Ditiragalo wa Bobedi

32 Morago ga dilo tseno le ditiro tseno tsa boikanyegi,+ Kgosi Senakeribe wa Asiria o ne a tla mme a tlhasela Juda. O ne a kampa go dikologa metse e e sireletsegileng ka maikaelelo a gore a tsene mo go yone a bo a e gapa.+

2 E rile Hesekia a bona gore Senakeribe o ne a tlile e bile a ikemiseditse go tlhabana le Jerusalema, 3 o ne a buisana le dikgosana tsa gagwe le batlhabani ba gagwe, mme morago ga moo o ne a dira tshwetso ya gore go thibelwe metsi a metswedi e e kwa ntle ga motse,+ mme ba ne ba mo ema nôkeng. 4 Go ne ga phuthiwa batho ba le bantsi, mme ba ne ba thiba metswedi yotlhe le melatswana e e elelang e e mo lefatsheng la bone, ba re: “Ke ka ntlha yang fa dikgosi tsa Asiria di tshwanetse go fitlhela metsi a mantsi fa di tla?”

5 Mo godimo ga moo, o ne a tsosolosa lobota lotlhe lo lo thubegileng a bo a aga ditora mo go lone, mme o ne a aga lobota lo longwe ka kwa ntle ka boikemisetso jo bogolo. Gape o ne a baakanya Thota*+ e e mo Motseng wa ga Dafide, e bile o ne a dira dibetsa* le dithebe di le dintsi. 6 Go tswa foo, o ne a tlhoma balaodi ba masole gore ba okamele batho mme a ba phuthela kwa lefelong le le bulegileng kwa kgorong ya motse a bo a ba kgothatsa* a re: 7 “Nnang pelokgale lo bo lo nonofe. Lo se ka lwa boifisiwa kgotsa lwa tshosiwa ke kgosi ya Asiria+ le batho ba bantsintsi ba ba nang le ene, ka gonne ba ba nang le rona ba bantsi go feta ba ba nang le ene.+ 8 Ene o ikaegile ka maatla a batho,* mme rona re na le Jehofa, Modimo wa rona go re thusa le go tlhabana dintwa tsa rona.”+ Mme batho ba ne ba nonotshiwa ke mafoko ao a ga Kgosi Hesekia wa Juda.+

9 Morago ga seno, fa Kgosi Senakeribe wa Asiria a ne a le kwa Lakishe+ a na le maatla otlhe a gagwe a magolo,* o ne a romela batlhanka ba gagwe kwa Jerusalema kwa go Kgosi Hesekia wa Juda le kwa bathong botlhe ba Judea kwa Jerusalema,+ a re:

10 “Seno ke se Kgosi Senakeribe wa Asiria a se buang, ‘Lo ikantse eng fa lo ntse fela mo Jerusalema mme e dikologilwe?+ 11 A Hesekia ga a lo tsietse le go dira gore lo feleletse lo sule ka ntlha ya tlala le lenyora, a re: “Jehofa, Modimo wa rona o tla re golola mo seatleng sa kgosi ya Asiria”?+ 12 A Hesekia ga se ene a neng a tlosa mafelo a a kwa godimo a a boitshepo+ a Modimo wa lona* le dibeso+ tsa gagwe a bo a raya batho ba Juda le Jerusalema a re: “Lo tshwanetse go ikoba fa pele ga sebeso se le sengwe e bile lo tshwanetse go ntsha ditlhabelo tsa lona mo go sone”?+ 13 A ga lo itse se nna le borremogolo re neng ra se dira ditšhaba tsotlhe tsa mafatshe a mangwe?+ A medimo ya ditšhaba tsa mafatshe ao e ne ya kgona go golola lefatshe la tsone mo seatleng sa me?+ 14 Ke modimo ofe mo medimong yotlhe ya ditšhaba tseno tse borremogolo ba di sentseng o o neng wa kgona go golola batho ba one mo seatleng sa me, mo e leng gore Modimo wa lona a ka kgona go lo golola mo seatleng sa me?+ 15 Jaanong lo se ka lwa letla Hesekia a lo tsietsa kgotsa a lo timetsa ka tsela eno!+ Lo se ka lwa mo dumela, ka gonne ga go na modimo wa setšhaba sepe kgotsa wa bogosi bope yo o neng a kgona go golola batho ba gagwe mo seatleng sa me le mo seatleng sa borraetshomogolo. Ruri Modimo wa lona le ene ga a kitla a kgona go lo golola mo seatleng sa me!’”+

