Esekiele

17 Jehofa o ne a bua le nna gape a re: 2 “Morwa motho, tlhaba thamalakane o bo o bue seane ka batho ba Iseraele.+ 3 O re, ‘Seno ke se Morena Molaodimogolo Jehofa a se buang: “Ntsu yo mogolo,+ yo o nang le diphuka tse dikgolo, le dintlha tsa diphuka tse ditelele, e bile a tletse mafofa a a mebalabala, o ne a tla kwa Lebanona+ a bo a tsaya karolo e e kwa godimo ya setlhare sa mosedara.+ 4 O ne a kgetla letlhogela la sone le le kwa godimodimo mme a le isa kwa lefatsheng la bagwebi* a bo a le tlhoma mo motseng wa bagwebi.+ 5 Go tswa foo, o ne a tsaya nngwe ya peo ya lefatshe+ leo a bo a e jala mo tshimong ya mmu o o nonneng. O ne a e jala gaufi le metsi a mantsi jaaka setlhare sa mogokare. 6 Ka jalo, e ne ya tlhoga mme ya nna setlhare sa morara* se se golelang kwa tlase se se namang,+ se matlhare a sone a obegetseng ka fa teng le medi ya sone e golelang ka fa tlase ga sone. Jaanong e ne ya nna setlhare sa morara mme sa tlhagisa matlhogela sa bo sa ntsha dikala.+

7 “‘“Mme go ne ga tla ntsu yo mongwe yo mogolo,+ yo o nang le diphuka tse dikgolo le dintlha tsa diphuka tse dikgolo.+ Foo setlhare seno sa morara se ne sa namela medi ya sone kwa go ene, kgakala le ditshingwana tse se neng se jadilwe mo go tsone, mme se ne sa tsharololela matlhare a sone kwa go ene gore a tle a se nosetse.+ 8 Se ne se setse se jadilwe mo tshimong ya mmu o o nonneng gaufi le metsi a mantsi, gore se tlhagise dikala, se ungwe se bo se nne setlhare se segolo thata sa morara.”’+

9 “Bua o re, ‘Seno ke se Morena Molaodimogolo Jehofa a se buang: “A se tla gola? A mongwe ga a kitla a kgaola medi ya sone+ a bo a dira gore maungo a sone a bole le gore matlhogela a sone a swabe?+ Se tla omelela thata mo e leng gore ga go kitla go tlhokega lebogo le le nonofileng kgotsa batho ba bantsi gore ba se kumole ka medi. 10 Le fa gone se ntshitswe mo lefelong le lengwe se bo se jalwa mo go le sele, a se tla gola? A ga se kitla se omelela fa se fokwa ke phefo ya botlhaba? Se tla omelela mo tshingwaneng e se neng sa tlhoga mo go yone.”’”

11 Mme Jehofa o ne a bua le nna gape a re: 12 “Tsweetswee raya batlhanogi bano o re, ‘A ga lo lemoge gore dilo tseno di kaya eng?’ O ba reye o re, ‘Kgosi ya Babelona e ne ya tla mo Jerusalema mme ya tsaya kgosi ya motse oo le dikgosana tsa yone e bo e tsamaya le bone kwa Babelona.+ 13 Mo godimo ga moo, e ne ya tsaya mongwe wa losika lwa segosi+ mme ya dira kgolagano le ene e bo e dira gore a ikane.+ Go tswa foo, e ne ya tsaya banna ba ba tlotlegang ba lefatshe leo,+ 14 gore bogosi bo tle bo kokobediwe, bo se ka jwa nna maatla gape, gore bo tle bo kgone go tswelela bo le teng fa fela bo boloka kgolagano ya gagwe.+ 15 Le fa go ntse jalo, la bofelo kgosi e ne ya mo tlhanogela+ ka go romela barongwa ba yone kwa Egepeto gore ba ye go tsaya dipitse+ le masole a mantsi.+ A e tla atlega? A motho yo o dirang dilo tseno o tla tlogelwa fela a sa otlhaiwa? A a ka tlola kgolagano e a e dirileng mme a bo a falola?’+

16 “‘“Ke ikana ka nna,” go bua Morena Molaodimogolo Jehofa, “o tla swela kwa Babelona, kwa lefelong le kgosi* e e mo tlhomileng gore a* nne kgosi e nnang kwa go lone, ene yo a neng a nyatsa maikano a gagwe a bo a tlola kgolagano ya gagwe.+ 17 Mme masole a mantsi le mephato e mentsi ya masole a ga Faro ga a kitla a thusa ka sepe kwa ntweng,+ fa go tla bo go dirilwe dithotana le dipota go dikologa motse gore go bolawe batho ba le bantsi. 18 O nyaditse maikano e bile o tlodile kgolagano. O dirile dilo tseno tsotlhe le fa gone a ile a solofetsa,* mme ga a kitla a falola.”’

19 “‘Ka jalo, seno ke se Morena Molaodimogolo Jehofa a se buang: “Ke ikana ka nna, ke tla tlisa mo tlhogong ya gagwe ditlamorago tsa go bo a nyaditse maikano+ a me e bile a tlodile kgolagano ya me. 20 Ke tla tsharololela letlowa la me mo godimo ga gagwe, mme o tla tshwarwa ke letlowa la me la go tsoma.+ Ke tla mo isa kwa Babelona ke bo ke mo atlholela gone koo ka gonne a ile a se ka a ikanyega mo go nna.+ 21 Botlhe ba ba tshabileng mo mephatong ya gagwe ya masole ba tla bolawa ka tšhaka, mme ba ba setseng ba tla gasamela kwa dikarolong tse di farologaneng.*+ Foo lo tla tshwanelwa ke go itse gore nna, Jehofa, ke buile.”’+

22 “‘Seno ke se Morena Molaodimogolo Jehofa a se buang: “Ke tla tsaya letlhogela kwa karolong e e kwa godimo ya setlhare sa mosedara se se goletseng kwa godimo+ ke bo ke le jala, ke tla kgetla letlhogela le lennye kwa godimo ga dikalana tsa sone,+ mme ke tla le jala mo thabeng e e kwa godimo e e tsholetsegileng.+ 23 Ke tla le jala mo thabeng ya Iseraele e e kwa godimo; mme dikala tsa lone di tla gola, e bile le tla tlhagisa maungo le bo le nna mosedara o mogolo thata. Mme dinonyane tsa mofuta mongwe le mongwe di tla nna ka fa tlase ga one e bile di tla nna mo moriting wa dikala tsa one tse di nang le matlhare. 24 Mme ditlhare tsotlhe tsa naga di tla itse gore nna, Jehofa, ke isitse setlhare se se goletseng kwa godimo kwa tlase mme ke tlotlomaditse setlhare se se golelang kwa tlase;+ ke dirile gore setlhare se setala se omelele mme ke dirile gore setlhare se se omeletseng se ntshe malômô.*+ Nna Jehofa, ke buile seno e bile ke se dirile.”’”