Baatlhodi

3 Tseno ke ditšhaba tse Jehofa a neng a di letla gore di tswelele di le teng, gore di leke batho botlhe ba Iseraele ba ba neng ba ise ba lwe dintwa dipe tsa Kanana+ 2 (seno e ne e le gore dikokomana tse di latelang tsa Baiseraele di tle di lebane le ntwa, dikokomana tse di neng di ise di tsamaye di diragalelwe ke dilo tse di ntseng jalo): 3 babusi ba batlhano ba Bafilisitia+ le Bakanana botlhe, Basidona+ le Bahife+ ba ba nnang mo Thabeng ya Lebanona+ go simologa kwa Thabeng ya Baale-heremone go ya go fitlha kwa Lebo-hamathe.*+ 4 Ba ne ba nna didirisiwa tsa go leka Baiseraele go bona gore a ba ne ba tla ikobela ditaelo tsa ga Jehofa tse a neng a di neile borraabone ka Moshe.+ 5 Ka jalo, Baiseraele ba ne ba nna le Bakanana,+ Bahite, Baamore, Baperise, Bahife le Bajebuse. 6 Ba ne ba nyala bomorwadia ditšhaba tseo e bile bomorwadiabone ba ne ba ba nyadisa bomorwa ditšhaba tseo, mme ba ne ba simolola go direla medimo ya tsone.+

7 Ka jalo, Baiseraele ba ne ba dira se se bosula mo matlhong a ga Jehofa e bile ba ne ba lebala Jehofa, Modimo wa bone mme ba ne ba direla Bobaale+ le dikota tse di boitshepo.*+ 8 Foo bogale jwa ga Jehofa bo ne jwa tukela Baiseraele, mme o ne a ba tsenya* mo seatleng sa ga Kushane-rishathaime kgosi ya Mesopotamia.* Baiseraele ba ne ba direla Kushane-rishathaime dingwaga di le robedi. 9 Fa Baiseraele ba ne ba kopa thuso kwa go Jehofa,+ Jehofa o ne a naya Baiseraele+ mmoloki gore a ba golole, e bong Otheniele+ morwa wa ga monnawe Kalebe yo o bidiwang Kenase. 10 Moya wa ga Jehofa o ne wa tla mo go ene,+ mme a nna moatlhodi wa Iseraele. E rile a tswa a ya tlhabanong, Jehofa a tsenya Kushane-rishathaime kgosi ya Mesopotamia* mo seatleng sa gagwe mo a neng a fenya Kushane-rishathaime. 11 Morago ga moo, lefatshe le ne la nna mo kagisong dingwaga di le 40. Go tswa foo, Otheniele morwa Kenase o ne a swa.

12 Mme Baiseraele ba ne ba simolola go dira se se bosula gape mo matlhong a ga Jehofa.+ Ka jalo, Jehofa o ne a letla Egelone kgosi ya Moabe+ gore a fenye Iseraele, ka gonne ba ne ba dira se se bosula mo matlhong a ga Jehofa. 13 Mo godimo ga moo, o ne a ba tlisetsa Baamone+ le Baamaleke.+ Ba ne ba tlhasela Baiseraele ba bo ba gapa motse wa ditlhare tsa mokolane.+ 14 Baiseraele ba ne ba direla Egelone kgosi ya Moabe dingwaga di le 18.+ 15 Morago ga moo, Baiseraele ba ne ba kopa thuso kwa go Jehofa,+ ka jalo Jehofa o ne a ba naya mmoloki,+ Ehude+ morwa Gera, Mobenjamine+ yo o neng a dirisa letsogo la molema.+ Fa nako e ntse e tsamaya, Baiseraele ba ne ba mo roma gore a ise sehuba* kwa go Egelone kgosi ya Moabe. 16 Mo nakong eo, Ehude o ne a itirela tšhaka e e magale mabedi, e e boleele jwa kubita* a bo a e gatlha ka fa tlase ga seaparo sa gagwe mo seropeng sa moja. 17 Go tswa foo, o ne a naya Egelone kgosi ya Moabe sehuba. Egelone e ne e le monna yo mokima thata.