16 Batlhanka ba gagwe ba ne ba nna ba bua dilo tse dingwe tse dintsi tse di tlhapatsang Jehofa, Modimo wa boammaaruri le motlhanka wa gagwe e bong Hesekia. 17 Gape o ne a kwala makwalo+ a tlhapatsa Jehofa, Modimo wa Iseraele+ e bile a mo nyatsa, a re: “Fela jaaka medimo ya ditšhaba tsa mafatshe a mangwe e ne ya palelwa ke go golola batho ba yone mo seatleng sa me,+ Modimo wa ga Hesekia le ene ga a kitla a kgona go golola batho ba gagwe mo seatleng sa me.” 18 Ba ne ba nna ba goela kwa godimo kwa bathong ba Jerusalema ba ba neng ba le mo godimo ga lobota ka puo ya Bajuda, go dira gore ba tshoge ba bo ba rorome, gore ba tle ba gape motse.+ 19 Ba ne ba nyatsa Modimo wa Jerusalema ka tsela e e tshwanang le e ba neng ba nyatsa medimo ya ditšhaba tsa lefatshe ka yone, e e dirilweng ke motho. 20 Mme gone, Kgosi Hesekia le moporofeti Isaia+ morwa Amosi, ba ne ba nna ba rapela ka kgang eno e bile ba goela kwa magodimong ba kopa thuso.+

21 Foo Jehofa o ne a romela moengele mme a kgemetha motlhabani mongwe le mongwe yo o maatla,+ moeteledipele mongwe le mongwe le molaodi mongwe le mongwe mo kampeng ya kgosi ya Asiria, mme Senakeribe o ne a boela kwa lefatsheng la gagwe a tlhabilwe ke ditlhong. Moragonyana o ne a tsena mo ntlong* ya modimo wa gagwe, mme fa a le koo bangwe ba bomorwawe ba ne ba mmolaya ka tšhaka.+ 22 Ka jalo, Jehofa o ne a golola Hesekia le banni ba Jerusalema mo seatleng sa ga Kgosi Senakeribe wa Asiria le mo seatleng sa ba bangwe botlhe mme o ne a ba naya boikhutso mo matlhakoreng otlhe. 23 Mme batho ba le bantsi ba ne ba tlisetsa Jehofa dimpho kwa Jerusalema e bile ba tlisetsa Kgosi Hesekia wa Juda+ dilo tse di di gaisang tsotlhe, mme morago ga moo ditšhaba tsotlhe di ne tsa mo tlotla thata.

24 Mo metlheng eo, Hesekia o ne a lwala mo a neng a le gaufi le go swa, mme o ne a rapela Jehofa,+ yo o neng a mo araba a bo a mo naya sesupo.*+ 25 Mme gone, Hesekia o ne a se ka a lebogela molemo o a neng a o diretswe, ka gonne pelo ya gagwe e ne ya nna mabela, mme a dira gore ene le batho ba Juda le ba Jerusalema ba galefelwe. 26 Le fa go ntse jalo, Hesekia o ne a ikokobetsa mme a tlogela go nna mabela+ ene le banni ba Jerusalema, mme bogale jwa ga Jehofa bo ne jwa se ka jwa tla mo go bone mo motlheng wa ga Hesekia.+

27 Mme Hesekia o ne a nna le dikhumo tse dintsi thata le kgalalelo e kgolo thata;+ o ne a itirela mabolokelo+ a selefera, gauta, maje a a tlhwatlhwakgolo, leokwane la balema, dithebe le a dilwana tsotlhe tse di eletsegang. 28 Gape o ne a dira mafelo a go bolokela thobo ya dijo tsa ditlhaka le beine e ntšha le leokwane, mmogo le masaka a diruiwa tsotlhe tse di farologaneng le masaka a matsomane. 29 Gape o ne a ikagela metse, a nna le diruiwa tse dintsi, matsomane le metlhape e mentsi, ka gonne Modimo o ne a mo neile dithoto di le dintsi thata. 30 Hesekia ke ene yo o neng a thiba motswedi o o kwa godimo wa metsi+ a Gihone+ mme a dira gore a ye kwa bophirima kwa Motseng wa ga Dafide,+ mme Hesekia o ne a atlega mo tirong nngwe le nngwe ya gagwe. 31 Le fa go ntse jalo, fa babueledi ba dikgosana tsa Babelona ba ne ba romilwe go tla go mmotsa ka sesupo*+ se se neng se diragetse mo lefatsheng la gagwe,+ Modimo wa boammaaruri o ne a mo letla gore a itirele tshwetso ka gonne a ne a batla go mo leka,+ gore a tle a itse sotlhe se se neng se le mo pelong ya gagwe.+

32 Mme pego yotlhe ya botshelo jwa ga Hesekia le ditiro tsa gagwe tsa lorato lo lo sa kgaotseng,+ di kwadilwe mo ponatshegelong ya ga moporofeti Isaia,+ morwa Amosi, mo Bukeng ya Dikgosi Tsa Juda le Tsa Iseraele.+ 33 Go tswa foo, Hesekia o ne a swa jaaka borraagwemogolo, mme ba ne ba mo fitlha mo thotaneng e e yang kwa mabitleng a bomorwa Dafide;+ mme batho botlhe ba Juda le banni ba Jerusalema ba ne ba mo fitlha ka tlotlo. Mme morwawe e bong Manase o ne a nna kgosi mo boemong jwa gagwe.