Lande na kele lokombo la Jehowa ohomba efula le Yeso?

1-2. a) Kakɔna kakasale Yeso l’otsho wa la ntondo ka nyɔi kande? b) Ambola akɔna wayotɔsɛdingola lo sawo nɛ?

AKI Lushi la nɛi la dikɔlɔ lo Nisana 14, 33 T.D., mbaki Yeso suke la fungama, nomboshama, mbidjama lo lokanu, soyama ndo ndjakema. Nde aki tsho oma la ndɛ dambo dia laande lo luudu la la diko kaamɛ l’apɔstɔlɔ ande wa kɔlamelo. L’ɔkɔngɔ wa dambo sɔ, Yeso akatɛ apɔstɔlɔ ande ɛtɛkɛta ɛmɔtshi w’ekomelo w’ekeketshelo. Ndo yema tshitshɛ la ntondo ka vɔ ntomba oma lo luudu la la diko, Yeso akasale dɔmbɛlɔ di’ohomba efula. Ɔpɔstɔlɔ Joani akafunde dɔmbɛlɔ diakɔ ndo diɔ tanemaka lo Joani tshapita 17.

² Kakɔna katosholɛ dɔmbɛlɔ dia Yeso lo kɛnɛ kendana la woho wakandayakiyanyaka l’etena kɛsɔ? Ngande wɛnya dɔmbɛlɔ sɔ kɛnɛ kaki ohomba le nde l’edja k’olimu ande w’esambishelo lanɛ la nkɛtɛ? Nyɛsɔ tɔsɛdingole ekadimwelo wa ambola asɔ.

“DIMI LAKAWAEWOYA LOKOMBO LAYƐ”

3. Kakɔna kakate Yeso lo kɛnɛ kendana la lokombo Jehowa ndo kakɔna kakandalange mbuta? (Joani 17:​6, 26)

³ Lo dɔmbɛlɔ diande sɔ, Yeso akate ate: “Dimi lakawaewoya lokombo layɛ.” Lo mɛtɛ, nde akate mbala hiende y’etondo dia nde akewoya lokombo la Jehowa le ambeki ande. (Adia Joani 17:​6, 26.) Kakɔna kakandalange mbuta? Onde nde akawasholɛ lokombo lɔmɔtshi lakiwɔ kombeyaka? Ambeki wa Yeso waki ase Juda, laasɔ vɔ wakeyaka dia lokombo la Nzambi ekɔ Jehowa. Lokombo lakɔ tanemaka mbala nunu l’Afundelo wa lo Hɛbɛru. Laasɔ, Yeso konanga ntɛkɛta dia lokombo l’oshika laki Nzambi koko nde akalange ntɛkɛta dia kitshimudi ya lɔ. Yeso akakimanyiya ambeki ande dia vɔ mbeya Jehowa dimɛna mbidja ndo sangwelo Diande lo dikambo di’anto, kɛnɛ kakandasale, kayondosala ndo waonga wele la nde. Yeso ndamɛ oto mboleki mbeya Jehowa dimɛna.

4-5. a) Ngande wakoka lokombo l’onto ɔmɔtshi ndeka monga la nɛmɔ efula le so? b) Lo yoho yakɔna yakeye ambeki waki Yeso lokombo la Jehowa?

⁴ Ɛnyɛlɔ, tɔshi dia ekumanyi kɛmɔtshi kelamɛ David ekɔ l’etshumanelo kanyu ndo ekɔ dɔkɔtɛlɛ. Wɛ okeyaka ɔnangɛso ɔsɔ l’edja k’ɛnɔnyi efula. Koko lushi lɔmɔtshi, wɛ ambondama la hemɔ ka wanyandja. Ko wɛ ambosamanya otsha lo lopitadi lakamba ɔnangɛso akɔ ndo nde ambokamba la diewo diande di’aseka enganga dia nshimbɛ lɔsɛnɔ layɛ. Onde lokombo l’ɔnangɛso ɔsɔ layoleka monga la nɛmɔ efula le yɛ? Ekɔ ngasɔ! David aya bu tsho onto leyayɛ koko aya ndo dɔkɔtɛlɛ diakashimbɛ lɔsɛnɔ layɛ.

