Esekiele
19 “O tshwanetse go opela pina ya khutsafalo e e ka ga dikgosana tsa Iseraele 2 o re,
‘Mmago e ne e le eng? E ne e le tau e namagadi mo gare ga ditau.
O ne a botha le ditawana tse di nonofileng* e bile a godisa ditawana tsa gagwe.
3 O ne a godisa nngwe ya ditawana tsa gagwe, mme e ne ya nna tawana e e nonofileng.+
E ne ya ithuta go garolaka se e se tsomileng,
E bile e ne e bolaya le batho.
4 Ditšhaba di ne tsa utlwela ka yone mme di ne tsa e epela khuti di bo di e tshwara,
Mme di ne tsa e isa kwa lefatsheng la Egepeto ka dihuku.+
5 Mmaayone o ne a leta mme la bofelo a lemoga gore ga go na tsholofelo ya gore e tla boa.
Ka jalo, o ne a tsaya tawana e nngwe gape a bo a e dira tawana e e nonofileng.
6 Gape e ne ya tsamayatsamaya mo gare ga ditau mme ya nna tawana e e nonofileng.
E ne ya ithuta go garolaka se e se tsomileng, e bile e ne e bolaya le batho.+
7 E ne ya tsamayatsamaya mo gare ga ditora tsa bone tse di sireletsegileng e bo e senya metse ya bone,
Mo e leng gore modumo wa go kurutla ga yone o ne wa utlwala mo lefatsheng le le kgakgabetseng.+
8 Ditšhaba tse di tswang kwa dikgaolong tse di e dikologileng di ne tsa tla go e tlhasela di bo di tsharololela letlowa la tsone mo godimo ga yone,
Mme e ne ya tshwarwa mo khuting ya tsone.
9 Ba ne ba e tsenya mo hokong ka dihuku ba bo ba e isa kwa kgosing ya Babelona.
Fa ba fitlha koo ba ne ba e tswalela, gore modumo wa yone o se ka wa tlhola o utlwiwa mo dithabeng tsa Iseraele.
10 Mmago o ne a tshwana le morara,*+ o o jadilweng fa metsing.
O ne o ungwa maungo e bile o na le dikala tse dintsi ka ntlha ya metsi a mantsi.
11 O ne wa nna le dikala* tse di nonofileng, tse di neng di ka kgona go nna dithobane* tsa segosi tsa babusi.
O ne wa gola mme wa nna moleele go feta ditlhare tse dingwe,
Mme o ne o bonala sentle ka ntlha ya boleele jwa one le ka ntlha ya go bo dikala tsa one di na le matlhare a mantsi.
12 Le fa go ntse jalo, o ne wa kumolwa ka bogale+ o bo o latlhelwa mo lefatsheng,
Mme phefo ya botlhaba e ne ya omeletsa maungo a one.
Dikala tsa one tse di nonofileng di ne tsa kgaolwa di bo di omelela,+ mme di ne tsa lailwa ke molelo.+
13 Jaanong o jadilwe kwa nageng,
Mo lefatsheng le le se nang metsi, le le nyorilweng.+
14 Molelo o ne wa tswa mo dikaleng* tsa one o bo o laila matlhogela a one le maungo a one,
Mme ga go a ka ga sala kala epe e e nonofileng, le fa e le lore lwa go busa.+
“‘Eo ke pina ya khutsafalo, mme e tla nna pina ya khutsafalo.’”