Dikgosi wa Ntlha

1 Jaanong Kgosi Dafide o ne a tsofetse+ e bile a na le dingwaga* di le dintsi, mme le fa ba ne ba tle ba mo tlhatlaganyetse dikobo, o ne a sa thuthafale. 2 Ka jalo, batlhanka ba gagwe ba ne ba mo raya ba re: “A wena morena wa me kgosi o batlelwe mosetsana yo e leng kgarebane, mme a go direle e le motlhokomedi wa gago. A robale mo mabogong a gago gore wena morena wa me kgosi o thuthafale.” 3 Ba ne ba batla mosetsana yo montle mo nageng yotlhe ya Iseraele, mme ba ne ba bona Abishage+ wa Moshunema+ ba bo ba mo tlisa kwa kgosing. 4 Mosetsana yoo o ne a le montle fela thata, mme o ne a nna motlhokomedi wa kgosi a bo a mo direla, le fa go ntse jalo, kgosi ga e a ka ya tlhakanela dikobo le ene.

5 Mo nakong eo yotlhe, Adonija+ morwa Hagithe o ne a ikgodisa, a re: “Ke tlile go nna kgosi!” O ne a ipatlela kara le masole a a tsamayang ka dipitse le banna ba le 50 gore ba siane fa pele ga gagwe.+ 6 Le fa go ntse jalo, rraagwe ga a ka a mo kgalemela* a re: “Ke ka ntlha yang fa o dirile selo seno?” Le ene o ne a le montle thata, mme mmaagwe o ne a mo tshotse morago ga ga Abesalome. 7 O ne a buisana le Joabe morwa Seruia le moperesiti Abiathare,+ mme ba ne ba thusa Adonija e bile ba ne ba mo ema nôkeng.+ 8 Le fa go ntse jalo, moperesiti Sadoke,+ Benaia+ morwa Jehoiada, moporofeti Nathane,+ Shimei,+ Rei le batlhabani ba ba maatla ba ga Dafide,+ ba ne ba se ka ba ema Adonija nôkeng.

9 La bofelo Adonija o ne a dira setlhabelo+ sa dinku, dikgomo le diphologolo tse di nonneng go bapa le leje la Sohelethe, le le gaufi le Ene-rogele, mme o ne a laletsa bomorwarraagwe botlhe, bomorwa kgosi, le banna botlhe ba Juda ba e leng batlhanka ba kgosi. 10 Mme o ne a se ka a laletsa moporofeti Nathane, Benaia le batlhabani ba ba maatla, le fa e le Solomone morwarraagwe. 11 Foo Nathane+ o ne a raya mmaagwe Solomone+ e bong Bathe-sheba,+ a re: “A ga o a utlwa gore Adonija+ morwa Hagithe ke kgosi, mme morena wa rona Dafide ga a itse sepe ka gone? 12 Jaanong, tsweetswee tlaa mme ke go gakolole, gore o tle o falotse botshelo jwa gago le botshelo jwa ga morwao Solomone.+ 13 Tsamaya o ye kwa go Kgosi Dafide mme o mo reye o re, ‘A e ne e se wena morena wa me kgosi, yo o neng wa ikanela lelata la gago, wa re: “Morwao Solomone o tla nna kgosi morago ga me, e bile ke ene yo o tla nnang mo setulong sa me sa bogosi”?+ Jaanong ke ka ntlha yang fa Adonija e le kgosi?’ 14 Fa o sa ntse o le foo o bua le kgosi, ke tla tsena morago ga gago ke bo ke bolelela kgosi gore o bua boammaaruri.”

15 Ka jalo, Bathe-sheba o ne a ya kwa kgosing, a tsena kwa phaposing ya yone ya borobalo. Kgosi e ne e tsofetse thata, mme Abishage+ wa Moshunema o ne a direla kgosi. 16 Foo Bathe-sheba o ne a ikoba mme a obama fa kgosing, mme kgosi e ne ya re: “O kopa eng?” 17 O ne a araba a re: “Morena wa me, o ne wa ikanela nna lelata la gago ka Jehofa, Modimo wa gago wa re, ‘Morwao Solomone o tla nna kgosi morago ga me, e bile ke ene yo o tla nnang mo setulong sa me sa bogosi.’+ 18 Jaanong Adonija ke kgosi, mme wena morena wa me kgosi ga o itse sepe ka gone.+ 19 O ntshitse setlhabelo sa dipoo, diphologolo tse di nonneng le dinku tse dintsi thata mme o laleditse bomorwa kgosi botlhe le moperesiti Abiathare le Joabe molaodi wa masole;+ le fa go ntse jalo, ga a laletsa motlhanka wa gago e bong Solomone.+ 20 Mme jaanong, morena wa me kgosi, matlho a Iseraele yotlhe a mo go wena gore o ba bolelele gore ke mang yo o tla nnang mo setulong sa bogosi morago ga gago, morena wa me kgosi. 21 Go seng jalo, fela fa wena morena wa me kgosi o swa jaaka borragomogolo, nna le morwaake Solomone re tla tsewa re le batsietsi.”