⁵ Woho akɔ waamɛ mbele, ambeki waki Yeso wakeyaka lokombo laki Jehowa. Koko lokombo lɔsɔ lakayoleka monga ohomba efula le wɔ, nɛ dia Yeso akaakimanyiya dia mbeka dia mbeya Jehowa dimɛna. Lande na kakokaso mbuta ngasɔ? Nɛ dia Yeso akakɛnɛmɔla lonto laki She l’oseka dui tshɛ diakandataka ndo diakandasalaka. Laasɔ, apɔstɔlɔ waki Yeso ‘wakayeyaka’ Jehowa dimɛna lo mboka woho waketshaka Yeso ndo lo mɛna woho wakandasalɛka anto akambo.—Jni. 14:9; 17:3.

“LOKOMBO LAYƐ LAKAYAMBISHA”

6. Lo woho akɔna wakasha Jehowa, Yeso lokombo lande? (Joani 17:​11, 12)

⁶ Lo dɔmbɛlɔ diande, Yeso akalɔmbɛ lo dikambo di’ambeki ande ate: “Owakoke l’ɔtɛ wa lokombo layɛ lakayambisha.” (Adia Joani 17:​11, 12.) Onde kɛsɔ nembetshiyaka dia Yeso akahombe mbeyama oko Jehowa? Ndooko. Tolembete dia lo dɔmbɛlɔ diande, Yeso akatɛkɛta lo dikambo dia Jehowa ate: “Lokombo layɛ.” Laasɔ, lokombo la Jehowa kokoma lokombo l’oshika laki Yeso. Ko kakɔna kakalange Yeso mbuta etena kakandate ate wakawosha lokombo la Nzambi? Ntondotondo, Yeso aki onyimpala wa Jehowa ndo Yɛmba awui yande. Nde akaye lo lokombo la She ndo akasale elimu wa diambo lo lokombo lɔsɔ. (Jni. 5:43; 10:25) Ndo nto, lokombo laki Yeso nembetshiyaka ɔnɛ: “Jehowa ekɔ panda.” Laasɔ, kitshimudi ya lokombo laki Yeso ekɔ ndo la lokombo la Jehowa.

7. Sha ɛnyɛlɔ kɛnya woho wakakoke Yeso ntɛkɛta lo lokombo la Jehowa.

⁷ Lam’ele onyimpala mbɔsaka dihole dia owandji wa wodja, nde koka ntɛkɛta lo lokombo l’owandji wa wodja. Laasɔ, ɛtɛkɛta w’onyimpala wayonga la nɛmɔ dia woho akɔ waamɛ l’ɛtɛkɛta w’owandji. Woho akɔ waamɛ mbele, Yeso aki onyimpala wa Nzambi ndo akatɛkɛta lo lokombo Lande.—Mat. 21:9; Luka 13:35.

8. Lande na kakate Jehowa dia lokombo lande lekɔ “le” Yeso kaanga la ntondo ka Yeso ndja la nkɛtɛ? (Etombelo 23:​20, 21)

⁸ Oko wende Dui, Yeso akakambe oko Yɛmba awui ya Jehowa dia mbewoya losango ndo ɛlɛmbɛ le ditongami dikina dia lo nyuma diaki Nzambi ndo le anto. (Jni. 1:​1-3) Yeso mbaki ondo ondjelo wakatome Jehowa dia tokokɛ ase Isariyɛlɛ etena kakiwɔ l’oswe wa shɛnga. Etena kakatɛ Jehowa ase Isariyɛlɛ dia nkitanyiya ondjelo, nde akate ate: “Dikambo lokombo lami lekɔ le nde.”a (Adia Etombelo 23:​20, 21.) Jehowa akate ate lokombo lande lekɔ “le” Yeso nɛ dia Yeso akatɛkɛta akambo wa Jehowa ndo nde mbele onto la ntondo lakɛnya dia Jehowa salaka akambo tshɛ la losembwe ndo ɔnɛ Jehowa ekɔ ekila.

