Samuele wa Ntlha

15 Go tswa foo, Samuele o ne a raya Saulo a re: “Jehofa o ne a nthoma gore ke go tlotse gore o nne kgosi ya batho ba gagwe ba Iseraele;+ jaanong reetsa se Jehofa a tla se buang.+ 2 Seno ke se Jehofa wa masomosomo a se buang: ‘Ke tla ipusolosetsa mo Baamalekeng ka se ba se dirileng Baiseraele fa ba ne ba tswa kwa Egepeto.+ 3 Jaanong tsamaya mme o kgemethe Baamaleke,+ o ba bolaye+ le sotlhe se ba nang le sone. Ga o a tshwanela go tlogela ope wa bone a tshela;* o bolaye+ monna mmogo le mosadi, ngwana mmogo le losea, poo mmogo le nku, kamela mmogo le tonki.’ ”+ 4 Saulo o ne a bitsa batho a bo a ba bala kwa Telaime: E ne e le masole a a tsamayang ka dinao a le 200 000 le banna ba Juda ba le 10 000.+

5 Saulo o ne a tsamaya a ya go fitlha kwa motseng wa Baamaleke mme o ne a tlhoma balaledi fa mokgatšheng.* 6 Go tswa foo, Saulo o ne a raya Bakene+ a re: “Tsamayang, tswang mo Baamalekeng, gore ke se ka ka lo nyeletsa le bone.+ Gonne lo ne lwa bontsha batho botlhe ba Iseraele lorato lo lo sa kgaotseng+ ka nako ya fa ba ne ba tswa kwa Egepeto.” Ka jalo, Bakene ba ne ba tswa mo Baamalekeng. 7 Morago ga moo, Saulo o ne a kgemetha Baamaleke+ go simologa kwa Hafila+ go ya go fitlha kwa Shure,+ e e gaufi le Egepeto. 8 O ne a tshwara Agage+ kgosi ya Baamaleke a tshela, mme gone batho ba bangwe botlhe o ne a ba bolaya ka tšhaka.+ 9 Le fa go ntse jalo, Saulo le batho ba ne ba se ka ba bolaya* Agage le tse di di gaisang tsotlhe tsa letsomane, motlhape, diphologolo tse di nonneng, diphelefu le sotlhe se se neng se le molemo.+ Ba ne ba sa batle go di fedisa. Mme dithoto tsotlhe tse di neng di se na mosola e bile di sa batliwe, tsone ba ne ba di senya.

10 Foo Jehofa o ne a raya Samuele a re: 11 “Ke ikwatlhaela* go bo ke dirile Saulo kgosi, ka gonne o fapogile mo go ntshaleng morago e bile ga a diragatsa mafoko a me.”+ Samuele o ne a utlwa botlhoko thata, mme o ne a rapela Jehofa bosigo jotlhe.+ 12 E rile Samuele a tsoga phakela thata mo mosong gore a ye go kgatlhantsha Saulo, Samuele o ne a bolelelwa jaana: “Saulo o ne a ile kwa Karemele,+ mme fa a le koo o ne a itlhomela sefikantswe.+ Go tswa foo, o ne a boa mme a ya kwa Gilegala.” 13 Fa la bofelo Samuele a tla kwa go ene, Saulo o ne a mo raya a re: “E kete Jehofa a ka go segofatsa. Ke diragaditse lefoko la ga Jehofa.” 14 Le fa go ntse jalo, Samuele o ne a re: “Jaanong modumo ono wa letsomane le wa dikgomo o ke o utlwang ke wa eng?”+ 15 Fa a rialo, Saulo o ne a re: “Di tserwe kwa Baamalekeng, ka gonne batho ba ne ba se ka ba bolaya* tse di di gaisang tsotlhe tsa letsomane le tsa motlhape gore Jehofa, Modimo wa gago a ntshediwe setlhabelo ka tsone; mme gone, se se neng se setse re ne ra se senya.” 16 Foo Samuele o ne a raya Saulo a re: “Iketle! Mma ke go bolelele se Jehofa a se mpoleletseng maabane bosigo.”+ Ka jalo, o ne a mo raya a re: “Bua!”

17 Samuele o ne a tswelela a re: “A o ne o sa itseye o se motho wa sepe+ fa o ne o dirwa tlhogo ya ditso tsa Iseraele le fa Jehofa a ne a go tlotsa gore o nne kgosi mo Iseraele?+ 18 Moragonyana Jehofa o ne a go roma mme a re, ‘Tsamaya, mme o ye go bolaya Baamaleke ba e leng baleofi.+ O tlhabane le bone go fitlha o ba fedisa.’+ 19 Ka jalo, ke ka ntlha yang fa o ile wa se ka wa ikobela lentswe la ga Jehofa? Go na le moo, o ne wa itlhaganelela go gapa dilo ka bogagaru+ mme wa dira se se bosula mo matlhong a ga Jehofa!”

