Lefitiko

19 Jehofa o ne a tswelela a bua le Moshe a re: 2 “Bua le phuthego yotlhe ya Baiseraele mme o ba reye o re, ‘Lo nne boitshepo ka gonne nna Jehofa, Modimo wa lona, ke boitshepo.+

3 “‘Mongwe le mongwe wa lona a tlotle* mmaagwe le rraagwe,+ mme lo boloke bosabata+ ba me. Ke nna Jehofa, Modimo wa lona. 4 Lo se ka lwa ikobela medimo e e se nang mosola+ e bile lo se ka lwa itirela medimo epe.+ Ke nna Jehofa, Modimo wa lona.

5 “‘Jaanong fa lo ntshetsa Jehofa setlhabelo sa go abelana,+ lo se ntshe ka tsela e e tla dirang gore a lo amogele.+ 6 Se jewe mo letsatsing le go ntshitsweng setlhabelo ka lone le mo letsatsing le le latelang, mme se se salang go fitlha mo letsatsing la boraro se fisiwe ka molelo.+ 7 Le fa go ntse jalo, fa sengwe sa sone se jewa mo letsatsing la boraro, ke selo se se kgopisang se se ka se kang sa amogelwa. 8 Motho yo o se jang o tla otlhaelwa phoso ya gagwe ka gonne o leswafaditse selo se se boitshepo sa ga Jehofa, mme motho yoo o tshwanetse go bolawa.

9 “‘Fa lo roba thobo ya lefatshe la lona, ga lo a tshwanela go roba matlhakore a tshimo ya lona gotlhelele e bile ga lo a tshwanela go sela se se setseng mo tshimong ya lona.+ 10 Gape, ga lo a tshwanela go phutha se se salang mo tshimong ya lona ya morara* kgotsa lwa sela morara o o gasameng mo tshimong. Lo di tlogelele yo o humanegileng*+ le motswakwa. Ke nna Jehofa, Modimo wa lona.

11 “‘Ga lo a tshwanela go utswa,+ ga lo a tshwanela go tsietsa+ e bile ga lo a tshwanela go akelana. 12 Ga lo a tshwanela go ikana ka leina la me lo ikanela se e leng maaka+ mme lwa leswafatsa leina la Modimo wa lona. Ke nna Jehofa. 13 Ga o a tshwanela go direla motho yo mongwe boferefere,+ gape ga o a tshwanela go kgothosa.+ O se ka wa baya tuelo ya motho yo o thapilweng kwa go wena bosigo jotlhe go fitlha mo mosong.+

14 “‘Ga o a tshwanela go tlhapatsa* motho yo o susu kgotsa wa baya sekgopi fa pele ga sefofu,+ mme o tshwanetse go boifa Modimo wa gago.+ Ke nna Jehofa.

15 “‘Ga o a tshwanela go dira tshiamololo fa o atlhola. Ga o a tshwanela go tlhaola mohumanegi kgotsa wa tseela motho yo o humileng kwa godimo.+ O atlhole motho yo mongwe ka tshiamiso.

16 “‘Ga o a tshwanela go tsamaya o senya motho leina mo bathong ba gaeno.+ Ga o a tshwanela go tsenya botshelo jwa motho yo mongwe mo kotsing.*+ Ke nna Jehofa.

17 “‘Ga o a tshwanela go tlhoa morwarrago mo pelong ya gago.+ O dire sotlhe se o ka se kgonang go kgalemela motho yo mongwe+ gore o se ka wa nna le molato wa boleo jaaka ene.

18 “‘Ga o a tshwanela go ipusolosetsa+ kgotsa go tshwarela bomorwa batho bagaeno sekgopi, mme o tshwanetse go rata motho yo mongwe jaaka o ithata.+ Ke nna Jehofa.