“PAPA, OTOMBOLE LOKOMBO LAYƐ”

9. Ohomba wa ngande waki la lokombo la Jehowa le Yeso? Lembetshiya.

⁹ Oko wambotodiɛna, kaanga la ntondo ka Yeso ndja la nkɛtɛ, lokombo la Jehowa laki ohomba efula le nde. Aha la taamu, lokombo la Jehowa lakendanaka la kɛnɛ tshɛ kakasalaka Yeso etena kakinde lanɛ la nkɛtɛ. Otsha l’ekomelo k’olimu ande, Yeso akalɔmbɛ Jehowa ate: “Papa, otombole lokombo layɛ.” Aha la ntshimbatshimba, She akakadimola la dui dia wolo oma l’olongo ate: “Dimi lakalitombola ndo layolitombola nto.”—Jni. 12:28.

10-11. a) Ngande wakatombola Yeso lokombo la Jehowa? (Enda ndo osato.) b) Lande na kahomba lokombo la Jehowa kidiama ndo mamemɛ?

¹⁰ Ndo Yeso akatombola lokombo la She. Lo woho akɔna? Yoho mɔtshi ele lo mbisholɛ anto waonga ndo etsha wa diambo wele la She. Lokombo la Jehowa lakahombe kidiama ndo mamɛ lokumu lande.b Yeso akɛnya ohomba wa dui sɔ etena kakandetsha ambeki ande dɔmbɛlɔ dia ɛnyɛlɔ. Nde akawatɛ dia nɔmbaka ɔnɛ: “Shɛso lele l’olongo, lokombo layɛ lakidiame.”—Mat. 6:9.

¹¹ Lande na kakahombe lokombo la Jehowa kidiama ndo mamemɛ? Nɛ dia l’ekambɔ k’Ɛdɛna, Satana Diabolo akate kashi lo lokombo la Jehowa Nzambi. Satana akate dia Jehowa ekɔ kanga kashi ndo akadime Adama l’Eva ɛngɔ kɛmɔtshi ka dimɛna efula. (Eta. 3:​1-5) Lo ntɛkɛta ngasɔ, Satana akɛnya dia yoho ya Jehowa ya nsala akambo bu dimɛna. L’ɔtɛ wakate Satana kashi lo dikambo dia Jehowa, anto mbeyaka ndjɔfɔnya dia Jehowa ekɔ onto la kɔlɔ. Ndo nto, lo nshi ya Jɔbɔ, Satana akate dia anto wekɔ lo kambɛ Jehowa paka l’ɔtɛ wa wahɔ ɔmɔtshi. Kanga kashi ɔsɔ akate di’anto koka ntshika kambɛ Jehowa etena kewɔ l’ohemba nɛ dia vɔ hawowoke ngandji ka mɛtɛ. (Jɔbɔ 1:​9-11; 2:4) Akalɔmbama di’etena kɛmɔtshi mbeta di’anto mbishola ele kanga kashi lam’asa Jehowa la Satana.

“LAYANGA NKIMƆ LƆSƐNƆ LAMI”

12. Kakɔna kaki Yeso suke dia nsala l’ɔtɛ wa ngandji kokande lokombo la Jehowa?

¹² L’ɔtɛ wa ngandji kakandokaka lokombo la Jehowa, Yeso akasale kɛnɛ tshɛ kakinde l’akoka wa nsala dia mamɛ ndo nkokɛ lokombo la Jehowa. Diakɔ diakandate ate: “Layanga nkimɔ lɔsɛnɔ lami.” (Jni. 10:​17, 18) Lo mɛtɛ, Yeso aki kaanga suke dia mvɔ l’ɔtɛ wa lokombo la Jehowa.c Anto ahende wa ntondo wa kokele, mbuta ate Adama l’Eva, wakoke Jehowa ɔkɔngɔ ndo wakete lo wedi wa Satana. Otshikitanyi la wɔ, Yeso aketawɔ ndja la nkɛtɛ dia mɛnya ngandji kokande Jehowa. Yeso akakitanyiyaka Jehowa lo kɛnɛ tshɛ kakandataka ndo kakandasalaka. (Hɛb. 4:15; 5:​7-10) Nde akalame olowanyi ande lɔsɛnɔ l’otondo polo ndo lo nyɔi ka l’otamba w’asui. (Hɛb. 12:2) Lo yoho shɔ, nde akɛnya ngandji kokande Jehowa ndo lokombo Lande.