20 Le fa go ntse jalo, Saulo o ne a raya Samuele a re: “Mme ke ikobetse lentswe la ga Jehofa! Ke ne ka ya kwa Jehofa a neng a nthomile gone mme ke tlile le Agage kgosi ya Amaleke e bile ke bolaile Baamaleke.+ 21 Mme batho ba ne ba tsaya dinku le dikgomo mo dilong tse di gapilweng, e leng tse di di gaisang tsotlhe mo go se se neng se tshwanetse go senngwa, gore go ntshediwe Jehofa, Modimo wa gago setlhabelo kwa Gilegala.”+

22 Foo Samuele o ne a re: “Ke eng se se itumedisang Jehofa thata? A ke go ntsha ditlhabelo tse di fisiwang+ kgotsa go ikobela lentswe la ga Jehofa? Go ikoba go botoka go na le setlhabelo+ le go reetsa go botoka go na le mafura+ a diphelefu; 23 ka gonne botlhanogi+ bo tshwana fela le boleo jwa go dira boitseanape,+ mme ditiro tsa boikgodiso di tshwana fela le go dirisa maatla a boselamose le go obamela medingwana.* E re ka o ganne lefoko la ga Jehofa,+ le ene ga a batle gore o tswelele o le kgosi.”+

24 Foo Saulo o ne a raya Samuele a re: “Ke leofile ka gonne ke tlodile taelo ya ga Jehofa le mafoko a gago, ka gonne ke ne ke boifa batho mme ka reetsa se ba neng ba se bua. 25 Tsweetswee, jaanong intshwarele boleo jwa me mme o boe le nna gore ke tle ke ikobe fa pele ga ga Jehofa.”+ 26 Le fa go ntse jalo, Samuele o ne a raya Saulo a re: “Ga nkitla ke boa le wena, ka gonne o ganne lefoko la ga Jehofa, mme Jehofa o go latlhile gore o se ka wa tswelela o le kgosi ya Iseraele.”+ 27 E rile Samuele a retologa gore a tsamaye, Saulo o ne a tshwara momeno wa seaparo sa gagwe se se se nang mabogo, mme se ne sa gagoga. 28 Foo Samuele o ne a mo raya a re: “Jehofa o gagotse bogosi jwa Iseraele mo go wena gompieno, mme o tla bo naya mongwe wa batho ba gaeno yo o botoka mo go wena.+ 29 Mo godimo ga moo, Motlotlegi wa Iseraele+ ga a kitla a itshupa a le maaka+ e bile ga a kitla a fetola mogopolo wa gagwe,* ka gonne Modimo ga se motho gore a ka fetola mogopolo wa gagwe.”*+

30 Fa a rialo, Saulo o ne a re: “Ke leofile. Le fa go ntse jalo, tsweetswee, ntlotle fa pele ga bagolwane ba batho ba gaetsho le fa pele ga Iseraele. Boa le nna, mme ke tla ikoba fa pele ga ga Jehofa, Modimo wa gago.”+ 31 Ka jalo, Samuele o ne a boa a tla a setse Saulo morago, mme Saulo o ne a ikoba fa pele ga ga Jehofa. 32 Mme Samuele o ne a re: “Tlisang Agage kgosi ya Amaleke mo go nna.” Foo Agage o ne a ya kwa go ene a okaoka,* ka gonne Agage o ne a ntse a ipolelela jaana: “Ruri matshosetsi* a loso a fetile.” 33 Le fa go ntse jalo, Samuele o ne a re: “Fela jaaka tšhaka ya gago e amogile basadi bana, mmago le ene e tla nna yo o amogilweng thata mo basading.” Fa Samuele a sena go rialo, o ne a remaganya Agage fa pele ga ga Jehofa kwa Gilegala.+

34 Jaanong Samuele o ne a ya kwa Rama, mme Saulo a tlhatlogela kwa ntlong ya gagwe kwa Gibea wa ga Saulo. 35 Samuele ga a ka a tlhola a bona Saulo gape go fitlha ka letsatsi la loso lwa gagwe, ka gonne Samuele o ne a hutsafaletse Saulo.+ Mme Jehofa o ne a ikwatlhaela go bo a ne a dirile Saulo kgosi ya Iseraele.+