Dipesalema
Go mokaedi. Pesalema ya bomorwa Kora.+ Pina.
49 Utlwang seno, lona ditšhaba tsotlhe.
Reetsang ka kelotlhoko, lona banni botlhe ba lefatshe,*
2 Lona ba bannye le ba bagolo,*
Bahumi mmogo le bahumanegi.
3 Molomo wa me o tla bua botlhale,
Ke tla akanyetsa kwa teng ka dilo tse di nang le tlhaloganyo.+
4 Ke tla reetsa seane ka kelotlhoko;
Ke tla tlhalosa thamalakane ya me ka harepa.
5 Goreng ke tshwanetse go boifa ka dinako tsa mathata,+
Fa ke dikologilwe ke bosula* jwa batho ba ba batlang go ntiga?
6 Ba ba ikanyang dikhumo tsa bone+
Le ba ba ikgantshang ka dikhumo tsa bone tse dintsi,+
7 Ga go na ope wa bone yo o ka gololang yo mongwe
Kgotsa yo o ka duelang Modimo tlhwatlhwa ya go rekolola yo mongwe,+
8 (Tlhwatlhwa ya botshelo* jwa motho e kwa godimo thata
Mo e leng gore ba ka se kgone go e duela);
9 Ga ba kgone go rekolola ope gore a tshele ka bosakhutleng mme a se ka a swa.*+
10 Mongwe le mongwe o a bona gore tota le batho ba ba botlhale ba a swa;
Dimatla le ba ba se nang tlhaloganyo ba nyelela mmogo,+
Mme ba tshwanelwa ke go tlogelela ba bangwe dikhumo tsa bone.+
11 Keletso ya bone ke gore matlo a bone a nne ka bosakhutleng,
Ditente tsa bone di nne gone kokomana morago ga kokomana.
Ba reeletse ditsha tsa bone ka maina a bone.
12 Mme gone le fa motho a tlotlega, a ka se tswelele a tshela;+
Ga a botoka mo diphologolong tse di nyelelang.+
13 Seno ke se se tla diragalelang batho ba ba dimatla,+
Le balatedi ba bone, ba ba itumelang ka ntlha ya mafoko a bone a a se nang mosola. (Selah)
14 Ba atlholetswe go ya kwa Lebitleng,* jaaka dinku tse di yang tlhabong.
Loso lo tla ba disa;
Ba ba siameng ba tla ba laola+ mo mosong.
15 Le fa go ntse jalo, Modimo o tla nkgolola mo maatleng* a Lebitla,*+
Gonne o tla nngangatlela. (Selah)
16 O se ka wa boifa fa motho mongwe a huma,
Fa bontle jwa ntlo ya gagwe bo oketsega,
17 Gonne fa a swa a ka se tsamaye ka sepe;+
Dikhumo tsa gagwe di ka se fologele le ene kwa tlase.+
18 Gonne fa a sa ntse a tshela o a ikakgola.+
(Batho ba a go galaletsa fa o atlega.)+
19 Mme la bofelo o latela kokomana ya borraagwemogolo.
Ga ba kitla ba tlhola ba bona lesedi gape.
20 Motho yo o sa tlhaloganyeng seno, tota le fa a tlotlega,+
Ga a botoka mo diphologolong tse di nyelelang.