndjelaka nsanganya yasalema lo Mbalasa ka Diolelo. Lo mbokoya ɛnyɛlɔ kawɔ k’ɔlɔlɔ, nyɛsɔ totetemale ngɛnangɛna dia mbidjaka welo dia mbɔtɔka lo nsanganya yaso etena katɛmɔlaso Jehowa Nzambi kaso ka woke.—Osam. 95:1-3, 6; 122:1.