Duteronome
32 “Sekegang tsebe, lona magodimo, mme ke tla bua,
Mme a lefatshe le utlwe mafoko a molomo wa me.
2 Thuto ya me e tla na jaaka pula;
Mafoko a me a tla rotha jaaka monyo,
Jaaka dipula tsa medupe mo bojannyeng
Le jaaka dipula tse dikgolo mo dimeleng.
3 Gonne ke tla bolela leina la ga Jehofa.+
Buang ka bogolo jwa Modimo wa rona!+
5 Ke bone ba ba dirileng bosula.+
Ga se bana ba gagwe, bogole ke jwa bone.+
Ke kokomana e e sa tlhamalalang le e e sokameng!+
A ga se Rraalona yo o lo bopileng,+
Ene yo o lo dirileng a bo a lo nonotsha gore lo nne setšhaba?
7 Gakologelwang malatsi a bogologolo;
Akanyang ka dingwaga tsa dikokomana tse di fetileng.
Botsa rrago, mme a ka go bolelela;+
Botsa bagolwane ba lona, mme ba tla go itsise.
8 Fa Mogodimodimo a ne a naya ditšhaba boswa jwa tsone,+
Fa a ne a kgaoganya bomorwa Adame,*+
O ne a tlhoma molelwane wa ditšhaba+
Go ya ka palo ya bomorwa Iseraele.+
10 O ne a mo fitlhela mo nageng e e kgakgabetseng,+
Le mo sekakeng se se se nang sepe, se se bokolelang.+
O ne a ema go mo dikologa a mo sireletsa, a mo tlhokomela,+
Mme o ne a mo sireletsa jaaka thaka ya leitlho la gagwe.+
11 Fela jaaka ntsu e fudua sentlhaga sa yone,
E fofafofa fa godimo ga mamphorwana a yone,
E phutholola diphuka tsa yone, e a tsaya,
E a tshola mo dintlheng tsa diphuka tsa yone,+
12 Jehofa a le nosi o ne a nna a mo* etelela pele;+
Go ne go se na modimo o sele yo o neng a na le ene.+
O ne a mo tlamela ka tswina ya dinotshe go tswa mo lefikeng
Le ka leokwane go tswa mo lejeng le le thatathata,
14 Botoro ya motlhape le mashi a letsomane,
Mmogo le dinku tse di di gaisang tsotlhe,*
Le diphelefu tsa kwa Bashana, le diphoko,
15 Fa Jeshurune* a simolola go nona, o ne a tlhanoga mme a raga mong wa gagwe.
O nonne, o mokima, o kgotshe thata.+
Ka jalo, o ne a tlogela Modimo yo o mo dirileng,+
A bo a nyatsa Lefika la poloko ya gagwe.
16 Ba ne ba mo galefisa ka go direla medimo e sele;+
Ba ne ba mo kgopisa ka go dira dilo tse di makgapha.+
17 Ba ne ba ntshetsa madimona ditlhabelo, e seng Modimo,+
Ba di ntshetsa medimo e ba neng ba sa e itse,
E mesha e e neng e tlile bosheng,
Medimo e borraalonamogolo ba neng ba sa e itse.
18 O ne wa lebala Lefika,+ yo o neng a nna rrago,
Mme ga o a ka wa gakologelwa Modimo yo o neng a go tshola.+
19 E rile Jehofa a bona seno, o ne a ba latlha+
Ka gonne bomorwawe le bomorwadie ba ne ba mo kgopisa.
20 Ka jalo o ne a re, ‘Ke tla ba fitlhela sefatlhego sa me;+
Ke tla bona gore ba tla felela kae.
21 Ba ntlhotlheleditse gore ke galefe* ka go direla se e seng modimo;+
Ba ne ba nkgopisa ka medingwana ya bone e e se nang mosola.+
Ka jalo, ke tla dira gore ba fufege ka batho ba ba se nang mosola;+
Ke tla ba kgopisa ka setšhaba se se seng botlhale.+
22 Gonne bogale jwa me bo tlhoseditse molelo+
O o tla tukang go fitlha kwa teng ga Lebitla,*+
Mme o tla laila lefatshe le se se tlhogileng mo go lone
E bile o tla tshuba metheo ya dithaba.
23 Ke tla oketsa masetlapelo a bone;
Ke tla dirisa metswi ya me yotlhe mo go bone.
24 Ba tla felelwa ke maatla ka ntlha ya tlala+
E bile ba tla jewa ke letshoroma le le fisang le tshenyo e e botlhoko.+
Ke tla ba romelela dibatana gore di ba lome+
Le digagabi tsa lorole tse di botlhole gore di ba lome.
25 Kwa ntle, tšhaka e tla ba amoga bana;+
Mo teng ga matlo a bone, ke letshogo fela,+
Le le tla tlelang lekau le kgarebane,
Losea mmogo le monna wa moriri o mosweu.+
26 Nkabo ke rile: “Ke tla ba phatlalatsa;
Ke tla dira gore batho ba se ka ba tlhola ba ba gopola,”
27 Fa ke ne ke sa boifa tsela e mmaba a neng a tla tsiboga ka yone,+
Ka gonne baganetsi ba ne ba ka nna ba tlhaloganya seo ka tsela e sele.+
Ba ne ba ka nna ba re: “Nonofo ya rona e fentse;+
Jehofa ga se ene yo o neng a dira seno sotlhe.”