13. Lande na kele aki paka Yeso oto mbakakoke mɛnya dia Satana ekɔ kanga kashi? (Enda ndo osato.)

¹³ L’edja tshɛ ka lɔsɛnɔ lande lanɛ la nkɛtɛ, Yeso akɛnya l’eshikikelo tshɛ ɔnɛ Satana mbele kanga kashi koko aha Jehowa. (Jni. 8:44) Yeso akeyaka Jehowa dimɛna oleki anto akina tshɛ. Otondongaka aki kaanga dui ɔtɔi dia mɛtɛ lo awui wakate Satana lo dikambo dia Jehowa, tshike Yeso oteya. Koko Yeso akayashikikɛ dia mamɛ lokumu ndo lokombo la Jehowa. Kaanga etena kakandɛnamaka diele oko Jehowa ambookalɛ, Yeso aketawɔ mvɔ lo dihole dia mboka She ka ngandji ɔkɔngɔ.—Mat. 27:46.d

“LAMBOSHIDIYA OLIMU WAKAYAMBISHA”

14. Ngande wakatshɔkɔla Jehowa kɔlamelo ya Yeso?

¹⁴ Lo dɔmbɛlɔ diakandalɔmbɛ l’otsho wa la ntondo ka nyɔi kande, Yeso akakoke mbuta ate: “Lamboshidiya olimu wakayambisha dia nsala.” Nde aki l’eshikikelo dia Jehowa akahombe mbofuta l’ɔtɛ wa kɔlamelo yande. (Jni. 17:​4, 5) Yeso aki la shadiya lo woho wakandayaɛkɛ le She. Jehowa kombetawɔ dia Yeso ntshikala lo diombo. (Ets. 2:​23, 24) Nde akoolola Yeso ndo akawosha dihole dia laadiko l’olongo. (Flpɛ. 2:​8, 9) Ndo l’ekomelo, Yeso akatatɛ nɔmbɔla oko Nkumekanga ka Diolelo diaki Nzambi. Kakɔna kakahombe Diolelo sɔ nsala? Etenyi ka hende ka dɔmbɛlɔ di’ɛnyɛlɔ totɛka ɔnɛ: “Diolelo diayɛ diaye. Lolango layɛ [wɛ Jehowa] latshame la nkɛtɛ oko watshamalɔ l’olongo.”—Mat. 6:10.

15. Kakɔna nto kayosala Yeso?

¹⁵ Kem’edja lo nshi yayaye, Yeso ayolanya atunyi wa Nzambi ndo anto wa kɔlɔ lo Aramangɛdɔna. (Ɛny. 16:​14, 16; 19:​11-16) Yema tshitshɛ oma laasɔ, nde ayokasha Satana lo “difuku diaha l’ekomelo” lɛnɛ ayondodihama ndo hatonga l’akoka wa nsala ndooko dui. (Ɛny. 20:​1-3) Yeso ayokaloya wɔladi ndo ayokonya anto tshɛ kokele l’Ɛlɔmbwɛlɔ kande k’ɛnɔnyi kinunu. Nde ayolola wanɛ wakavu. Ndo ayetɛ nkɛtɛ k’otondo paradiso. Laasɔ, sangwelo dia Jehowa diayokotshama!—Ɛny. 21:​1-4.

