Onga la dihonga oko Zadɔka

1-2. Zadɔka aakinde? (1 Ɛkɔndɔ 12:​22, 26-28)

ONGA oko onto lɛna woho wakete akambo. Olui w’apami ndekana 340000 wambotshumana dia mbetɛ Davidɛ nkumekanga k’Isariyɛlɛ w’otondo. L’edja ka nshi shato, mindjo y’asawo, esambo w’ɔngɛnɔngɛnɔ wa lotombo ndo ekoko wa tɔla wekɔ lo mbokɛ l’akona w’ave sukana la Hɛbɛrɔna. (1 Ɛk. 12:39) L’atei w’olui w’apami asɔ mbaki ndo ɔlɔngɔlɔngɔ ɔmɔtshi wakawelɛka Zadɔka, kaanga mbele anto kombodjaka yimba. Koko, Jehowa akawodjaka yimba ndo akalange di’anto mbeya dia Zadɔka aki laawɔ. (Adia 1 Ɛkɔndɔ 12:​22, 26-28.) Zadɔka aakinde?

² Zadɔka aki ɔlɔmbɛdi wakakambaka suke l’Ɔlɔmbɛdi a Laadiko Abiyatara. Zadɔka aki ɔmɛnyi w’akambo woshɛmi waki l’akoka wa nshihodia lolango la Nzambi ndo Nzambi akawosha lomba l’efula. (2 Sa. 15:27) Anto wakatshɔka le Zadɔka etena kakiwɔ l’ohomba w’alako wa lomba. Nde aki nto pami kaki la dihonga. Ndo dia lonto lande lɔsɔ mbayangaso nsɛdingola lo sawo nɛ.

3. a) Lande na kahomba atɛmɔdi wa Jehowa monga la dihonga? b) Kakɔna kayotɔsɛdingola lo sawo nɛ?

³ Lo nshi y’ekomelo nyɛ, Satana amboleka mfudia toho tande ta ndɔsha ekambi wa Nzambi. (1 Pe. 5:8) Sho pombaka monga la dihonga etena kakongaso dia Jehowa nkomiya Satana ndo dikongɛ diande di’akambo dia kɔlɔ. (Os. 31:24) Nyɛsɔ tɔsɛdingole toho tosato takokaso mbokoya dihonga dia Zadɔka.

SUKƐ DIOLELO DIAKI NZAMBI

4. Lande na kele ekambi wa Jehowa wekɔ l’ohomba wa dihonga dia nsukɛ Diolelo diaki Nzambi? (Enda ndo osato.)

⁴ Oko weso ekambi wa Jehowa, sho sukɛka Diolelo diaki Nzambi la tshondo tshɛ, koko mbala efula sho mongaka l’ohomba wa dihonga dia nsala dui sɔ. (Mat. 6:33) Ɛnyɛlɔ, l’andja wa kɔlɔ ɔnɛ, tekɔ l’ohomba wa dihonga dia nsɛna lo ndjela ɛlɛmbɛ wa Jehowa ndo dia nsambisha lokumu l’ɔlɔlɔ la Diolelo. (1 Tɛs. 2:2) Ndo mbala efula nɔmbamaka monga la dihonga dia nama lomangemange laso l’awui wa pɔlitikɛ lo dikongɛ nɛ di’akambo diambatɔna lo yoho y’efula. (Jni. 18:36) Ekambi wa Jehowa efula wekɔ lo diɛnɛ l’oshishelo wa falanga, lo pɛnyahɛnyama kana wekɔ lo mbidjama lo nkanu l’ɔtɛ watonawɔ mbɔtɔ l’awui wa pɔlitikɛ kana l’olimu w’ɔsɔlayi.

5. Lande na kaki Zadɔka l’ohomba wa dihonga dia nsukɛ Davidɛ?

⁵ Zadɔka kotshɔ la Hɛbɛrɔna paka dia tɔngɛnangɛna tsho lowandji la Davidɛ. Nde akatshu lɛkɔ la dihomɔ diande dia ta ndo aki suke dia ndɔsha. (1 Ɛk. 12:38) Nde akalange ndjela Davidɛ lo ta ndo toshimbɛ ase Isariyɛlɛ oma le atunyi awɔ. Zadɔka komonga la diewo efula l’awui w’ata oko ɔsɔlayi, koko nde aki la dihonga.

