WOHO WA MBIDJA LOHETSHO OTSHUMBA

4 | Lohetsho kokaka mbidjama otshumba l’ekimanyielo ka Nzambi

Bible mbutaka ɔnɛ:

“Olowa wa nyuma wekɔ ngandji, ɔngɛnɔngɛnɔ, wɔladi, solo dia lotutsha, ɔlɔlɔ w’otema, ɔlɔlɔ, mbetawɔ, memakana ndo ndjakimɛ.”—NGALATIYA 5:22, 23.

Kɛnɛ kalembetshiya divɛsa nɛ:

Wɛ kokaka minya lohetsho l’ekimanyielo ka Nzambi. Nyuma kande k’ekila koka tokimanyiya dia sho nkɛnɛmɔla waonga weso tatongaka la wɔ. Ɔnkɔnɛ, lo dihole dia mpemba mbidja lohetsho otshumba lo welo aso shoamɛ, ayonga dimɛna sho ndjaɛkɛ l’ekimanyielo ka Nzambi. Naka sho nsala ngasɔ, kete tayoyaoka woho akɔ waamɛ wakayaoke ɔpɔstɔlɔ Pɔɔlɔ lakafunde ɔnɛ: “Lo akambo tshɛ, dimi lekɔ la wolo oma le ɔnɛ lambisha lokalo.” (Filipɛ 4:13) Ndo tayonga nsuke dia mbuta ɔnɛ: “Ekimanyielo kami ndjaaka oma le Jehowa.”—Osambo 121:2.

Kɛnɛ kakokayɛ nsala:

“Jehowa akatshikitanya lɔsɛnɔ lami dia ntshika awui wa ngala ko nkoma onto ladja wɔladi.”—WALDO

Lɔmba Jehowa, lɔmbande nyuma kande k’ekila l’otema ɔtɔi. (Luka 11:13) Lɔmbande dia nde kokimanyiya dia wɛ monga la waonga w’amɛna lo lɔsɛnɔ layɛ. Eka kɛnɛ kata Bible lo dikambo dia waonga watokimanyiya dia minya lohetsho, waonga wele oko ngandji, wɔladi, solo dia lotutsha ndo ndjakimɛ. Yanga toho takokayɛ nkɛnɛmɔla waonga asɔ lo lɔsɛnɔ layɛ hita. Ndo etshaka wenya kaamɛ la wanɛ wakombola ndo vɔ lawɔ nkɛnɛmɔla waonga asɔ. Angɛnyi asɔ kokaka ‘kotshutshuya lo ngandji ndo l’etsha w’ɛlɔlɔ.’—Hɛbɛru 10:24.

Dikambo dimɔtshi diakete lo lɔsɛnɔ—WALDO

Akadje awui wa ngala ndo wa lohetsho otshumba

Pami kelɛwɔ Waldo aki la lɔsɛnɔ la kɔlɔ efula etena kakandayolaka ndo dui sɔ diakayookonyaka dia nde monga la lohetsho. Nde kɔndɔlaka ate: “Lakalɔka ata lo shinga dimi la anɔshi wa kaandji . . . Lo diaaso dimɔtshi, vɔ wakafute elengalenga kɛmɔtshi kakanyanyemaka dia nde ndjakami, koko kaanga mbakinde kondjakami, nde akapomuya.”

Waldo kɔngɛnangɛna etena kakatatɛ wadɛnde mbeka Bible la Ɛmɛnyi wa Jehowa. Nde mbutaka ate: “Lakahetshaka Ɛmɛnyi wa Jehowa ndo mbala efula lakaatondjɛka ɛtɛkɛta wa kɔlɔ. Koko mbala tshɛ vɔ wakakaloyaka dui la dilɛmiɛlɔ tshɛ.”

L’ɔkɔngɔ w’etena kɛmɔtshi, Waldo nde lawɔ akayotatɛ mbeka Bible. Nde mbutaka ate: “Aki tshondo y’okakatanu le mi dia nkamba la kɛnɛ kakamekaka. Lakafɔnyaka ɔnɛ hamimɔki kanga ngala pondjo.” Koko dui dimɔtshi diakandeke oma lo Bible diakookimanyiya dia nde nsala otshikitanu wa woke.

Waldo nembetshiyaka ɔnɛ: “Lushi lɔmɔtshi, Alejandro lakambetshaka Bible akanɔmbɛ dia mbadia Ngalatiya 5:22, 23. . . . Alejandro akanembetshiya ɔnɛ paka l’ekimanyielo ka nyuma k’ekila kaki Nzambi mbakokami nkɛnɛmɔla waonga asɔ. Ɛtɛkɛta ande ɛsɔ wakatshikitanya kanyi yami tshɛ lo tshɛ!”

Lo ndjaɛkɛ l’ekimanyielo ka Nzambi, Waldo akadje lohetsho lakinde la lɔ otshumba. Nde mbutaka ate: “Ewotɔ ndo angɛnyi ami wa ntondo hawetawɔ dia dimi mbambotshikitana nganɛ.” Nde kotshaka ate: “Jehowa akatshikitanya lɔsɛnɔ lami dia ntshika awui wa ngala ko nkoma onto ladja wɔladi.”