Lefitiko

23 Jehofa o ne a tswelela a bua le Moshe a re: 2 “Bua le Baiseraele mme o ba reye o re, ‘Meletlo ya dipaka+ ya ga Jehofa e lo tla e bolelang,+ ke dikopano tse di boitshepo. Eno ke meletlo ya me ya dipaka:

3 “‘Lo ka nna lwa dira tiro malatsi a le marataro mme letsatsi la bosupa ke sabata, letsatsi le le kgethegileng la go ikhutsa,+ ke kopano e e boitshepo. Lo se ka lwa dira tiro ya mofuta ope. E nne sabata e e direlwang go tlotla Jehofa gongwe le gongwe kwa lo nnang gone.+

4 “‘Eno ke meletlo ya dipaka ya ga Jehofa, dikopano tse di boitshepo, e lo tla e bolelang ka dinako tse di tlhomilweng tse e tla ketekiwang ka tsone: 5 Mo kgweding ya ntlha, mo letsatsing la bo14 la kgwedi eo,+ ka lotlatlana* ke Tlolaganyo+ ya ga Jehofa.

6 “‘Mo letsatsing la bo15 la kgwedi eo, ke Moletlo wa Senkgwe Se se Se Nang Sebediso o o direlwang Jehofa.+ Lo je senkgwe se se se nang sebediso malatsi a le supa.+ 7 Mo letsatsing la ntlha lo tshware kopano e e boitshepo.+ Lo se ka lwa dira tiro ya mofuta ope e e boima. 8 Mme lo isetse Jehofa setlhabelo se se dirwang ka molelo malatsi a le supa. Go tla nna le kopano e e boitshepo mo letsatsing la bosupa. Lo se ka lwa dira tiro ya mofuta ope e e boima.’”

9 Jehofa o ne a tswelela a bua le Moshe a re: 10 “Bua le Baiseraele mme o ba reye o re, ‘Fa lo setse lo tsene mo lefatsheng le ke le lo nayang, e bile lo setse lo robile thobo ya lone, lo ise ngata ya mabutswapele+ a thobo ya lona kwa moperesiting.+ 11 Mme o tla fokisetsa ngata kwa morago le kwa pele fa pele ga ga Jehofa gore lo amogelwe. Moperesiti a dire seo mo letsatsing le le tlang morago ga Sabata. 12 Mo letsatsing la fa ngata e fokisiwa, lo tshwanetse go tlisa phelefu e potlana e e itekanetseng sentle, e e nang le ngwaga, e le setlhabelo se se fisiwang se se yang kwa go Jehofa. 13 Setlhabelo sa dijo tsa ditlhaka se se ntshiwang le sone e nne bupi jo bo boleta jo bo tlhakantsweng le leokwane jwa selekanyo sa dikilogerama di ka nna pedi,* e le setlhabelo se se dirwang ka molelo se se yang kwa go Jehofa, lonko lo lo itumedisang.* Setlhabelo sa senô se se ntshiwang le sone e nne beine ya selekanyo sa litara e le nngwe.* 14 Ga lo a tshwanela go ja senkgwe sepe, dijo dipe tsa ditlhaka tse di besitsweng kgotsa dijo dipe tsa ditlhaka tse disha go fitlha mo letsatsing leno, go fitlha lo ntshetsa Modimo wa lona setlhabelo seno. Ke molao o o tla nnelang ruri mo dikokomaneng tsotlhe tsa lona gongwe le gongwe kwa lo nnang gone.

15 “‘Lo bale bosabata ba le supa go tloga ka letsatsi le le tlang morago ga Sabata, go tloga ka letsatsi le lo tlisang ngata ya setlhabelo se se fokwang ka lone.+ E nne dibeke tse di feletseng. 16 Lo bale malatsi a le 50+ go fitlha ka letsatsi le le tlang morago ga Sabata wa bosupa, go tswa foo lo isetse Jehofa setlhabelo sa dijo tsa ditlhaka tse disha.+ 17 Go tswa mo mafelong a lo nnang mo go one, lo tlise dilofo tse pedi e le setlhabelo se se fokwang. Di dirwe ka dikilogerama di ka nna pedi* tsa bupi jo bo boleta. Di apewe di na le sebediso,+ e le maungo a a buduleng pele a a yang kwa go Jehofa.+ 18 Mme dilofo tseno lo di ise mmogo le dikwanyana di le supa tse ditonanyana tse di itekanetseng sentle, nngwe le nngwe e na le ngwaga, le powana e le nngwe le diphelefu di le pedi.+ Di tla nna setlhabelo se se fisiwang se se yang kwa go Jehofa mmogo le setlhabelo sa dijo tsa ditlhaka le ditlhabelo tsa senô tse di tsamaisanang le tsone, e le setlhabelo se se dirwang ka molelo sa lonko lo lo itumedisang* lo lo yang kwa go Jehofa. 19 Mme lo tshwanetse go isa potsane e le nngwe e le setlhabelo sa boleo+ le dikwanyana di le pedi tse ditonanyana, nngwe le nngwe e na le ngwaga, e le setlhabelo sa go abelana.+ 20 Moperesiti o tla di fokisetsa kwa morago le kwa pele mmogo le dilofo tse di dirilweng ka maungo a a buduleng pele, e le setlhabelo se se fokwang fa pele ga ga Jehofa, mmogo le dikwanyana tse pedi tse ditonanyana. Di tla nna dilo tse di boitshepo mo go Jehofa gore e nne tsa moperesiti.+ 21 Mo letsatsing leno, lo dire kitsiso+ ya gore lo tla tshwara kopano e e boitshepo. Lo se ka lwa dira tiro ya mofuta ope e e boima. Ke molao o o tla nnelang ruri mo dikokomaneng tsotlhe tsa lona mo mafelong otlhe a lo nnang mo go one.