6. Ɛnyɛlɔ kakɔna ka dimɛna kakatshikɛ Davidɛ Zadɔka dia ndjela? (Osambo 138:3)

⁶ Oma le waa na akeke ɔlɔmbɛdi Zadɔka dia monga la dihonga? Nde akadingama l’apami waki la wolo ndo la dihonga. Aha la taamu, nde akakondja wahɔ oma l’ɛnyɛlɔ kawɔ. Ɛnyɛlɔ, dihonga dia Davidɛ ‘lakalɔmbɔlaka Isariyɛlɛ lo ata’ kakatshutshuya ase Isariyɛlɛ tshɛ dia mbosukɛ l’otema ɔtɔi. (1 Ɛk. 11:​1, 2) Davidɛ akayaɛkɛka le Jehowa dia mbokimanyiya dia ndɔshana l’atunyi ande. (Os. 28:7; adia Osambo 138:3.) Zadɔka akeke oma le apami waki la dihonga waki l’etena kande, ɛnyɛlɔ oko Jɛhɔyada ndo ɔnande l’ɔsɔlayi Bɛnaya mbidja ndo ewandji ekina wa nkumbo 22 wakasukɛka Davidɛ. (1 Ɛk. 11:​22-25; 12:​26-28) Apami asɔ tshɛ wakɔshi yɛdikɔ ya nsukɛ lowandji la Davidɛ.

7. a) Kakɔna kakokaso mbeka oma lo bɛnyɛlɔ dia nshi nyɛ di’anto wele la dihonga? b) Wetshelo akɔna wamboyokondja oma l’ɛnyɛlɔ k’ɔnangɛso Nsilu oko wɛnyamidiɔ lo vidɛo?

⁷ Sho kondjaka wolo ndo dihonga etena kasɛdingolaso bɛnyɛlɔ dia wanɛ wakasukɛ la dihonga tshɛ ɛlɔmbwɛlɔ ka Jehowa. Nkumekanga kaso Yeso Kristo, akashike ntanga lo tɔsɛngiya ta ndjatambiya lo dikongɛ di’akambo dia pɔlitikɛ diaki Satana. (Mat. 4:​8-11; Jni. 6:​14, 15) Nde akayaɛkɛ le Jehowa dia mbokeketsha. Tekɔ nto la bɛnyɛlɔ dia nshi nyɛ di’ɛlɔngɔlɔngɔ washika ntanga, watona diaha nsala dikambo diaashimba nkum’etema yawɔ kana watona dia ndjatambiya l’awui wa pɔlitikɛ. Lande na kahatadia ɛkɔndɔ awɔ lo jw.org?a

KIMANYIYA ANANGƐYƐ

8. Etena kakɔna kahomba dikumanyi monga l’ohomba wa dihonga dia nkimanyiya anangɛwɔ?

⁸ Ekambi wa Jehowa kimanyiyanaka lam’asawɔ. (2 Kɔr. 8:4) Koko lo tena dimɔtshi, nɔmbamaka monga la dihonga dia nsala dui sɔ. Ɛnyɛlɔ etena kalɔma ta, dikumanyi dia l’ɛtshi ka nkɛtɛ kakɔ shihodiaka di’anangɛwɔ l’akadiyɛwɔ wekɔ l’ohomba w’ekeketshelo, w’osukɔ ndo ondo w’ekimanyielo ka lo nyuma ndo ka lo demba. Oma lo ngandji kokawɔ ɛkɔkɔ, dikumanyi mbidjaka nsɛnɔ yawɔ lo waale l’oyango wa vɔ nkotsha ehomba w’ɛkɔkɔ ɛsɔ. (Jni. 15:​12, 13) Lo nsala ngasɔ, vɔ mbokoyaka ɛnyɛlɔ ka dihonga kaki Zadɔka.

