Ambola w’oma le ambadi

Waa na wele “andjelo wakasɔnama” wɔtɛkɛtami lo 1 Timɔte 5:21?

Ɔpɔstɔlɔ Pɔɔlɔ akafundɛ osekande Timɔtɛ ate: “Lambokodjangɛ la kiɔkɔmɛ tshɛ la ntondo ka Nzambi ndo ka Kristo Yeso ndo k’andjelo wakasɔnama dia wɛ ndjela alako anɛ aha la tongi ntondo la tokanyi ta kɔlɔ kana la shɔnɔdi.”—1 Tim. 5:21.

Ntondotondo, tayanga nsɛdingola wanɛ wahatakoke mbidja l’ɔnɔngɔ w’andjelo asɔ. Mbokɛmɛka hwe dia andjelo asɔ bu anto 144000 wanɛ wayolɛ la Yeso. Etena kakafundɛ Pɔɔlɔ Timɔte, ko eolwelo k’Akristo w’akitami otsha l’olongo katatatɛ. L’etena kɛnɛ ko apɔstɔlɔ l’akitami akina watakome ditongami dia lo nyuma, laasɔ “andjelo wakasɔnama” komendanaka la wɔ.—1 Kɔr. 15:​50-54; 1 Tɛs. 4:​13-17; 1 Jni. 3:2.

Ndo nto, “andjelo wakasɔnama” komonga andjelo wakatɔmbɔkɔ l’etena ka Mvula k’elola. Andjelo asɔ wakete lo wedi wa Satana ndo wakakome ɛdiɛngɛ walɔshana la Yeso. (Eta. 6:2; Luka 8:​30, 31; 2 Pe. 2:4) Lo nshi yayaye, vɔ wayodjama lo difuku diaha l’ekomelo l’edja k’ɛnɔnyi 1000 ndo oma laasɔ, vɔ wayolanyenama kaamɛ la Diabolo.—Judɛ 6; Ɛny. 20:​1-3, 10.

“Andjelo wakasɔnama” wakatɛkɛta Pɔɔlɔ pombaka monga andjelo wele l’olongo wakasukɛ ‘Nzambi ndo Kristo Yeso,’ wɔtɛkɛtshiwɔ lo divɛsa diakɔ diaamɛ.

Andjelo wa kɔlamelo wekɔ nunu la nunu. (Hɛb. 12:​22, 23) Mɛnamaka dia Jehowa hasha andjelo olimu akɔ waamɛ dia vɔ nkamba l’etena kakɔ kaamɛ. (Ɛny. 14:​17, 18) Tohɔ dia l’etena kɛmɔtshi, ondjelo ɔtɔi akadiake asɔlayi w’ase Asuriya 185000. (2 Nku. 19:35) Lofulo lɔmɔtshi l’andjelo wakalongola ɔkɛndɛ wa ‘ntshumanya diangɔ tshɛ diatakanya anto ndo anto wɔnyɔla ɛlɛmbɛ oma lo Diolelo dia Yeso.’ (Mat. 13:​39-41) Akina “wayotshumanya asɔnami ande kaamɛ” otsha l’olongo. (Mat. 24:31) Ndo wakadjangɛ akina nto dia vɔ ‘tolama lo mboka yaso tshɛ.’—Os. 91:11; Mat. 18:10; ɛdika la Mateo 4:11; Luka 22:43.

“Andjelo wakasɔnama” wɔtɛkɛtami lo 1 Timɔte 5:21 waki ondo andjelo wakalongola ɛkɛndɛ wa laande wa nkokɛ tshumanelo. Lo ndjela awui wɔtɛkɛtami lo etenyi ka divɛsa kɛnɛ, Pɔɔlɔ akasha alako wa lomba wendana la dikumanyi, wanɛ wasungana nɛmiyama l’etshumanelo. Lo wedi awɔ, dikumanyi pombaka nkotsha ɛkɛndɛ awɔ “aha la tongi ntondo la tokanyi ta kɔlɔ kana la shɔnɔdi” ndo hawohombe mbɔsa tɛdikɔ l’esasesase. Ɔkɔkɔ ɔmɔtshi wa woke wahombawɔ ndjela dako dia Pɔɔlɔ diakasambiyama sɔ ele, nɛ dia vɔ wekɔ lo nsala akambo “la ntondo ka Nzambi ndo ka Kristo Yeso ndo k’andjelo wakasɔnama.” Mbokɛmaka hwe di’andjelo amɔtshi wakalongola ɛkɛndɛ wendana la etshumanelo, ɛnyɛlɔ lo mbakokɛ, mbakimanyiya l’olimu w’esambishelo, ndo oma laasɔ ko vɔ tosha Jehowa alapɔlɔ.—Mat. 18:10; Ɛny. 14:6.