22 Mme fa a sa ntse a bua le kgosi, moporofeti Nathane o ne a goroga.+ 23 Ka yone nako eo, kgosi e ne ya bolelelwa jaana: “Moporofeti Nathane ke yo.” O ne a tla fa pele ga kgosi a bo a obama fa kgosing sefatlhego sa gagwe se lebile fa fatshe. 24 Go tswa foo, Nathane o ne a re: “Morena wa me kgosi, a o ne wa re, ‘Adonija o tla nna kgosi morago ga me, e bile ke ene yo o tla nnang mo setulong sa me sa bogosi’?+ 25 Gonne gompieno o ile go ntsha setlhabelo+ sa dipoo, diphologolo tse di nonneng le dinku tse dintsi, mme o laleditse bomorwa kgosi botlhe le balaodi ba masole le moperesiti Abiathare.+ Ba na le ene koo, ba a ja e bile ba a nwa mme ba ntse ba re, ‘A Kgosi Adonija a tshele lobaka lo loleele!’ 26 Mme ga a laletsa nna, motlhanka wa gago, kgotsa moperesiti Sadoke kgotsa Benaia+ morwa Jehoiada kgotsa motlhanka wa gago Solomone. 27 Morena wa me kgosi, a o letleletse seno o sa mpolelela gore ke mang yo o tshwanetseng go nna mo setulong sa bogosi morago ga gago?”

28 Jaanong Kgosi Dafide o ne a araba a re: “Mpiletsang Bathe-sheba.” Foo o ne a tsena mme a ema fa pele ga kgosi. 29 Go tswa foo, kgosi e ne ya ikana ya re: “Ke ikana ka Jehofa Modimo yo o tshelang, ene yo o nkgolotseng mo matshwenyegong otlhe,+ 30 fela jaaka ke ne ka go ikanela ka Jehofa, Modimo wa Iseraele ka re, ‘Morwao Solomone o tla nna kgosi morago ga me, e bile ke ene yo o tla nnang mo setulong sa me sa bogosi mo boemong jwa me!’ seo ke sone se ke tla se diragatsang mo letsatsing leno.” 31 Foo Bathe-sheba o ne a ikoba sefatlhego sa gagwe se lebile fa fatshe mme a obama fa pele ga kgosi a re: “E kete morena wa me Kgosi Dafide a ka tshela ka bosakhutleng!”

32 Ka yone nako eo, Kgosi Dafide o ne a re: “Mpiletsang moperesiti Sadoke, moporofeti Nathane le Benaia+ morwa Jehoiada.”+ Ka jalo, ba ne ba tla fa pele ga kgosi. 33 Kgosi e ne ya ba raya ya re: “Tsamayang le batlhanka ba morena wa lona, mme lo pege morwaake Solomone mo mmoulong+ wa me lo bo lo mo isa kwa Gihone.+ 34 Moperesiti Sadoke le moporofeti Nathane ba tla mo tlotsa+ gone koo gore a nne kgosi ya Iseraele; go tswa foo lo letse lonaka mme lo re, ‘A Kgosi Solomone a tshele lobaka lo loleele!’+ 35 Go tswa foo, lo tle lo mo setse morago, mme o tla tla a bo a nna mo setulong sa me sa bogosi; mme o tla nna kgosi mo boemong jwa me, e bile ke tla mo tlhoma gore a nne moeteledipele mo Iseraele le mo Juda.” 36 Ka yone nako eo, Benaia morwa Jehoiada o ne a raya kgosi a re: “Amen! E kete Jehofa, Modimo wa morena wa me kgosi a ka tlhomamisa gore seo se a direga. 37 E kete Jehofa a ka nna le Solomone fela jaaka a ne a na le wena morena wa me kgosi,+ mme e kete Modimo a ka dira gore setulo sa gagwe sa bogosi se nne segolo go feta setulo sa bogosi sa morena wa me Kgosi Dafide.”+