9. Oko wɔkɔndwamidiɔ lo 2 Samuɛlɛ 15:​27-29, kakɔna kakalɔmbɛ Davidɛ Zadɔka dia nsala? (Enda ndo osato.)

⁹ Lɔsɛnɔ la Davidɛ laki lo waale. Ɔnande Abisalɔma akayashikikɛ dia mbodiaka l’oyango wa nde nkoma nkumekanga. (2 Sa. 15:​12, 13) Davidɛ akahombe mimɔ oma la Jɛrusalɛma aha la ntshimbatshimba! Nde akatɛ ekambi ande tshɛ ate: “Nyonee, nyoyete tolawɔ, nɛ dia ndooko onto l’atei aso layohandɔ oma l’anya wa Abisalɔma!” (2 Sa. 15:14) Etena kakawatatshɔka, Davidɛ akashihodia di’akahombama onto ɔmɔtshi ntshikala dia mbeewoyaka kɛnɛ tshɛ kakahombaka Abisalɔma nsala. Ɔnkɔnɛ, nde akakawoya Zadɔka ndo ɛlɔmbɛdi ekina l’osomba dia vɔ tokamba oko atɔpi. (Adia 2 Samuɛlɛ 15:​27-29.) Wakahombe monga la yambalo y’efula. Kɛnɛ kakalɔmbɛ Davidɛ ɛlɔmbɛdi ɛsɔ dia nsala aki waale efula. Ohokanyiya kɛnɛ kotosalɛ Abisalɔma, pami ka lotamanya, ka shɔmbɔya ndo ka lokeso, Zadɔka ndo ɛlɔmbɛdi ekina otondoshola dia vɔ waki atɔpi wakalange dia ntshikala la nde dia nkokɛ Davidɛ!

10. Ngande wakasale Zadɔka ndo anto waki kaamɛ la nde dia nkokɛ Davidɛ?

¹⁰ Davidɛ akalɔmbɛ Zadɔka la ɔngɛnyi ande okina wa kɔlamelo Hushai, dia vɔ mbosukɛ lo kanyi yande. (2 Sa. 15:​32-37) Lo ndjela kanyi yakɔ, Hushai aketawɔma le Abisalɔma lakayowetɛ owandji w’asɔlayi ndo kɛsɔ akasha Davidɛ etena ka ndjalɔngɔsɔla dia mbalɔsha. Oma laasɔ, Hushai akatɛ Zadɔka la Abiyatara kanyi yakɔ. (2 Sa. 17:​8-16) Laasɔ, apami ahende asɔ wakayonga l’akoka wa tomɛ Davidɛ losango. (2 Sa. 17:17) L’ekimanyielo ka Jehowa, Zadɔka nde l’asekande ɛlɔmbɛdi wakakambe olimu wa wolo dia nkokɛ lɔsɛnɔ la Davidɛ.—2 Sa. 17:​21, 22.

11. Ngande wakokaso mbokoya dihonga diaki Zadɔka etena kakimanyiyaso anangɛso?

¹¹ Naka wambotɔlɔmba dia nkimanyiya anangɛso lo tena dia waale, ngande wakokaso mɛnya dihonga oko diaki la Zadɔka? 1) Yela ɛlɔmbwɛlɔ. Lo tena dia ngasɔ, ekɔ ohomba sho ntshikala kaamɛ. Yela ɛlɔmbwɛlɔ k’oma lo Bɛtɛlɛ kanyu. (Hɛb. 13:17) Dikumanyi wayonyosha ɛlɔmbwɛlɔ kendana la woho wa ndjaalɔngɔsɔla dikambo dia mpokoso ndo kɛnɛ kakokanyu nsala etena katomba mpokoso. (1 Kɔr. 14:​33, 40) 2) Onga la dihonga ndo la yewo. (Tok. 22:3) Kanyiya la ntondo ka nsala dui dimɔtshi. Toyadjake lo waale tshanana. 3) Yaɛkɛ le Jehowa. Nyohɔ dia Jehowa ndjakiyanyaka lo yɛdikɔ y’efula lo dikambo dianyu ndo di’anangɛnyu. Nde koka nyosha akoka wa nyu nkimanyiya anangɛnyu diaha vɔ monga lo waale.

12-13. Wetshelo akɔna wamboyokondja oma lo kɛnɛ kakasale Viktor nde la Vitalii? (Enda ndo osato.)