19 “‘Lo boloke melao ya me: Ga o a tshwanela go dira gore diruiwa tsa gago tsa mefuta e mebedi di gwelane. Ga o a tshwanela go jala tshimo ya gago ka dipeo tsa mefuta e mebedi+ e bile ga o a tshwanela go apara seaparo se se dirilweng ka ditlhale tsa mefuta e mebedi, di tlhakantswe.+

20 “‘Jaanong fa monna a tlhakanela dikobo le mosadi mme e le lelata le le tlhophetsweng monna yo mongwe, mme gone a ise a rekololwe kgotsa a ise a newe kgololesego, ba tshwanetse go otlhaiwa. Le fa go ntse jalo, ba se ka ba bolawa ka gonne mosadi yoo o ne a ise a gololwe. 21 Monna yoo a tlise setlhabelo sa gagwe sa molato kwa go Jehofa kwa kgorong ya tente ya bokopanelo, phelefu ya setlhabelo sa molato.+ 22 Moperesiti o tla mo ntshetsa setlhabelo sa go itshwarelwa maleo ka phelefu ya setlhabelo sa molato fa pele ga ga Jehofa ka ntlha ya boleo jo a bo dirileng, mme o tla itshwarelwa boleo jo a bo dirileng.

23 “‘Fa lo tsena mo lefatsheng lo bo lo jala setlhare sepe fela sa dijo, lo tshwanetse go tsaya maungo a sone e le a a sa itshekang e bile a ileditswe.* A tla nna a ileditswe* ka dingwaga di le tharo. Ga a tshwanela go jewa. 24 Mme mo ngwageng wa bonê, maungo a sone otlhe a tla nna boitshepo mme e tla bo e le nako ya go itumela fa pele ga ga Jehofa.+ 25 Mme mo ngwageng wa botlhano, lo ka nna lwa ja maungo a sone gore lo tle lo oketse thobo ya lona ka maungo a sone. Ke nna Jehofa, Modimo wa lona.

26 “‘Ga lo a tshwanela go ja sepe se se nang le madi.+

“‘Ga lo a tshwanela go batla ditshupo kgotsa go dira maselamose.+

27 “‘Ga lo a tshwanela go beola* moriri o o mo matlhakoreng a ditlhogo tsa lona* kgotsa lwa fetola tsela e dintlha tsa ditedu tsa lona di lebegang ka yone.+

28 “‘Ga lo a tshwanela go itshega mo nameng ka ntlha ya motho yo o suleng*+ e bile ga lo a tshwanela go ikwala matshwao mo mmeleng.* Ke nna Jehofa.

29 “‘O se ka wa tlontlolola morwadio ka go mo dira seaka,+ gore lefatshe le se ka la dira boaka mme la tlala ka boitsholo jo bo maswe.+

30 “‘Lo tshwanetse go boloka bosabata+ ba me, gape lo tshwanetse go tlotla* lefelo la me le le boitshepo. Ke nna Jehofa.

31 “‘Lo se ka lwa ya kwa go ba ba buang le badimo+ e bile lo se ka lwa kopa kgakololo mo go ba ba bolelelang ditiragalo pele,+ ka gonne ba tla lo itshekolola. Ke nna Jehofa, Modimo wa lona.

32 “‘O eme fa pele ga moriri o mosweu,+ mme o tshwanetse go tlotla motho yo o tsofetseng,+ gape o tshwanetse go boifa Modimo wa gago.+ Ke nna Jehofa.

33 “‘Fa motswakwa a nna mo lefatsheng la lona, ga lo a tshwanela go mo sotla.+ 34 Motswakwa yo o agileng le lona a nne fela jaaka motho wa mo lefatsheng la lona;+ mme o tshwanetse go mo rata jaaka o ithata ka gonne lo ne lwa nna batswakwa kwa lefatsheng la Egepeto.+ Ke nna Jehofa, Modimo wa lona.

35 “‘Ga lo a tshwanela go dirisa dilekanyo tsa go tsietsa fa lo lekanya boleele, bokete kgotsa sepe fela.+ 36 Lo dirise dikale tse di tlhomameng, dilekanyabokete tse di tlhomameng, didirisiwa tse di tlhomameng tsa go lekanya dilo tse di sa eleleng* le didirisiwa tse di tlhomameng tsa go lekanya dilo tse di elelang.*+ Ke nna Jehofa, Modimo wa lona, yo o lo ntshitseng kwa lefatsheng la Egepeto. 37 Ka jalo, lo tshwanetse go boloka melao ya me yotlhe le ditshwetso tsa me tsotlhe tsa boatlhodi, mme lo tshwanetse go di latela.+ Ke nna Jehofa.’”