Esekiele

15 Jehofa o ne a bua le nna gape a re: 2 “Morwa motho, logong lwa setlhare sa morara* lo farologana jang le logong lwa setlhare sepe se sengwe kgotsa kala ya ditlhare tsa sekgwa? 3 A kota ya sone e ka dirisiwa go dira tiro nngwe? Kgotsa a batho ba ka dira sepekere sa logong ka yone gore ba pege dilwana mo go sone? 4 Lo tsenngwa mo molelong gore lo tuke, mme molelo o laila dintlha tsa lone ka bobedi o bo o babola karolo ya lone e e mo gare. A jaanong lo ka dirisiwa mo tirong nngwe? 5 Tota le fa lo feletse, ga lo ka ke lwa dirisediwa sepe. Ruri ga lo kitla lo nna le mosola wa sepe fa molelo o lo laitse e bile lo babogile!”

6 “Ka jalo, seno ke se Morena Molaodimogolo Jehofa a se buang: ‘Fela jaaka logong lwa setlhare sa morara se se mo gare ga ditlhare tsa sekgwa, lo ke dirileng gore e nne sengwe se se tukisang molelo, ke tla dira fela jalo ka banni ba Jerusalema.+ 7 Ke tla ba tlhasela. Ba dule mo molelong, le fa go ntse jalo molelo o mongwe o tla ba laila. Mme lo tla tshwanelwa ke go itse gore ke nna Jehofa, fa ke ba tlhasela.’”+

8 “‘Mme ke tla dira gore lefatshe la bone le kgakgabale+ ka gonne ba dirile dilo ka go sa ikanyege,’+ go bua Morena Molaodimogolo Jehofa.”