¹² Tɔsɛdingole ɛnyɛlɔ ka Viktor nde la Vitalii, anangɛso ahende wele la lonyuma wakakambe wolo dia mbisha asekawɔ atɛmɔdi mbo ya ndɛ la ashi l’Ukraine. Viktor mbutaka ate: “Takayangaka mbo ya ndɛ ahole tshɛ. Mbala efula, asashi wakatondɔtondɔka sukana la so. Ɔnangɛso ɔmɔtshi akakimɔ mbo ya ndɛ oma lo eombelo kande. Woshasha ɔsɔ wakakimanyiya apandjudi efula la kɛnɛ kaki lawɔ ohomba dia nsɛna l’edja k’etena kɛmɔtshi. Etena kakatadjaka diangɔ lo mutuka, bɔmbɛ kɛmɔtshi kakatondɔ lo mɛtrɛ oko 20 mangana la so. Lakalɔmbɛ Jehowa lushi l’otondo dia mbishami dihonga diaki lami ohomba dia ntetemala nkimanyiya apandjudi.”

¹³ Vitalii mbutaka ate: “Akalɔmbamaka monga la dihonga di’efula. Lɔkɛndɔ lami la ntondo lakɔshi wenya 12. Lakataalɔmbaka Jehowa lo mboka k’otondo.” Vitalii aki la dihonga koko nde aki ndo la yewo. Nde kotshaka ate: “Lakatetemala nɔmba Jehowa lomba ndo wɛdimo. Lakatetaka paka lo mboka kaketawɔka ɛnɔmbɔdi di’anto mbeta. Lakakondja wahɔ lo mɛna woho wakakambaka anangɛso l’akadiyɛso kaamɛ. Wakatanyaka diangɔ tshɛ diakadihaka mboka, wakatakɔngɔlaka weshasha ko wakadjaka lo mutuka ndo wakatoshaka mbo ya ndɛ ndo ahole wa sho momuya lo mboka k’otondo.”

TSHIKALA LA KƆLAMELO LE JEHOWA

14. Ngande wayotoyaoka naka onto ɔmɔtshi lokaso ngandji ambotshika kambɛ Jehowa?

¹⁴ Ohemba ɔmɔtshi l’atei w’ehemba wa wolo wakokayɛ mpomana la wɔ ele, etena katshika ose nkumbo kana ɔngɛnyi ayɛ wa ma ma kambɛ Jehowa. (Os. 78:40; Tok. 24:10) Etena kayoyotalekaka mboka onto ɔsɔ ngandji, mbayondotalekaka monga wolo le yɛ dia mbikikɛ okakatanu ɔsɔ. Naka lo tena dimɔtshi wɛ amboyaokaka ngasɔ, kete ɛnyɛlɔ ka kɔlamelo ka Zadɔka koka kokeketsha.

15. Lande na kaki Zadɔka l’ohomba wa dihonga dia ntshikala la kɔlamelo le Jehowa? (1 Nkumi ya dikanga 1:​5-8)

¹⁵ Zadɔka akatshikala la kɔlamelo kaanga etena kakashisha ɔngɛnyi ande Abiyatara kɔlamelo le Jehowa. Dui sɔ diakatombe l’ekomelo k’ɛlɔmbwɛlɔ ka Davidɛ. Etena kaki Davidɛ suke la mvɔ, ɔnande Adɔnidja akayange dia mbahema la wolo lo kɔsa ka lowandji kakalake Jehowa Sɔlɔmɔna. (1 Ɛk. 22:​9, 10) Abiyatara akasɔnɛ dia nsukɛ Adɔnidja. (Adia 1 Nkumi ya dikanga 1:​5-8.) Lo nsala ngasɔ, Abiyatara akashisha kɔlamelo yande aha paka le Davidɛ oto koko ndo le Jehowa. Ande ɔkɛyi ndo lonyangu lakakoke monga la Zadɔka lee! L’edja kolekanyi ɛnɔnyi 40, nde l’Abiyatara wakakambe kaamɛ oko ɛlɔmbɛdi. (2 Sa. 8:17) Vɔ wakakokɛ “Ɔshɛtɛ wa Nzambi ka mɛtɛ” kaamɛ. (2 Sa. 15:29) L’etatelo, apami akɔ ahende wakasukɛ lowandji laki Davidɛ ndo wakasale awui efula l’olimu wa Jehowa.—2 Sa. 19:​11-14.

