Baatlhodi

8 Go tswa foo, banna ba Eferaime ba ne ba mo raya ba re: “O re dirile eng? Goreng o ne o sa re bitse fa o ya go tlhabana le Bamidiana?”+ Mme ba ne ba omana le ene mo go botlhoko.+ 2 Le fa go ntse jalo, o ne a ba raya a re: “Ke dirile eng fa ke bapisiwa le lona? A lona banna ba Eferaime+ ga lo a fitlhelela mo gontsi go feta se se fitlheletsweng ke rona banna ba ga Abiesere?+ 3 Modimo o ne a tsenya Orebe le Seebe+ dikgosana tsa Bamidiana mo seatleng sa lona, mme nna ke dirile eng fa ke bapisiwa le lona?” E rile a bua ka tsela eno,* bogale jwa bone bo ne jwa kokobela.*

4 Go tswa foo, Gidione o ne a tla mo Joredane mme a e kgabaganya. Ene le banna ba le 300 ba ba nang le ene ba ne ba lapile, le fa go ntse jalo ba ne ba nna ba ba lelekisa. 5 Ka jalo, o ne a raya banna ba Sukothe a re: “Tsweetswee nayang batho ba ba ntshetseng morago dilofo tsa senkgwe, ka gonne ba lapile mme ke lelekisa Seba le Salamuna, dikgosi tsa Bamidiana.” 6 Mme dikgosana tsa Sukothe di ne tsa re: “Goreng re tshwanetse go naya masole a gago senkgwe? A e le gore o setse o gapile Seba le Salamuna?” 7 Fa ba rialo, Gidione o ne a re: “Ka ntlha ya seo, fa Jehofa a tsenya Seba le Salamuna mo seatleng sa me, ke tlile go lo itaya ka mmitlwa le mengana ya kwa nageng.”+ 8 Mme o ne a tswa koo a ya kwa Penuele mme a ba kopa se se tshwanang, banna ba Penuele le bone ba ne ba mo araba ka tsela e e tshwanang le ya banna ba kwa Sukothe. 9 Ka jalo, banna ba Penuele le bone o ne a ba raya a re: “Fa ke boa ka kagiso, ke tlile go diga tora eno.”+

10 Jaanong Seba le Salamuna ba ne ba le kwa Karekore ba na le masole a bone, banna ba ka nna 15 000. Bano e ne e le botlhe ba ba setseng mo masoleng otlhe a batho ba kwa Botlhaba,+ ka gonne banna ba le 120 000 ba ba neng ba tshotse ditšhaka ba ne ba sule. 11 Gidione o ne a tswelela a tlhatloga ka tsela e e dirisiwang ke batho ba ba nnang mo ditenteng kwa botlhaba jwa Noba le Jogebeha+ mme a tlhasela kampa e e neng e sa disiwa. 12 E rile dikgosi tseno tse pedi tsa Bamidiana, e bong Seba le Salamuna ba tshaba, o ne a ba lelekisa a bo a ba tshwara, a dira gore botlhe mo kampeng ba tshoge.

13 Go tswa foo, Gidione morwa Joashe o ne a boa kwa ntweng a tsamaya ka tsela ya thotana e e yang kwa Herese. 14 Fa a le mo tseleng o ne a tshwara lekawana lengwe le le tswang kwa Sukothe a bo a le botsakaka dipotso. Ka jalo, lekawana leo le ne la mo kwalela maina a dikgosana le bagolwane ba Sukothe, banna ba le 77. 15 Go tswa foo, o ne a ya kwa banneng ba Sukothe mme a re: “Seba le Salamuna ke bano, ba lo neng lo nkgoba ka bone lo re, ‘A o setse o gapile Seba le Salamuna mo e leng gore re tshwanetse go naya banna ba gago ba ba lapileng senkgwe?’”+ 16 Foo o ne a tsaya bagolwane ba motse mme a tsaya mmitlwa le mengana ya kwa nageng a bo a itaya banna ba Sukothe ka yone.+ 17 Mme o ne a diga tora ya Penuele+ a bo a bolaya banna ba motse oo.

