Ditiragalo wa Bobedi

27 Jothame+ o ne a na le dingwaga di le 25 fa a nna kgosi, mme o ne a busa dingwaga di le 16 mo Jerusalema. Leina la ga mmaagwe e ne e le Jerushahe, morwadia Sadoke.+ 2 Jothame o ne a tswelela a dira se se siameng mo matlhong a ga Jehofa, fela jaaka rraagwe e bong Usia a ne a dirile,+ mme ene ga a ka a tsena mo tempeleng ya ga Jehofa+ go sa tshwanela. Le fa go ntse jalo, batho ba ne ba sa ntse ba dira bosula. 3 O ne a aga kgoro e e kwa godimo ya ntlo ya ga Jehofa,+ e bile bontsi jwa tiro ya go aga lobota lwa Ofele+ e ne e dirwa ke ene. 4 Gape o ne a aga metse+ mo kgaolong e e dithaba ya Juda+ a bo a aga mafelo a a sireletsegileng+ le ditora+ mo dikgweng. 5 O ne a tlhabana le kgosi ya Baamone+ mme la bofelo a ba fenya, mme mo ngwageng oo Baamone ba ne ba mo naya ditalenta* tsa selefera di le 100, korong ya dikilogerama di le 1 600 000* le barele* ya dikilogerama di le 1 300 000.* Gape Baamone ba ne ba mo duela ka dilo tseno mo ngwageng wa bobedi le wa boraro.+ 6 Ka jalo, Jothame o ne a nna a nonofa, ka gonne o ne a ikemiseditse go tsamaya mo ditseleng tsa ga Jehofa, Modimo wa gagwe.

7 Mme fa e le pego yotlhe ya botshelo jwa ga Jothame, dintwa tsotlhe tsa gagwe le ditsela tsotlhe tsa gagwe, e kwadilwe mo Bukeng ya Dikgosi Tsa Iseraele le Tsa Juda.+ 8 O ne a na le dingwaga di le 25 fa a nna kgosi, mme o ne a busa dingwaga di le 16 mo Jerusalema.+ 9 Go tswa foo, Jothame o ne a swa jaaka borraagwemogolo, mme ba ne ba mo fitlha mo Motseng wa ga Dafide.+ Mme morwawe e bong Ahase o ne a nna kgosi mo boemong jwa gagwe.+