Sefela sa Difela
5 “Ke tsene mo tshingwaneng ya me,+
Wena kgaitsadiaka, monyadiwa wa me.
Ke phuthile borekhu jwa me jo bo nkgang monate* le senkgisamonate sa me.+
Ke jele lomepe lwa me lwa dinotshe le tswina ya me ya dinotshe;
Ke nole beine ya me le mashi a me.”+
“Jang lona ditsala tse di rategang!
Nwang mme lo tagwe ke lorato!”+
2 “Ke robetse, mme pelo ya me yone e tsogile.+
Ke utlwa moratiwa wa me a kokota!”
‘Mpulele tlhe kgaitsadiaka, wena moratiwa wa me,
Leeba la me, motho wa me yo o se nang molato!
Gonne tlhogo ya me e kolobeditswe ke monyo,
Metshopho ya moriri wa me e kolobeditswe ke bongola jwa bosigo.’+
3 Ke apotse seaparo sa me se setelele.
A ke se apare gape?
Ke tlhapile dinao tsa me.
A ke di leswafatse gape?
4 Moratiwa wa me o ne a busetsa seatla sa gagwe morago mo lerobeng la kgoro,
Mme maikutlo a me a ne a fuduega ka ntlha ya gagwe.
5 Ke ne ka tsoga gore ke bulele moratiwa wa me;
Diatla tsa me di ne di rotha borekhu jo bo nkgang monate,
Le menwana ya me e ne e rotha borekhu jo bo nkgang monate jo bo metsi,
Bo rothela mo llokong.
6 Ke ne ka bulela moratiwa wa me,
Mme moratiwa wa me o ne a boile, o ne a tsamaile.
Ke ne ka hutsafala fa a ne a tsamaya.*
Ke ne ka mmatla, mme ga ke a ka ka mmona.+
Ke ne ka mmitsa, mme ga a a ka a nkaraba.
7 Balebeledi ba ba tsamayatsamayang ba disitse motse ba ne ba mpona.
Ba ne ba ntitaya, ba nkgobatsa.
Balebeledi ba dipota ba ne ba tsaya kojwana* ya me mo go nna.
8 Ke a lo ikanisa, lona bomorwadia Jerusalema, ka re:
Fa lo bona moratiwa wa me,
Lo mmolelele gore ke a lwala ka ntlha ya lorato.”
9 “Moratiwa wa gago o gaisa banna ba bangwe ka eng,
Wena yo montle thata go gaisa basadi ba bangwe botlhe?
Moratiwa wa gago o gaisa banna ba bangwe ka eng,
Fa o re ikanisa ka tsela e e ntseng jaana?”
10 “Moratiwa wa me o montle e bile o mohibitswana;
O tlhomologile thata mo go ba le dikete di le lesome.
11 Tlhogo ya gagwe ke gauta, gauta e e di gaisang tsotlhe.
Metshopho ya moriri wa gagwe e tshwana le dikala tse di akgegang tsa setlhare sa mokolane,*
Moriri wa gagwe o montsho jaaka legakabe.
12 Matlho a gagwe a tshwana le maeba a a gaufi le metswedi ya metsi,
A a tlhapang mo mashing,
A a ntseng gaufi le mogobe o o penologang.*
13 Marama a gagwe a tshwana le tshingwana ya dinkgisamonate,+
Mekoa ya ditlhatshana tse di nkgang monate.
Molomo wa gagwe ke malômô* a masoma, a a rothang borekhu jo bo nkgang monate jo bo metsi.+
14 Diatla tsa gagwe ke disilendara tsa gauta, tse di tsentsweng leje la kerusolete.
Mpa ya gagwe ke lonaka lwa tlou lo lo phatsimisitsweng lo lo khurumeditsweng ka maje a safire.
15 Maoto a gagwe ke dipilara tsa mmabole tse di tlhomilweng mo metheong e e khuti ya gauta e e di gaisang tsotlhe.
O montle jaaka naga ya Lebanona, ga a gaisiwe ke ope fela jaaka ditlhare tsa masedara.+
Yono ke moratiwa wa me, yono ke mokapelo wa me, lona bomorwadia Jerusalema.”