29 E kete ba ka bo ba le botlhale!+ Ba ne ba tla tlhatlhanya ka seno.+
Ba ne ba tla akanya kafa ba tla felelang ka gone.+
30 Motho a le mongwe o ne a ka lelekisa jang ba ba 1 000,
E bile ba babedi ba ne ba ka lelekisa jang ba ba 10 000?+
Ntle le fa Lefika la bone le ne le ba rekisitse+
E bile Jehofa a ba neetse mo go bone.
31 Gonne lefika la bone ga le tshwane le Lefika la rona,+
Tota le baba ba rona ba tlhalogantse seno.+
32 Gonne morara wa bone o tswa kwa Sodoma
Le kwa masimong a Gomora.+
Morara wa bone ke morara wa botlhole,
E bile o bogalaka.+
33 Beine ya bone ke botlhole jwa dinoga,
Botlhole jo bo kotsi jwa dikake.
34 Ditiro tsotlhe tsa bone ke di bolokile fa go nna,
Ke di tswaletse mo mabolokelong a me.+
35 Ke tla busolosa, e bile ke tla duela,+
Ka nako e e tlhomilweng fa lonao lwa bone lo relela,+
Gonne letsatsi la masetlapelo a bone le gaufi,
Mme se se ba letetseng se tla tla ka bonako.’
Fa a bona gore maatla a bone a fokotsegile,
Le gore go setse fela ba ba sa kgoneng go itshireletsa le ba ba bokoa.
37 Go tswa foo o tla re, ‘E kae medimo ya bone,+
Lefika le ba neng ba batlile botshabelo mo go lone,
38 E e neng e tle e je mafura a ditlhabelo tsa bone,*
E nwe beine ya ditlhabelo tsa bone tsa senô?+
A e tle go lo thusa.
A e nne lefelo la lona la botshabelo.
Ke a bolaya e bile ke a tshedisa.+
40 Gonne ke tsholeletsa seatla sa me kwa legodimong,
Mme ke a ikana ka re: “Fela jaaka ke tshela ka bosakhutleng,”+
41 Fa ke lootsa tšhaka ya me e e tsabakelang
Mme ke baakanyetsa seatla sa me katlholo,+
Ke tla ipusolosetsa mo baganetsing ba me+
Ke bo ke itefetsa mo go ba ba ntlhoileng.
42 Ke tla dira gore metswi ya me e tagiwe ke madi,
Mme tšhaka ya me e tla ja nama,
Le madi a ba ba bolailweng setlhogo le a batshwarwa,
Le ditlhogo tsa baeteledipele ba mmaba.’
43 Lona ditšhaba, itumeleng le batho ba gagwe,+
Gonne o tla busolosetsa madi a batlhanka ba gagwe,+
Mme o tla ipusolosetsa mo baganetsing ba gagwe+
E bile o tla dira lefatshe la batho ba gagwe boitshepo.”
44 Ka jalo, Moshe o ne a tla mme a bua mafoko otlhe a pina eno batho ba mo reeditse,+ ene le Hoshea*+ morwa Nune. 45 Fa Moshe a sena go bua mafoko ano otlhe le Iseraele yotlhe, 46 o ne a ba raya a re: “Mafoko otlhe a ke lo tlhagisang ka one gompieno lo a tsenye mo pelong,+ gore lo tle lo laele bomorwaalona gore ba diragatse mafoko otlhe a Molao+ ono. 47 Gonne leno ga se lefoko le le se nang mosola mo go lona, mme le raya botshelo+ jwa lona e bile ka lefoko leno lo ka nna lwa tshela lobaka lo loleele mo lefatsheng le lo kgabaganyang Joredane lo ya go le rua.”
48 Jehofa o ne a bua le Moshe mo go lone letsatsi leno a re: 49 “Tlhatlogela mo thabeng eno ya Abarime,+ Thaba ya Nebo,+ e e mo lefatsheng la Moabe, e e lebaganeng le Jeriko mme o lebe lefatshe la Kanana le ke le nayang Baiseraele gore ba le rue.+ 50 Go tswa foo, o tla swela mo thabeng e o tlogang o e palama, mme o tla phuthelwa kwa bathong ba gaeno,* fela jaaka Arone mogoloo a ile a swela mo Thabeng ya Hore+ mme a phuthelwa kwa bathong ba gagabo, 51 ka gonne loobabedi lo ne lwa se ka lwa ikanyega mo go nna fa lo na le Baiseraele kwa metsing a Meriba+ kwa Kadeshe mo nageng ya Tsine, ka gonne lo ne lwa se ka lwa dira gore batho ba Iseraele ba bone gore ke boitshepo.+ 52 O tla bona lefatshe leo o le kgakajana, mme gone ga o kitla o tsena kwa lefatsheng le ke le nayang batho ba Iseraele.”+