Lɔngɔsɔla otema ayɛ

Etena kekaso Bible, sho nangaka dia tokanyi ta Jehowa minanda otema aso ndo lonto laso la l’etei k’otema. Ɛzɛra akatotshikɛ ɛnyɛlɔ ka dimɛna lo dikambo sɔ nɛ dia nde “akalɔngɔsɔla otema ande dia mbeka Ɛlɛmbɛ wa Jehowa.” (Ɛzr. 7:10) Ngande wakokaso nɔngɔsɔla otema aso?

Dɔmbɛlɔ. Tatɛka wekelo tshɛ la dɔmbɛlɔ. Lɔmba Jehowa dia nde kokimanyiya dia nshihodia ndo dia wɛ nkamba la kɛnɛ kekayɛ.—Os. 119:​18, 34.

Onga l’okitshakitsha. Nzambi mbishɛka wanɛ wayaɛkɛ la lotamanya tshɛ lo yimba yawɔ akambo wa mɛtɛ. (Luka 10:21) Ewɔ dia nsala eyangelo l’oyango wa mambiya anto akina. L’okitshakitsha tshɛ, tshikitanya ekanelo kayɛ ka yimba naka tɔ hɔtɔnɛ la lolango laki Nzambi.

Hokamɛ osambo ɔmɔtshi wa Diolelo. Mishiki koka monga la shɛngiya lo dionga diaso. Laasɔ, naka sho mpokamɛ osambo la ntondo ka sho mbeka, kete dui sɔ koka tokimanyiya dia mbika washo aso le Jehowa di’awui wekaso minanda etema aso.