Dipesalema
Go mokaedi; e opelwe ka molodi wa “O se Ka wa Ntshenya.” Pesalema ya ga Dafide. Miketame.*
58 A lo ka kgona go bua ka tshiamo fa lo didimetse?+
A lo ka kgona go atlhola ka tsela e e siameng, lona bomorwa batho?+
2 Nnyaa, go na le moo lo loga maano a a sa siamang mo dipelong tsa lona,+
E bile diatla tsa lona di dira thubakanyo mo lefatsheng.+
3 Badirabosula ba a fapoga* go tloga fela fa ba tsholwa;*
Ga ba laolesege e bile ke baaki go tloga fela fa ba belegwa.
4 Botlhole jwa bone bo tshwana le botlhole jwa dinoga;+
Ba tshwana le kake e e ithibang ditsebe, e e sa utlweng.
5 Ga e kitla e reetsa lentswe la batho ba ba tshereanyang dinoga,
Le fa maselamose a bone a ka tswa a na le bokgoni jo bo kana kang.
6 Ao tlhe Modimo, kgola meno a bone!
Ao tlhe Jehofa, roba ditlhaa tsa ditau* tseno!
7 E kete ba ka nyelela fela jaaka metsi a kgala.
E kete Modimo a ka oba bora jwa gagwe mme a ba diga ka metswi ya gagwe.
8 E kete ba ka tshwana le kgopa e e nyerologang fa e ntse e tsamaya;
Ba tshwana le ngwana yo o tsholwang a sule yo le ka motlha a iseng a bone letsatsi.
9 Pele ga dipitsa tsa lona di utlwa mogote wa setlhare sa mokaikai,
Modimo o tla nyeletsa kalana e e bongola mmogo le e e tukang, jaaka phefo e e tsubutlang.+
10 Mosiami o tla itumela ka gonne Modimo o tla mmusolosetsa mo go ba ba bosula;+
Dinao tsa gagwe di tla tlala madi a batho ba ba bosula.+
11 Foo batho ba tla re: “Ruri go na le tuelo e basiami ba e amogelang.+
Eleruri go na le Modimo yo o atlholang mo lefatsheng.”+