Tshenolo e e Yang Kwa go Johane

10 Mme ke ne ka bona moengele yo mongwe yo o nonofileng a fologa a tswa kwa legodimong, a apere* leru, e bile motshe wa godimo o ne o le mo tlhogong ya gagwe, mme sefatlhego sa gagwe se ne se tshwana le letsatsi,+ maoto* a gagwe one a ne a tshwana le dipilara tsa molelo, 2 mme o ne a tshotse momeno o monnye o o butsweng mo seatleng sa gagwe. O ne a tlhomile lonao lwa gagwe lwa moja mo lewatleng, mme lwa molema mo lefatsheng, 3 mme o ile a goa ka lentswe le le kwa godimo fela jaaka fa tau e kurutla.+ E rile a goa, ke ne ka utlwa lentswe la ditumo tsa maru tse supa.+

4 Jaanong e rile ditumo tsa maru tse supa di bua, ke ne ka ipaakanyetsa go kwala, le fa go ntse jalo, ke ne ka utlwa lentswe le tswa kwa legodimong+ le re: “Boloka dilo tse ditumo tsa maru tse supa di di buileng e le sephiri, o se ka wa di kwala.” 5 Moengele yo ke neng ka mmona a eme mo lewatleng le mo lefatsheng o ne a tsholeletsa seatla sa gagwe sa moja kwa legodimong, 6 mme o ne a ikana ka Ene yo o tshelang ka bosakhutleng le go ya go ile,+ yo o neng a bopa legodimo le dilo tse di mo go lone, le lefatshe le dilo tse di mo go lone, le lewatle le dilo tse di mo go lone+ a re: “Nako ya go leta e fedile. 7 Le fa go ntse jalo, mo malatsing a fa moengele wa bosupa+ a tloga a letsa terompeta ya gagwe,+ sephiri se se boitshepo+ se Modimo a neng a se bolelela batlhanka ba gagwe ba e leng baporofeti e le dikgang tse di molemo,+ eleruri se tla diragadiwa.”

8 Mme ke ne ka utlwa lentswe le le neng le tswa kwa legodimong+ le bua le nna gape le re: “Tsamaya, tsaya momeno o o butsweng o o mo seatleng sa moengele yo o emeng mo lewatleng le mo lefatsheng.”+ 9 Ke ne ka ya kwa moengeleng yoo mme ka mmolelela gore a mphe momeno oo o monnye. O ne a nthaya a re: “O tseye, o je,+ o o fetse mme o tla dira gore mpa ya gago e nne botlhoko,* le fa go ntse jalo, mo leganong la gago o tla nna botshe jaaka tswina ya dinotshe.” 10 Ke ne ka tsaya momeno oo o monnye mo seatleng sa moengele, ka o ja,+ ka o fetsa, mme mo leganong la me o ne o le botshe jaaka tswina ya dinotshe,+ mme e rile ke sena go o ja ke o fetsa, mpa ya me e ne ya nna botlhoko. 11 Mme ke ne ka tewa go twe: “O tshwanetse go porofeta gape ka se se tla diragalelang merafe le ditšhaba le batho ba ba buang dipuo* tse di farologaneng le dikgosi di le dintsi.”