Dipesalema

107 Ntshetsang Jehofa ditebogo, ka gonne o molemo;+

Lorato lwa gagwe lo lo sa kgaotseng lo nnela ruri.+

 2 A batho ba Jehofa a ba namotseng* ba bue jalo,

Ba a ba namotseng mo seatleng* sa mmaba,+

 3 Ba a neng a ba phutha go tswa kwa mafatsheng,+

Go tswa kwa botlhaba le go tswa kwa bophirima,

Go tswa kwa bokone le go tswa kwa borwa.+

 4 Ba ne ba kgarakgatshega mo nageng, mo sekakeng;

Ga ba a ka ba bona tsela e e yang kwa motseng o ba neng ba ka nna mo go one.

 5 Ba ne ba tshwerwe ke tlala e bile ba nyorilwe;

Ba ne ba feletswe ke maatla ka ntlha ya letsapa.

 6 Ba ne ba nna ba goela kwa go Jehofa ba le mo matshwenyegong;+

O ne a ba golola mo mathateng a ba neng ba le mo go one.+

 7 O ne a dira gore ba tsamaye mo tseleng e e siameng+

Gore ba ye kwa motseng o ba neng ba ka nna mo go one.+

 8 A batho ba ntshetse Jehofa ditebogo+ ka ntlha ya lorato lwa gagwe lo lo sa kgaotseng

Le ka ntlha ya ditiro tsa gagwe tse di gakgamatsang tse a di diretseng bomorwa batho.+

 9 Gonne o kgotsofaditse ba ba nyorilweng;

E bile o ne a tlamela ba ba tshwerweng ke tlala ka dilo tse di molemo.+

10 Bangwe ba ne ba nna mo lefifing le lentshontsho,

E le magolegwa a a bogisiwang, a le mo ditshiping.

11 Gonne ba ne ba sa reetsa lefoko la Modimo;

Ba ne ba sa tlotle kgakololo ya Mogodimodimo.+

12 Ka jalo, o ne a kokobetsa dipelo tsa bone ka matshwenyego;+

Ba ne ba kgopiwa, mme go ne go se na ope yo o ba thusang.

13 Fa ba le mo matshwenyegong, ba ne ba goela kwa go Jehofa ba kopa thuso;

O ne a ba golola mo mathateng a ba neng ba le mo go one.

14 O ne a ba ntsha mo lefifing le lentshontsho,

E bile o ne a kgaola dikeetane tse ba neng ba bofilwe ka tsone.+

15 A batho ba ntshetse Jehofa ditebogo ka ntlha ya lorato lwa gagwe lo lo sa kgaotseng+

Le ka ntlha ya ditiro tsa gagwe tse di gakgamatsang tse a di diretseng bomorwa batho.

16 Gonne o robagantse ditswalo tsa kopore

E bile o robile mephakalego ya tshipi.+

17 Ba ne ba le dieleele, ka jalo ba ne ba boga+

Ka ntlha ya maleo a bone le melato ya bone.+

18 Ba ne ba felelwa ke keletso ya* dijo tsotlhe fela;

Ba ne ba le gaufi le dikgoro tsa loso.

19 Fa ba le mo matshwenyegong, ba ne ba tle ba goele kwa go Jehofa ba kopa thuso;

O ne a tle a ba golole mo mathateng a ba neng ba le mo go one.

20 O ne a tle a romele lefoko la gagwe mme a ba fodise+

A bo a ba ntsha mo dikhuting tse ba neng ba gaeletswe mo go tsone.

21 A batho ba ntshetse Jehofa ditebogo ka ntlha ya lorato lwa gagwe lo lo sa kgaotseng

Le ka ntlha ya ditiro tsa gagwe tse di gakgamatsang tse a di diretseng bomorwa batho.

22 A ba mo ntshetse ditlhabelo tsa go leboga+

Ba bo ba itsise ditiro tsa gagwe ba goa ka boitumelo.

23 Batho ba ba tsamayang mo lewatleng ka dikepe,

Ba ba dirang kgwebo ya bone mo metsing a mantsi,+

24 Ba bone ditiro tsa ga Jehofa

Le dilo tse dintle tse a di bopileng tse di mo lewatleng;+

25 Kafa setsuatsue se kgonang go tsoga ka teng fa a se laela,+

Se bo se tsholetsa makhubu a lewatle.

26 Ba tlhatlogela kwa loaping;

Ba thabuela kwa tlasetlase ga lewatle.

27 Ba a kgokgweetsega e bile ba a thetheekela fela jaaka motho yo o tagilweng,

Mme bokgoni jwa bone ga bo ba tswele mosola.+

28 Foo ba goela kwa go Jehofa ba le mo matshwenyegong;+

Mme o ba golola mo mathateng a ba leng mo go one.

29 O sisibatsa setsuatsue;

Makhubu a lewatle a a didimala.+

30 Ba a itumela fa makhubu ano a sisibala,

Mme o ba isa kwa lefelong le dikepe di emang mo go lone le ba le batlang.

31 A batho ba ntshetse Jehofa ditebogo ka ntlha ya lorato lwa gagwe lo lo sa kgaotseng

Le ka ntlha ya ditiro tsa gagwe tse di gakgamatsang tse a di diretseng bomorwa batho.+

32 A ba mo tlotlomatse mo bathong ba ba phuthegileng,+

E bile a ba mmake mo gare* ga bagolwane.

33 O fetola dinoka gore e nne sekaka

Le metswedi ya metsi gore e nne mmu o o omileng,+

34 O fetola lefatshe le le ungwang gore e nne naga e e letswai,+

Ka ntlha ya bosula jo bo bogolo jwa ba ba nnang mo go lone.

35 O fetola sekaka gore e nne megobe ya metsi e e tletseng lotlhaka,

Le naga e e omeletseng gore e nne metswedi ya metsi.+

36 O dira gore ba ba tshwerweng ke tlala ba nne koo,+

Gore ba tle ba age motse o ba ka nnang mo go one.+

37 Ba jala masimo e bile ba lema masimo a morara*+

A a ugwang thata.+

38 O a ba segofatsa ba bo ba oketsega thata;

Ga a letle gore dikgomo tsa bone di fokotsege.+

39 Le fa go ntse jalo, ba boa ba fokotsega ba bo ba kokobediwa

Ka ntlha ya kgatelelo, masetlapelo le khutsafalo.

40 O dira gore batlotlegi ba nyatsege

E bile o dira gore ba kgarakgatshege mo mafelong a a se nang ditsela.+

41 Le fa go ntse jalo, o sireletsa* bahumanegi gore ba se ka ba gatelelwa+

E bile o dira gore ba malapa a bone ba nne bantsi jaaka letsomane.

42 Batho ba ba siameng ba bona seno ba bo ba itumela;+

Mme batho botlhe ba ba sa siamang ba tswala melomo.+

43 Ope fela yo o botlhale o tla ela dilo tseno tlhoko+

E bile o tla sekaseka ka kelotlhoko ditiro tsa ga Jehofa tsa lorato lo lo sa kgaotseng.+