18 Fa Ehude a sena go ntsha sehuba, o ne a tsamaya le batho ba ba neng ba tlile ba tshotse sehuba. 19 Mme fa ba sena go goroga fa ditshwantshong tse di betlilweng* kwa Gilegala,+ ene o ne a boela kwa kgosing mme a mo raya a re: “Kgosi, ke go tshwaretse molaetsa wa sephiri.” Ka jalo, kgosi e ne ya re: “Re suteleng.” Fa a rialo, batlhokomedi botlhe ba gagwe ba ne ba tswa fa go ene. 20 Ka jalo, Ehude o ne a tla kwa go ene fa a ne a ntse a le nosi mo phaposing ya gagwe e e tsiditsana e e kwa borulelong. Go tswa foo, Ehude o ne a re: “Ke go tshwaretse molaetsa o o tswang kwa Modimong.” Ka jalo, a ema mo setulong sa gagwe sa bogosi. 21 Foo Ehude a somola tšhaka mo seropeng sa gagwe sa moja ka seatla sa molema a bo a tlhaba kgosi mo mpeng ka yone. 22 Fa bogale jwa yone bo sena go tsena, mohinyana wa yone le one o ne wa tsena, mme mafura a ne a khurumetsa bogale jwa yone ka gonne ga a ka a somola tšhaka mo mpeng ya kgosi, mme mantle a ne a tswa. 23 Ehude o ne a tswa fa mathuding,* a tswala dikgoro tsa phaposi e e kwa borulelong a bo a di lotlela. 24 Fa a sena go tsamaya, batlhanka ba kgosi ba ne ba boa mme ba fitlhela dikgoro tsa phaposi e e kwa borulelong di lotletswe. Ka jalo, ba ne ba re: “O tshwanetse a bo a ithoma* mo phaposing e e kwa teng e e tsiditsana.” 25 Ba ne ba nna ba leta go fitlha ba tlhabiwa ke ditlhong, mme fa ba bona gore o ne a sa bule dikgoro tsa phaposi e e kwa borulelong, ba ne ba tsaya selotlolo ba bo ba di bula, mme ba fitlhela morena wa bone a wetse fa fatshe* a sule.

26 Ehude o ne a tshaba fa ba ntse ba diega, mme o ne a feta fa ditshwantshong tse di betlilweng*+ a bo a fitlha kwa Seira a sireletsegile. 27 Fa a goroga, o ne a letsa lonaka+ mo kgaolong e e dithaba ya Eferaime;+ mme Baiseraele ba ne ba tswa mo kgaolong e e dithaba, ene a le kwa pele ga bone. 28 Go tswa foo, o ne a ba raya a re: “Ntshalang morago, ka gonne Jehofa o tsentse baba ba lona, Bamoabe, mo seatleng sa lona.” Ka jalo, ba ne ba mo sala morago ba bo ba gapa karolo e batho ba kgabaganyang Joredane mo go yone gore Bamoabe ba se ka ba sia, mme ba ne ba se ka ba letla ope go kgabaganya. 29 Ka nako eo, ba ne ba kgemetha Bamoabe ba ka nna 10 000,+ banna botlhe ba ba nonofileng le ba ba diganka; ga go a ka ga falola ope wa bone.+ 30 Ka jalo, Iseraele o ne a fenya Moabe mo letsatsing leo; mme lefatshe le ne la nna mo kagisong* dingwaga di le 80.+

31 Morago ga gagwe go ne ga tla Shamegare+ morwa Anathe, yo o neng a bolaya banna ba Bafilisitia ba le 600+ ka setlhabo*+ sa dikgomo le ene o ne a boloka Iseraele.