Ditiragalo wa Bobedi
8 Kwa bokhutlong jwa dingwaga di le 20, tse mo go tsone Solomone a agileng ntlo ya ga Jehofa le ntlo ya kgosi,*+ 2 Solomone o ne a aga sesha metse e Hirame+ a neng a e mo neile a bo a baya Baiseraele* mo go yone. 3 Mo godimo ga moo, Solomone o ne a ya go tlhabana le Hamathe-soba a bo a e gapa. 4 Morago ga moo, o ne a aga sesha Tadamore mo nageng le metse yotlhe ya mabolokelo+ e a neng a e agile kwa Hamathe.+ 5 Gape o ne a aga sesha Bethe-horona yo o Kwa Godimo+ le Bethe-horona yo o Kwa Tlase,+ metse e e sireletsegileng e e nang le dipota, ditswalo le mephakalego, 6 le Baalathe+ mmogo le metse yotlhe ya mabolokelo a ga Solomone, metse yotlhe ya dikara,+ metse ya masole a a tsamayang ka dipitse le sengwe le sengwe se Solomone a neng a eleditse go se aga mo Jerusalema, mo Lebanona le mo lefatsheng lotlhe le a neng a le busa.
7 Mme batho botlhe ba ba neng ba setse ba Bahite, ba Baamore, ba Baperise, ba Bahife le ba Bajebuse,+ ba e neng e se karolo ya Baiseraele,+ 8 ditlogolwana tsa bone tse di neng di setse mo lefatsheng, tse Baiseraele ba neng ba sa di fedisa,+ Solomone o ne a di tlhopha gore di mmerekele e le makgoba go tla go fitlha mo letsatsing leno.+ 9 Le fa go ntse jalo, Solomone ga a ka a dira Baiseraele bape makgoba mo tirong ya gagwe,+ ka gonne e ne e le batlhabani ba gagwe, balaodi ba badiredibagolo ba masole a gagwe le balaodi ba bakgweetsi ba gagwe ba dikara le ba masole a a tsamayang ka dipitse.+ 10 Go ne go na le balaodi ba bathusi ba ga Kgosi Solomone ba le 250, e leng balebedi ba ba okametseng batho.+
11 Gape Solomone o ne a ntsha morwadia Faro+ mo Motseng wa ga Dafide a mo isa kwa ntlong e a neng a e mo agetse,+ ka gonne o ne a re: “Le fa gone e le mosadi wa me, ga a tshwanela go nna mo ntlong ya ga Kgosi Dafide wa Iseraele, ka gonne mafelo a Letlole la ga Jehofa le tlileng mo go one a boitshepo.”+
12 Go tswa foo, Solomone o ne a ntshetsa Jehofa ditlhabelo tse di fisiwang+ mo sebesong+ sa ga Jehofa se a neng a se agile fa pele ga mathudi.+ 13 O ne a latela thulaganyo ya letsatsi le letsatsi mme o ne a ntsha ditlhabelo go ya ka taelo ya ga Moshe e e buang ka Bosabata,+ bongwedi ba basha+ le meletlo e e tlhomilweng e e tshwarwang gararo ka ngwaga,+ e leng Moletlo wa Senkgwe Se se Se Nang Sebediso,+ Moletlo wa Dibeke+ le Moletlo wa Diobo.*+ 14 Mo godimo ga moo, o ne a tlhoma ditlhopha tsa baperesiti+ gore ba dire ditiro tsa bone go ya ka taelo ya ga rraagwe e bong Dafide, a tlhoma le Balefi mo maemong a ba direlang mo go one, gore ba bake+ Modimo le gore ba direle ba na le baperesiti go ya ka thulaganyo ya letsatsi le letsatsi, le balebedi ba dikgoro go ya ka ditlhopha tsa bone mo dikgorong tse di farologaneng,+ ka gonne eo e ne e le taelo ya ga Dafide, monna wa Modimo wa boammaaruri. 15 Mme ga ba a ka ba fapoga taelo e kgosi e neng e e laetse baperesiti le Balefi ka kgang epe kgotsa ka mabolokelo. 16 Ka jalo, tiro yotlhe ya ga Solomone e ne e rulagantswe sentle* go simologa ka letsatsi le motheo wa ntlo ya ga Jehofa o neng wa thaiwa+ ka lone go fitlha e wediwa. Ka jalo, ntlo ya ga Jehofa e ne ya wediwa.+
17 Ke ka yone nako eo mo Solomone a neng a ya kwa Esione-gebere+ le kwa Elothe+ mo losing lwa lewatle kwa lefatsheng la Edoma.+ 18 Hirame+ o ne a mo romelela dikepe le batsamaisi ba dikepe ba ba nang le maitemogelo a dirisa batlhanka ba gagwe. Ba ne ba tsamaya le batlhanka ba ga Solomone kwa Ofire+ mme ba tsaya ditalenta* tsa gauta+ di le 450 teng ba bo ba di isa kwa go Kgosi Solomone.+