18 O ne a botsa Seba le Salamuna jaana: “Banna ba lo ba bolaileng kwa Tabore ba ne ba ntse jang?” Ba ne ba re: “Ba ne ba tshwana le wena, mongwe le mongwe wa bone o ne a tshwana le morwa wa kgosi.” 19 Mme o ne a re: “E ne e le bomorwarre, barwa ba ga mmê. Ke ikana ka Jehofa Modimo yo o tshelang, fa lo ka bo lo ba tlogetse ba tshela, ke ne nka se lo bolaye.” 20 Foo o ne a raya Jethere leitibolo la gagwe a re: “Ema o ba bolaye.” Le fa go ntse jalo, lekawana leno le ne la se ka la somola tšhaka ya lone; o ne a boifa ka gonne o ne a sa ntse a le lekawana. 21 Ka jalo, Seba le Salamuna ba ne ba re: “Wena re bolaye ka gonne monna o lemogiwa ka maatla a gagwe.”* Ka jalo, Gidione o ne a bolaya Seba le Salamuna+ a bo a tsaya mekgabisa e e bopegileng jaaka ngwedi yo o sa felelang e e neng e le mo melaleng ya dikamela tsa bone.

22 Moragonyana banna ba Iseraele ba ne ba raya Gidione ba re: “Re buse, wena le morwao mmogo le morwa wa ga morwao, ka gonne o re golotse mo seatleng sa Bamidiana.”+ 23 Le fa go ntse jalo, Gidione o ne a ba raya a re: “Nka se lo buse, le morwaake a ka se lo buse. Jehofa ke ene a tla lo busang.”+ 24 Gidione o ne a tswelela a re: “Mma ke lo kope selo se le sengwe: a mongwe le mongwe wa lona a nneye lenyena la nko go tswa mo dilong tse a di gapileng.” (Gonne ba ne ba na le manyena a nko a gauta, ka gonne e ne e le Baishemaele.)+ 25 Ba ne ba mo araba ba re: “Ruri re tla go a naya.” Foo ba ne ba phutholola seaparo se setelele mme monna mongwe le mongwe a latlhela mo go sone lenyena la nko go tswa mo go se a se gapileng. 26 Bokete jwa gauta ya manyena a nko a a neng a a kopile e ne e le dishekele* tsa gauta di le 1 700, kwantle ga mekgabisa e e bopegileng jaaka ngwedi yo o sa felelang, mekgabisa e e lepelelang, diaparo tsa wulu e phepole tse di aparwang ke dikgosi tsa Midiana le dibaga tse di neng di le mo dikameleng.+

27 Gidione o ne a dira khiba+ ka yone mme a e baya mo e neng e kgona go bonwa sentle teng mo motseng wa gagwe wa Ofera;+ mme Baiseraele botlhe ba ne ba e obamela* teng koo+ mme e ne ya nna serai mo go Gidione le mo go ba lelapa la gagwe.+

28 Ka jalo, Baiseraele ba ne ba fenya Bamidiana,+ mme ga ba a ka ba tlhola ba ba tlhasela* gape; mme lefatshe le ne la nna mo kagisong* dingwaga di le 40 mo malatsing a ga Gidione.+

29 Ka jalo, Jerubaale+ morwa Joashe o ne a boela kwa legaeng la gagwe mme a nna koo.

30 Gidione o ne a na le barwa ba le 70* ka gonne o ne a na le basadi ba le bantsi. 31 Mogadingwana wa gagwe yo o neng a le kwa Shekema le ene o ne a mo tsholela ngwana wa mosimane mme Gidione o ne a mmitsa Abimeleke.+ 32 Mme Gidione morwa Joashe o ne a swa a tsofetse thata mme o ne a fitlhelwa kwa lebitleng la ga Joashe rraagwe kwa Ofera wa Baabiesere.+

33 Fela fa Gidione a sena go swa, Baiseraele ba ne ba obamela* Bobaale+ gape, mme ba ne ba tlhoma Baale-berithe gore e nne modimo wa bone.+ 34 Baiseraele ba ne ba se ka ba gakologelwa Jehofa, Modimo wa bone,+ yo o neng a ba golotse mo seatleng sa baba botlhe ba bone ba ba neng ba ba dikologile;+ 35 e bile ba ne ba se ka ba bontsha ba lelapa la ga Jerubaale, e bong Gidione, lorato lo lo sa kgaotseng ka ntlha ya molemo otlhe o a neng a o diretse Baiseraele.+