16. Kakɔna kayosalema otsha l’ekomelo k’Ɛlɔmbwɛlɔ k’ɛnɔnyi kinunu?

¹⁶ Kakɔna kakokaso nongamɛ kayosalema otsha l’ekomelo k’Ɛlɔmbwɛlɔ k’ɛnɔnyi kinunu? Pɛkato ndo eongelo kele keema kokele hatonga nto. Anto hawotonga l’ohomba wa nɔmba edimanyelo lo tshimbo y’oshinga w’etshungwelo, ndo hawotonga l’ohomba w’ompakemi kana monga l’ohomba w’ɛlɔmbɛdi. Ndo “otunyi w’ekomelo wayolanyema ele nyɔi.” Waombo wayotshikala hwe. Anto wakavu wayolɔ. Ndo anto tshɛ wayokoma kokele.—1 Kɔr. 15:​25, 26.

17-18. a) Kakɔna kayotomba l’ekomelo k’Ɛlɔmbwɛlɔ k’ɛnɔnyi kinunu? b) Kakɔna kayosala Yeso etena kayondokoma l’ekomelo k’ɛlɔmbwɛlɔ kande? (1 Kɔrɛtɔ 15:​24, 28) (Enda ndo osato.)

¹⁷ Kakɔna nto kayosalema otsha l’ekomelo k’Ɛlɔmbwɛlɔ k’ɛnɔnyi kinunu? L’etena kɛsɔ, dui dimɔtshi dia laande diayosalema. Taamu tendana l’okidiamelo wa lokombo la Jehowa tayokomɛ. Lo woho akɔna? Lo ekambɔ k’Ɛdɛna, Satana akate dia Jehowa ekɔ kanga kashi ndo ɔnɛ Nde halɔmbɔla anto la ngandji. Oma ko etena kɛsɔ, lokombo lande lakakidiama pondjo pondjo oma le wanɛ wawɔlɛmiya ndo wawokitanyiya. Ɔnkɔnɛ, l’ekomelo k’Ɛlɔmbwɛlɔ k’ɛnɔnyi kinunu, lokumu la Jehowa layamemɛ lo pondjo. Ndo nde ayɛnya lo yoho ya laande dia nde ekɔ Papa ka l’olongo koludi la ngandji.

¹⁸ L’ɔkɔngɔ w’ekomelo k’Ɛlɔmbwɛlɔ k’ɛnɔnyi kinunu, anto tshɛ wayeya dia kɛnɛ kakate Satana lo dikambo dia Jehowa kaki kashi. Kakɔna kayosala Yeso etena kayondokoma l’ekomelo k’ɛlɔmbwɛlɔ kande? Onde nde ayoyela ɛnyɛlɔ ka Satana ndo ayɔtɔmbɔkwɛ Jehowa? Ndooko! (Adia 1 Kɔrɛtɔ 15:​24, 28.) Yeso ayokaloya Diolelo le She. Nde ayoyakitshakitsha l’ɛse k’ɛlɔmbwɛlɔ ka Jehowa. Lo mɛtɛ, otshikitanyi la Satana, la lolango tshɛ Yeso ayokaloya lowandji tshɛ lo tshɛ le Jehowa l’ɔtɛ wa ngandji kawokande.

19. Kakɔna kalembetshiya lokombo la Jehowa le Yeso?

¹⁹ Aha la taamu, Jehowa aki suke dia mbisha Yeso lokombo Lande! Yeso akɛnya lo yoho ya kokele woho w’onto waki She. Ko, kakɔna kalembetshiya lokombo la Jehowa le Yeso? Kɛsɔ nembetshiyaka dia lɔ mbakaleke ohomba le Yeso oleki ɛngɔ kekina tshɛ ndo nde aki suke dia mvɔ l’ɔtɛ wa lokombo lɔsɔ. Ndo la lolango tshɛ, nde ayokimɔ lowandji le Jehowa l’ekomelo k’Ɛlɔmbwɛlɔ kande k’ɛnɔnyi kinunu. Ngande wakokaso mbokoya ɛnyɛlɔ ka Yeso? Tayokondja okadimwelo wa dimbola sɔ lo sawo diayela.