Samuele wa Bobedi

21 Jaanong go ne ga nna le leuba+ mo motlheng wa ga Dafide dingwaga di le tharo tse di latelanang, ka jalo, Dafide o ne a botsa Jehofa mme Jehofa o ne a re: “Saulo le ba lelapa la gagwe ba na le molato wa madi, ka gonne o bolaile Bagibeone.”+ 2 Ka jalo, kgosi e ne ya bitsa Bagibeone+ mme ya bua le bone. (Bagibeone e ne e se Baiseraele, mme e ne e le Baamore+ ba ba neng ba setse, mme Baiseraele ba ne ba ikanne gore ba tla ba tlogela ba tshela,+ le fa go ntse jalo, Saulo o ne a batla go ba kgemetha ka gonne o ne a tlhagafetse thata a batla go thusa batho ba Iseraele le Juda.) 3 Dafide o ne a raya Bagibeone a re: “Ke tla lo direla eng, le gone ke tla tlosa boleo jono jang, gore lo tle lo segofatse boswa jwa ga Jehofa?” 4 Bagibeone ba ne ba mo raya ba re: “Kgang eno ga e tlhoke gore Saulo le ba lelapa la gagwe ba ntshe selefera kgotsa gauta;+ e bile ga re ka ke ra bolaya motho ope mo Iseraele.” Foo Dafide o ne a re: “Sepe fela se lo se buang, ke tla se lo direla.” 5 Ba ne ba raya kgosi ba re: “Monna yo o neng a re fedisa a bo a loga leano la go re nyeletsa gore re se ka ra nna gope mo nageng ya Iseraele+ . . . 6 mma re newe bomorwawe ba le supa. Re tla kaletsa ditopo tsa bone*+ fa pele ga ga Jehofa kwa Gibea+ wa ga Saulo, ene yo Jehofa a neng a mo tlhophile.”+ Foo kgosi e ne ya re: “Ke tla lo ba naya.”

7 Le fa go ntse jalo, kgosi e ne ya tlhomogela Mefiboshethe,+ morwa Jonathane morwa Saulo pelo ka ntlha ya maikano a Dafide le Jonathane,+ morwa Saulo ba neng ba a dirile fa pele ga ga Jehofa. 8 Ka jalo, kgosi e ne ya tsaya Aremoni le Mefiboshethe, barwa ba babedi ba ga Risepa+ morwadia Aia ba a neng a ba tsholela Saulo, le barwa ba batlhano ba ga Mikale*+ morwadia Saulo ba a neng a ba tsholela Aderiele+ morwa Barisilai wa Momehola. 9 Go tswa foo, o ne a ba naya Bagibeone mme ba kaletsa ditopo tsa bone mo thabeng fa pele ga ga Jehofa.+ Botlhe ba le supa ba ne ba swa mmogo; ba ne ba bolawa mo malatsing a ntlha a thobo, fa thobo ya barele* e ne e simologa. 10 Morago ga moo, Risepa+ morwadia Aia o ne a tsaya letsela la kgetsi mme a le ala mo godimo ga lefika go tloga kwa tshimologong ya thobo go fitlha pula e tswa kwa magodimong e tshologela mo ditopong tsa bone; ga a ka a letla dinonyane tsa magodimo gore di kotame mo godimo ga tsone motshegare kgotsa gore dibatana di di atamele bosigo.

11 Dafide o ne a bolelelwa se mogadingwana wa ga Saulo e bong Risepa morwadia Aia a se dirileng. 12 Ka jalo, Dafide o ne a ya go tsaya marapo a ga Saulo le marapo a ga Jonathane morwawe kwa baeteledipeleng* ba Jabeshe-gileade,+ ba ba neng ba ba utswile mo patlelong ya Bethe-shane, kwa Bafilisitia ba neng ba ba kaleditse gone ka letsatsi la fa Bafilisitia ba ne ba tlhaba Saulo kwa Gileboa.+ 13 O ne a tla le marapo a ga Saulo le marapo a ga Jonathane morwawe go tswa koo, mme gape ba ne ba phutha marapo a banna ba ba neng ba bolailwe.*+ 14 Go tswa foo, ba ne ba fitlha marapo a ga Saulo le a ga Jonathane morwawe mo lefatsheng la Benjamine kwa Seela+ mo lebitleng la ga Kishe+ rraagwe. Fa ba sena go dira sengwe le sengwe se kgosi e neng e se laetse, Modimo o ne a reetsa dithapelo tse ba neng ba di rapela ka lefatshe leo.+

15 Bafilisitia le Baiseraele ba ne ba lwa gape.+ Ka jalo, Dafide le batlhanka ba gagwe ba ne ba tsamaya mme ba ya go tlhabana le Bafilisitia, le fa go ntse jalo Dafide o ne a lapa. 16 Setlogolwana sa Barefaime,+ yo o bidiwang Ishibi-benobe, yo lerumo la gagwe la kopore le neng le le bokete jwa dishekele di le 300*+ le yo o neng a tlhometse ka tšhaka e ntšha, o ne a ikemiseditse go bolaya Dafide. 17 Gone fela foo, Abishai+ morwa Seruia o ne a tla go mo thusa+ mme a tlhaba Mofilisitia yoo a bo a mmolaya. Ka nako eo, banna ba ga Dafide ba ne ba mo ikanela jaana: “Ga o kitla o tlhola o tsamaya le rona go ya tlhabanong!+ Ga o a tshwanela go tima lobone lwa Iseraele!”+

18 Morago ga seno, Baiseraele ba ne ba lwa gape le Bafilisitia+ kwa Gobe. Ka nako eo, Sibekai+ wa Mohusha o ne a bolaya Safe, yo e neng e le setlogolwana sa Barefaime.+

19 Mme go ne ga lowa gape le Bafilisitia+ kwa Gobe, mme Elehanane morwa Jaare-oregime wa Mobethelehema o ne a bolaya Goliathe wa Mogathe, yo lerumo la gagwe le neng le na le thobane e e tshwanang le logong lwa balogi.+

20 Go ne ga nna le ntwa e nngwe gape kwa Gathe, kwa go neng go na le monna yo mogolo ka tsela e e sa tlwaelegang, a na le menwana e le 6 mo seatleng sengwe le sengwe le menwana e le 6 mo lonaong longwe le longwe, yotlhe e le 24; mme le ene e ne e le setlogolwana sa Barefaime.+ 21 O ne a nna a kgoba Iseraele.+ Ka jalo, Jonathane morwa Shimei,+ morwarraagwe Dafide, o ne a mmolaya.

22 Ba banê bano e ne e le ditlogolwana tsa Barefaime kwa Gathe, mme ba ne ba wa ka seatla sa ga Dafide le ka seatla sa batlhanka ba gagwe.+