38 Go tswa foo, moperesiti Sadoke, moporofeti Nathane, Benaia+ morwa Jehoiada le Bakeretha le Bapelethe+ ba ne ba tsamaya mme ba pega Solomone mo mmoulong wa ga Kgosi Dafide,+ mme ba ne ba mo isa kwa Gihone.+ 39 Jaanong moperesiti Sadoke o ne a ntsha lonaka lwa leokwane+ mo tenteng+ a bo a tlotsa Solomone,+ mme ba ne ba letsa lonaka, mme batho botlhe ba goa ba re: “A Kgosi Solomone a tshele lobaka lo loleele!” 40 Morago ga moo, batho botlhe ba ne ba mo sala morago mme ba tlhatloga ba ntse ba letsa difulutu e bile ba itumetse thata, mo lefatshe le neng la tshikinyega ka ntlha ya modumo wa bone.+

41 Adonija le botlhe ba a neng a ba laleditse ba ne ba utlwa modumo oo fa ba sena go ja.+ Fela fa Joabe a utlwa modumo wa lonaka, o ne a re: “Goreng go na le modumo o mogolo jaana mo motseng?” 42 Fa a sa ntse a bua, Jonathane+ morwa moperesiti Abiathare o ne a goroga. Foo Adonija o ne a re: “Tsena, ka gonne o monna yo o molemo,* mme o tshwanetse wa bo o tlisitse dikgang tse di molemo.” 43 Le fa go ntse jalo, Jonathane o ne a araba Adonija a re: “Nnyaa! Morena wa rona Kgosi Dafide o dirile Solomone kgosi. 44 Kgosi e ne ya laela gore moperesiti Sadoke, moporofeti Nathane, Benaia morwa Jehoiada le Bakeretha le Bapelethe ba tsamaye le ene, mme ba ne ba dira gore a palame mmoulo wa kgosi.+ 45 Go tswa foo, moperesiti Sadoke le moporofeti Nathane ba ne ba mo tlotsa kwa Gihone gore a nne kgosi. Morago ga moo, ba ne ba tswa koo ba itumetse, mme jaanong go na le modumo o mogolo mo motseng. Ke one modumo o lo neng lwa o utlwa. 46 Mo godimo ga moo, Solomone o ntse mo setulong sa bogosi. 47 Gape batlhanka ba kgosi ba ne ba tla go akgola morena wa rona Kgosi Dafide ba re, ‘E kete Modimo wa gago a ka dira gore leina la ga Solomone le tume go feta leina la gago, mme e kete a ka dira gore setulo sa gagwe sa bogosi se nne segolo go feta setulo sa gago sa bogosi!’ Foo kgosi e ne ya ikoba e le mo bolaong. 48 Mme gape kgosi e ne ya re, ‘E kete Jehofa, Modimo wa Iseraele a ka bakwa, yo gompieno a ntshitseng mongwe gore a nne mo setulong sa me sa bogosi e bile a letlile gore matlho a me a bone seo!’ ”

49 Mme botlhe ba Adonija a neng a ba laleditse ba ne ba tshoga, mme mongwe le mongwe wa bone o ne a ema a tswa ka tsela ya gagwe. 50 Adonija le ene o ne a boifa ka ntlha ya ga Solomone, ka jalo o ne a ema mme a tsamaya a ya go tshwara dinaka tsa sebeso.+ 51 Solomone o ne a begelwa jaana: “Adonija o boifa Kgosi Solomone; mme o tshwere dinaka tsa sebeso, a re, ‘A Kgosi Solomone a inkanele pele gore ga a kitla a bolaya motlhanka wa gagwe ka tšhaka.’” 52 Foo Solomone o ne a re: “Fa a itshwara ka tsela e e siameng, ga go na moriri ope wa gagwe o o tla welang fa fatshe; mme fa go fitlhelwa se se bosula mo go ene,+ o tla tshwanelwa ke go swa.” 53 Ka jalo, Kgosi Solomone o ne a laela gore a ye go tsewa kwa sebesong. Mme o ne a tla a bo a ikoba fa pele ga ga Kgosi Solomone, morago ga moo Solomone o ne a mo raya a re: “Ya kwa ntlong ya gago.”