22 “‘Fa lo roba thobo ya lefatshe la lona, ga lo a tshwanela go roba matlhakore a tshimo ya lona gotlhelele e bile lo se ka lwa sela se se setseng mo thobong ya lona.+ Lo se tlogelele yo o humanegileng*+ le motswakwa.+ Ke nna Jehofa, Modimo wa lona.’”

23 Jehofa o ne a tswelela a bua le Moshe a re: 24 “Bolelela Baiseraele o re, ‘Mo kgweding ya bosupa, mo letsatsing la ntlha la kgwedi, e nne letsatsi le le kgethegileng la go ikhutsa, segopotso se se bontshiwang ka go lediwa ga terompeta,+ kopano e e boitshepo. 25 Lo se ka lwa dira tiro epe e e boima, mme lo isetse Jehofa setlhabelo se se dirwang ka molelo.’”

26 Jehofa o ne a bua gape le Moshe a re: 27 “Le fa go ntse jalo, letsatsi la bolesome la kgwedi eno ya bosupa ke Letsatsi la go Ntsha Ditlhabelo Tsa go Itshwarelwa Maleo.*+ Lo nne le kopano e e boitshepo, mme lo tshwanetse go ipogisa*+ lo bo lo isetse Jehofa setlhabelo se se dirwang ka molelo. 28 Lo se ka lwa dira tiro ya mofuta ope mo go lone letsatsi leno ka gonne ke letsatsi la go kopa gore maleo a lona a itshwarelwe*+ fa pele ga ga Jehofa, Modimo wa lona. 29 Motho ope fela yo o se kitlang a ipogisa* mo letsatsing leno o tla bolawa a tlosiwa mo bathong ba gagabo.+ 30 Mme motho mongwe le mongwe yo o dirang tiro ya mofuta ope mo letsatsing leno ke tla mo nyeletsa. 31 Ga lo a tshwanela go dira tiro ya mofuta ope. Ke molao o o tla nnelang ruri mo dikokomaneng tsotlhe tsa lona gongwe le gongwe kwa lo nnang gone. 32 Ke sabata, letsatsi le le kgethegileng la go ikhutsa, mme lo ipogise+ mo letsatsing la borobongwe la kgwedi eo mo maitseboeng. Lo boloke sabata ya lona go tloga maitseboa go ya maitseboeng.”

33 Jehofa o ne a tswelela a bua le Moshe a re: 34 “Bolelela Baiseraele o re, ‘Mo letsatsing la bo15 la kgwedi eno ya bosupa ke Moletlo wa Diobo* wa malatsi a le supa o o direlwang Jehofa.+ 35 Go tla nna le kopano e e boitshepo mo letsatsing la ntlha mme lo se ka lwa dira tiro epe e e boima. 36 Lo tshwanetse go isetsa Jehofa setlhabelo se se dirwang ka molelo malatsi a le supa. Mo letsatsing la borobedi, lo nne le kopano e e boitshepo+ e bile lo isetse Jehofa setlhabelo se se dirwang ka molelo. Ke kopano e e kgethegileng. Lo se ka lwa dira tiro epe e e boima.

37 “‘Eno ke meletlo ya dipaka+ ya ga Jehofa e lo tshwanetseng go e bolela e le dikopano tse di boitshepo+ gore lo isetse Jehofa setlhabelo se se dirwang ka molelo: setlhabelo se se fisiwang+ le setlhabelo sa dijo tsa ditlhaka+ le ditlhabelo tsa senô+ go ya ka thulaganyo ya letsatsi le letsatsi. 38 Tseno ke tse lo ka di ntshang mo godimo ga tse di ntshiwang ka bosabata ba ga Jehofa,+ le mo godimo ga dimpho+ tsa lona, ditlhabelo tsa lona tsa maikano+ le ditlhabelo tsa lona tse di ntshiwang ka go rata,+ tse lo di nayang Jehofa. 39 Le fa go ntse jalo, mo letsatsing la bo15 la kgwedi ya bosupa, fa lo setse lo phuthile thobo ya masimo a lona, lo keteke moletlo wa ga Jehofa malatsi a le supa.+ Letsatsi la ntlha ke le le kgethegileng la go ikhutsa le letsatsi la borobedi ke le le kgethegileng la go ikhutsa.+ 40 Mo letsatsing la ntlha, lo tla tsaya maungo a ditlhare tse dikgolo, dikala tsa ditlhare tsa mokolane,+ dikala tsa ditlhare tse di tletseng matlhare le ditlhare tsa modibonoka tsa mokgatšha* mme lo itumele+ fa pele ga ga Jehofa, Modimo wa lona, malatsi a le supa.+ 41 Lo o keteke e le moletlo o o direlwang Jehofa malatsi a le supa mo ngwageng.+ Lo o keteke mo kgweding ya bosupa e le molao o o tla nnelang ruri mo dikokomaneng tsotlhe tsa lona. 42 Lo nne mo diobong malatsi a le supa.+ Batho botlhe ba mo lefelong la lona ba nne mo diobong, 43 gore dikokomana tsa lona tse di latelang di tle di itse+ gore ke ne ka dira gore Baiseraele ba nne mo diobong fa ke ne ke ba ntsha kwa lefatsheng la Egepeto.+ Ke nna Jehofa, Modimo wa lona.’”

44 Ka jalo, Moshe o ne a bolelela Baiseraele ka meletlo eno ya dipaka ya ga Jehofa.