Bakorintha wa Ntlha

12 Jaanong bakaulengwe, ke batla gore lo nne le kitso ka dimpho tse di tswang kwa Modimong.+ 2 Lo a itse gore pele lo nna Bakeresete, lo ne lwa faposiwa ka ditsela di le dintsi gore lo obamele medingwana e e sa bueng.+ 3 Ka jalo, ke batla gore lo itse gore ga go na ope yo o ka tlhotlhelediwang ke moya wa Modimo go bua jaana: “Jesu o hutsitswe!” e bile ga go na ope yo o ka reng: “Jesu ke Morena!” fa a sa tlhotlhelediwe ke moya o o boitshepo.+

4 Jaanong go na le dimpho tse di farologaneng, mme moya o le mongwe fela ke one o o dirang gore di nne teng;+ 5 gape mo tirong ya Modimo go na le ditiro tse dintsi,+ mme tsotlhe di direlwa Morena a le mongwe fela; 6 e bile go na le ditiro tse di farologaneng, le fa go ntse jalo ke Modimo a le mongwe fela yo o dirang gore batho ba dire ditiro tseno tsotlhe.+ 7 Le fa go ntse jalo, tsela e moya o o boitshepo o thusang ka yone e bonala mo go mongwe le mongwe, mme Modimo ke ene a ba o nayang gore o solegele batho botlhe molemo.+ 8 Moya o thusa motho yo mongwe gore a bue ka* botlhale, mme one moya oo o thusa yo mongwe gore a bue se batho ba bangwe ba sa se itseng, 9 one moya oo o thusa motho yo mongwe gore a nne le tumelo,+ mme gape o thusa yo mongwe gore a kgone go fodisa,+ 10 yo mongwe gore a kgone go dira ditiro tse di maatla,+ yo mongwe gore a kgone go porofeta, yo mongwe gore a kgone go lemoga gore a mafoko mangwe a tswa kwa Modimong kgotsa nnyaa,+ yo mongwe gore a bue dipuo tse di farologaneng,+ mme yo mongwe a ranolele mo dipuong tse di farologaneng.+ 11 Ditiro tseno tsotlhe di dirwa ke moya o le mongwe fela, mme o abela mongwe le mongwe dilo tse di farologaneng fela jaaka o rata.

12 Mmele o mongwe fela mme o na le dikarolo di le dintsi. Le fa dikarolo tsotlhe tsa mmele oo di le dintsi, mmele one o mongwe,+ ka jalo Keresete le ene o ntse jalo. 13 Gonne rotlhe re ne ra kolobediwa ka moya o le mongwe gore re nne mmele o le mongwe, e ka tswa re le Bajuda kgotsa Bagerika, makgoba kgotsa ba ba gololesegileng, mme rotlhe re ne ra amogela moya o le mongwe.

14 Gonne eleruri mmele o na le dikarolo di le dintsi.+ 15 Fa lonao lo ka re, “E re ka ke se seatla, ga ke karolo ya mmele,” seo ga se dire gore lo se ka lwa nna karolo ya mmele. 16 Mme fa tsebe e ka re: “E re ka ke se leitlho, ga ke karolo ya mmele,” seo ga se dire gore e se ka ya nna karolo ya mmele. 17 Fa mmele otlhe o ka bo e le leitlho, re ne re tla utlwa ka eng? Fa mmele otlhe o ka bo e le tsebe, re ne re tla dupa ka eng? 18 Mme jaanong Modimo o rulagantse karolo nngwe le nngwe ya mmele jaaka a batla.

19 Fa dikarolo tsotlhe tsa mmele di ka bo di tshwana, mmele o ka bo o ntse jang? 20 Le fa go ntse jalo, dikarolo tsa mmele di dintsi, mme mmele o mongwe. 21 Leitlho ga le ka ke la raya seatla la re, “Ga ke go tlhoke,” e bile tlhogo ga e ka ke ya raya dinao ya re, “Ga ke lo tlhoke.” 22 Go na le moo, dikarolo tsa mmele tse di lebegang di se botlhokwa di a tlhokega, 23 le dikarolo tsa mmele tse re akanyang gore di a nyatsega, re a di tlhokomela,+ e bile dikarolo tsa rona tsa mmele tse di seng dintle, re a di kgabisa, 24 mme dikarolo tsa rona tse dintle tsone ga di tlhoke go kgabisiwa. Le fa go ntse jalo, Modimo o ne a bopa mmele jalo, a naya karolo ya mmele e e neng e sa tlotlege, tlotlo e kgolo thata, 25 gore mmele o se ka wa kgaogana, mme dikarolo tsa one di tlhokomelane.+ 26 Fa karolo nngwe ya mmele e boga, dikarolo tse dingwe tsotlhe di boga le yone;+ kgotsa fa karolo nngwe ya mmele e galalediwa, dikarolo tse dingwe tsotlhe di itumela le yone.+

27 Jaanong lo mmele wa ga Keresete,+ mme mongwe le mongwe wa lona ke karolo ya mmele wa gagwe.+ 28 Le fa go ntse jalo, Modimo o neile batho dikabelo tse di farologaneng mo phuthegong: ba ntlha gore e nne baaposetoloi;+ ba bobedi gore e nne baporofeti;+ ba boraro gore e nne barutisi;+ go tswa foo o ne a naya ba bangwe kabelo ya go dira ditiro tse di maatla;+ a naya ba bangwe dimpho tsa go fodisa;+ tsa go thusa ba bangwe; tsa go etelela ba bangwe pele;+ ba bangwe bokgoni jwa go bua dipuo tse di farologaneng.+ 29 A batho botlhe ke baaposetoloi? A botlhe ke baporofeti? A botlhe ke barutisi? A botlhe ba dira ditiro tse di maatla? 30 A botlhe ba na le dimpho tsa go fodisa? A botlhe ba bua dipuo tse di farologaneng?+ A botlhe ke baranodi?+ 31 Mme nnang lo lwele go nna le* dimpho tse di botlhokwa go feta tseno.+ Le fa go ntse jalo, ke tla lo bontsha sengwe se se di gaisang tsotlhe.+