Sefela sa Difela
7 “Ruri dinao tsa gago di dintle mo teng ga ditlhako* tsa gago,
Wena mosetsana yo o tlotlegang!
Tsela e dirope tsa gago di bopegileng ka yone e tshwana le mekgabisa,
Tiro ya diatla tsa modiri yo o setswerere.
2 Mohubu* wa gago o tshwana le kopi.
E kete e ka nna e na le beine.
Mpa ya gago ke mokoa wa korong,
O o dikologilweng ke malômô* a masoma.
3 Mabele a gago a tshwana le bana ba tshephe ba babedi,
Ditshetshwana tsa mafatlha.+
4 Molala+ wa gago o tshwana le tora e e dirilweng ka lonaka lwa tlou.+
Nko ya gago e tshwana le tora ya kwa Lebanona,
E e lebileng ntlheng ya Damaseko.
5 Tlhogo ya gago e ntle jaaka Thaba ya Karemele,+
E bile metshopho ya moriri*+ wa gago e tshwana le wulu e phepole.+
Kgosi e kgatlhilwe ke moriri wa gago o moleele o o lepeletseng.
6 Ruri o montle, e bile o a kgatlha,
Wena mosetsana yo o rategang go gaisa dilo tsotlhe tse di itumedisang!
7 Boleele jwa gago bo tshwana le setlhare sa mokolane,
E bile mabele a gago a tshwana le maungo a mokolane.+
8 Ke ne ka re, ‘Ke tla palama setlhare sa mokolane
Gore ke tshware dikalana tsa maungo a sone.’
E kete mabele a gago a ka nna jaaka morara* o montsi,
Mohemo wa gago wa nna jaaka lonko lo lo monate lwa diapole,
9 Le molomo* wa gago wa nna jaaka beine e e di gaisang tsotlhe.”
“E kete e ka lelemela monate mo go moratiwa wa me,
E elela monate mo melomong ya ba ba robetseng.
10 Ke wa moratiwa wa me,+
E bile o ntlhologeletswe.
11 Tla kwano tlhe wena moratiwa,
A re ye kwa masimong;
Re ye go nna kwa dimeleng tse di nkgang monate tsa hena.+
12 A re tsoge go sa le phakela mme re ye kwa masimong a morara
Gore re ye go bona gore a morara o tlhogile,*
Gore a malômô a thuntse,+
Gore a ditlhare tsa garanata di thuntse.+
Fa re le koo, ke tla go bontsha tsela e ke go ratang ka yone.+
13 Ditholwana tsa dimandereiki+ di ntsha lonko lwa tsone lo lo monate;
Fa dikgorong tsa rona go na le mefuta yotlhe ya maungo a a a gaisang otlhe.+
Wena moratiwa wa me, ke go beetse
A masha mmogo le a magologolo.