16. Kakɔna kakahombe nkimanyiya Zadɔka dia ntshikala la kɔlamelo?

¹⁶ Zadɔka akatshikala la kɔlamelo kaanga mbaki Abiyatara kotshikala la kɔlamelo le Jehowa. Davidɛ komvɔ tshodia lo kɔlamelo yaki Zadɔka. Etena kakawashola sheke yaki Adɔnidja, Davidɛ akatɛ Zadɔka, Natana ndo Bɛnaya dia nkita Sɔlɔmɔna esɔ oko nkumekanga. (1 Nku. 1:​32-34) Lo monga kaamɛ l’atɛmɔdi wa Jehowa wa kɔlamelo, ɛnyɛlɔ oko Natana ndo anto akina wakasukɛka nkumekanga Davidɛ, Zadɔka akahombe keketshama ndo monga la dihonga. (1 Nku. 1:​38, 39) Etena kakakome Sɔlɔmɔna nkumekanga, nde “akasɔnɛ ɔlɔmbɛdi Zadɔka lo dihole dia Abiyatara.”—1 Nku. 2:35.

17. Ngande wakokayɛ mbokoya Zadɔka naka ɔngɛnyi ayɛ ambotshika kambɛ Jehowa?

¹⁷ Ngande wakokayɛ mbokoya Zadɔka? Naka ɔngɛnyi ayɛ ambɔsɔna dia ntshika kambɛ Jehowa, kete tetawɔke ntshika kambɛ Jehowa. (Jas. 24:15) Jehowa ayokosha wolo ndo dihonga diele la yɛ ohomba. Yaɛkɛka le nde lo dɔmbɛlɔ ndo ongaka kaamɛ l’atɛmɔdi ande wa kɔlamelo. Jehowa mbɔsaka kɔlamelo yayɛ la nɛmɔ ndo ayokofuta l’ɔtɛ ayɔ.—2 Sa. 22:26.

18. Kakɔna kamboyeka oma lo kɛnɛ kakakomɛ Marco nde la Sidse?

¹⁸ Tɔsɛdingole ɛnyɛlɔ ka Marco nde la wadɛnde Sidse, wele anawɔ ahende wa wamato waya epalanga wakɔshi yɛdikɔ ya ntshika kambɛ Jehowa. Marco mbutaka ate: “Oma ko lushi lotɔ anayɛ, wɛ mbalangaka efula. Wɛ koka nsala kɛnɛ tshɛ kakokayɛ nsala dia mbakokɛ oma lo waale. Laasɔ etena kasɔnawɔ dia ntshika kambɛ Jehowa, dui sɔ mbishaka paa efula l’asolo.” Nde tetemalaka mbuta ate: “Koko Jehowa aki lo wedi aso. Nde akasale dia etena kemi wɔdu, ko wadɛmi monga wolo ndo etena kende wɔdu, ko dimi monga wolo.” Sidse kotshaka ate: “Toototonga l’akoka wa mbikikɛ otondongaka Jehowa kotosha wolo waki la so ohomba. Lakayaɛndjaka onongo lo mfɔnya dia aki munga kami, ko lakatɛ Jehowa woho wakamayaokaka. Kombeta edja, kadiyɛso kɛmɔtshi kaketshana la mi ambeta ɛnɔnyi efula akaye oya le mi, akambahɛ anya l’ahɛka, akamende tɛɛ ndo akambutɛ ate: ‘Sidse, eya diaha munga kayɛ!’ L’ekimanyielo ka Jehowa, lakasale la wolo dia nama ɔngɛnɔngɛnɔ ami lo mbokambɛ.”

19. Kakɔna kamboyoyashikikɛ dia nsala?

¹⁹ Jehowa nangaka di’atɛmɔdi ande tshɛ monga la dihonga oko diaki la Zadɔka. (2 Tim. 1:7) Koko, Nde halange dia sho ndjaɛkɛ lo wolo aso hita. Nde nangaka dia sho ndjaɛkɛ le nde. Laasɔ etena katanemayɛ lo dikambo dimɔtshi dialɔmba dia wɛ monga la dihonga, endɛ le Jehowa. Wɛ koka monga l’eshikikelo dia nde ayokosha dihonga oko nɛ diaki la Zadɔka!—1 Pe. 5:10.